Yes Les Mias yug los xyoo 645 ua Yes Xus ntej. Yes Les Mias tuaj tom qab His Xas Lais li 100 xyoo. Nws yug los nyob ib lub zos tsis deb tsis ze Yes Lus Xas Les. Yes Les Mias tsev neeg muaj ntau leej ua Leej Choj tab sis tsis yog Yes Les Mias.
Xyoo 626 Tswv Ntuj hu Yes Les Mias los ua Yaj Saub, thaum ntawd nws muaj 19 xyoos.
Lub caij Yes Les Mias ua Yaj Saub yog lub caij sawv daws mem tau tias Yus Das teb yuav tawg vim cov haiv neeg ua yeeb ncuab txav los ze zuj zus thiab cov vaj Yus Das tsis xyiv fab mloog Mais Xes txoj cai. Lub caij ntawd kuj yog lub caij tus vaj Yos Xias nrhiav tau phau ntawv Txoj Cai nyob hauv lub Tuam Tsev Teev Ntuj. Tus vaj xav kom tsoom pej xeem rov mloog Txoj Cai tab sis cov nom tswv tsis pab nws. Xyoo 609 Yos Xias ua rog tuag nyob Mes Nkis Dos ces tsis tshuav chaw tso siab tias cov Yus Das yuav rov mloog Txoj Cai ces Yes Les Mias xub puab tseeb tias Yus Das teb yuav tawg. Tas Yes Les Mias sid mas nws yuav tsum ceeb toom rau Yus Das teb tias lub teb chaws yuav tawg, ces cov nom tswv ntxub Yes Les Mias (YLM 26: 1-16).
Xyoo 598 thiab xyoo 597 tus vaj Npas Npws Kos Dos Nos Xos tuaj ntaus Yes Lus Xas Les thiab coj ntau leej Yus Das mus nyob txim nyob Npas Npis Los teb raws li Yes Les Mias xub ceeb toom ntxov los.
Thaum Yes Lus Xas Les tawg zaum ob mas Npas Kos Dos Nos Xos tsa ib tug nom Yus Das hu ua Nkos Dos Lias saib Yes Lus Xas Les. Yes Les Mias xav mus nrog cov neeg nyob txim nyob Npas Npis Los teb nyob vim nws paub tias yog nyob hauv cov neeg ntawd Tswv Ntuj thiaj yuav xaiv cov neeg ntseeg khov ntseeg ruaj thiab yuav coj Txoj Cai txog qhov kawg. Yes Les Mias xav nrog lawv mus tab sis Nkos Dos Lias cheem kom nws nyob Yes Lus Xas Les.
Muaj ib co Yus Das muab Nkos Dos Lias tua pov tseg. Lawv ntshai tsam tus vaj Nas Npws Kos Dos Nos Xos yuav pauj rau lawv, ces lawv khiav mus tsiv nraim nyob Hais Nkws Tos teb. Lawv tsis kheev Yes Les Mias nyob Yes Lus Xas Les ces lawv pus Yes Les Mias nrog lawv mus txog Hais Nkws Tos teb. Yes Les Mias thiaj tuag nyob ntawd.
Yes Les Mias yog ib tug neeg siab zoo, xav hais lus zoo lus mos rau luag tej, tab sis tas nws sid mas nws yuav tsum ceeb toom tej lo lus ntxhib rau tsoom sid. Yes Les Mias yog ib tug neeg nyiam kev thaj yeeb, tab sis tas nws sid nws yuav tsum hais txog kev tsov kev rog thiab kev raug xwv txheej (YLM 20: 7-13). Yes Les Mias thiaj raug kev txom nyem tas nws sid vim cov lus nws yuav tsum ceeb toom mas tsis haum nws tus yeeb yam zoo thiab mos. Cov vaj thiab cov nom tswv los cov pej xeem ntau leej ntxub Yes Les Mias vim nws tsuas pheej ceeb toom tias lub teb chaws yuav raug txim. Lawv hais tias Yes Les Mias yog ib tug neeg ua kom tsoom sid ntaus siab me ntshai tiv cov yeeb ncuab. Yes Les Mias thiaj ntsaj ntaus zaus rau Tswv Ntuj mloog, nws hais tias “Kuv tsawm lub hnub nyoog kuv yug los.” Yes Les Mias tu siab ntau zaus.
Vim Yes Les Mias tau txais ib txog hmoov ceeb laj ris li ntawd mas nws lub siab ntshiaj tuaj zoo, nws to taub txoj kev ua neeg siab ntshiab. Yes Les Mias paub zoo tias Tswv Ntuj xav nrog tas txhua leej txhua tus cog lus tshiab (YLM 31: 31-34). Yes Les Mias paub zoo tias Tswv Ntuj pom hauv neeg nruab siab (YLM 11: 20) thiab Tswv Ntuj pub txoj hmoov rau nyias raws li nyias txoj hauj lwm (YLM 31: 29-30). Yes Les Mias paub zoo tias sawv daws yuav nrog Tswv Ntuj ua phooj ywg (YLM 2: 2). Yes Les Mias paub tias cov txhaum txhawv hauv neeg lub siab los (YLM 4: 4, 17: 9, 18: 12). Yes Les Mias tau qhia meej tias txoj kev txom nyem muaj nqe nyob ntawm Tswv Ntuj xub ntiag tsuav yog yus txais xws li ib txog kev mloog Tswv Ntuj lus. Yes Les Mias tau ua ib tug piv txwv qhia txog tus cawm lub ntiaj teb yuav raug kev txom nyem. Yes Les Mias tau pom tseeb tias tab yog Tswv Ntuj haiv neeg tau zwm rau cov pej kum vaj mas lawv tau kev mloog Txoj Cai thiab taug kev nrog Tswv Ntuj cog lus kuj tau vim kev mloog Tswv Ntuj yog nyob hauv siab.
Thaum Yes Les Mias ua neej nyob sawv daws thuam nws thiab hiam nws, tab sis yog thaum nws tuag lawm mas sawv daws thiaj to taub zoo zuj zus nws cov lus ceeb toom txog kev ua neeg nyiam Tswv Ntuj.
Tus Yaj Saub Yes Les Mias phau ntawv tus txheej txheem zoo li no:
Ntu 1. Yes Les Mias cov lus ceeb toom tias Yus Das thiab Yes Lus Xas Les yuav raug txim (YLM 1-25).
Ntu 2. Yes Les Mias cov lus ceeb toom tias pej kum haiv neeg yuav rau txim (YLM 25, 46-51); nyob hauv no muaj ntau yam sib txawv; tej yam yog Yes Les Mias sau tseg thiab tej zaj mas lawv sau ntev xyoo tom qab no, lawv lam qiv Yes Les Mias lub npe.
Ntu 3. Yes Les Mias cov lus ceeb toom txog kev nyob dawb nyob huv (YLM 26-35).
Ntu 4. Npas Lws cov lus piav txog Yes Les Mias kev raug txom nyem (YLM 36-45).
Ntu 5. Cov lus ntxiv rau phau ntawv (YLM 52).
Phau ntawv Yes Les Mias qhia dab tsi rau peb?

1. Phau ntawv Yes Les Mias qhia tias Tswv Ntuj tau npaj txoj kab xwm ua Yaj Saub rau Yes Les Mias ces nws yuav tsis mus taug lwm txoj kev ntxiv (YLM 1: 5). Tsis kav Yes Les Mias zoo li Mais Xes, nws yig kom dhau tab sis Tswv Ntuj tsis mloog nws lo lus yig ntawd (YLM 1: 6).
2. Phau ntawv Yes Les Mias qhia tias Tswv Ntuj yuav muab txim rau Yus Das teb (YLM 1: 10-16) tab sis lawv tseem muaj kev vam khom ntxiv (YLM 1: 10).
3. Tswv Ntuj hais rau Yes Les Mias tias nws yuav raug hiam tab sis Tswv Ntuj yuav npo nws (YLM 1: 8, 19).
4. Tswv Ntuj ceeb toom tias cov Yus Das ua 2 yam txhaum; lawv ntxeev siab rau Tswv Ntuj, lawv mus teev cov dab ua Tswv Ntuj (YLM 2: 2-37). Lawv ua txhaum li ntawd mas cov Yaj Saub cuav tau ntxeev Tswv Ntuj lo lus, cov Leej Choj teev Ntuj ywj lawv siab, thiab tsoom sid nyiam kom ua li ntawd (YLM 5: 30-31). Cov Yus Das tsis nyiam muab tas lawv txoj sia los txi rau Tswv Ntuj nyob hauv kev txom nyem.
5. Tswv Ntuj yuav siv cov Npas Npis Los txhais tes tuaj nplua cov Yus Das (YLM 1: 13-16, 5: 15) ces yuav tsis tshuav dab tsi nyob hauv lub teb chaws ntxiv (YLM 4: 23-28). Tab sis tseem tsis tau txog lub zim txwv kawg vim Tswv Ntuj tseem tshuav cov Yus Das muaj sia nyob (YLM 4: 27).
6. Yes Les Mias ceeb toom tias Tswv Ntuj yuav rhuav lub Tuam Tsev Teev Ntuj ib yam li thaud Tswv Ntuj tau rhuav lub nroog Xis Laus.
7. Yes Les Mias tshaj tias Tswv Ntuj nyiam cov neeg nco txog lwm tus thiab muab siab npuab Tswv Ntuj mus li “Yog nej kho nej tus yeeb yam thiab nej tej hauj lwm kom zoo, yog nej ua ncaj rau sawv daws, yog nej tsis yuam cov pej kum neeg, cov me nyuam ntsuag thiab poj ntsuam, yog nej tsis tua cov neeg tsis muaj txhaum, yog nej tsis yuam kev mus teev lwm cov tswv ntuj, mas kuv thiaj yuav ua kom nej tau ua neej nyob hauv thaj chaw uas kuv ib txwm muab rau nej cov yawg koob, thiab kuv xav muab rau nej nyob mus li” (YLM 7: 5-7).
8. Yes Les Mias xav thov Tswv Ntuj rau cov Yus Das tab sis Tswv Ntuj tsis kheev cia Yes Les Mias ua li ntawd vim Tswv Ntuj yuav muab txim rau cov Yus Das. (YLM 7: 16-20).