Leej Ntshiab Las Xaws (St. John Baptiste de La Salle)

Leej Ntshiab Zam Nxuav Plig Ntaws Las Xaws yug xyoo 1651 hauv Lees (Rheims), Fab Kis teb, nws tsev neeg yog haiv neeg txheej siab nyob hauv lub teb chaws. Nws txais Cim Tiag Tes thaum muaj 26 xyoo.
Txiv Plig Las Xaws pom tias nyob hauv nws lub zos mas cov neeg txom nyem lawv tsis muaj peev xwm xa lawv cov me nyuam mus kawm ntawv tau, ces Txiv Plig Las Xaws ua ib siab tawm hauv nws txoj hauj lwm hauv lub tsev teev Ntuj los ua cov hauj lwm qhia ntawv rau cov neeg txom nyem.
Txiv Plig Las Xaws kub siab ua txoj hauj lwm qhia ntawv rau cov me nyuam, nws muab nws lub cuab tam muag coj los txhim tsa tsev kawm ntawv pub rau cov neeg pluag txom nyem tau kawm ntawv, nws coj tus yam ntxwv pluag, nyiam them txim thiab nquag teev Ntuj.
Muaj 7 tus xib hwb qhia ntawv pom txog Txiv Plig Las Xaws lub siab hlub cov me nyuam txom nyem li no, ces lawv thiaj thov koom nrog Txiv Plig Las Xaws ua txoj kab xwm no. Txiv Plig Las Xaws thiaj txhim tsa lub haum xeeb cov Leej Tij Las Xaws los ua nws cov hauj lwm pub kev kawm rau cov me nyuam pluag txom nyem, yog thawj lub haum xeeb ua hauj lwm fab qhia kev txawj ntse rau cov me nyuam. Txiv Plig Las Xaws kev qhia ntawv tsis thooj li cov tsev qhia ntawv hauv tiam ntawd, nws siv haiv neeg hauv thaj tsam ntawd cov lus rov los qhia lawv cov me nyuam, tsis yog siv lus Las Tis Nas, ces ua rau cov me nyuam to taub yooj yim.
Txiv Plig Las Xaws tseem txhim tsa cov tsev kawm ntawv txheej siab thiab cov tsev kawm ua xib hwb ntau lub nyob hauv lub teb chaws thiab. Xyoo 1719, Txiv Plig Las Xaws tuag nyob hauv nroog Luas (Rouen).
Lub Koom Txoos saib Leej Ntshiab Las Xaws ua tus pov hwm cov kws qhia ntawv.