Vis Ses Nthes (Vincente) Fes Les yug xyoo 1350 hauv Vas Les Xias (Valencia), Xyis Pas Yas teb. Nws ua Leej Choj nyob hauv cov Dos Mis Nis Kas thaum muaj 17 xyoo.
Vis Ses Nthes siv sij hawm 3 xyoos los nyeem Ntawv Ntshiab thiab nco cov lus hauv Ntawv Ntshiab tau tag nrho, ces xyoo 1379 Vis Ses Nthes ua Leej Choj nyob hauv lub nroog Npas Xes Los Nias.
Xyoo 1385 Vis Ses Nthes ua kws qhia txuj hais txog txoj kev ntseeg. Vis Ses Nthes tawm mus qhuab qhia tsoom sid raws tej zej zos kom lawv txawj coj lub neej raws nraim lub Moo Zoo.
Txiv Plig Vis Ses Nthes kub siab tshaj lub Moo Zoo rau cov neeg Yus Das hauv Xyis Pas Yas, ces muaj coob tus neeg Yus Das tau hloov siab tshiab los ntseeg txog Yes Xus. Vis Ses Nthes Fes Les hais txog kev tshaj lub Moo Zoo tias “Thaum peb nthuav Tswv Ntuj Lo Lus mas peb yuav tau siv cov lus to taub yooj yim thiab yuav hais cov zaj ua piv txwv kom ntau. Thaum cov neeg ntseeg hnov cov zaj ua piv txwv raug lawv lub neej mas lawv yuav pom tias yog peb tab tom hais lus rau nws ntag. Thaum peb nthuav Tswv Ntuj Lo Lus mas peb yuav nthuav cov lus txhawv hauv lub siab hlub neeg tuaj xws li leej txiv hais lus rau tus me nyuam rov los thov txim ntawm leej txiv.
Xyoo 1419 Vis Ses mus txog Vas Nes (Vannes) Fab Kis teb ces nws tuag.