Leej Ntshiab Is Xis Dos Les yug xyoo 560 hauv Xes Vis Las, Xyis Pas Yas teb, lawv tsev neeg yog tsev neeg ntshiab vim nws muaj ob tug tij laug ua Tswv Qhia tib yam li nws, nws muaj ib tug muam coj lub neej tab seeb qee rau Tswv Ntuj. Nws yog tus Tswv Qhia hauv Xes Vis Las.
Thaum Is Xis Dos Les txiv tuag tas, nws tus tij laum hlob hu ua Les As Dos tau ua tus tu thiab qhia txuj rau nws. Les As Dos qhia nruj dhau ces Is Xis Dos Les thev tsis taus, nws khiav mus tab sis tom qab nws tu siab ces nws thiaj rov qab los thiab rau siab kawm txuj.
Les As Dos ua tus saib xyuas tsoom ntseeg, ces Is Xis Dos Les thiaj niaj hnub tawm mus pab nws tus tij laug ua cov hauj lwm rau Ntuj thiab rau zej zog. As Les Dos tuag tas, ces Is Xis Dos Les thiaj txais nws tus tij laug lub mom Tswv Qhia los ua tus saib xyuas tsoom ntseeg hauv Xes Vis Las.
Is Xis Dos Les tau sau ntau phau ntawv pab txhawb cov Leej Choj hauv lub Koom Txoos. Nws hais tias “Kev ua Thaj Txi Ntuj yuav tsis tau Tswv Ntuj lub txiaj ntsim yog tias tus coj lub Txoos thiab tsoom neeg tuaj koom lub Txoos tsis muab siab rau ua tiag.”
Is Xis Dos Les hais txog kev teev Ntuj thiab nyeem phau Ntawv Ntshiab tias “Tus twg xav muaj Tswv Ntuj nrog nraim nws mas nws yuav kub siab teev Ntuj thiab nquag nyeem Ntawv Ntshiab, vim tias thaum peb teev Ntuj mas yog peb tab tom hais lus rau Tswv Ntuj, thaum peb nyeem Ntawv Ntshiab mas yog peb tab tom mloog Tswv Ntuj hais lus rau peb.” Is Xis Dos Les tseem txhib sawv daws kom nyiam twm Ntawv Ntshiab vim kev twm Ntawv Ntshiab yuav pab kom sawv daws nco tau cov lus Tswv Ntuj hais qhia rau sawv daws.
Is Xis Dos Les hais txog kev nyeem Ntawv Ntshiab tias “Peb nyeem Ntawv Ntshiab yog kom peb to taub phau Ntawv Ntshiab thiab paub tias yuav ua li cas Tswv Ntuj Lo Lus thiaj tawg paj txi tau txiv.”
Xyoo 636 Is Xis Dos Les tuag, ua ntej yuav tuag, nws tau pub nws cov cuab tam rau neeg txom nyem.
Lub Koom Txoos saib Leej Ntshiab Is Xis Dos Les ua tus pov hwm tsoom tub ntxhais kawm txuj.