Leej Ntshiab Is Nyas Xyus nyob As Nthias Kias (St. Ignatius of Antioch)

Is Nyas Xyus yog haiv neeg Xis Lias, yug xyoo 35. Is Nyas Xyus yog tus Hauv Paus Xas Lus Zam tus thwj tim. Xyoo 69 Is Nyas Xyus ua Tswv Qhia coj cov ntseeg hauv As Nthias Kias. Nws muab siab rau tshaj lub Moo Zoo kawg, ces cov ntseeg hauv lub nroog As Nthias Kias thiaj tis nws npe tshiab rau nws hu ua ‘Tus pab ev Tswv Ntuj’. Tos lawv tau ua li ntawd yog vim nws tau saib cov neeg ntseeg zoo cuag li Tswv Ntuj saib.
Lub caij ntawd mas tus vaj Los Mas kav 10 tawm lub teb chaws nruj nruj nws hu ua Ras Zas Nus. Nws ua raws li cov vaj uas xub ua nom ua ntej, nws khav hais tias nws yog ib tug tswv ntuj, ces sawv daws yuav tsum pe nws thiab muab tej tsiaj txhu los hawm nws. Cov pej xeem coj lwm txoj kev teev hawm kuj kawg yuav tsum saib tus vaj Ras Zas Nus zoo li yog ib tug tswv ntuj thiab.
Xyoo 90 txog 95 tus vaj Ras Zas Nus hnov tias nyob hauv ntau lub teb chaws uas zwm rau nws mas muaj tej pab neeg lawv coj ib txoj kev teev hawm txawv. Cov neeg ntawd lawv cav lus zoo tias “Yes Xus Pleev sawv ntawm cov tub tuag rov los. Nws yog tus tseem Tswv Ntuj tiag. Peb ntseeg txog nws thiab peb txiav siab raws nws qab.”
Tus vaj Ras Zas Nus tseem hnov hais tias “Cov neeg uas ntseeg tej ntawd, lawv muaj peev xwm xaiv tej tus neeg los ua lawv tus ntaus thawj zoo li hauv ntau lub nroog muaj cov Tswv Qhia.”
Tus vaj hnov txog qhov ntawd mas nws ntshai tsam lwm hnub cov neeg ntseeg ntawd yuav ua kom nws poob nom. Yog vim li ntawd mas xyoo 100 Ras Zas Nus thiaj ceeb toom rau nws tsoom pej xeem hais tias “Nyob tas hauv lub teb chaws, hauv txhua lub nroog mas cov ntseeg txog Yes Xus yuav tsum thim lawv txoj kev ntseeg sai sai. Yog tias lawv tsis mloog kuv tej lus, mas kuv yuav muab lawv tua pov tseg kom tas.”
Thaum tus vaj ceeb toom nws cov lus zoo li ntawd, mas cov ntseeg nyob hauv lub nroog As Nthias Kias uas Tswv Qhia Is Nyas Xyus saib xyuas mas lawv nyob ruaj nreb li qub tsis muaj ib tug thim kev ntseeg li. Lawv tsis quav ntsej txog tus vaj Ras Zas Nus cov lus ceeb toom, lawv kuj tsis ntshai kev tuag thiab. Cov ntseeg lawv yim raug kev quab yuam, mas lawv txoj kev ntseeg yim nyob ruaj dua qhov qub.
Xyoo 107 Ras Zas Nus hnov tsoom ntseeg cav lus zoo txog Tswv Qhia Is Nyas Xyus, ces tus vaj xav tias yog peb muab tus Tswv Qhia tua, mas tsoom ntseeg yeej yuav thim kev ntseeg xwb. Muaj ib hnub ib pab tub rog Los Mas tuaj txog lub nroog As Nthias Kias. Lawv ntes Tswv Qhia Is Nyas Xyus thiab coj nws mus txog lub nroog Los Mas uas nyob Is Tas Lias teb.
Thaum Is Nyas Xyus raug Ras Zas Nus ntes mus nyob Los Mas, nws tau sau 6 tsab ntawv xa rau cov Koom Txoos qhia txog kev tswj lub Koom Txoos thiab txhawb lawv txoj kev ntseeg. Is Nyas Xyus sau tias “Ib tug neeg ua nom kav ib lub teb chaws dav nyob ntiaj teb no, mas nws kuj muaj hwj chim loj. Tab sis qhov uas muaj nqes tshaj ntawd, yog qhov tau nrog Haub Tais Yes Xus koom ua vaj muaj txoj sia nyob pem Tswv Ntuj lub Ceeb Tsheej. Li ntawd, thov kom nej tsis txhob khuv xim kuv txoj sia. Tus uas kuv xav nrhiav kom tau yog Huab Tais Yes Xus. Tus yuav pub kev kaj siab lug rau kuv yog Huab Tais Yes Xus tib leeg xwb. Li ntawd, kuv hais tseeb rau nej tias hnub kuv yuav tso ntiaj teb no tseg thiaj yog zoo hnub tshaj plaws, vim tias hnub ntawd kuv yuav rov yug dua tshiab nyob ntawm peb Txiv nyob saum ntuj. Yog lub caij ntawd, mas kuv yuav ua tus tsheej neeg tiag.”
Is Nyas Xyus raug txiav txim rau tsov ntxhuav tom tuag. Is Nyas Xyus hnov tias cov ntseeg nyob hauv lub nroog Los Mas tau taij tsoom nom Tswv kom tso Is Nyas Xyus dim. Thaum Is Nyas Xyus hnov li ntawd, nws sau ntawv mus rau cov ntseeg nyob Los Mas tias “Tsoom me nyuam hauv Leej Pleev lub npe, kuv hnov tias nej nyiam kuv kawg nkaus. Nej cev lus thov cov nom tswv Los Mas kom lawv txuag kuv txoj sia, mas kuv zoo siab ua nej sawv daws tsaug ntau. Tab sis, thov kom nej ua lwm yam uas yuav zeem tseeb tias nej nyiam kuv tiag. Yam li, thov kom nej tsis txhob mus taij cov nom tswv Los Mas. Nej cia kuv tuag, vim txoj kev tuag yuav xa kuv mus txog Leej Txiv nyob saum ntuj sai. Nej tsuas thov kom kuv muaj zog tuag ua tim khawv tias kuv nyiam Huab Tais Yes Xus txog qhov tuag. Kuv xav kom cov tsov xo kuv tej nqaij, tej pob txha los ua ib co mov dawb yug cov neeg ntseeg lub siab. Nej cia kuv mus txais txoj kev kaj siab nrog Huab Tais Yes Xus nyob mus li.”
Is Nyas Xyus cov tsab ntawv nws sau tseg cia mas muaj 6 qib li no:

1. Yes Xus tau mloog nws Txiv lus zoo li cas rau li cas, mas nej yuav kub siab mloog nej tus Tswv Qhia raws li Yes Xus tus piv txwv.
2. Muaj ib pawg ntseeg txog Yes Xus nyob hauv lub teb chaws, los nyob hauv haiv neeg twg kuj xij, mas lub Koom Txoos Kav Tos Liv kuj nyob hauv lub teb chaws ntawd thiab nyob hauv haiv neeg ntawd.
3. Txij lub caij Yes Xus rov mus lawm saum ntuj los txog xyoo 100 mas lub Moo Zoo ri mus hauv ntau lub teb chaws. Tsis muaj ib lub teb chaws twg yuav tsis muaj ib pawg ntseeg txog Yes Xus li. Yog vim qhov ntawd lub Koom Txoos thiaj yog ‘Kav Tos Liv’ (Catholic) txhais tias ‘cia rau lub qab ntuj neeg’.
4. Leej Txiv Tswv Ntuj kev nyiam kev hlub neeg nqes los pov hwm ib pab neeg nyob rau hauv ib lub teb chaws twg, mas yog vim cov Tswv Qhia thiab cov Leej Choj lawv tej hauj lwm tshaj Ntuj Lus. Lawv pab kom tej pab neeg tig los yuav lub siab tshiab thiab ua Tswv Ntuj cov me nyuam. Yog vim li ntawd, cov Tswv Qhia thiab cov Leej Choj lawv thiaj yog peb Txiv nyob saum ntuj tus duab ntxoov ntxoo.
5. Txhua Hnub Chiv yog ib hnub zoo, vim nws yog hnub Yes Xus foom hmoov zoo rau peb. Txhua zaus thaum peb txais Yes Xus lub Cev hauv peb nruab siab, mas zoo li yog peb txais ib hom tshuaj pab peb tiv kev phem thiab kev tuag nyob hauv peb nruab siab. Peb yim txais lub Cim Yug, mas peb yim muaj txoj sia nyob hauv Yes Xus.
6. Thov kom nej nquag sib sau los cav txog Tswv Ntuj lub koob meej thiab ua Ntuj tsaug ntau ntau, ces lwm hnub nej thiaj yuav tau mus cuag nej tus Huab Tais Yes Xus Pleev mog!