Leej Ntshiab Mas Nkas Lis As Las Nkos (St. Margaret Mary Alacoque)

Mas Nkas Lis As Las Nkos yug xyoo 1647 tim 22 lub 7 hli hauv ib yim neeg noob nom nyob Fab Kis teb. Nws txiv ua thoob xwm nyob hauv tus vaj lub tuam tsev.
Thaum muaj 5 xyoos, nws cog lus hauv nruab siab tias yuav qee lub neej ua nkauj xwb tsis yuav txiv mus tas nws ib sid.
Thaum muaj 8 xyoo, ces nws txiv tuag, lawv tsev neeg ntsib kev txom nyem loj, Mas Nkas Lis niam xa nws mus nyob hauv cov Leej Phauj ib lub tsev kawm.
Mas Nkas Lis yuam nws lub cev them txim ua rau nws tau ib tug mob tuag tes tuag taw, tus mob no yuav nrog Mas Nkas Lis nyob mus txog thaum nws 15 xyoos thiaj zoo. Niaj hnub nws thov Tswv Ntuj pab tshem qhov mob tawm hauv nws mus, nws cog lus tias yog zoo mas nws yuav thov ua niam Mab Liab ib tug ntxhais, ces thaum Mas Nkas Lis zoo lawm, nws thiaj ntxiv Mab Liab lub npe rau hauv nws lub npe, hu ua ‘Mas Nkas Lis – Mab Liab’.
Mas Nkas Lis nquag teev Ntuj heev, ces nws pib pom Yes Xus raug ntsia saum Ntoo Cuam thiab pom Yes Xus lub siab khuv leej; yog Yes Xus cov qhov txhab thiab cov ntshav ntws. Mas Nkas Lis yim pom mas nws yim tu siab rau neeg cov txhaum, ces nws haj yam nrhiav kev them neeg cov txim txhaum. Tim 25 lub 5 hlis 1671 Mas Nkas Lis mus xyaum lub neej tab seeb nyob hauv lub koom haum cov Phauj Mab Liab tuaj xyuas (The Order of the Visitation of Holy Mary). Thaum ntawd, nws hnov Yes Xus lub suab hais rau nws tias “Kuv xav kom koj tuaj nyob hauv qhov chaw no.” Txog lub 11 hlis tim 6 nws thiaj cog lus ua Leej Phauj.
Mas Nkas Lis hwm Yes Xus nyob hauv lub Cim Yug zoo tshaj, ces xyoo 1673 tim 27 lub 12 hlis, Mas Nkas Lis pom ib co nplaim taws cig thiab muaj ib lub kauj pos nyob ncig Yes Xus lub plawv. Yes Xus hais rau nws tias “Kuv lub plawv koj pom no, yog lub plawv hlub neeg tshaj plaws, kuv thiaj yeem tuag los ua tim khawv txog kev nyiam. Tab sis qhov kuv tau txais ciav yog lawv tsis paub kev nyiam kev hlub lub txiaj ntsim.”
Yes Xus cog lus rau Mas Nkas Lis tias yuav foom hmoov zoo rau txhua tus neeg uas hwm Yes Xus lub siab ntshiab, yuav pub cov neeg ntawd pom Yes Xus lub plawv nyob hauv lub Cim Yug thaum lawv yuav tuag.
Yes Xus tseem hais kom Mas Nkas Lis mus tshaj rau sawv daws txog Yes Xus lub siab ntshiab tias “Kuv lub siab lub plawv muaj kev nyiam ntiaj teb neeg nyob ntxaws nkaus, txoj kev nyiam no hlawv kuv lub siab lub plawv dhau lawm, kuv yuav tau hais qhia rau ntiaj teb neeg kom lawv paub txog kuv lub siab thiab kom lawv paub tias kuv lub siab yuav cawm tau lawv hauv dab teb cov hluav taws.”
Mas Nkas Lis hais tej ntawd rau sawv daws, tab sis cov loj tsis ntseeg, lawv txwv tsis pub nws hais txog ntxiv. Xyoo 1686 lub loog cov Phauj Mab Liab tuaj xyuas hloov tus thawj Phauj tshiab, ces lawv thiaj pib ua hmoov hwm Yes Xus lub siab ntshiab. 4 xyoos tom qab, Mas Nkas Lis tas sim neej. Yog tim 17 lub 10 hli 1690.