Nyob hauv xyoo 1854 lub 12 hlis tim 8, Vaj Qhia Pis Yus Cuaj (Pope Pius IX) tshaj lus rau lub Koom Txoos nyob tas ntiaj teb tias “Peb tshaj rau ib zeej tsoom tias ib txwm los lub Koom Txoos muaj ib nqe lus qhia (doctrine) zoo li no tias tus nkauj ntshiab Mab Liab yog tus tau koob tau hmoov tshaj sawv daws, vim nws xeeb los nyob hauv tus Tswv Ntuj Muaj Hwj Chim (Almighty God) lub txiaj ntsim (grace) thiab sab xeeb (privilege), thiab nyob hauv Huab Tais Yes Xus Pleev tus Cawm lub qab ntuj neeg tej koob hmoov (merit), mas Mab Liab thiaj yog tus tsis lo neeg lub keeb txhaum; Tswv Ntuj yog tus nthuav nqe lus qhia no tawm los, mas tsoom neeg ntseeg sawv daws thiaj yuav ntseeg ruaj ntxiv mus li ntawd.”

Txij thaum Vaj Qhia Pis Yus Cuaj tshaj cov lus no tawm, mas thiaj yog zoo li ib cov lus zeem tseeb tias Mab Liab ib txwm tsis lo neeg lub keeb txhaum tiag thiab Mab Liab ua neej nyob hauv qhov ntshiab.

Ua ntej lub Koom Txoos Kav Tos Liv yuav tawm los zeem tseeb txog niam Mab Liab tsis lo neeg lub keeb txhaum, mas tsoom ntseeg ib txhia hauv lub Koom Txoos yeej ntseeg li ntawd thiab txuag lawv qhov ntseeg ntawd lawm. Xws li cov txwj laus hauv lub Koom Txoos tiam ib ntau tus tau hais lus pov thawj txog nqe lus qhia tias Mab Liab xeeb los tsis lo neeg lub keeb txhaum, ces cov Koom Txoos sab hnub tuaj thiaj ua lub ntees hwm Mab Liab tsis lo neeg lub keeb txhaum nyob hauv tiam 7 los txog niaj hnub no. Ntawm cov Koom Txoos sab hnub poob, mas lawv ua lub ntees hwm Mab Liab tsis lo neeg lub keeb txhaum tom qab sab hnub tuaj li ob puas xyoo.

Leej Ntshiab As Xees (St. Anselm) tau ntuas tsoom ntseeg kom ras ntsoov tias thaum lawv ua lub ntees hwm Mab Liab tsis lo neeg lub keeb txhaum, mas lawv yuav nco tias Huab Tais Tswv Ntuj tau txuag niam Mab Liab kom txhob poob hauv qhov txhaum thiab, ces xyoo 1439 lub Koom Txoos thiaj hais tias tas tsoom neeg ua Ntuj kev cai yuav tau ntseeg li ntawd.

Xyoo 1497 cov tub kawm txuj hauv Pas Lis kuj cog lus tias lawv yuav ua pov thawj txog nqe lus qhia no mus li. Xyoo 1839 lawv kuj tau ntxiv lo lus ‘tus poj vaj xeeb los tsis muaj txhaum, koj thov Ntuj rau peb’ rau hauv zaj thov Ntuj nyob Los Les Tos (Litany of Loreto).

Plaub xyoos tom qab lub Koom Txoos zeem tseeb tias niam Mab Liab tsis lo neeg lub keeb txhaum, mas yog thaum niam Mab Liab yees tawm nyob lub nrooj Lus Daws, niam Mab Liab hais rau tus ntxhais Npes Nes Des tias Mab Liab yog tus tsis lo neeg lub keeb txhaum.

Leej Ntshiab Paj Lug hais tias “Txoj kev tuag tuaj raug tas zeej tsoom vim As Das” (LM 5: 12), ces thiaj muaj ob peb tug thoob xwm ntawv hauv lub Koom Txoos tsis ntseeg tias niam Mab Liab tsis lo neeg lub keeb txhaum. Lawv hais tias yog niam Mab Liab tsis lo neeg lub keeb txhaum, mas niam Mab Liab yeej tsis vam txog Leej Pleev ua tus txhiv nws hauv qhov txhaum. Yog zoo li ntawd, mas yuav hais tsis tau tias Leej Pleev nqes los cawm tas ntiaj teb neeg. Tab sis muaj ib tug tub koom haum Fas Ntshis Kas hu ua ‘Zam Nkos Tus’ (John Duns Scotus) tiv cov ntawd tias niam Mab Liab yog tus nyob nruab nrab pub Tswv Ntuj lub txiaj ntsim rau tas ntiaj teb neeg, yog li mas niam Mab Liab yim vam txog Leej Pleev kev cawm los pab npo nws kom tsis txhob lo neeg lub keeb txhaum. Niam Mab Liab tsis lo neeg lub keeb txhaum, mas tus yug ntawm niam Mab Liab los thiaj yuav tsis lo neeg lub keeb txhaum, ces tus yug ntawm niam Mab Liab los thiaj tsis ua qhov txhaum. Li ntawd, lub ntees hwm Mab Liab tsis lo neeg lub keeb txhaum thiaj yog ib lub cim qhia tias kev cog lus tshiab sawv tim npoo ntuj tuaj lawm, yog lub ntees npaj tos txais peb tus Huab Tais Cawm Seej tab tom yuav tuaj. Tas zeej tsoom thiaj yuav tsa suab hais tias “Koj nyob kaj lug Mab Liab, tus tau txiaj ntsim puv siab. Huab Tais nrog koj nyob, koj tau koob tau hmoov tshaj ib zeej tsoom poj niam tib si, thiab Yes Xus, lub txiv txi hauv koj lub cev tau koob tau hmoov.”

Huab Tais Tswv Ntuj yeej tau hais tseg tias “Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws” (HP 3: 15), mas thiaj hais tau tias Huab Tais Tswv Ntuj yeej ib txwm tau xaiv Mab Liab los ua ntiaj teb neeg qhov chaw cawm, thiab yuav xa nws Leej Tub nqes los ua ‘Neeg Leej Tub’ nyob hauv lub qab ntuj; yog li Mab Liab thiaj tau lub npe tias yog tus ‘Es Vas’ tshiab. Es Vas txhais tias ‘Ib tsoom neeg muaj txoj sia leej niam’, ces peb thiaj pom niam Mab Liab sawv nyob ntawm Huab Tais Yes Xus ib sab. Qhov no kuj qhia tau rau peb kom yuav tsum tau hwm poj niam lub meej mom xws li txiv neej lub thiab.

Niam Mab Liab tsis yog tus tau koob tau hmoov tshaj sawv daws xwb, niam Mab Liab tseem yog tus yeem cia Tswv Ntuj ua hauj lwm nyob hauv nws thiab, nws yeem ua xis Tswv Ntuj siab dua yuav ua raws li nws lub siab nyiam; nws thiaj hais rau tus Tshiab tias “Kuv yog Huab Tais tus ntxhais txib. Kuv xav kom muaj raws li koj hais” (LK 1: 38). Yog li niam Mab Liab thiaj pab leg Tswv Ntuj txoj hauj lwm cawm ntiaj teb neeg, nws tau nrog Huab Tais Yes Xus ris kev txom nyem mus txog ntawm lub rooj Nkos Nkos Tas. Nyob ntawd, niam Mab Liab tau pub Leej Pleev peb tus cawm seej rau lub ntiaj teb neeg. Niam Mab Liab tau qhia rau peb tias yog peb xav tau kev cawm mas peb yuav tau ua sawv daws tus tub txib ntxhais txuas. Niam Mab Liab tau txoj hmoov zoo ua Tswv Ntuj Leej Niam, tsis kav nws hais tias nws yog Huab Tais tus ntxhais txib. Tas niam Mab Liab txoj sia, nws nyob nraim hauv txoj kev ntseeg, nws muab tas nws lub neej qee rau Tswv Ntuj, nws ua neeg me mloog sawv daws hais, nws nyiam sawv daws, thiab nws tso siab rau nws Leej Tub mus txog hnub kawg.

Peb yuav pom tias tas niam Mab Liab sid, nws tsis hais lus ntau, nws ua thiab nyiam cov hauj lwm nws ua, nws muab lub siab nyiam luag tso rau hauv nws cov hauj lwm, nws tsis xaiv tsob hwb tus no tseg tus tod. Niam Mab Liab yog tus piv txwv rau peb pom tias tus neeg muaj kev ntseeg hlob tiav yuav zoo li cas.

Yog vim raws li tej lus tau hais los no, mas nyob hauv hnub peb ua lub ntees hwm Mab Liab tsis lo neeg lub keeb txhaum, peb thiaj yuav nco tias niam Mab Liab yog tus tau koob tau hmoov thiab tau Tswv Ntuj lub txiaj ntsim puv siab, nws yog tus coj Tswv Ntuj lub txiaj ntsim cawm neeg tuaj pub rau lub ntiaj teb, ces peb thiaj yuav kawm ntawm niam Mab Liab, mas peb thiaj yuav txais tau Huab Tais Yes Xus yug los nyob hauv peb.