Xyoo 1515 Tes Les Xas yug los nyob As Vis Las, hauv Xyis Pas Yas teb. Thaum Tes Les Xas lub hnub nyoog muaj 10 xyoo, nws hais rau nws niam thiab nws txiv hais tias “Kuv xav pom Tswv Ntuj ntawm qhov muag kiag.”
Thaum Tes Les Xas hnub nyoog 18 xyoo, nws txiav siab coj lub neej tab seeb kom xwv tas ib puas tsav yam hauv nws lub neej zwm rau Huab Tais Tswv Ntuj. Tes Les Xas thiaj mus nyob hauv cov Leej Phauj Kas Mes lub tsev twj cuab hauv lub nroog As Vis Las.
Ob peb xyoos tom qab Tes Les Xas cog lus tias nws yuav coj lub neej tab seeb nyob ntawm Tswv Ntuj xub ntiag mus tas nws sim neej. Tiam sis, Tes Les Xas tsis zoo siab kiag vim nws pom tej tus Leej Phauj tawm mus sab nraud los mus xyuas cov swm neeg. Cov Phauj ntawd tsis tshua kub siab txais Tswv Ntuj Lo Lus thiab lawv tig nraub qaum rau Txoj Cai kav tsoom Leej Phauj Kas Mes.
Tes Les Xas pom tej ntawd, nws thiaj qhib ib lub tsev rau tej pab Leej Phauj kub siab mloog lawv lub koom haum txoj cai. Tes Les Xas hais tias “Tab txawm txoj cai ntawd nruj li cas los xij, kawg yuav tsum mloog thiab coj.”
Tswv Ntuj foom hmoov zoo rau Tes Les Xas tej dej num kawg, ces 2 xyoos tom qab nws tau qhib thawj lub tsev rau cov Leej Phauj Kas Mes txiav siab mloog txoj cai nruj ntawd. Tej pab ntxhais hluas thiab tej pab poj niam tab seeb tuaj thov nrog cov Phauj ntawd nyob. Tsis tas li ntawd xwb, Tes Les Xas kuj hnov tias nyob lwm lub nroog hauv teb chaws Xyis Pas Yas muaj tej pab ntxhais hluas los sis tej tug poj niam tab seeb lawv xav coj lub neej raws txoj cai nws rov kho dua tshiab ntawd, ces Tes Les Xas mus xyuas lawv. Tes Les Xas qhib tej lub tsev tshiab kom lawv tau nyob ua ke.
Tes Les Xas nyiam Tswv Ntuj tas siab, nws npuab Yes Xus mus li, ces nws zoo siab luag ntxhi mus li.
Thaum Tes Les Xas muaj 53 xyoos, Leej Ntuj Plig tshoj nws kom mus tsim 17 lub tsev Kas Mes Taw Do (Discalced Carmelites) nyob Xyis Pas Yas teb. Nyob hauv cov Phauj Kas Mes Taw Do ntawd, mas ib pab muaj 20 tawm leej nyob ua ke xwb. Yog muaj tej tus xav nrog lawv koom mas yuav tsum qhib lwm lub tsev tshiab ntxiv. Nyob tas txhia lub teb chaws cov Phauj Kas Mes Taw Do nyob, mas txoj cai puav leej zoo ib yam.
Tes Les Xas siv sij hawm ntev loo los nrog Tswv Ntuj tham, ces muaj ib hnub Tes Les Xas hnov Yes Xus hais rau nws tias “Yuav tsis muaj leej twg ua kom koj thiab kuv wb sib txhem tau. Kuv tej kev kaj siab yog koj tug thiab koj tej kev kaj siab kuj yog kuv tug.”
Tes Les Xas tau sau 2 phau ntawv tseem ceeb los txhawb nqa kev ntseeg, muaj lub ntsiab li no:
- Koj tsis txhob ntxhov siab! Koj yuav tsis ntsib kev ntshai thiab kev txhawj xeeb, vim tias tas ib puas tsav yam mas muaj ib hnub yuav ploj ntais mus. Kawg yog Tswv Ntuj tib leeg xwb thiaj yuav nyob li qub mus li.
- Yog ib tug neeg ntseeg twg ua lub siab ntev loo los thov Ntuj, mas nws yeej yuav tau txais qhov nws thov.
- Peb tsoom neeg ntseeg, yog tias peb muaj Tswv Ntuj nyob hauv peb nruab siab, mas peb yuav tsis ntshaw txog dab tsi ntau, peb yuav txaus siab rau tej yam uas peb twb muaj lawm.
- Thaum peb nyob twj ywm ntawm Tswv Ntuj xub ntiag, mas peb tus Huab Tais Tswv Ntuj qhia peb tias nws hlub peb kawg. Thaum twg peb teev Ntuj twj ywm mas txhais tias peb tab tom nrog Tswv Ntuj tham.
Xyoo 1582 Tes Les Xas muaj 67 xyoo, nws txoj sia tu. Lo lus kawg Tes Les Xas hais mas yog “Kuv tus Huab Tais zoo nyiad, kuv zoo siab! Txog lub caij wb yuav sib ntsia mus li tim ntsej tim muag!”
Xyoo 1622 lub Koom Txoos tsa Tes Les Xas ua ib tug Leej Ntshiab, thiab xyoo 1970 Vaj Qhia Paj Lug tim 6 tshaj lus tias Leej Ntshiab Tes Les Xas nyob As Vis Las yog thawj tus poj niam nyob hauv Koom Txoos cov kws txuj.