Leej Ntshiab Nps Los Mes Os yog tus Leej Ntshiab pov hwm cov Xib Hwb tshaj Ntuj Lus hauv lub Koom Txoos.
Npos Los Mes Os yug nyob hauv yim neeg nplua nuj muaj suab npe thiab yog Vaj Qhia Pis Yus tim 4 (Pope Pius IV) tus xeeb ntxwv. Npos Los Mes Os tau kawm kev ntseeg ntawm Vaj Qhia Nqes Nkos Lis tim 13 (Pope Greogory XIII).
Thaum Npos Los Mes Os muaj hnub nyoog 21 xyoos, nws tau ua kws lij choj. Tom qab nws tus tij laug tau tas sim neej, mas nws txiav siab txais Cim Tiag Tes ua Leej Choj. Npos Los Mes Os muaj 25 xyoos Vaj Qhias Pis Yus tim 4 tsa nws ua Tswv Qhia saib Ceeb Koom Txoos Mis Las Nos.
Tswv Qhia Npos Los Mes Os yog tus Leej Choj tseem ceeb nyob hauv lub Rooj Ncauj Lus Rhis Las Dis Nus (Council of Trent) uas cov Tswv Qhia sib sau sab laj ntev txog 10 xyoo thiaj tiav.
Tswv Qhia Npos Los Mes Os xam pom tias lub Koom Txoos tawg ua Kav Tos Liv thiab Plos Tes Taas vim cov Leej Choj tsis muaj kev ntseeg zoo; yog li nws thiaj tsa tsev kawm Leej Choj tshiab.
Xyoo 1576 Tswv Qhia Npos Los Mes Os tau muab nws suab npe, nyiaj txiag thiab lub hwj chim tso pov tseg. Nws muab nws cov cuab tam los pab cov neeg raug mob thiab txhim tsev teev Ntuj, tsev kho mob thiab tsev kawm ntawv ntau lub los pab cov neeg txom nyem hauv Ceeb Koom Txoos Mis Las Nos.
Lub caij tus kab mob sib kis nyob thoob Mis Las Nos, cov kws kho mob khiav tawm hauv nroog mus nyob deb cov neeg mob, Tswv Qhia Npos Los Mes Os tsis tso lawv tseg, nws nrog lawv nyob thiab nrhiav nyiaj los muas zaub mov yug cov neeg mob 60,000 leej neeg.
Yog vim Npos Los Mes Os muab nws txoj sia los tsob hwb cov neeg mob thiaj ua rau nws tas sim neej nyob hauv hnub tim 3 lub 11 hlis xyoo 1584. Thaum ntawd, nws muaj hnub nyoog 46 xyoo.
Leej Ntshiab Tshas Laws Npos Los Mes Os (St. Charles Borromeo)
