2. Kuv rov sawv
Kuv hnov kuv tus txiv lub suab quaj suab nyiav hu kom kuv rov mus nrhiav nws. Kuv pom nws quaj tu siab ntso, tab sis kuv tsis xav rov qab vim tias qhov kuv nyob ntawd ntxim nyob dhau lawm, kuv muaj kev xyiv fab phwj yaws puv kuv lub siab lub ntsws.
Kuv pom kuv lub cev nyob saum lub txaj kho mob, kuv pom cov kws kho mob tab tom pab cawm kuv txoj sia. Kuv hnov zoo li kuv lub cev tab tom nrub kuv tus plig kom rov nkag mus nyob hauv lub cev. Kuv ib ce pib hnov mob hnov nplaim taws txhiab kuv tus plig. Kuv hnov tias kuv tus plig tab tom nkag mus nyob rau ib qho chaw nqaim nqaim xws li thaum peb tab tom hnav cov me nyuam yaus tej ris tsho es hnav paum cas los tsis hum peb lub cev. Ces kuv hnov cov kws kho mob qw zom zaws tias ‘nws rov ua taus paj lawm!’
Lawv ke qw ke zoo siab, hos kuv mas mob thiab txom nyem kawg nkaus.
Thaum kuv xeev los lawm, lawv coj kuv mus rau kem tsev tshiab kom tau hlais kuv cov nqaij kub hnyiab thiab siav pov tseg, ces kuv tus plig rov qab tawm hauv kuv lub cev dua.
Ua ntej no mas kuv thov lees rau nej sawv daws paub tias kuv yog ib tug neeg ntseeg nyob hauv lub Koom Txoos Kav Tos Liv, tab sis kuv lub siab ntxhib tsis kub siab ntseeg nruaj. Ib lub lis piam mas kuv tsuas muab 25 fiab cia rau nrog Tswv Ntuj xwb, yog thaum koom ua thaj txi Ntuj. Kuv nyiam mus koom lub txoos uas muaj tus Txiv Plig ntuas luv luv xwb, kuv ceeb laj mloog cov Txiv Plig nthuav Tswv Ntuj Lo Lus ntev.
Kuv lub sij hawm pub rau Tswv Ntuj yog zoo li no.
Vim ntiaj teb lub cuab tam nrub kuv kom khiav deb ntawm Tswv Ntuj, ces kuv thiaj tsis muaj cov cuab yeej tiv thaiv kuv sab ntsuj plig. Cov cuab yeej tiv thaiv yus tus plig yog ‘kev teev Ntuj nyob hauv txoj kev ntseeg’.
Thaum kuv nyob hauv lub txoos txi Ntuj, kuv hnov ib tug Txiv Plig hais rau sawv daws tias tsis muaj dab teb thiab tsis muaj dab phem. Yog tsis muaj dab phem thiab dab teb mas peb sawv daws thiaj yuav tau mus saum Ntuj. Li ntawd, peb yuav mus ntshai ua dab tsi mas!
Kuv thov hais rau nej tias tos kuv ua ib tug neeg ntseeg vim kuv ntshai dab phem xwb, yog li thaum kuv hnov tias tsis muaj dab teb thiab dab phem, mas kuv hais tias ‘zoo kawg li. Peb yuav ua dab tsi ywj siab los yeej tau.’ Ces kuv thiaj pib khiav deb ntawm Tswv Ntuj, deb tsev teev Ntuj thiab pib hais lus phem lus lus tsis zoo, kuv tsis ntshai yuav muaj txhaum ntxiv lawm.
Kuv pib hais rau lwm tus tias tsis muaj dab phem kiag li, tsuas yog cov Leej Choj xev los hem neeg xwb. Txog qhov kawg, kuv hais rau cov phooj ywg sawv daws tias nyob hauv lub sim ceeb no mas tsis muaj Tswv Ntuj. Tib neeg yog txias los ntawm liab los. Muaj coob leej ntseeg xws li kuv hais.
Kuv thov rov hais txog thaum cov kws kho mob kho kuv dua. Txaus ntshai kawg! Kuv pom dab phem lawm tiag. Dab muaj tiag, lawv los nrhiav kuv, los qhib kuv cov txhaum rau kuv saib dua.
Kuv pib ntsia pom muaj tej yam tawm hauv sab phab ntsa tsev kho mob tuaj, yam ntawd yog cov ntsuj plig muaj ib lub siab ntxub ntxaug tsis tsaim thiab txaus ntshai.
Thaum kuv pom ces kuv ib ce tshee na, kuv paub tias ziag no kuv tab tom pom dab lawm tiag tiag. Kuv paub tias kuv tshauv lawv cov nuj nqes, kuv tau ua txhaum rau lawv.
Dab phem ntxias neeg tias tsis muaj txhaum. Nod yog lo lus dag zoo hauj sim! Yog lo lus ntxias neeg mus poob hauv nws txhais tes.
Kuv ras dheev tias dab phem muaj tseeb tiag! Lawv nyob ncig kuv. Lawv ncaj qha los nrhiav kuv. Nej xav mas! Kuv yuav ceeb thiab ntshai npaum li cas.
Kev txawj ntse pab dab tsi tsis tau rau kuv, kuv khiav mus qhov txhia chaw hauv kem tsev kho mob, kuv ua tiag nkag rov rau hauv kuv lub cev, los kuv nkag mus tsis tau kiag li. Kuv thiaj ua tiag khiav kom sai thiab deb. Kuv hla dhau cov phab ntsa tsev tawm mus. Kuv plam plaws poob rau hauv ib chav tsis muaj dab tsi nyob. Poob rau hauv cov qhov tsaus nti, kuv pom muaj tej kem mas muaj neeg nyob, cov hluas cov laus, cov txiv neej poj niam. Lawv tab tom tsa suab quaj qw yam txom nyem thiab ntshai. Lawv quaj tom hniav nkawv.
Kuv pom li ntawd, mas kuv haj yam ntshai. Kuv nrhiav saib puas muaj chaw tawm rov qab los rau sab saud. Kuv nrhiav npaum cas lost sis pom lub qhov tawm li. Kuv nyob hauv qhov tsaus nti.
Kuv xuas dub los txog ib qhov chaw. Kuv tsis paub yog nyob qhov twg thiab yuav piv tau rau qhov twg. Hais tau tias qhov tsaus ntuj tshaj plaws hauv lub qab ntuj no twb tsaus tsis cuag qhov chaw ntawd. Qhov chaw tsaus ntuj nti no ua kom kuv mob , kuv ntshai thiab txaj muag. Yog qhov chaw tsaus ntuj nti muaj txoj sia.
Yog lawm! nws muaj sia. Qhov chaw no yog yeeb ceeb. Kuv ua tiag khiav kom dim, kuv ua tiag kom kuv rov muaj sia nyob ntxiv. Tab sis ziag no kuv pab kuv tsis tau lawm. Vim kuv poob los nyob ntawm no thiab yuav nyob ntawm no mus tas ib sid.
Nyob nyob kuv pom lub ncauj qhov qhib, kuv pom tias tsis muaj kuv ntxiv lawm, kuv tsis muaj txiaj ntsim qab hau dab tsi ntxiv, kuv yog lub hiav txwv ntshai. Kuv ib ce txias thiab khov tas. Ntawm no koj yuav tsis pom txog Tswv Ntuj kev nyiam, koj yuav tsis pom ib tee kev vam khom. Kuv raug nqus mus hauv lub ncauj qhov ntawd, kuv qw cuag li ib tug neeg vwm. Kuv paub tias yog kuv poob mus hauv lub qhov, mas kuv yuav nce lost sis tau li lawm. Kuv tus plig yuav tuag mus tas ib txhiab ib txhis.
Thaum kuv tab tom yuav ploj mus hauv lub qhov tuag ntawd, kuv pom tus Tshiab Mis Kes cev tes los tuav kuv txhais taw cia. Kuv ib ce twb poob hauv lawm tiag, tshuav nkaus kuv txhais taw ua tus Tshiab tuav cia xwb thiaj tsis tau poob rau hauv.
Cov dab phem ya cuag ca tuaj rub kuv kom poob mus nrog lawv nyob. Lawv zoo xws li cov kas nkag los tom los nqus qhov pom kev hauv kuv tus ntsuj plig.
Nej xav mas, puas txaus ntshai! Thaum yus pom ib co kas nkag puv yus ib ce tas zoo li ntawd.