3. Thaum kuv pom teb chaws them txim
Kuv thov hais qhia rau nej paub tias kuv tsis ntseeg txog Tswv Ntuj, kuv tsis coj ib txoj kev teev hawm dab tsi li. Tab sis thaum kuv nyob rau thaj tsam ntawd, kuv pib tsa suab qw tias ‘cov ntsuj plig nyob teb chaws them txim, thov koj pab kuv kom dim hauv qhov chaw no yuad! Kuv thov nej pab kuv mas!’ ces kuv hnov ib co suab quaj hnyiav nyob hauv cov hav iav, cov suab ntawd yog cov neeg hluas lub suab. Lawv lub suab quaj qw txom nyem tom hniav nkawv ua rau kuv haj yam ntxhov siab tuaj. Txawm tias yuav dhau los lawm 10 lub xyoos, los kuv txawm nco txog lawv cov suab ntawd. Kuv xav hais rau nej tias cov suab ntawd yog cov neeg lawv rov txo lawv txoj sia lub suab ntag. Qhov lawv quaj qw mob li ntawd vim lawv tab tom raug ib cov dab tsim txom, tab sis yam uas ua rau lawv mob txom nyem tshaj plaws mas yog lawv tsis muaj Tswv Ntuj nrog lawv nyob, vim qhov chaw ntawd tsis muaj leej twg yuav nco tau Tswv Ntuj li. Lawv poob mus rau thaj chaw ntawd thiab nyob txom nyem nkawv li ntawd ntev ib yam li lub caij nyoog lawv yuav tsum muaj txoj sia nyob saum ntiaj teb. Cov neeg rov txo txoj sia mas lawv nyob deb ntawm Tswv Ntuj lub txiaj ntsim ntshiab.
Nej puas paub tias txoj kev txom nyem tshaj mas yog dab tsi? Yog qhov tias yus rov pom yus niam yus txiv, cov kwv tij txheeb ze uas txawm muaj txoj sia nyob, lawv tab tom quaj tu siab tias yog lawv mas lawv tus neeg thiaj tau txo txoj sia tuag mus lawm. Lawv cov txheeb ze txoj kev tu siab no zoo xws li lawv tab tom coj lawv niam lawv txiv, lawv cov kwv tij txheeb ze uas lawv nyiam mus nyob rau dab phem teb chaws. Qhov no yog cov neeg txo nws txoj sia txoj kev txom nyem tshaj plaws. Lawv yuav pom cov txheeb ze kev tu siab no tshwm nyob hauv lawv lub tswv yim mus tas ib txhis.
Yam uas cov ntsuj plig poob hauv kev quaj hnyiav txom nyem no vam txog, mas yog lawv vam tias cov neeg txawm muaj txoj sia nyob yuav hloov lawv lub siab, lawv yuav tig los ua cov hauj lwm tsim koob hmoov, lawv yuav mus saib xyuas cov neeg mob nkees, thiab thov Leej Choj ua lub txoos teev Ntuj pub rau cov neeg tuag; ces cov ntsuj plig no thiaj yuav tau txais lub txiaj ntsim los ywg lawv kom muaj kev xyiv fab.
Cov ntsuj plig no mas lawv tsis muaj peev xwm yuav rov pab lawv tau, tsuas yog Tswv Ntuj xwb thiaj yuav pab tau lawv, yog pab nyob hauv lub txoos ua thaj txi Ntuj. Li ntawd mas cov kwv tij, peb yuav tau thov Txiv Plig ua thaj txi Ntuj mus pab lawv.
Kuv to taub tias thaum kuv raug txom nyem li ntawd, mas cov ntsuj plig nyob hauv kev txom nyem ntawd yuav pab tsis tau kuv, ces kuv pib qw pib yws tias yeej yog muaj tej yam tsis yog tshwm sim nyob hauv no lawm tiag. Kuv yog ib tus neeg muaj lub siab hlub lwm tus, kuv muaj lub siab ntshiab nas! Kuv tsis tau ua tub sab ntshaw luag lwm tus tej cuab tam, kuv tsis tau tua neeg, kuv tsis tau ua txhaum rau leej twg li, kuv cov hauj lwm los kuv twb nrhiav qhov zoo tshaj los cia kho kuv cov neeg mob, muaj ntau zaus lawv tsis muaj nyiaj them rau kuv los kuv twb tsis hais dab tsi, kuv twb tau faib tej cuab yeej cuab tam rau cov neeg txom nyem, es ua cas kuv ho tsum nyob rau thaj chaw no mas?
Kuv pib nrhiav qhov ncaj rau kuv, kuv xav tias kuv yog ib tug neeg zoo hauj sim, kuv tsim nyog yuav tsum tau mus nyob saum Ntuj Ceeb Tsheej.
Kuv ua dab tsis txhaum, ua dab tsi tsis yog, es kuv thiaj nyob ntawm no?
Txawm tias kuv tsis ntseeg Tswv Ntuj, tsis kav niaj lis piam, kuv kuj tau mus koom thaj txi Ntuj. Txawm kuv tsis kub siab mloog Txiv Plig ntuas, tsis kav kuv twb tsis ntxuam lub thaj txi Ntuj li. Yog li kuv qhov txhaum yog dab tsi tiag?
“Tso kuv tawm hauv thaj chaw no mas! Tso kuv tsuag tsuag mas!” Kuv kev qw ke ntshai. “Kuv yog cov Kav Tos Liv, kuv yog ib tug ntseeg hauv lub Koom Txoos Kav Tos Liv nas!”