‘Ntawv Ntshiab’ yog phau ntawv ntim Tswv Ntuj cov lus uas Tswv Ntuj tshoj neeg lub siab kom muab sau tseg kom tau pab neeg qhia txuj, pab neeg tiv kev dag, pab neeg kho tej yam yuam kev, pab neeg mus taug kev ncaj (2TMT 3: 16), thiab tshaj txog tus cawm lub qab ntuj neeg.
Ntawv Ntshiab yog ntxeev los ntawm lus Las Tis Nas tias ‘Biblia Sacra’ los lus Aas Kiv hais tias ‘Holy Bible’. ‘Biblia’, ‘Bible’ txhais tias ‘Phau Ntawv’. ‘Sacra’, ‘Holy’ txhais tias ‘Ntshiab’.
Cov kwv tij Hmoob hauv lub Koom Txoos Plos Tes Taas hu phau Ntawv Ntshiab ua ‘Ntawv Vaj Lug Kub’, vim yog ib lo lus piav txog Tswv Ntuj Lo Lus tias yog tus Vaj Lo Lus thiab yog ib lo lus muaj nqes li nyiaj thiab kub. Li ntawd lo lus ‘Vaj Lug Kub’ yog lub npe piav thiab cav lus zoo txog Tswv Ntuj Lo Lus, tab sis lo lus no yog lo lus cov ntseeg tsim tshiab, tsuas yog Hmoob thiaj siv xwb, lwm haiv neeg tsis muaj leej twg siv (TP. Nyiaj Pov 1995).
Lub Koom Txoos Kav Tos Liv phau Ntawv Ntshiab ntim cov phau ntawv me 73 phau raws li tus txhooj Xya Caum (Septuagint). Ntawv Ntshiab cais ua 2 ntu; yog Ntawv Cog Qub Lus muaj 46 phau ntawv me, thiab Ntawv Cog Lus Tshiab muaj 27 phau ntawv me. Ntawv Cog Qub Lus sau ua xeem lus Hes Nplaws, lus As Las Mais, thiab lis Hes Las piav cov xwm ua ntej Huab Tais Yes Xus yug los, yog cov xwm hais txog haiv His Xas Lais tej kwv huam thiab liv xwm. Ntawv Cog Lus Tshiab sau ua xeem lus Hes Las piav txog Huab Tais Yes Xus lub neej, Huab Tais Yes Xus cov lus qhia, Huab Tais Yes Xus kev tuag thiab sawv rov los, hais txog lub Koom Txoos sawv thiab pib hlob.
Ntawv Ntshiab yog dab tsi?
