Ntawv Yob sau tau zoo tshaj lwm cov phau ntawv qhia kev thoob tsib; yam li nws tu tus txheej txheem zoo thiab txawj piav cov zaj, txawj hais lus kom nrov zoo thiab kom muaj txwm. Tus sau yog ib tug His Xas Lais nyob txawm hauv Yus Das teb sau ze ntawm 480 xyoo ua Yes Xus ntej.
Ntawv Yob muaj lub ntsiab li no:
Thawj ob zag yog piav txog ‘Yob’, nws yog ib tug neeg txheej thaud nyob ze As Las Npias ciam teb, nws yog ib tug neeg muaj, nws hwm Ntuj zoo, thiab nws noj qab nyob zoo.
Muaj ib hnub Yob tau raug ntau yam xwv txheej loj. Qhov kawg nws tau raug ib tug mob phem, ces Yob poj niam hais rau Yob kom nws cem Ntuj tab sis Yob hwm Tswv Ntuj zoo li qhov qub.
Muaj peb tug neeg sib hloo tuaj ntuas Yob. Lawv ib tug ntuas Yob zuj zus, mas Yob teb lawv ib tug zuj zus. Lawv ua li ntawd 3 zaug sib law, ces tsis muaj ib tug tuaj ntuas Yob ntxiv. Lawv puav leej xav hais rau Yob tias vim Yob ua txhaum ntau mas nws thiaj li raug txom nyem li ntawd. Tab sis lawv ntuas Yob npaum twg mas Yob teb tias nws tsis tau ua txhaum rau Tswv Ntuj; nws tsis to taub tias yog vim li cas Tswv Ntuj thiaj pub txoj hmoov phem rau nws, tab sis nws tsis cem Tswv Ntuj.
Qhov kawg Tswv Ntuj tuaj ntuas Yob tias neeg yuav to taub Tswv Ntuj tej txoj kev tsis tau.
Nyob hauv zaj xaus ntawv Yob piav tias Tswv Ntuj pub kom Yob rov tau nyob dawb nyob huv noj qab nyob zoo.
Ntawv Yob tus txheej txheem.

1. Xas Tas tau lus kheev mus ua xwv txheej rau Yob (Yb 1-2).
2. Yob peb tug phooj ywg nrog Yob tham (Yb 3-31).
   2.1. Cov lus sib tham sib ntuas zaum ib (Yb 3-14).
   2.2. Cov lus sib tham sib ntuas zaum ob (Yb 15-21).
   2.3. Cov lus sib tham sib ntuas zaum peb (Yb 22-27).
   2.4. Lus cav txog kev thoob tsib (Yb 28).
   2.5. Lus xaus cov lus sib tham sib ntuas (Yb 29-31
3. Es Lis Hus qhuab qhia Yob thiab peb tug phooj ywg (Yb 32-37).
4. Yas Ves Tswv Ntuj ntuas Yob (Yb 38-41).
5. Cov lus xaus phau ntawv Yob (Yb 42).
   5.1. Yob zoo siab txais Yas Ves Tswv Ntuj lus ntuas.
   5.2. Yas Ves Tswv Ntuj cem Yob cov phooj ywg.
   5.3. Yas Ves Tswv Ntuj rov tsa Yob nyob hauv txoj kev vam meej.
   Ntawv Yob zoo qhia dab tsi?
   Ntawv Yob xav piav tias yog vim li cas cov neeg siab ncaj tseem yuav raug txom nyem raug xwv txheej ntau. Yob cov phooj ywg teb rau qhov ntawd raws li zeej tsoom ib txwm hais kam; yam li lawv hais tias:

• Cov neeg tau nyob dawb nyob huv kuj yog tab sis nws tsis tau nyob ntev li ntawd.
• Tus neeg siab ncaj raug txom nyem kuj yog, tab sis yog ib txog kev sim nws siab saib nws siab puas zoo tiag.
• Tej zaus tus neeg siab ncaj raug txom nyem vim nws tau ua tej yam txhaum uas nws tsis paub, los tus neeg siab ncaj tau ua tej yam txhaum uas nws tsis nyiam pes tsawg tab sis nws tsis muaj zog ua qhov zoo.
• Tej zaus Tswv Ntuj tso xwv txheej tuaj raug cov neeg siab ncaj vim muaj tej yam zoo uas lawv yuav ua tau tab sis lawv tsis kub siab ua, los yog tus siab zoo ua txhaum tab sis tsis yog vim nws txhob txwm ua.
• Tej zaus Tswv Ntuj tso xwv txheej tuaj nphav tus siab ncaj vim Tswv Ntuj xav thaiv nws kev ua txhaum, los Tswv Ntuj xav pab tus siab ncaj kom nws txhob muab hlob, kom nws txhob xav tias nws yog ib tug neeg zoo dua luag tej.
  Li ntawd, mas Yob cov phooj ywg xav tias ib tug neeg raug kev txom nyem thaum twg, mas yog vim nws raug kev ua txhaum los yog vim Ntuj xav pab nws kom txhob ua txhaum.
  Tab sis Tswv Ntuj hais rau Yob tias Tswv Ntuj txoj kev coj neeg mus, mas neeg yuav to taub tsis tau; thaum yus raug txom nyem mas yus yuav ua li no:

1. Txhob nrhiav tias yog vim yus ua txhaum dab tsi.
2. Yuav tso siab mus li tias Tswv Ntuj siab zoo, nws pov hwm yus. Yus txoj hmoov yeej yog ib txog hmoov pab yus mus taug kev ua neeg siab ntshiab.
3. Yog vim ntiaj teb neeg ua txhaum thiaj muaj kev txom nyem raug neeg nyob ntiaj teb no. Tab sis tsis yog vim yus ua txhaum yus thiaj raug txom nyem.
   Yog thaum Huab Tais Yes Xus tuaj mas nws thiaj qhia tias tseem muaj lwm tiam uas neeg yuav txais txoj hmoov phim neeg cov koob hmoov, thiab txoj kev raug txom nyem muaj nqes vim peb txoj kev txom nyem nrog Huab Tais Yes Xus txoj mas pab cawm lub ntiaj teb neeg.