Nyob teb chaws Yus Das, lawv ua tsev, mas lawv muab tej tus nqaj thiab ib co ceg ntoo thiab ib co av nplaum nplaum los ua ib lub ru pheeb me ntsis kom xwv cov dej nag ntws saud. Lawv puab ib tug ntaiv cia nce mus saum lub ruv. Lub tsev Yes Xus so yog Pob Zeb lub, ces muaj neeg coj lawv cov neeg mob coob coob tuaj rau Yes Xus kho. Plaub tus neeg nqa lawv tus swm neeeg tus tuag ceg tuaj. Lawv pom tias tsis muaj chaw coj lawv tus neeg mob mus cuag Yes Xus, mas lawv nce mus saum lub qhaum tsev, lawv tho ib lub qhov ntawm lub ru kom txaus tso tus tuag ceg nqes los hauv lub tsev. Ntshai cov neeg hauv tsev cem, tab sis 4 tug neeg tsis mloog, lawv tseev thov Yes Xus kho lawv tus neeg tuag ceg.  Yes Xus tsis nrog luag yws, nws tsis cem 4 tug neeg ntawd. Yes Xus tsuas pom tias cov neeg ntawd ntseeg tas siab tias Yes Xus muaj lub hwj huam tuaj ntawm Tswv Ntuj, ces Yes Xus kho lawv tus neeg tuag ceg kom zoo hlo.

Cov Yus Das ntseeg tias tos tib neeg raug mob vim yog tib neeg ua txhaum, ces Tswv Ntuj rau txim rau. Tab sis Yes Xus tsis ntseeg li ntawd; muaj ib zaug Yes Xus hais rau cov thwj tim nug nws txog tus dig muag nruab thiab los tias tsis yog nws ua txhaum thiab tsis yog nws niam nws txiv txhaum, nws thiaj dig muag, tab sis nws yug los dig muag kom xwv Tswv Ntuj cov hauj lwm tshwm hauv nws tuaj rau sawv daws pom (Z 9: 2-3). Tus tuag ceg, nws ntseeg li cov Yus Das, ces nws xav kom Tswv Ntuj zam txhaum rau nws, nws thiaj yuav rov mus taus kev.

Nyob ntawd kuj muaj cov Kws Ntawv Ntshiab nrog lawv thiab; lawv tuaj mloog saib Yes Xus qhia txog dab tsi. Thaum lawv hnov Yes Xus hais rau tus tuag ceg tias “Koj cov txhaum daws tas lawm” (MK 2: 5), mas lawv xav tias Yes Xus tab tom thuam Tswv Ntuj. Lawv xav tias kawg yog Tswv Ntuj tib leeg xwb thiaj daws txhaum tau; lawv xav li no yeej yog kawg. Tab sis lawv xav yuam kev txog Yes Xus, lawv tsis nco pom tias Yes Xus muaj Tswv Ntuj lub hwj huam (God’s authority).

Yes Xus tseem hais ntxiv rau lawv tias lo lus ‘koj cov txhaum daws tas lawm’ thiab lo lus ‘koj sawv mus kev’, ob lo lus no lo lus twg yuav hais yooj yim dua. Kawg yog lo lus ‘koj cov txhaum daws tas lawm’, tab sis yog tus tuag ceg sawv mus kev, mas txhais tau tias Yes Xus yeej muaj hwj huam daws tau nws cov txhaum tiag, nws thiaj mus taus kev.

Yes Xus tseem ncaj qha hais rau lawv tias nws yog ‘Neeg Leej Tub’ (Son of Man).  Lo lus no yog hais txog ‘leej neeg’ (a man) vim Yes Xus yog tseem tib neeg (human). Thiab lo lus no tseem hais txog ‘tus neeg muaj hwj chim’ (a powerful person) tawm tuaj tsa nws lub tsa nws lub tuam teb nyob mus li tsis txawj kawg raws nraim cov lus hauv ntawv Das Nias (DN 7: 13-14).

Cov Kws Ntawv Ntshiab yog cov neeg tau kawm phau Ntawv Ntshiab thiab kawm Mais Xes txoj cai ntau, lawv paub tias tus Neeg Leej Tub uas sau txog hauv ntawv Das Nias yog ib tug tuaj ntawm Tswv Ntuj thiab nws muaj peev xwm ua hwj huam xws li Tswv Ntuj pub; tus ntawd yog tus ‘Mes Xias’ (Messiah) los yog ‘Leej Pleev’ (Christ).

Yog li thaum Yes Xus rov hu nws ua ‘Neeg Leej Tub’, mas yog Yes Xus tab tom hais rau lawv tias nws yog tus Mes Xias tuaj ntawm Tswv Ntuj tuaj, nws muaj Tswv Ntuj lub hwj huam nrog nws, nws ua tau cov hauj lwm Tswv Ntuj ua, nws loj ib yam li Tswv Ntuj.