Nyob rau lub zim txwv ntawd, tus mob phem thiab txaus ntshai tshaj plaws yog ‘tus mob ruas’ (Leprosy). Muaj 3 yam mob ruas;

1) Tus mob ruas ua rau lub cev nce pob thiab ua kua paug.

2) Tus mob ruas ua rau tej nqaij txhav tej leeg caws tej yas txha o ua tej lub pob ces pom tias yas tes yas taw los yog ntiv tes luv tuaj.

3) Tus mob ruas ua rau cev nqaij ua kua paug nti thiab mob pob qij txha.

Tus neeg twg tau tub mob ruas tsis hais yam twg los xij, nws yuav nyob hauv kev txom nyem mus tas nws sid. Nws ua neej zoo li ib tug neeg tuag los yog poob rau dab phem cov hluav taws. Nyob hauv phau ntawv Les Vis hais tias tus neeg daim tawv xoo pob, voos kiav txhab, tawv nqaij pheej txaij; mas ceev faj tsam yog mob ruas (LV 13: 1-2) vim tias txheej thaud sawv daws tseem tshuaj tsis tau tias tus mob twg yog mob ruas thiab tus mob twg yog mob cev. Tab sis txoj cai tsis pub lawv nyob xyaw zeej tsoom, tus neeg mob tsum tau tawm mus nyob sab yeej nrawd, nws yuav tsum hnav tej ris tsho khaub hlab, cia plaub hau ntxhov, nws yuav npog sab di ncauj saud thiab qw tias ‘tsis huv! tsis huv!’ kom sawv daws paub (LV 13: 45-46).

            Tus neeg mob ruas los cuag Yes Xus, nws ntseeg tias Yes Xus muaj hwj huam kho tau nws tus mob. Tab sis nws tsis paub tias Yes Xus nyiam tsoom sid, nws tsis ruaj siab tias Yes Xus puas yuav kho nws.

Cov Yus Das lawv tsis kam kov tus neeg mob ruas, lawv hais tias yog lawv chwv tus mob ruas mas lawv yuav tsis huv. Tab sis Yes Xus tsis xav li sawv daws, Yes Xus kov tus mob ruas. Yes Xus ua li ntawd, yog Yes Xus xav qhia tus mob ruas tias Yes Xus nyiam nws.

Yes Xus coj rawv txoj cai, mas Yes Xus thiaj li hais kom nws mus thws nws lub cev rau tus Leej Choj saib thiab mus cev paj tshab raws li Mais Xes qhia (LV 14: 1-32). Tus mob ruas tsis mloog Yes Xus hais, nws tshaj tej Yes Xus ua rau nws rau zej zog paub, ces Yes Xus thiaj tsis tau kev tab meeg mus hauv lub nroog.