Ntawv cov Nkauj Paj Nruag los yog cov Zaj Ntxuag Qeej yog cov His Xas Lais cov zaj hu nkauj teev Tswv Ntuj. Ib txwm cov His Xas Lais yeej tsim tej zaj hu nkauj teev Tswv Ntuj.
Yog vim tas txhua haiv neeg nyob ntiaj teb no lawv muaj lawv cov zaj kwv txhiaj, lus taum los hu nkauj. Sawv daws txawj tsim tej zaj zoo mloog muaj txwm; lawv seev suab laug suab hais, lawv muab suab qeej suab raj los ntxuag rau kom zoo mloog dua. cov His Xas Lais lawv ib txwm muaj lawv tej zaj kwv txhiaj thiab tej zaj hu nkauj xws li luag, tab sis lawv yog ib haiv neeg nyiam Tswv Ntuj tshaj nyiam neeg ces lawv thiaj tsim tej zaj hu nkauj teev Tswv Ntuj.
Thaum cov His Xas Lais hla lub hiav txwv Tauj tas, lawv hu nkauj ua Tswv Ntuj tsaug (KT 15). Thaum Yos Nas Thas tuag lawm, Das Vis hais ib zag nkauj tu siab (2XM 1). Thaum Das Nias nyob hauv lub qhov hluav taws mas nws kuj hu nkauj (DN 3). Thaum Mab Liab mus xyuas Es Lis Xas Npes, nws hu nkauj cav txog Tswv Ntuj saib nws zoo (LK 1: 46-55). Tseem tshuav ntau zaj zoo li ntawd nyob hauv Ntawv Ntshiab.
Tab sis cov His Xas Lais tseem muaj ib phau ntawv uas yog ib co zaj hu nkauj xwb. Phau ntawv no muaj 150 zaj. Thaud, cov Nkauj Paj Nruag sib ncaim nyob hauv ntau phau ntawv. Yog lub caij uas cov His Xas Lais mus nyob txim nyob Npas Npis Los rov los, lawv thiaj muab los ua ke ua ntawv ‘cov Nkauj Paj Nruag’.
Tus xub pib tsim cov Nkauj Paj Nruag yog tus vaj Das Vis vim nws txawj hu nkauj zoo thiab nws txawj ntaus thaj cheej. Muaj tej tus Kws Ntawv Ntshiab xav tias hais qhov tsawg mas muaj 47 zaj Nkauj Paj Nruag yog Das Vis tsim. Muaj ntau zaj yog cov tswj cov pab neeg tshuab qeej ntaus nruas hauv lub Tuam Tsev Teev Ntuj tau tsim. Tseem muaj ntau zaj hauj sim yog lub caij cov Yus Das mus nyob txim nyob Npas Npis Los ces lawv tsim. Thiab tseem muaj tej zaj yog lub caij lawv rov los nyob Yes Lus Xas Les lawv thiaj mam tsim. Li ntawd, qhov kawg mas yuav hais tias tus vaj Das Vis xub qhib txoj kev ua cov Nkauj Paj Nruag thiab niaj tiam muaj ntau leej ua ntxiv raws Das Vis tus lwj lwm.
Thaum lub caij Das Vis ua vaj, nws muaj nws ib pab neeg hu nkauj thiab txawj dhia, Xas Los Moos kuj muaj. Tej hnub lawv ua hmoov hauv lub Tuam Tsev Teev Ntuj mas cov neeg ntawd dhia hu nkauj tshuab qeej, ntaus nruas, tshuab puab tshuab hom nog ncas thiab hais cov Nkauj Paj Nruag. Nyob hauv cov Nkauj Paj Nruag kuj muaj ib txog kab piav txog tus tsim zaj nkauj thiab pab neeg twg dhia los hu nkauj.
Li ntawd, peb thiaj paub tias lawv txhob txwm tsim cov Nkauj Paj Nruag los siv nyob hauv lub Tuam Tsev Teev Ntuj nyob Yes Lus Xas Les. Tab yog tej zaj uas yog ib tug neeg tsim los thov ntuj rau nws, mas lawv kuj siv nyob hauv cov tsev teev Ntuj.
Cov His Xas Lais mus nyob txim rov los, lawv txhim tej lub tsev txoos nyob hauv lawv cov nroog, ces lawv siv cov Nkauj Paj Nruag nyob hauv lawv cov tsev txoos.
Cov His Xas Lais hu cov Nkauj Paj Nruag mas lawv siv ib co twj ntaus paj nruag; yam li ‘nkauj nog ncas 8 txoj hlua, raj xyu, raj kub tshis, nruas npuaj, nruas zoj, nruas pluav dai tswb’ los ntxuag cov neeg lub suab hu nkauj.
Ntawv Nkauj Paj Nruag faib ua 4 lub ntsiab 4 hom.

1. Cov zaj hu nkauj cav txog Tswv Ntuj, muaj tus txheej txheem zoo li no:
   1. 1. Xub hais ib lo lus txhib sawv daws kom muab siab rau cav txog Tswv Ntuj.
      1.2. Piav tias yog vim li cas peb thiaj yuav cav txog Tswv Ntuj; yam li Tswv Ntuj muaj hwj huam tsim lub ntuj lub teb, Tswv Ntuj kav lub sim ceeb, Tswv Ntuj ua hwj huam cawm His Xas Lais.
      1.3. Ib co lus xaus; yam li tej zaus yog rov qab yuav cov lus qhib zaj, los tej zaus yog ib lo lus thov ntuj.
      1.4. Cov zaj cav txog lub roob Xis Yoos los yog lub tsheej Yes Lus Xas Les uas yog qhov chaw Tswv Ntuj nyob thiab yog qhov chaw sawv daws yuav tuaj teev Tswv Ntuj.
      1.5. Cov zaj cav txog Tswv Ntuj kav nws lub Ceeb Tsheej xws li cov vaj kav tej lub tsheej zoo tshaj nyob ntiaj teb no, Tswv Ntuj yog tus vaj tas ntiaj teb yuav sawv los hwm
      Cov Nkauj Paj Nruag hu nkauj cav txog Tswv Ntuj mas yog zaj 8, 19, 29, 33, 45-48, 76, 84, 87, 93, 96-100, 103-106, 113, 114, 117, 122, 135, 136, 145-150.
2. Cov zaj hu nkauj thov Tswv Ntuj, tus txheej txheem zoo li no:
   2.1. Xub hais ib lo lus hu txog Tswv Ntuj, thov kom Tswv Ntuj pab, los hais ib lo lus tso siab rau Tswv Ntuj.
   2.2. Tus ua zaj xav kom Tswv Ntuj hlub nws, nws thiaj piav nws txoj kev txom nyem; nws vam txog ib co paj lug los piav nws txoj kev txom nyem los yog piav cov xwv txheej nws tau raug. Nws hais txog qab tiv txwv, hais txog cov rooj ntxiab, hais txog lub lam theeb puam, hais txog cov yeeb ncuab, hais txog tej tsiaj, hais txog nws cov pob txha ntsoog tas, nws hais txog lub siab lub plawv, nws hais txog tej kev ntshai tshee na. Nws hais nws txoj kev txom nyem tas li ntawd, nws hais tias nws tsis muaj txhaum los nws lees txhaum.
   2.3. Tus ua zaj kuj tseem hais rau Tswv Ntuj tias nws tso siab rau Tswv Ntuj vim Tswv Ntuj twb tau zam rau tsoom poj yawm txwv koob, Tswv Ntuj yog tus siab zoo tsis fav xeeb. Tej zaus nws tseem hais tej lo lus ua Ntuj tsaug ntxiv. Ntau zaus tus txheej txheem zoo li piav no tab sis nyias zaj txawv nyias thiab.
   Cov Nkauj Paj Nruag hu nkauj thov Tswv Ntuj muaj 2 yam: cov zaj tas zeej tsoom thov Tswv Ntuj, thiab cov zaj yog ib tug neeg thov Tswv Ntuj.

• Cov Nkauj Paj Nruag tas zeej tsoom hu nkauj thov Tswv Ntuj; zoo li zaj 12, 44, 60, 74, 79, 80, 83, 85, 106, 123, 129, 137. Cov Nkauj Paj Nruag no lawv hu thaum txog tej lub caij uas lub teb chaws raug xwv txheej loj yam li ua rog swb los yog raug kev tshaib plab, mas cov His Xas Lais thov Tswv Ntuj cawm lawv thiab rov tsa lawv nyob hauv txoj kev vam meej.
• Cov Nkauj Paj Nruag ib tug neeg hu los thov Tswv Ntuj; yam li zaj 3, 5, 6, 7, 13, 17, 21, 22, 25, 26, 28, 31, 35, 38, 42, 43, 51, 54, 55, 56, 57, 59, 63, 64, 69, 70, 71, 77, 86, 102, 120, 130, 140, 141, 142, 143. Cov Nkauj Paj Nruag li hais no mas lawv hu los thov Tswv Ntuj thaum lawv ntshai kev ploj kev tuag, los lawv raug hiam, los lawv nyob txim nyob pej kum teb, los lawv raug txom nyem raug kev mob nkeeg, los lawv poob hauv kev ua txhaum.
  Cov Nkauj Paj Nruag no mas ua ntej yog ib tug neeg hu los thov ntuj rau nws, tab sis ntev mus sawv daws yuav nws zaj nws cov lus los thov Tswv Ntuj rau lub teb chaws vim yuav txhais cov lus ntawd los hais txog lub teb chaws kuj tau.

1. Cov zaj hu nkauj ua Tswv Ntuj tsaug.
   Cov Nkauj Paj Nruag ua Tswv Ntuj tsaug mas tsis tshua muaj ntau; tej zaj mas yog ib tug ua Tswv Ntuj tsaug vim nws nyuam qhuav raug xwv txheej ces nws dim los yog nws tau txais txiaj ntsim, tej zaj mas yog tas tsoom sid ua Tswv Ntuj tsaug vim Tswv Ntuj cawm lawv los yog npo tsoom His Xas Lais ntawm ib yam xwv txheej los yog Tswv Ntuj pub qoob loo ntsu rau lub teb chaws los yog Tswv Ntuj tej xwm zoo tuaj txog cov His Xas Lais tus vaj.
   Cov Nkauj Paj Nruag hu nkauj ua Tswv Ntuj tsaug mas muaj li zaj 18, 21, 30, 33, 34, 40, 65, 66, 67, 68, 92, 116, 118, 124, 129, 138, 144.
2. Cov zaj hu nkauj hais txog lwm yam.
   Cov Nkauj Paj Nruag no ib nrab yog ib cov lus thov Tswv Ntuj vim kev txom nyem thiab ib nrab yog ib cov lus ua Tswv Ntuj tsaug; zoo li zaj 28 thiab zaj 57. Muaj tej zaj cav txog Mais Xes txoj cai; xws li zaj 119. Muaj tej zaj yog ntuas kom mus taug kev thoob tsib; xws li zaj 1, 112, 127, 25, 32, 37, 73. Tseem muaj tej zaj tshaj txog tej xwm yuav tshwm sim yav tom ntej; zoo li zaj 2, 50, 75, 81, 82, 85, 95, 110.
   Thaum cov Yus Das txais kev ntseeg txog Yes Xus lawm, lawv tau muab phau Nkauj Paj Nruag faib ua 5 phau.
   Phau 1. Das Vis cov Nkauj Paj Nruag (Zaj 1 txog zaj 41).
   Phau 2. Kos Les thiab As Xas cov Nkauj Paj Nraug (Zaj 42 txog zaj 72).
   Phau 3. Kos Les thiab As Xas cov Nkauj Paj Nraug (Zaj 73 txog zaj 89).
   Phau 4. Tsis paub tus neeg tsim (Zaj 90 txog zaj 106).
   Phau 5. Lub Koom Txoos tsim los siv teev Tswv Ntuj (Zaj 107 txog zaj 150).
   Nyob hauv phau 5 tseem muaj 15 zaj yog ‘cov nkauj nce’ vim yog cov Nkauj Paj Nruag uas cov His Xas Lais hu thaum lawv nce tuaj mus ua kab ke teev Ntuj pem lub Tuam Tsev Teev Ntuj nyob Yes Lus Xas Les. Cov nkauj nce yog ib cov nkauj luv luv hais txog kev tso siab, kev thoob tsib, thiab kev sib hlub. Cov nkauj nce mas yog zaj 120 txog zaj 134.
   Tag nrho 150 zaj Nkauj Paj Nruag tau hais txog 10 yam loj li no:
3. Hais txog Tswv Ntuj yog tus muaj peev xwm nyob mus li, nws tsim lub sim ceeb, nws muaj lub siab npuab nws haiv neeg.
4. Nqua hu tas lub sim ceeb kom nrog neeg cav txog Tswv Ntuj.
5. Cav txog Tswv Ntuj lub Tuam Tsev Teev Ntuj thiab Tswv Ntuj lub Tsheej.
6. Cav txog Tswv Ntuj yog cov His Xas Lais tus tseem vaj.
7. Thov Tswv Ntuj pab.
8. Thov Tswv Ntuj zam txhaum.
9. Kev tso siab rau Tswv Ntuj.
10. Ua Tswv Ntuj tsaug.
11. Cav txog Tswv Ntuj cawm His Xas Lais lub keeb.
12. Qhuab qhia kom nyiam mloog Tswv Ntuj txoj cai.
    Cov Nkauj Paj Nruag hais txog cov vaj His Xas Lais ntau zaus vim lawv tsim cov zaj ntawd lub caij muaj ib co vaj Yus Das thiab ib co vaj His Xas Lais. Cov vaj ntawd puav leej tau txais cov roj tsa lawv ua vaj; lawv yog Tswv Ntuj cov neeg ‘xaiv’, yog Tswv Ntuj cov ‘vaj pleev’. Lawv puav leej hais tias lawv yog ‘Das Vis xeeb ntxwv’, lawv puav leej ntseeg tias nyob hauv lawv tsoom xeeb ntxwv yuav muaj ib tug ua Vaj Pleev txawv luag tej; nws yuav ua vaj mus li xws li tus Yaj Saub Nas Taas xub hais ceeb toom rau Das Vis (2XM 7).
    Lub caij uas tsis muaj cov vaj His Xas Lais los Yus Das, mas tsoom His Xas Lais tseem hais cov Nkauj Paj Nruag cav txog cov vaj tab sis lawv muab txhais los cav txog ib tug Vaj Pleev yuav sawv los kav Tswv Ntuj haiv neeg. Nyob hauv Ntawv Moo Zoo, Huab Tais Yes Xus kuj hais tias cov Nkauj Paj Nruag ntawd yog cav txog nws.
    Yog vim tej ntawd tib si mas nyem no lub Koom Txoos thiaj muab cov Nkauj Paj Nruag cav txog cov vaj His Xas Lais los ua tej zaj cav txog Huab Tais Yes Xus uas yog Tswv Ntuj tus ‘Tseem Vaj Pleev’.