Ntawv Xam Phaj yog ntxeev los ntawm lo lus Las Tis Nas tias ‘Numeri’ los yog lus Aas Kiv tias ‘Number’. Tab sis cov Yus Das hu phau ntawv no ua ‘Bemidbar’ txhais tias ‘nyob teb chaws suab puam’. Tos hu ua ntawv Xam Phaj vim tias nyob hauv zaj 1 txog zaj 4 thiab zaj 26 lawv txheeb cov His Xas Lais, mas lawv thiaj hu phau ntawv no ua ‘Xam Phaj’.

Ntawv Xam Phaj yog tuaj ntawm 3 txog kwv huam; yam li Yas Ves, Es Los His, thiab Leej Choj. Muaj ntau zaj uas lawv sau tseg lub caij Das Vis thiab Xas Los Moos ua vaj. Muaj zaj puav uas zoo li cov lus nyob hauv tus Yaj Saub Es Xes Kias phau ntawv thiab. Li ntawd, ntshai yog cov khaws kwv huam tseg los ua phau ntawv Xam Phauj, lawv txais tej zaj ntawd ntawm Es Xes Kias cov thwj tim los.

Tseem muaj tej txoj cai uas yog lub caij Es Nras thiab Nes Hes Mis kav cov His Xas Lais, lawv thiaj ntxiv los ua ntawv Xam Phaj tab sis yog qib puav xwb. Yog lub caij Es Nras thiab Nes Hes Mis rov qhia Mais Xes txoj cai rau cov His Xas Lais, lawv thiaj tu ntawv Xam Phaj zoo li peb niaj hnub nyeem.

Nyob hauv ntawv Xam Phaj, zaj 1 txog 4 yog zaj txheeb neeg nyob teb chaws suab puam. Lawv hais ntau dua txog lub xeem Les Vis; lawv piav txog cov ua kab xwm Leej Choj thiab kab xwm Les Vis nyob hauv xeem Les Vis.

Zaj 5 txog 6 yog ib co txoj cai qhia tej kab ke uas cov Leej Choj yuav ua rau luag tej; zoo li thaum cov His Xas Lais ua tub sab lawv yuav them rov qab zoo li cas, thaum ua plaub tsis muaj yam zeem tseeb zoo mas yuav ua zoo li cas, cov fiv yeem Nas Xis Las yuav ua zoo li cas. Tseem muaj ib zag foom hmoov rau cov me nyuam thiab.

Zaj 7 thiab 8 hais txog thaum cov His Xas Lais tseem nyob ntawm taw roob Xis Nais, lawv ua ib thaj txi Ntuj loj uas cov nom tswv cev paj tshab rau Tswv Ntuj. Lawv tsa ib pab neeg ua tub kav xwm Les Vis.

Zaj 9 thiab 10 cov His Xas Lais ua Hmoov Hla thiab npaj sawv kev mus ntxiv hauv teb chaws suab puam. Ntawv hais ntev hauj sim txog twv huab ua His Xas Lais ntej thiab hais txog ob lub hom.

Zaj 11 txog zaj 14 yog piav txoj kev lawv taug txij lub roob Xis Nais mus txog Kas Des. Cov His Xas Lais yws yws, Tswv Ntuj yuav muab lawv nplua mas Mais Xes thov kom Tswv Ntuj zam rau cov His Xas Lais.

Tsoom pej xeem thiab tas haiv neeg sawv daws tshaib plab. Cov His Xas Lais rov qab quaj quaj yws yws. Yas Ves npau taws heev, hos Mais Xes ntxhov siab kawg. Tas tsoom His Xas Lais yws yws Mais Xes thiab As Loos nkawd, lawv sib hais lawv zom zaws tias lawv yuav tsa ib tug thawj coj lawv rov mus Hais Nkws Tos teb.

Tas tsoom His Xas Lais tab tom tham tias lawv yuav txawb pob zeb tua Mais Xes, As Loos, Yos Xuas, thiab Kas Les lawv kom tuag, ces Yas Ves lub hwj chim tawm los nyob ntawm lub Tsev Tsam Phooj Sib Ntsib rau cov His Xas Lais pom. Yas Ves hais rau Mais Xes tias yuav rho lub cuab tam ntawm cov His Xas Lais, thiab yuav cia Mais Xes tsim ib haiv neeg tshiab.

Mais Xes tsis pom zoo, mas Yas Ves thiaj li zam rau cov His Xas Lais, tab sis lawv cov tau sim thiab tsis xav mloog Tswv Ntuj lus, mas lawv yuav tsis pom lub teb chaws uas Tswv Ntuj tau cog lus pub rau lawv cov yawg koob.

Zaj 15 txog 19 yog tej txoj cai hais txog kev txi Ntuj thiab piav tias cov Leej Choj thiab cov Les Vis muaj cai ua dab tsi. Kuj muaj ib zag hais txog Kos Les, Das Taas, thiab As Npis Laas ntxeev siab, ces av rua ncauj nqos lawv thiab lawv cov cuab tam.

Zaj 20 txog 25 piav tias cov His Xas Lais tso Kas Des tseg mus txog Muas teb. Yog nyob hauv ntu no thiaj piav txog tus nab tooj, txog tus pej kum Yaj Saub Npas Las Has, piav txog cov His Xas Lais ua dab nyob Pes Os.

Zaj 26 txog 30 mas lawv rov txheeb cov His Xas Lais. Piav txog kev txi Ntuj, piav txog hnub nyoog nqaum paj nqaum nruas tsa tsev tsam phooj, piav txog cov hnub nyoog yuav coj.

Zaj 31 txog 36 piav txog cov His Xas Lais siv cov cuab yeej lawv txeeb tau ntawm cov yeeb ncuab. Piav tias lawv sib faib teb chaws zoo li cas nyob Kas Nas Has teb. Muaj ib zag rov piav txoj kev cov His Xas Lais taug txij Hais Nkws Tos teb los txog Kas Nas Has teb.