Xes Xis Lias yug kws yees li xyoo 200 ntawd. Nws yog ib tug ntxhais noob nom nyob Los Mas. Xes Xis Lias txais lub Cim Ntxuav thaum tseem yau. Thaum tiav hluas nkauj, nws niam thiab txiv muab nws khaib rau tus hluas ‘Vas Les Lias’ (Valerian) tab sis Xes Xis Lias xav ua ib tug ntxhais nkauj xwb. Vim li ntawd, Xes Xis Lias thiaj yoo mov thiab thov Tswv Ntuj tsoom Tshiab pab nws. Muaj ib hnub, Xes Xis Lias hais rau Vas Les Lias tias “Kuv yuav qhia kuv txoj kev zais rau koj, kuv muaj ib tus Tshiab pov hwm kuv. Kuv tus Tshiab no yuav rhuav cov neeg los zes kuv.”
Thaum Vas Les Lias hnov li ntawd, Vas Les Lias thiaj kom Xes Xis Lias hais tus Tshiab tawm los rau Vas Les Lias pom. Xes Xis Lias thiaj xa Vas Les Lias mus cuag Vaj Qhia Aws Npas (Pope Urban I). Vas Les Lias kawm Ntuj kev cai ntawm Vaj Qhia, nws pom ib tug yawg laus ci ntsa iab los cev ib phau ntawv rau nws. Nyob hauv phau ntawv sau cov lus tias “Muaj ib tug Huab Tais xwb, muaj ib zaj zoo ntseeg xwb, muaj ib lub Cim Ntxuav cawm tau neeg xwb.”
Vas Les Lias nyeem cov lus no tag, nws thiaj txais lub Cim Ntxuav ntawm Vaj Qhia. Vas Les Lees rov qab los txog tsev, nws pom Xes Xis Lias tab tom thov Ntuj nyob hauv chav tsev siab, muaj ib tus Tshiab nrog Xes Xis Lias nyob. Tus Tshiab ntawd ob txhais tis cig cuag nplaim taws, hauv tus Tshiab txhais tes tuav ib lub kaus mom paj ntshua nplaim thiab paj nroj. Tus Tshiab muab lub kaus mom paj los ntoo rau nkawd tas ces nws yaj ntshis lawm.
Vas Les Lias tus kwv ‘Tis’ (Tiburce) tuaj xyuas nkawd, ces nws hnov tsw tsw qab nyob hauv Vas Les Lias thiab Xes Xis Lias nkawd lub tsev. Tis nug nkawd, ces Xes Xis Lias piav tias qhov tsw qa ntawd yog Yes Xus cov lo lus. Xes Xis Lias piav txog Yes Xus rau Tis mloog tas, Tis thiaj mus thov kom Vaj Qhia ua lub Cim Ntxuav rau nws.
Vas Les Lias thiab Tis qhib nkawd lub loog cia npaj ua lub toj ntxas faus cov coj Ntuj kev cai tus qauv, thiab nkawd hu tsoom ntseeg tuaj teev Ntuj hauv nkawd tsev. Tsis ntev ces muaj neeg mus hais rau cov nom tswv, nkawd thiaj raug ntes mus txiav caj dab tuag ua tim khawv.
Tom qab Vas Les Lias tuag, Xes Xis Lias tau tawm mus qhia Ntuj kev cai rau tsoom sid ua rau muaj neeg hloov siab tshiab txog 400 leej. Xes Xis Lias raug ntes, cov nom kom Xes Xis Lias thim Ntuj kev cai, ces Xes Xis Lias hais rau cov nom tias “Peb hwm ib tug Huab Tais muaj ib lub npe ntshiab. Peb yuav tsis thim peb tus Huab Tais ib zaug. Peb ua tsis tau li ntawd, peb yeem tuag zoo dua.”
Cov nom hnov li ntawd, lawv thiab coj nws mus kaw hauv lub tsev da dej tsaus ntuj nti thiab rauv taws txhiab lub tsev da dej kom vaum vaum. Txawm li ntawd los Xes Xis Lias tsis quaj thiab tsis thov ib los li.
Tus nom pom li ntawd, nws thiaj coj Xes Xis Lias los txiav caj dab. Txawm tias Xes Xis Lias raug txiav caj dab txog 3 zaug los nws taub hau tsis tu, tsuas muaj ntshav nws tawm los ntawm caj dab xwb. Xes Xis Lias raug tsim txom li ntawd tau 3 hnub ces nws thiaj mam tuag.
Leej Ntshiab Xes Xis Lias (St. Cecillia)
