Cov ntawv qhia kev thoob tsib muaj 5 phau; yog ntawv Yob, ntawv cov Nkauj Paj Nruag, ntawv cov Paj Lug, ntawv Kos Es Les, thiab ntawv Kwv Txhiaj.
Tsib phau ntawv no sib txawv ntau tab sis puav leej hais txog kev thoob tsib raws li Tswv Ntuj nyiam.
Cov haiv neeg nyob ib ncig ntawm His Xas Lais xws li cov Hais Nkws Tos thiab cov nyob Mes Xos Pos Tas Mias lawv puav leej tau sau tej phau ntawv qhia txog kev thoob tsib; yam li lawv khaws cov txwj laus tej zaj paj lug los tej zaj txhais los tej zaj ntuas; yog ntiaj teb neeg kev thoob tsib uas ib txwm cov neeg txawj xav tom ntej tom qab lawv tsim thiab taug.
Cov His Xas Lais lawv muaj lawv ntawv qhia kev thoob tsib; qhov ntau mas yog lawv tsim, tab sis nyob hauv cov ntawv His Xas Lais qhia kev thoob tsib muaj ntau yam hauj sim yog lawv txais ntawm cov Hais Nkws Tos, cov Kas Nas Has, los cov As Las Npias. Li ntawd, cov ntawv His Xas Lais qhia kev thoob tsib muaj ntsis zoo li lwm haiv neeg cov ntawv thoob tsib thiab. Tsis kav cov ntawv His Xas Lais txawv rau ib qho; yam li cov His Xas Lais cov phau ntawv qhia kev thoob tsib hais txog Tswv Ntuj Kev Thoob Tsib hos cov neeg nyob ncig His Xas Lais cov ntawv qhia kev thoob tsib yog hais txog ntiaj teb neeg kev thoob tsib.
His Xas Lais kev thoob tsib qhia kom lawv yim paub Tswv Ntuj lub siab, kom lawv paub meej tias lawv kev thoob tsib yog ‘kev hwm Tswv Ntuj, kev nyiam Tswv Ntuj, thiab kev zam txhaum’. Yog li His Xas Lais kev thoob tsib thiaj yog Tswv Ntuj kev thoob tsib. Lawv hais tias Tswv Ntuj kev thoob tsib txawv ntiaj teb neeg kev thoob tsib vim ntau zaus ntiaj teb neeg nrhiav tej yam uas Tswv Ntuj saib tsis muaj nqe, los Tswv Ntuj saib tias yog kev vwm.