Leej Ntshiab Pis Os yug hnub tim 25 lub 5 hlis 1887 hauv lub nroog Pis Es Ntes Xis Nas, Is Tas Lias Naj Fab. Nws lub npe hu tias Fas Ntshes Kos Fos Ntsis Os Nes (Francesco Forgione).
Pis Os tsev neeg yog ib yim neeg ntseeg Ntuj, nws niam nws txiv niaj lis piam coj lawv 5 kwv tij mus koom Thaj Txi Ntuj, qhia lawv hais saw Mab Liab txhua hmo thiab kom lawv yoo nqaij ib lis piam 3 hnub. Nkawd nquag piav Ntawv Ntshiab rau lawv 5 tug kwv tij mloog, ua li mas lub noob ntseeg thiaj pib nrhau cag nyob hauv Pis Os lub siab.
Thaum muaj 10 xyoo, Pis Os tau hais rau nws niam thiab txiv tias ‘Kuv xav ua ib tug Leej Tij.’ Li ntawd, thaum muaj 16 xyoo, nws tau cog lus coj lub neej ua Leej Tij nyob hauv lub koom haum cog lus Kws Pws Xees. Lawv tis npe tshiab rau nws ua ‘Pis Os’.
Pis Os mus kawm txuj ua Leej Choj nyob hauv lub nroog As Xis Xis tau 6 xyoo ces mam txais Cim Tiag Tes ua Leej Choj rau hnub tim 10 lub 8 hli xyoo 1910. Tau tsis ntev ces Txiv Plig Pis Os txawm muaj Yes Xus cov caus pliav nyob hauv nws lub cev. Txiv Plig Pis Os thov Ntuj kom tshem qhov caus pliav ntawd pov tseg ces qhov caus pliav thiaj rov zoo tuaj. Tiam sis txog hnub tim 22 hauv lub 9 hlis 1918, Txiv Plig Pis Os lub cev rov caus pliav dua. Zaum no muaj ntshav ntws tawm raws nws ob txhais tes thiab ob txhais taw. Txiv Plig Pis Os tsum muab ntaub los qhwv cia tas mus li. Yes Xus qhov caus pliav no yuav nyob nrog Txiv Plig Pis Os mus tas nws ib sim neej.
Txiv Plig Pis Os sau txog zaj no cia tias “Huab Tais! Kuv txaj muag dhau lawm uas kuv muaj koj cov caus pliav vim kuv yog ib tus neeg tsis tsim nyog yuav tau txais koj lub txiaj ntsim. Hnub ntawd, thaum ua Thaj Txi Ntuj tas. Kuv tab tom thov Ntuj, kuv ua toog lias zoo li npau suav, txhia yam ntsiag to. Kuv pom zoo li kuv raug tso pov tseg, kuv pom ntshav ntws tawm hauv cov qhov txhab ntawm Leej Pleev ob txhais tes, ob txhais taw thiab ntawm phab tav. Kuv ntshai tshee na, kuv xav tias ntshai kuv kawg tuag xwb xwb. Ua cas qhov npau suav cia li yaj ntshis mus, kuv mam pom tias cov ntshav ntawd yog kuv li, yog ntws tawm ntawm kuv ob txhais tes, ob txhais taw thiab ntawm kuv phab tav. Kuv lub siab mob cuag li raug leej twg muab hmuv nkaug, mob kuv ib ce heev, mob mus ti txha dub, mob mus ti kuv tus ntsuj plig, kuv ntshai heev. Kuv vam khom txog Tswv Ntuj, kom hnov kuv lub suab nyiav, thov kom qhov txom nyem no dhau mus.”
Txiv Plig Pis Os muab txoj hauj lwm tshaj Ntuj Lo Lus thiab Yes Xus tus Ntoo Cuam los ua qhov txhab zog rau nws. Txiv Plig Pis Os nyiam ua Thaj Txi Ntuj thiab nyiam mloog cov ntseeg tuaj daws txhaum. Txiv Plig Pis Os nquag thov Ntuj thiab ua raws Tswv Ntuj lub siab nyiam.
Txiv Plig Pis Os coj tus yam ntxwv tsis muab hlob thiab mloog Ntuj Lus zoo; xws li xyoo 1931-1933 Vaj Qhia Pis Yus tim 11 txwv tsis pub Txiv Plig Pis Os ua Thaj Txi Ntuj thiab daws txhaum vim muaj ib pab Leej Choj tsis nyiam Txiv Plig Pis Os. Txiv Plig Pis Os tau thov Ntuj tias “Huab Tais! Kuv yuav ua li cas los paub koj lub txiaj ntsim no tau.”
Txiv Plig Pis Os hwm niam Mab Liab zoo heev, nws nyiam hais rau sawv daws tias peb yuav tsum thov kom niam Mab Liab pab peb thaum peb ntsib xwv txheej hnyav. Vim niam Mab Liab yog tus ris peb tej kev txom nyem nyob hauv qab Ntoo Cuam, vim niam Mab Liab nrog Yes Xus koom ib txog kev txom nyem. Li ntawd niam Mab Liab thiaj yog lub qhov rooj coj peb mus cuag Yes Xus tus cawm peb.
Tsis tas li, Txiv Plig Pis Os coj nraim txoj saw Mab Liab nyob ntawm nws ob txhais tes, nws niaj hnub hais txoj saw Mab Liab. Thaum txoj siav yuav tu, Txiv Plig Pis Os tuav txoj saw Mab Liab hais tias “Yes Xus, Mas Lis As.” Ces xyoo 1968 tim 23 lub 9 hlis thaum sawv ntxov, Txiv Plig Pis Os thiaj tso ntiaj teb tseg.
Vaj Qhia Zam Paj Lug tim 2 tsa Txiv Plig Pis Os ua Leej Ntshiab nyob hauv hnub tim 16 lub 6 hli 2002 thiab muab hnub tim 23 hauv lub 9 hlis ua hnub nco txog Leej Ntshiab Pis Os.
Leej Ntshiab Pis Os (St. Pio of Pietrelcina)
