Tus sau: TP. Nyiaj Pov (Tim 20 lub 2 hlis 1997)
Yes Xus muaj 12 xyoo lawm. Yog lub hnub nyoog uas cov hluas His Xas Lais lawv mus ntsib cov thoob xwm ntawv His Xas Lais. Cov thoob xwm ntawv sim cov hluas saib lawv puas tau kawm cov “Ntawv Tos Las” zoo, lawv puas tau kawm Mais Xes txoj cai zoo. Lawv pom tias Yes xus tau kawm cov ntawv Tos Las zoo heev.
“Cov thoob xwm ntawv lawv hnov Yes Xus cov lus nug thiab cov lus teb, lawv poob siab qhuas txog Yes Xus lub tswv yim thiab Yes Xus cov lus teb. “Cov thoob xwm ntawv yog cov neeg thoob tsib, tab sis lawv qhuas txog tus me nyuam Yes Xus muaj lub tswv yim thoob tsib.
Thiab Lus Kas piav tias Yes Xus zaum hauv nruab nrab lawv. Kev cai, yog tus xib hwb thiaj zaum hauv nruab nrab, hos tus zaum nyob nruab nrab yog Yes xus thiab sawv daws ntsia ntsoov nws.
Thaum Mab Liab thiab Yos Xes nkawd nrhiav tau Yes Xus, Mab Liab hais rau Yes Xus tias : “Me tub, ua cas koj ua li ntawd rau wb ? Saib, koj txiv wb nrhiav tsis tau koj, wb ntxhov siab kawg !”
Yes Xus hais rau nkawd tias : “Ua cas neb nrhiav kuv ? Neb tsis paub tias kuv yuav leg kuv Txiv tej hauj lwm ?”
Lo lus ntawd muaj lub ntsiab tias Yes Xus muaj 12 xyoo nws saib Tswv Ntuj yog nws Leej Txiv. Yes Xus nyob hauv lub tuam tsev teev Ntuj, nws nyob hauv nws Txiv lub tsev. Nws nrog cov thoob xwm ntawv mas nws leg nws Leej Txiv cov hauj lwm, vim nws nrog lawv hais Tswv Ntuj lo lus. Nws hais nws Leej Txiv lo lus.
Thaum Yes Xus muaj 12 xyoo nws txawj hais tej lo lus zoo li ntawd, vim nws muaj Leej Ntuj Plig puv hauv nws lub siab. Nws yog Tswv Ntuj Leej Tub.