Tus sau: TP. Nyiaj Pov (Tim 28 lub 4 hlis 1997)
Kwv tij sawv daws, yav sawv ntxov hauv lub tsev txoos. Yes Xus ntiab tus dab tsis huv. Tus dab tsis huv ntshai Yes Xus, nws nthe tias : “Kuv paub koj yog leej twg ! Koj yog tus ntshiab tuaj ntawm Tswv Ntuj tuaj ! Koj tuaj ua kom peb ploj ntais !”
Cov neeg zim txwv peb nyob no coob leej tsis kam ntseeg tias muaj dab. Luag tsis kam ntseeg tias yus raug mob yog vim dab ua kom yus mob. Luag hais tias neeg raug mob vim muaj ib co kab mob nkag hauv neeg lub cev : yuav tsum nrhiav cov tshuaj tua cov kab mob ces yus tus mob thiaj yuav zoo. Luag hais li ntawd. Tab sis peb tsoom Hmoog ntseeg hais tias yus muaj mob yog vim ib tug dab ntxias yus tej ntsuj plig. Ces Hmoob hu cov txiv dab txiv muam los kho cov neeg mob.
Puas yog Hmoob thiaj hais qhov yog ? Los puas yog cov neeg tso siab rau tshuaj xwb thiaj hais qhov yog ?
Ntshai ntiaj teb neeg tseem yuav sib cav txog ob zag ntawd mus txog hnub ntiaj teb neg dua ntais tas lawm.
Ntawm Huab Tais Yes Xus, nws tsis nrog luag sib cav txog qhov tias neeg raug mob puas vim dab los tsis yog vim dab. Yog zoo li Yes Xus xav tias muaj ntau zaus hauj sim neeg raug mob yog vim raug dab. Yes Xus tsis piav tias dab ua zoo li cas ces dab thiaj ua kom neeg raug mob. Yes Xus tsuas muab siab rau ua tib qho xwb : luag coj ib tug neeg mob tuaj rau Yes Xus. Luag hais tias tus neeg ntawd raug dab, Yes Xus thiaj ntiab tus dab, ces tus neeg rov zoo lawm. Yes Xus ua li ntawd ntau zaus.
Ntawm peb mas peb yuav xav li cas ?
Mas peb xav tias Yes Xus muaj peev xwm ntiab dab, muaj peev xwm ntiab tas puas tsav yam dab. Dab ntshai Yes Xus. Tsis muaj ib tug dab yuav tiv tau Yes Xus ntiab nws. Li ntawd peb tso siab rau Yes Xus. Peb muaj mob, puas yog vim dab los puas yog vim raug ib co kab mob ? Peb tsis sib cav txog qhov ntawd.
Peb ib txhij noj tshuaj thiab vam txog Yes Xus pab peb kom peb yeej tus mob. Peb tsis vam txog cov txiv dab txiv muam, vim cov txiv dab txiv muam tsuas muaj peev xwm vam txog lawv cov dab pab ntiab lwm tus dab. Hos peb tso siab ti txha rau Huab Tais Yes Xus pab peb, vim Huab Tais Yes Xus lub peev xwm thiab lub hwj huam loj dua tas ib tsoom dab. Tsis muaj ib tug dab yuav tiv tau Yes Xus.
Kwv tij Hmoob, thaum nej raug mob, tab txawm nej xav tias tus neeg nws raug dab, mas nej kawg tso siab ti txha rau Yes Xus lub hwj huam, tso siab ti txha tias Yes xus hlub nej, nws yuav pub lub txiaj ntsim zoo tshaj rau nej, mas yeej muaj ib hnub Yes Xus yuav kho tus neeg mob kom zoo, los nws yuav pub ib lub txiaj ntsim loj dua qhov ntawd rau nej ua lub neej mus ntxiv.
Yav sawv ntxov, Yes Xus ntiab ib tug dab phem nyob hauv Kas Fas Naus lub tsev Txoos. Sawv daws nyias rov mus nyias tsev.
Tab sis nyias piav rau cov nyob ib ncig ntawm nyias tsev tias Yes Xus lub hwj huam loj.
Yes Xus mus noj su nyob hauv nws tus thwj tim Pob Zeb lub tsev. Pob Zeb niam tais raug ib tug mob npaws. Yes Xus tuav niam tais tes tsa nws sawv. Tus mob npaws thim hlo tam sim ntawd.
Hnub ntawd yog hnub Xas Npas Tos, yog lis piam hnub xya, yog hnub uas sawv daws caiv, sawv daws nyob hauv tsev mus txog lub caij hnub poob qhov, ces dua lub caij caiv. Yuav tsaus ntuj cov neeg nyob Kas Fas Naus thiaj tuaj cuag Yes Xus nyob hauv Pob Zeb lub tsev. Ib me ntsis tsev puv neeg lawm, sawv daws ntsauv lub qhov rooj. Lawv coj lawv cov neeg mob los cov neeg raug dab tuaj rau Yes Xus. Yes Xus kho ntau leej thiab nws ntiab ntau tus dab phem.
Tab sis Mas Kos, tus piav zaj ntawd nyob hauv nws phau ntawv Moo Zoo, nws hais ib lo lus zoo li no :
“Yes Xus txwv cov dab kom txhob hais lus, vim lawv paub tias Yes Xus yog leej twg.”
Yes Xus hais ntau zaus rau cov neeg nws kho zoo hlo, kom lawv txhob mus tshaj rau teb chaws tias nws kho lawv zoo hlo. Vim li cas Yes Xus thiaj txwv cov dab kom txhob hais lus, thiab txwv cov neeg kom txhob mus cav txog Yes xus ua hwj huam ?
Yog vim qhov no :
Thaum Yes Xus kho cov neeg mob, los thaum nws ntiab cov dab phem, los thaum nws ua lwm yam hwj huam nws tsis ua tej ntawd kom luag qhuas txog nws. Hos nws ua tej ntawd kom zeej tsoom tso siab tias nws tuaj ntawm Tswv Ntuj tuaj : Yes Xus cov zaj hwj huam yog tej lub cim pab zeej tsoom ntseeg cov lus uas nws hais txog Tswv Ntuj.
Tab sis cov neeg pom Yes Xus muaj lub hwj huam loj npaum no mas lawv yog ib co neeg tos ib tug huab tais txawj ua kom nyob hauv lawv lub teb chaws sawv daws noj qab nyob zoo, tau mov txaus noj seem noj sos mus li, tsis khwv ncaws av ua qoob ua loo. Yes Xus yeej ua tau kom muaj li ntawd, tab sis lub neej tsim txiaj uas Yes Xus nqa tuaj rau lub ntiaj teb tsis yog ib lub neej xws li sawv daws tos. Lub neej tshiab uas Yes Xus coj tuaj rau sawv daws yog lub neej tig los yuav lub siab tshiab nyiam luag tej thiab nyiam Tswv Ntuj. Yes Xus xav kom peb muab peb lub siab phem tua, nws xav kom peb lub siab xyaum coj lub neej ntshiab thiab huv. Yes Xus tuaj yeem tuag nyob saum ntoo cuam thiab nws yuav rov sawv muaj txoj sia nyob mus li : Yes Xus txoj kev ua Huab Tais yog coj ntiaj teb neeg kom xyaum ua raws li nws xub ua rau peb pom : xyaum muab lub siab phem tua, xyaum ua neeg siab ntshiab.
Kwv tij Hmoob sawv daws, Yes Xus tsis tuaj ua tus Huab Tais pub lub neej zoo npaum li ua npau suav. Yes Xus tuaj qhia peb kom peb tig los xyaum ua lub neej kaj siab lug nyob hauv txoj kev sib nyiam sib hlub, nyob hauv txoj kev nyiam peb Txiv Tswv Ntuj.
Hmo ntawd Yes Xus kho cov neeg mob ntau leej, nws ntiab ntau tus dab phem. Nws kuj qhia lawv kom tig los yuav lub siab nyiam Tswv Ntuj thiab hlub neeg. Hmo ntawd Yes Xus pw lig lig.
Tag kis ntuj tsis tau kaj, Yes Xus mus nyob qhov xu kev, nws teev nws Leej Txiv Tswv Ntuj, vim Yes Xus xav ua piv txwv zoo kom peb nquag teev Tswv Ntuj zoo li nws.
Yes Xus cov thwj tim nrhiav tau nws nyob qhov chaw nws teev Ntuj. Lawv hais tias : “Sawv daws nrhiav koj.” Lawv hais li ntawd rau Yes Xus, vim tseem muaj tej tus neeg nyob Kas Fas Naus tuaj thov kom Yes Xus pab kho lawv.
Yes Xus teb lo lus no : “Peb mus lwm qhov chaw hauv cov zej zog ib ncig ntawm no kom kuv tau tshaj kuv lub Moo Zoo rau lawv thiab.”
Yes Xus xub paub tias nws yuav tsis tau kev qhia zej zog ntev xyoo vim cov neeg siab nkhaus yuav muab nws tua.
Lub caij maj caij nrawm. Yes Xus maj mus qhia ntau lub zos. Nws yuav mus tas zog li ntawd peb xyoos, tsis muaj caij so twj ywm.
Yes Xus tseem hais ib lo lus ntxiv rau nws cov thwj tim tuaj tos nws. Yes Xus hais tias :
“Peb mus lwm qhov chaw : yog vim qhov ntawd kuv thiaj tawm tuaj.”
Yes Xus tawm qhov twg tuaj ?
Ntshai Pob Zeb lawv to taub tias Yes Xus tawm ntawm nws lub zos Nas Xas Les tuaj kom nws tau mus tshaj nws lub Moo Zoo hauv ntau lub zos.
Tab sis Yes Xus lo lus tias “ yog vim qhov ntawd kuv thiaj tawm tuaj,” muaj ib lub ntsiab tob zoo li no :
“Yog vim kuv yuav tshaj lub Moo Zoo rau ntiaj teb paub, ces kuv thiaj tawm ntawm kuv Leej Txiv Tswv Ntuj tuaj.”
Yes Xus yog Tswv Ntuj Leej Tub ib txwm nrog Leej Txiv nyob tsim lub ntuj lub teb thiab kav lub ntuj lub teb. Yog vim Tswv Ntuj xav cawm peb tsoom neeg, nws thiaj tso nws Leej Tub nqes los ua neeg, yug los nyob Npes Les Hes, hlob nyob Nas Xas Les, tawm mus tshaj Leej Txiv cov lus peb xyoos, ua Leej Txiv cov hauj lwm peb xyoos kom sawv daws paub Tswv Ntuj.
Kwv tij Hmoob hmov tshua sawv daws, thaum Yes Xus hais lo lus no “ Yog vim qhov ntawd kuv thiaj tawm tuaj,” mas peb yuav to taub tias Yes Xus nqes los ua neeg, nws tawm ntawm Leej Txiv tuaj, yog vim nws xav kom tas ntiaj teb paub Tswv Ntuj.
Yes Xus tawm ntawm Leej Txiv tuaj vim nws xav kom peb tsoom Hmoob paub LeejTxiv Tswv Ntuj.
Hnub no nej hnov lub tshaj xov no hais tias Yes Xus txhob txwm tawm ntawm nws Leej Txiv tuaj vim nws xav kom nej paub nws.
Kwv tij, nej puas yuav qhib nej lub siab los txais Yes Xus cov lus ?
Nej tso siab rau Yes Xus mog !
Yes Xus txawj ntiab cov dab phem ze nej.
Yes Xus txawj kho peb cov mob.
Yes Xus tseem pub tej lub txiaj ntsim muaj nqi dua no rau cov tso siab rau nws.
Nej txais Yes Xus los kav nej lub siab mog !