1. Yam peb pom nyob hauv peb lub neej.
1.1 Peb puas xav ncaim ntawm Tswv Ntuj.
Tswv Ntuj hu yus los ua ib tug neeg ntseeg txog Tswv Ntuj, ces yus txiav siab tias yuav ntseeg; tab sis
– Puas muaj ntau zaus yus xav ncaim ntawm Tswv Ntuj?
– Yus puas nyob tej ntu ntev ntev nco txog Tswv Ntuj?
– Yus puas ua tej yam Tswv Ntuj tsis nyiam?
– Yus puas muaj tej lub caij yuav teev Tswv Ntuj, tab sis yus tsis teev?
1.2   Peb puas pom tej tus neeg tso kev ntseeg txog Tswv Ntuj pov tseg, los tej tus neeg ntseeg txog Tswv Ntuj tab sis coj tus yam ntxwv li cov neeg tsis ntseeg txog Tswv Ntuj?
1.3 Peb puas pom tej lub zos los tej yim neeg uas chiv thawj lawv kub siab ntseeg, ces tos 5-6 xyoo lawv siab rov txias, lawv nkees tuaj mloog Tswv Ntuj Lus, nkees tuaj ua lub Txoos Teev Ntuj? Peb puas muaj tej tus rov ua xyem xyav txog txoj kev ntseeg?
1.4 Puas yuav tsum muaj ib tug Huab Tais pheej xeeb rov hu neeg kom sawv daws los taug txoj kev ntseeg tsis tseg?

2. Tswv Ntuj lus teb.
Tswv Ntuj xav qhia ntiaj teb neeg paub tias Tswv Ntuj yog ib tug Huab Tais pheej xeeb. Neeg pheej xav ntxeev siab, mas Tswv Ntuj thiaj xaiv ‘Mais Xes’ los hu sawv daws kom rov nyob hauv kev pheej xeeb rau Tswv Ntuj.
Ntawv Hauv Paus piav tias Has Nplas Has yug tau Is Mas Es thiab His Xas Has. His Xas Has yug tau Es Xas Ws thiab Yas Kos. Yas Kos tau lub npe tshiab hu ua ‘His Xas Lais’, nws yug tau Yos Xes thiab nws cov kwv tij. Yos Xes coj nws txiv thiab cov kwv tij tsiv mus nyob Hais Nkws Tos teb. Lawv nyob Hais Nkws Tos teb 400 xyoo, lawv pib teev cov dab Hais Nkws Tos. His Xas Lais cov xeeb ntxwv huam vam coob, ces cov vaj Hais Nkws Tos xav rhuav cov His Xas Lais pov tseg.
Phau ntawv Kev Tsiv piav tias:
Tus vaj Hais Nkws Tos ceeb toom kom muab cov me nyuam tub His Xas Lais tua kom tas. Ib tug poj niam His Xas Lais yug tau ib tug tub, nws muab zais tau 3 hlis. Thaum nws zais tsis tau ntxiv lawm, nws npaj ib lub tawb xub yib, nws muab roj hmab dub thiab muab roj ntoo thuv leem zoo zoo rau. Nws tso tus me nyuam rau hauv lub tawb, nws coj mus tso rau hauv ib koog tauj deg ntawm ntug Niam Dej. Thaum ntawd tus vaj Hais Nkws Tos tus ntxhais nqes tuaj da dej hauv tus Niam Dej, nws cov ntxhais txib ncig ua si ntawm ntug dej. Tus ntxhais pom lub tawb ntab ntab hauv cov tauj deg, nws kom ib tug ntxhais txib mus muab los. Nws muab qhib xyuas ces nws pom tus me nyuam. Nws hlub tus me nyuam, nws coj tus me nyuam los ua nws tus me tub, nws tis npe rau tus me nyuam His Xas Lais ua ‘Mais Xes’.
Mais Xes hlob nyob hauv tus vaj Hais Nkws Tos lub tsev, nws tau kawm cov txuj Hais Nkws Tos. Muaj ib hnub Mais Xes tau muab ib tug tub rog Hais Nkws Tos tua, ces nws ntshai tus vaj Hais Nkws Tos muab txim rau nws. Mais Xes khiav mus nyob hauv teb chaws suab puam. Nws yuav poj niam Mas Dias thiab ua nws lub neej nyob nrog nws yawm txiv.
Mais Xes niaj hnub mus zov nws yawm txiv pab yaj. Mais Xes coj nws yawm txiv cov yaj mus noj zaub dhau teb chaws suab puam, ces nws mus txog lub roob Hos Les. Tswv Ntuj tus Tshiab yees tawm los rau Mais Xes pom nyob hauv ib co nplaim taws cig cig nyob hauv ib tsob pos. Mais Xes ntsia ntsoov, ces Mais Xes mus xyuas saib yog dab tsi. Tswv Ntuj hu hauv tsob ntoo tuaj tias “Mais Xes, Mais Xes.”
Mais Xes teb tias “Kuv nyob ntawm no.”
Tswv Ntuj hais tias “Koj txhob txav los ze ntawm no, hle koj nkawm khau ntawm koj ko taw, vim thaj chaw uas koj tsuj no yog ib thaj chaw ntshiab.”
Tswv Ntuj hais ntxiv tias  “Kuv yog koj cov yawg koob tus Tswv Ntuj, yog Has Nplas Has tus Tswv Ntuj, yog His Xas Has tus Tswv Ntuj, thiab yog Yas Kos tus Tswv Ntuj.”
Mais Xes thaiv nws lub ntsej muag, vim nws ntshai tsam nws qhov muag tau pom Tswv Ntuj. Tswv Ntuj hais tias “Kuv pom, kuv pom kuv haiv neeg txoj kev txom nyem nyob Hais Nkws Tos teb. Kuv hnov lawv lub suab quaj vim luag quab yuam lawv. Kuv paub lawv tej kev txhawj xeeb tas huv si. Kuv nqes los cawm lawv kom dim ntawm cov Hais Nkws Tos txhais tes. Kuv yuav coj lawv tawm hauv lub teb chaws ntawd rov los rau ib lub teb chaws dav thiab zoo qoob, lub teb chaws muaj mis nyuj thiab zib mu ntws sis laub sis lug, yog lub teb chaws uas cov Kas Nas Has. Nyem no, cov His Xas Lais lub suab quaj nrov tuaj txog kuv. Kuv pom cov Hais Nkws Tos txoj kev quab yuam lawv loj. Nyem no, koj mus, kuv xa koj mus cuag Fas Las Oos. Koj mus ua kom kuv haiv His Xas Lais tawm hauv Hais Nkws Tos teb los.”
Mais Xes hais rau Tswv Ntuj tias “Kuv yog leej twg, kuv thiaj yuav mus cuag Fas Las Oos tau, thiab ua tau kom cov His Xas Lais tawm hauv Hais Nkws Tos teb los?”
Tswv Ntuj hais tias “Kuv yuav nrog nraim koj, kuv muab lub cim no rau koj, kom koj paub tseeb tias yog kuv xa koj mus tiag. Thaum koj coj haiv His Xas Lais tawm hauv Hais Nkws Tos teb lawm, mas nej yuav teev Tswv Ntuj saum lub roob no.”
Tswv Ntuj hu Mais Xes li ntawd, ces Mais Xes mus taij tus vaj Hais Nkws Tos kom tso cov His Xas Lais tawm ntawm Hais Nkws Tos teb mus. Tus vaj tsis kam, Tswv Ntuj thiaj ua ‘Hmo Hla’. Tswv Ntuj hais rau Mais Xes thiab As Loos nyob Hais Nkws Tos teb tias “Lub hlis no nej yuav muab suav ua thawj lub hlis qhib lub xyoo. Neb hais rau ib tsoom pej xeem His Xas Lais tias lub hlis no xiab kaum, mas txhua yim neeg, nyias yuav tsum npaj nyias ib tug tsiaj me. Yog yim neeg twg tsawg dhau noj tsis tas ib tug tsiaj me, mas nej yuav mus nrog lwm yim neeg uas nyob ze nej dua cov koom noj ib tug tsiaj. Nej yuav xaiv ib tug tsiaj kom txaus sawv daws noj tsis seem. Nej yuav xaiv ib tug tsiaj zoo, tsis muaj chaw xyeej, yuav yog ib tug thav txiv yaj los thav txiv tshis, hnub nyoog ib xyoos. Nej yuav ceev rau ib qho tos txog hnub xiab kaum plaub, lub hlis no. Hmo tim kaum plaub, tas tsoom His Xas Lais, nyias yuav tua nyias tus tsiaj thaum tsaus ntuj zuag. Nej yuav cug cov ntshav coj mus pleev ob tug ncej puab rooj thiab pleev daim txiag tav saum lub qhov rooj nkag hauv lub tsev uas nej noj tus tsiaj ntawd. Hmo ntawd, nej yuav noj nqaij txhiab hauv hluav taws, nej yuav noj ntxuag ib co ncuav mov tsis xyaw poov xab, thiab ib cov zaub iab. Thaum noj mov nej yuav ua zoo li no: Nej sia siv khov kho, nej rau khau, thiab tuav nej rab pas nrig ntawm tes. Nej yuav sawv ntsug noj, noj nrawm nroos, vim yog HUAB TAIS hmo hla. Hmo ntawd, kuv yuav hla mus thoob Hais Nkws Tos teb. Kuv yuav ntaus neeg cov tub hlob, thiab tsiaj cov me nyuam hlob, kom ntog tas huv tib si. Thiab kuv yuav muab txim rau cov dab Hais Nkws Tos, vim kuv yog HUAB TAIS. Cov ntshav yuav yog ib lub cim txuag nej hauv cov tsev uas nej nyob. Kuv pom lub cim ntawd, kuv yuav hla plaws mus, nej yuav tsis raug qhov xwv txheej loj ntawd, vim kuv yog tus ua rau Hais Nkws Tos teb. Yav tom ntej, nej yuav cim ntsoov hnub ntawd cia, nej yuav nqaum paj nqaum nruas cav txog HUAB TAIS. Nej yuav muab hnub ntawd los ua ib txog cai nqaum paj nqaum nruas mus txheej dhau txheej rau nej coj” (KT 2-12).

Peb pom ntsoov tias Tswv Ntuj pom nws haiv neeg teev dab nyob Hais Nkws Tos teb, nws tsis tso lawv pov tseg, Tswv Ntuj tseem yuam lwm haiv neeg vim Tswv Ntuj xav pab nws haiv neeg. Hmo Hla, Tswv Ntuj txo cov tub hlob hauv Hais Nkws Tos teb txoj sia, ces tus vaj pom cov tub hlob Hais Nkws Tos tuag coob, nws thiaj tso cov His Xas Lais mus.

Phau ntawv Kev Tsiv piav txog Tswv Ntuj pab nws haiv neeg hla lub hiav txwv Liab tias:
Thaum lawv hais rau tus vaj Hais Nkws Tos tias cov His Xas Lais twb khiav tas lawm, mas Fas Las Oos thiab nws cov tub txib hloov siab. Fas Las Oos caij nws lub tsheb rog thiab coj nws cov tub rog sawv kev mus caum cov His Xas Lais uas tawm hauv lub teb chaws mus lawm. Cov Hais Nkws Tos mus caum tau cov His Xas Lais ntawm ntug dej ntuj, uas lawv tsa tsev tsam phooj so nyob ntawd. Thaum Fas Las Oos tuaj txog ze lawm, cov His Xas Lais ntsia pom cov Hais Nkws Tos tuaj caum lawv. Cov His Xas Lais ntshai kawg, lawv quaj hu HUAB TAIS. Mais Xes hais rau lawv tias “Nej tsis txhob ntshai! Nej ua siab ruaj nreb ces hnub no nej yuav pom HUAB TAIS ua dab tsi los cawm nej, vim cov Hais Nkws Tos uas nej pom hnub no, nej yuav tsis pom ib zaug ntxiv lawm. HUAB TAIS yuav ntaus rog thaiv nej, hos nej, mas nej tsuas nyob twj ywm ntsia xwb.”
Tswv Ntuj tus Tshiab uas mus ua tsoom His Xas Lais ntej, hloov chaw mus thaiv tom lawv qab, ces tus ncej huab nyob ntawm lawv hauv ntej txav chaw mus nyob tom lawv qub qab. Nws mus nyob nruab nrab kem tog Hais Nkws Tos ntawm tog His Xas Lais. Twv huab dub nciab tsaus nti ib hmos thaiv lawv, ces hmo ntawd ib hmos, ib tog txav tsis ti ib tog li. Mais Xes tsa tes rau saum dej ntuj, ces HUAB TAIS ua cua hlob hlob ntsawj toob fab tuaj thawb cov dej ib hmos, qab thu dej tawm qhuav qhawv los, hos dej faib ua nyob ob sab. Cov His Xas Lais nkag hauv hiav txwv, lawv tsuj av qhuav qhawv mus, nyob ntawm lawv sab xis thiab sab laug muaj ob lub phab ntsa dej. Cov Hais Nkws Tos caum lawv qab nkag mus hauv dej ntuj.
Thaum yuav kaj ntug, HUAB TAIS nyob saum tus ncej huab hluav taws, ntsia pom cov Hais Nkws Tos. Nws ua kom lawv cov log tsheb daig thiab ntog qeeb qeeb. HUAB TAIS hais rau Mais Xes tias “Koj tsa tes rau saum dej ntuj, kom dej ntws rov los nyab cov Hais Nkws Tos thiab lawv cov tsheb rog thiab cov tsav tsheb tib si.”
Mais Xes tsa tes rau saum dej ntuj, ces thaum pib kaj ntug, dej ntws rov los nyob qhov qub chaw. Cov Hais Nkws Tos tig khiav rov qab, tiam sis dej nphau nphwv los npog lawv, HUAB TAIS ua kom lawv ntxeev zom zaws rau hauv dej ntuj. Cov dej nphau rov los nyob qhov qub, los npog cov tsheb thiab cov tsav tsheb Hais Nkws Tos uas tau nkag mus hauv qab thu dej caum cov His Xas Lais, tsis dim ib tug li. Hnub ntawd, HUAB TAIS cawm cov His Xas Lais dim ntawm cov Hais Nkws Tos txhais tes. Cov His Xas Lais pom cov Hais Nkws Tos tuag pawg lug ntawm ntug dej ntuj. Cov His Xas Lais pom HUAB TAIS lub peev xwm uas nws siv los tiv yeej cov Hais Nkws Tos. Tsoom pej xeem sawv daws hwm HUAB TAIS. Lawv tso siab rau HUAB TAIS thiab rau nws tus tub txib Mais Xes (KT 14: 5-30).

Tswv Ntuj pab cov His Xas Lais kom lawv tso Hais Nkws Tos teb tseg, tab sis Tswv Ntuj xav kom cov His Xas Lais tso cov Hais Nkws Tos tseg thiab, ces Tswv Ntuj ua hwj huam pab nws haiv neeg kom tau noj tau haus, pab lawv tso siab rau Huab Tais Tswv Ntuj. Tswv Ntuj thiaj tso cov mov Mas Nas poob saum ntuj los yug cov His Xas Lais, pub yij rau cov His Xas Lais tau noj, pub dej txhawv hauv phab tsua rau cov His Xas Lais tau haus (KT 16-17).

Thaum cov His Xas Lais tuaj txog ntawm taw roob Xis Nais, Tswv Ntuj pub txoj cai thiab cog lus nrog lawv. Tswv Ntuj xav pab nws haiv neeg kom muaj lub siab hwm nws. Tswv Ntuj cov lus qhia yog tej lo lus uas tas txhua haiv neeg twb paub lawm, tab sis Tswv Ntuj rov qhia lawv kom paub tseeb dua.
Tswv Ntuj hais tias “Kuv yog HUAB TAIS, koj tus Tswv Ntuj, yog tus ua kom koj dim ntawm Hais Nkws Tos teb los, dim ntawm txoj kev ua luag qhev. Koj yuav tsis txhob muaj dua lwm tus tswv ntuj. Koj yuav tsis txhob puab ib tug mlom los ib tug duab zoo li tej yam nyob saum ntuj, los tej yam nyob hauv ntiaj teb no, los tej yam nyob hauv qab thu dej. Koj yuav tsis txhob pe cov mlom ntawd, txhob tsob hwb lawv, vim kuv yog HUAB TAIS thiab yog koj tus Tswv Ntuj, kuv yog ib tug Tswv Ntuj muaj khib, cov uas ntxub kuv, mas kuv rau txim rau phaj tub thiab phaj xeeb ntxwv thiab phaj xeeb ntxwv cov xeeb ntxwv tom qab, vim phaj txiv tau ua txhaum rau kuv. Hos cov nyiam kuv thiab ua raws kuv cov lus qhia, mas kuv hlub lawv thiab pub txiaj ntsha txiaj ntsim ntau rau txhiab leej vam leej mus tiam dhau tiam. Koj yuav tsis txhob hu txog koj tus HUAB TAIS Tswv Ntuj lub npe mus ua tej yam tsis zoo, vim HUAB TAIS yuav tsis zam txim rau tus neeg uas tuav txog nws lub npe dog dig. Koj yuav nco ntsoov caiv hnub xas npas tos, koj yuav muab saib ua ib hnub ntshiab. Koj ua hauj lwm rau hnub, tab sis hnub xya yog hnub caiv xas npas tos rau koj tus HUAB TAIS Tswv Ntuj. Koj yuav tsis txhob ua ib yam hauj lwm dab tsi li. Koj thiab koj tus tub, koj tus ntxhais, koj tus tub txib, koj tus ntxhais txib, koj cov tsiaj txhu, tus qhua uas tuaj nyob hauv koj tsev, nej sawv daws yuav tsis txhob ua hauj lwm li. Vim tias HUAB TAIS tau ua hauj lwm rau hnub los tsim lub ntuj, lub ntiaj teb, lub hiav txwv, thiab tas puas tsav yam nyob hauv, tiam sis hnub xya nws so, vim li ntawd HUAB TAIS tau foom hmoov zoo rau hnub xya, nws muab hnub xya qee ua ib hnub ntshiab. Koj yuav hwm koj niam thiab koj txiv, koj thiaj yuav tau nyob ntev niaj ntau xyoo hauv lub ntiaj teb uas koj tus HUAB TAIS Tswv Ntuj muab pub rau koj. Koj yuav tsis txhob tua neeg.  Koj yuav tsis txhob zes luag txij luag nkawm. Koj yuav tsis txhob ua tub sab tub nyiag. Koj yuav tsis txhob liam rau luag tej. Koj yuav tsis txhob ntshaw txeeb luag vaj luag tsev. Koj yuav tsis txhob ntshaw txeeb luag tus poj niam, luag tus tub txib, luag tus ntxhais txib, luag tus nyuj los tus luj, los ib yam dab tsi uas yog luag tug” (KT 20: 1-17).

Tswv Ntuj cog lus tias nws yuav pov hwm Tswv Ntuj haiv neeg, tab sis lawv kuj yuav cog lus tias lawv yuav hwm Tswv Ntuj, vim tias Tswv Ntuj xav yuav ib co neeg txawj txiav siab los ua nws haiv neeg. Tswv Ntuj xav yuav cov neeg txiav siab meej tias nyiam Tswv Ntuj thiab mloog Tswv Ntuj lus.

Tab Tswv Ntuj txawm pab cov His Xas Lais tas npaud, mas lawv tseem pheej xav ncaim ntawm Tswv Ntuj; cov His Xas Lais puab ib tug mlom nyuj los ua lawv tus huab tais. Tsoom pej xeem hais rau As Loos tias “Koj cia li ua ib tug tswv ntuj rau peb teev, kom nws mus ua peb ntej, vim Mais Xes uas nws coj peb tawm Hais Nkws Tos teb los, mas peb tsis paub xyov nws dua twg lawm.” As Loos kom lawv hle cov kauj ntseg kub los rau nws, ces nws muab nchuav hauv yeej vub ua ib tug mlom nyuj. Lawv hais tias “Cov His Xas Lais, nej ntsia! Tus no yog nej tus Tswv Ntuj, tus uas tau coj nej tawm Hais Nkws Tos teb los!” As Loos pom lawv ua li ntawd, mas nws tsa ib lub thaj txi mlom rau ntawm tus mlom hauv ntej thiab nws ceeb toom rau sawv daws tias “Tag kis, nej nqaum paj nqaum nruas cav txog HUAB TAIS.” Tag kis, lawv sawv ntxov, lawv tuaj hlawv tsiaj thiab nqa ib co txim tuaj txi lawv tus dab. Tsoom pej xeem tuaj zaum noj mov thiab haus dej, ces lawv sawv mus dhia daj dhia luag lom zem.
Mais Xes nqes saum roob rov los, Mais Xes pom tus mlom nyuj thiab tej pab hu nkauj dhia daj dhia luag lom zem. Ces Mais Xes npau taws heev, nws muab tus mlom nyuj uas lawv nchuav, pov hlawv hauv hluav taws, nws muab coj los tuav ua hmoov mos mos, nws muab coj mus nphoo rau hauv dej, ces nws yuam cov His Xas Lais haus cov dej ntawd (KT 32: 1-24).

Muaj ib zaug, cov His Xas Lais tso lub Roob Hos Les tseg, lawv taug txoj kev mus rau lub hiav txwv Xus. Thaum lawv mus txog ib tog kev, tsoom pej xeem npau taws. Lawv cem Tswv Ntuj thiab cem Mais Xes tias “Vim li cas neb thiaj coj peb tawm Hais Nkws Tos teb kom peb los tuag hauv lub teb chaws suab puam no? Tsis muaj mov noj, tsis muaj dej haus li, peb dhuav noj cov niag mov tuag tshaib ntawd dhau hwv lawm!”
Tswv Ntuj thiaj tso ib cov nab muaj taug tuaj tom lawv. Cov nab ntawd tom cov His Xas Lais tuag coob leej. Tsoom pej xeem mus hais rau Mais Xes tias “Peb ua txhaum lawm vim peb tau cem HUAB TAIS thiab cem koj. Koj thov kom HUAB TAIS zam rau peb, kom nws ntiab cov niag nab ntawd khiav mus deb peb.” Ces Mais Xes thiaj thov kom Tswv Ntuj zam rau lawv. HUAB TAIS teb tias “Koj nchuav ib tug nab muaj taug, koj muab khuam rau saum ib tug ncej. Leej twg raug nab tom, yog nws ntsia tus nab nchuav ntawd ces nws yuav tsis tuag.” Mais Xes thiaj muab tooj nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws tsis tuag (XP 21: 4-9).

Nyob hauv zaj no yuav pom tias Tswv Ntuj muab txim rau cov His Xas Lais tsis yog vim Tswv Ntuj ntxub lawv, tab sis yog vim Tswv Ntuj xav qhuab qhia lawv kom txawj tso siab rau Tswv Ntuj zoo zuj zus. Tswv Ntuj tsis rhuav nws haiv neeg, Tswv Ntuj tsuas qhia Tswv Ntuj haiv neeg kom rov ntshiab tuaj.

3. Lus qhia.
Neeg fav xeeb rau Tswv Ntuj, tab sis Tswv Ntuj pheej xeeb rau neeg. Thaum ub yog zoo li ntawd, Has Nplas Has cov xeeb ntxwv fav xeeb nyob Hais Nkws Tos teb, lawv teev cov dab Hais Nkws Tos. Has Nplas Has cov xeeb ntxwv fav xeeb nyob teb chaws suab puam, lawv teev tus mlom nyuj. Has Nplas Has cov xeeb ntxwv fav xeeb rau Tswv Ntuj, hos Tswv Ntuj pheej xeeb rau nws haiv neeg. Tswv Ntuj nco txog nws haiv neeg thiab Tswv Ntuj ua zoo rau lawv. Tswv Ntuj pab lawv dim Hmo Hla thiab nyob hauv lub hiav txwv Liab, Tswv Ntuj zam rau lawv thaum lawv teev tus mlom nyuj, Tswv Ntuj pub tus nab tooj rau lawv. Tswv Ntuj coj nws haiv neeg mus txog lub teb chaws Tswv Ntuj cog lus pub rau Has Nplas Has tsoom xeeb ntxwv.
Nyem no neeg kuj fav xeeb, hos Tswv Ntuj pheej xeeb, Tswv Ntuj rov hu peb tas zog kom rov qab los cuag Tswv Ntuj, Tswv Ntuj tso neeg tuaj ntuas peb, Tswv Ntuj ua kom peb rov hnov Tswv Ntuj cov lus, Tswv Ntuj xa Leej Ntuj Plig tuaj tshoj peb lub siab tsis tseg.
Tswv Ntuj pab dawb ntau kawg, nws siab dav. Thaud, Tswv Ntuj pab cov His Xas Lais hla dej, pub dej, pub mov, pub nqaij rau lawv noj. Tswv Ntuj pub txoj cai, pub tus nab tooj thiab ntau yam ntxiv. Tswv Ntuj pub rau cov His Xas Lais tas ib ntus 40 xyoo.
Nyem no, Tswv Ntuj pub nws tej txiaj ntsim tuaj tshoj peb lub siab, nws pub dawb, nws ua siab dav, nws ua zoo li nws tsis khuv xim nws tej txiaj ntsim. Tswv Ntuj saib tas txhia yam nws pub rau peb.
Tswv Ntuj hwj peb, nws saib peb yog ib co neeg txawj txiav siab, ces Tswv Ntuj xav kom peb mloog lus thiab nco txog nws cov lus vim tias ib co neeg hlob tiav yuav tsum txawj ua li ntawd.
Thaum Tswv Ntuj xav kom cov His Xas Lais ua ncaj raws li lawv cog lus; yog lawv ua tsis ncaj mas nws muab txim rau lawv. Nyem no, Tswv Ntuj xav kom peb ua ncaj raws li peb txiav siab hnub peb txais kev ntseeg. Txhob fav xeeb!
Yog peb fav xeeb, Tswv Ntuj qhuab qhia peb.
Yog vim Tswv Ntuj hwj peb, nws thiaj xav kom peb txiav siab ua ncaj mus li, txhob fav xeeb.
Kaum Lo Lus Qhia uas Tswv Ntuj pub rau peb yog txoj cai lij choj loj uas tas txhia haiv neeg paub, yog txoj kev ua neeg pheej xeeb rau Tswv Ntuj; yog cov txoj cai uas zeej tsoom yuav coj thiaj nyob tau ua ke. Ib yam li ib lub zos muaj txoj cai mas thiaj nyob tau ua ib zog. Ntiaj teb neeg kuj yuav tsum coj 10 Lo Lus Qhia thiaj nyob tau. Li ntawd, cov ntseeg los cov tsis ntseeg puav leej yuav coj txoj cai uas Tswv Ntuj qhia nyob saum lub Roob Xis Nais. Tab sis cov tsis ntseeg, lawv coj vim tias yog tsis coj mas nyob tsis taus ua ib zej zog los ua ib teb chaws. Hos peb cov ntseeg txog Tswv Ntuj mas coj 10 Lo Lus Qhia vim peb nyiam Tswv Ntuj; yog peb txoj kev nyiam Tswv Ntuj. Li ntawd, peb zoo siab coj vim peb zoo siab mus taug kev nyiam. Yog peb txoj kev ua neeg pheej xeeb rau Tswv Ntuj. Yam li peb tsis zes luag txij luag nkawm tsis yog vim peb ntshai raug txim, yog vim peb nyiam Tswv Ntuj, peb nrog Tswv Ntuj cog lus, peb zoo siab ua raws li lo lus peb cog.
Tswv Ntuj tso ib co neeg pab qhia peb kom peb txhob fav xeeb rau Tswv Ntuj. Thaud, Tswv Ntuj tso Mais Xes qhia cov His Xas Lais kom mus taug txoj kev pheej xeeb rau Tswv Ntuj. Nyem no, Tswv Ntuj tsa lub Koom Txoos thiab cov saib lub Koom Txoos kom lawv pab peb mus taug kev pheej xeeb. Cov Tswv Qhia, cov Leej Choj, cov tub tshaj Ntuj Lus; lawv qhia txoj kev pheej xeeb rau peb. Tab sis tus qhia txoj kev pheej xeeb kom thoob yog Yes Xus, nws tuaj qhia lub Moo Zoo uas yog txoj kev pheej xeeb. Thiab Yes Xus yog tus piv txwv pheej xeeb uas peb yuav ua raws li nws tus piv txwv.

4. Tig los yuav siab tshiab.

Peb yuav kawm ib lo lus nyob hauv Ntawv Ntshiab; Tswv Ntuj hais rau Mais Xes tias “Txij no rov yav tom ntej, yog nej mloog kuv lus thiab hwm cov lus kuv cog, mas kuv yuav saib nej yog kuv tug nyob hauv tas txhua haiv neeg.”

Nram no yog Huab Tais 10 Lo Lus Qhia.

1. Koj yuav teev Huab Tais Ntuj ib tug xwb thiab koj yuav nyiam Huab Tais Ntuj tshaj tas puas tsav yam.
2. Koj yuav hwm Huab Tais Ntuj lub npe.
3. Koj yuav caiv Huab Tais Ntuj hnub.
4. Koj yuav hwm koj niam koj txiv.
5. Koj tsis txhob tua neeg.
6. Koj tsis txhob zes luag txij luag nkawm.
7. Koj tsis txhob ua tub sab tub nyiag.
8. Koj tsis txhob dag rau luag tej.
9. Koj tsis txhob tso koj lub siab ntshaw zes luag txij luag nkawm.
10. Koj tsis txhob tso koj lub siab ntshaw ua tub sab tub nyiag.

Peb yuav kawm Huab Tais 10 Lo Lus Qhia, thiab peb yuav nrhiav hauv peb nruab siab saib peb puas ua raws li Huab Tais 10 Lo Lus Qhia. Niaj hmo peb yuav pw, peb xub hais Huab Tasis 10 Lo Lus Qhia tso thiab peb cog lus hauv nruab siab tias peb xav ua raws 10 Lo Lus Qhia.