Xis Lis thiab Mes Tos ua Tswv Qhia nyob hauv tiam 9. Xis Lis thiab Mes Tos nkawd yog 2 kwv tij nyob hauv ib lub xeem. Mes Tos yog tus tij, nws yug xyoo 815. Xis Lis yog tus kwv, nws yug xyoo 827. Nkawd loj hlob nyob hauv lub nroog Tes Xas Los Nis, Npis Xaas teb. Xis Lis ua ib tug xib hwb nto npe nyob hauv lub tsev kawm ntawv txheej siab. Mes Tos ua ib tug nom kav ib lub pov txwv. Tom qab Mes Tos tawm los ua ib tug Leej Choj thiab yog tus saib cov se ntawm tsoom pej xeem Hes Las.
Nkawd niaj hnub fim cov Xas Las Vas (Slave) vim cov pej xeem nyob Tes Xas Los Nis ib nrab hais lus Xas Las Vas, ces nkawd paub lus Xas Las Vas zoo heev.
Cov hlob nyob Npis Xaas qhia kom nkawd npaj mus tshaj Yes Xus lub Moo Zoo nyob teb chaws Mos Las Vas (Moravia), ces xyoo 862 tus vaj Miv Kas Es 3 (Michael III) tso lus rau cov tub tshaj Ntuj Lus tau kev tshaj lub Moo Zoo nyob hauv lub teb chaws, Xis Lis nkawd 2 kwv tij thiaj mus tshaj Yes Xus lub Moo Zoo nyob Mos Las Vas teb. Tsoom pej xeem kawm cov Ntawv Moo Zoo ua lus Xas Las Vas, lawv ua Thaj Txi Ntuj ua lus Xas Las Vas. Nkawd kuj pib txhais Ntawv Ntshiab ua lus Xas Las Vas.
Nkawd raug xwv txheej ntau yam ntawm tsov rog cov Zes Mas Nias thiab cov Xas Las Vas, tab sis nkawd tsis thaub qab thiab tsis thim, nkawd ua siab tawv qhawv tshaj Ntuj Lus tau 5 xyoos sib law, ces nkawd rov mus xyuas Npis Xaas teb. Vaj Qhia Nis Kos Las (Pope Nicholas I) nyob Los Mas caw Xis Lis thiab Mes Tos nkawd kom mus tsham Vaj Qhia nyob Los Mas.
Xyoo 869 Xis Lis raug ib tug mob nyob Los Mas, nws tas sim neej nyob ntawd. Hos Mes Tos rov mus Mos Las Vas teb, nws tshaj lub Moo Zoo ntxiv nyob ntawd thiab nyob Pos Kas teb (Poland). Xyoo 884 Mes Tos mam tuag.