Txiv Plig Txhiaj Foom Omi (Tim 9 lub 9 hli 2012)
Yes Xus tso Tws Los teb tseg, nws taug txoj kev hla Xis Doos mus rau dej ntuj Nkas Lis Lais, uas nyob hauv xeev Des Kas Pos Lis. Luag coj ib tug neeg lag ntseg, hais lus txhav qhi, tuaj rau Yes Xus. Lawv thov kom Yes Xus tsa tes rau saum nws. Yes Xus coj nws tawm ntawm tsoom sid mus rau ib cag, Yes Xus muab nws ntiv tes ntxig rau tus lag ntseg ob lub qhov ntsej, nws muab aub ncaug pleev tus neeg ntawd tus nplaig. Yes Xus tsa muag ntsia saum ntuj, nws xyu ib suab, nws hais rau tus lag ntseg tias “Es fas tas” txhais tias “Koj qhib los.” Tus lag ntseg ob lub qhov ntsej qhib hlo, hos cov hlua khi nws tus nplaig kuj plam plaws tam sim ntawd, ces nws hais lus meej. Yes Xus txwv tsis pub lawv hais qhov ntawd rau leej twg li. Tab sis Yes Xus yim txwv, lawv yim tshaj. Qhov ntawd raug lawv siab tshaj txhua yam, ces lawv hais tias : “Nws ua tau ib puas tsav yam zoo : nws ua kom cov lag ntseg hnov lus, thiab ua kom cov nplaig txhav hais lus tau.”
Ntawv Moo Zoo hais tias luag coj ib tug neeg ruam thiab lag ntseg tuaj rau Yes Xus. lawv thov kom Yes Xus tsa tes rau saum nws. Ib ntsis Yes Xus tsa muag ntsia saum ntuj, nws hais rau tus lag ntseg tias “Es Fas Tas”, lo lus no txhais tias “Koj qhib los.” Tam sis ntawd, tus neeg ntawd pob ntseg qhib hlo, cov hlua khi nws tus nplaim plam plaws. Nws hais tau lus meej (MT 7: 31-37).
Hnub ntawd mas Huab Tais Yes Xus khuv leej tus neeg ntawd uas txom txom nyem tag npaud. Nws pom kev tab sis nws tsis hnov qhov lawv hais thiab nws hais tsis tau ib nyuag lus rau leej twg. Ua li mas nws txom txom nyem heev, ces Yes Xus tsa muag ntsia saum ntuj. Nws ua nws Txiv tsaug vim tias Leej Txiv tau pub hwj huam loj rau nws pab kho tej pab neeg mob kom zoo.
Sawv daws poob siab nthav, lawv hais tias Yes Xus ua tau ib puas tsav yam zoo, nws ua kom cov lag ntseg hnov lus tau thiab ua kom cov nplaig tshav hais lus tau.
Cov kwv tij, peb zoo siab ntseeg khov kho tias lub zim txwv no, Huab Tais Yes Xus Pleev yog tus zoo li qub mus li, nws txoj kev khuv leej neeg tsis txawj lwj, tsis tsuas thiab tsis txhawj nphob (HN 13: 8, 1PZ 1: 4). Huab Tais Yes Xus lub siab hlub muaj zog tas nrho, Huab Tais lub siab pheej xeeb mus ib txhiab ib txhis.
Ua li Huab Tais niaj hnub xav kom peb nqes tes ua dab tsi?
- Peb yuav lees tias peb pluag kev ntseeg, peb nyob nrug deb ntawm Tswv Ntuj, ces txhob khav theeb tias ‘kuv lub siab zoo siab ncaj lauj’. Peb kuj yuav tsum lees tias peb tsis muaj zog los mus coj ib lub neej ntshiab dawb huv thiab peb raug tej lus haub lus ntxias; peb xav xav ua yam zoo tab sis peb ua tsis tau yam zoo ntawd (LM 7: 15-20). Ua li mas peb yuav lees tias peb tus plig txom nyem kawg. qhov lees txhaum no tsis yog ib yam yooj yim!
- Peb yuav tso siab lug rau Huab Tais, peb yuav khaub zig Yes Xus tus Huab Tais Cawm Seej, ces peb thov koj xa Leej Ntuj Plig nqes los txhim kho peb tej siab ntsws kom rov ntshiab dawb huv tuaj. Peb yuav thov Huab Tais tas zaj tas zog. Tsis hais lo lus thov li ntawd ib nyuag zaus xwb, qhov tseeb mas peb yuav thov Huab Tais tuaj pab txhim kho peb siab tas mus li, ces zaum puav peb thiaj hais zaj nkauj teev Ntuj li no tias “Koj lub siab zoo Huab Tais, koj zam rau kuv. Koj lub siab hlub neeg Huab Tais, koj so kuv cov txhaum.”
Kwv tij, kuv tau ntsib peb ib tug Phauj laus hauv nej zos. Nws hais tias “Ib ntsis kuv laus zog, mas kuv puas tsim nyog txais lub Cim Ntxuav?” Tam sis ntawd kuv tau teb tias “Niad, thov koj nco tias Tswv Ntuj khuv leej sawv daws. Cov me nyuam mos, cov tub ntxhais hluas thiab cov laus, mas Tswv Ntuj hlub sawv daws sib npaug zos. Nws tsis xaiv neeg. Thov koj tsis txhob ntshai los mas!” Thaum ntawd ces nws zoo siab luag ntxhi ntag.
Thov kom nej nco txog ib zag lust seem ceeb tias yav thaud, tim Fab Kis teb, ze ntawm xyoo 1200 mas lawv tus vaj Lus Is Cuaj hais tias “Kuv zoo siab ua nej tus vaj, tab sis qhov uas ua kom kuv nyob kaj lug kaj nrig tshaj plaws yog qhov tias kuv tau txais lub Cim Ntxuav. Nej yuav nco tias vim kuv tau txais lub Cim Ntxuav mas kuv thiaj yog Huab Tais Tswv Ntuj tus me nyuam ntag.”
Huab Tais Yes Xus lo lus tias “Txiv, koj yeej ib txwm mloog kuv” (Z 11: 42), mas peb yuav khaws tseg, ces peb yuav tso siab lug rau Tswv Ntuj raws li Yes Xus lo lus ntawd.
Huab Tais Leej Txiv, peb zoo siab ntseeg ruaj nreb khov kho tias Huab Tais Yes Xus lub siab pheej xeeb mus ib txhiab ib txhis. Ua li Huab Tais Yes Xus kuj khuv leej peb tsoom Hmoob huv tib si sib npaug zos. Nws tsis xaiv neeg. Peb zoo siab ntseeg li ntawd. Peb Txiv siab zoo tas nrho, thov koj xa Leej Ntuj Plig nqes los tshoj peb lub siab, ces peb thiaj yuav tshaib nqhis txog lub neej tshiab uas yog lub neej ua koj cov me nyuam. Thov koj pab peb qhib peb lub siab los mus txais koj tej txhiaj ntsim uas muaj nqes tas nrho.
