HNUB RAU LUB LIS PIAM 14 CAIJ NYOB NRUAB XYOO
16Yes Xus hais ntxiv tias “Kuv xa nej xws li ib co yaj mus nyob hauv nruab nrab ib co hma. Mas nej ua neeg xyuam xim xws li nab, ua siab dawb xws li nquab. 17Nej ceev faj txog neeg, lawv yuav mus kom nej rau cov rooj txwj laus txiav txim, lawv yuav nplawm nej hauv cov tsev txoos. 18Luag yuav coj nej mus rau cov nom thiab cov vaj vim kuv, kom nej ua tim khawv txog kuv nyob ntawm cov nom tswv thiab cov teev pej kum dab xub ntiag. 19Thaum luag ntes nej, mas nej tsis txhob txhawj tias yuav hais li cas thiab yuav teb dab tsi, lub sij hawm ntawd, Ntuj yuav muab cov lus teb rau nej. 20Li ntawd, yuav tsis yog nej hais lus, tab sis yog nej Txiv tus Leej Ntuj Plig yuav hais tawm hauv nej los. 21Tus tij yuav muab tus kwv muag rau luag tua, leej txiv yuav mus kom nws tus me nyuam rau luag. Tej me nyuam yuav sawv tiv niam thiab txiv, thiab yuav muab nkawd tua. 22Sawv daws yuav ntxub nej vim kuv lub npe, tab sis tus twg ua siab ntev nyiaj txog qhov kawg mas nws yuav txais kev cawm. 23Yog luag caum nej hauv lub nroog no, mas nej khiav mus rau lwm lub. Yog luag tseem caum nej hauv lub nroog ntawd thiab, nej yuav khiav ntxiv rau lwm lub nroog. Kuv hais tseeb rau nej, thaum Neeg Leej Tub los txog, nej tseem khiav tsis tau txhua cov nroog hauv His Xas Lais teb.”
Huab Tais Yes Xus ntuas cov Hauv Paus Xa Lus tias “Kuv xa nej xws li ib co yaj mus nyob hauv nruab nrab ib co hma. Mas nej ua neeg xyuam xim xws li nab, ua siab dawb xws li nquab.” Lo lus no yog hais tias cov Hauv Paus Xa Lus yuav zoo li ib co neeg tsis txawj tiv luag tej ua yeeb ncuab. Thaum lawv ntsib cov yeeb ncuab mas lawv yuav ua neeg xyuam xim thiab ua neeg siab ncaj. Cov tub tshaj Ntuj Lus yuav ceev faj. Lawv yuav tsum paub tias luag yuav hiam cov tub tshaj Ntuj Lus tiam sis cov tub tshaj Ntuj Lus yuav ua hauj lwm tas zog.
Huab Tais Yes Xus tseem hais kom cov thwj tim txhob ntxhov siab vim Leej Ntuj Plig yuav pab teb rau cov nom tswv, tsis yog yuav pab teb tej lo lus ua kom lawv yeej tiam sis yog pab teb tej lo lus zoo ua tim khawv txog Yes Xus.
Lo lus tias ‘ua tiag nyiaj mus txog qhov kawg’, mas cov neeg ua Ntuj kev cai thaud, lawv raug luag hiam, lawv tsis tiv, lawv ua tiag nyiaj kom mus txog qhov kawg. Qhov kawg yog txog hnub kawg, los yog txog hnub tuag. Li ntawd, mas yus yuav ua Huab Tais Yes Xus tim khawv tab yog yuav tuag mas yus tseem ua. Ua tim khawv txog qhov kawg mas yog zoo li ntawd.
Nyob hauv qib 23 hais tias “Yog luag caum nej hauv lub nroog no, mas nej khiav mus rau lwm lub. Yog luag tseem caum nej hauv lub nroog ntawd thiab, nej yuav khiav ntxiv rau lwm lub nroog.” Qib lus no Huab Tais Yes Xus xav hais 2 yam:
1. Thaum lawv caum nej, xav ntes nej, xav muab nej tua; mas nej tsis txhob txwm cia lawv ntes, nej khiav mus txog lwm lub nroog. Nej txhob tso txoj hauj lwm tshaj Ntuj Lus pov tseg, nej tshaj ntxiv, tsis txhob ntshai.
2. Txoj kev khiav ntawd mas Ntuj tsis txwv, vim tias txoj kev khiav yuav ua kom Ntuj Lus mus txog ntau lub teb chaws dua thiab sai dua.
