HNUB XYA LUB LIS PIAM 14 CAIJ NYOB NRUAB XYOO
24Yes Xus hais ntxiv tias “Tus thwj tim tsis loj dua nws tus xib hwb, tus tub txib tsis loj dua nws tus huab tais. 25Tus thwj tim txaus siab heev thaum nws zoo cuag li nws tus xib hwb, tus tub txib txaus siab heev thaum nws zoo cuag li nws tus huab tais. Yog lawv hu tus tswv tsev ua Npes Ntxes Npus, mas lawv yuav hu nws tsev neeg li cas! 26Nej txhob ntshai luag hem, vim tsis muaj ib yam npog rawv uas yuav tsis qhib tawm, tsis muaj ib yam zais ntshis uas yuav tsis tawm los rau sawv daws paub. 27Tej yam uas kuv hais rau nej hauv qhov tsaus ntuj, nej yuav hais tawm nruab hnub nrig; yam nej hnov ntxhi rau hauv nej pob ntseg, mas nej yuav nce mus tshaj saum ruv tsev. 28Nej txhob ntshai cov neeg tua nej lub cev, tab sis lawv tua tsis tau nej tus ntsuj plig. Nej yuav ntshai tus muaj peev xwm rhuav nej lub cev thiab tus ntsuj plig hauv hav hluav taws. 29Ob tug noog tsig txhuv, luag tsuas muag tau ib npib xwb. Tsis kav tsis muaj ib tug poob hauv av tau, yog nej Txiv tsis tso lus. 30Nej cov plaub hau yeej suav tas huv si lawm. 31Li ntawd, nej tsis txhob ntshai dab tsi mog. Nej muaj nqis tshaj tej pab tsig txhuv coob coob ua ke. 32Leej twg lees rau sawv daws tias nws paub kuv, mas kuv kuj lees rau kuv Txiv nyob saum Ntuj tias kuv paub nws. 33Tus tsis lees rau sawv daws tias nws paub kuv, kuv kuj yuav tsis lees rau kuv Txiv nyob saum ntuj tias kuv paub nws.”
Huab Tais Yes Xus hais 3 zaug tias ‘txhob ntshai’ los ‘txhob txhawj’. Txoj kev ntshai los txhawj ntawd yog hais txog tus ua Yes Xus tim khawv thaum txog lub caij nws yuav zeem tseeb txog Yes Xus mas nws ntshai los nws txhawj ces nws xav zais.
‘Nej txhob ntshai luag tej’, tsis yog vim lawv ua tsis tau ib yam rau nej; lawv yuav hiam xwb, tiam sis tab yog lawv hiam mas nej ua siab loj, txhob ntshai.
‘Nej yuav tsum ntshai tus muaj peev xwm’, yog txhais tias ‘hwm’ tus muaj peev xwm, yog hwm Tswv Ntuj thiab tso siab rau Tswv Ntuj vim Tswv Ntuj yog tus cawm tau yus. Yog yus ua Tswv Ntuj tim khawv, mas Tswv Ntuj tsis pov yus rau hauv cov hluav taws. Huab Tais Yes Xus cov tim khawv yuav tso siab rau Tswv Ntuj tsis yog vim Tswv Ntuj yuav pub txoj kev noj qab nyob zoo rau lawv. Lawv tso siab vim Tswv Ntuj saib nws cov tim khawv, nws nrog cov tim khawv nyob mus li, nws muab ib txog hauj lwm muaj nqis rau lawv ua; yog cia lawv tuag kom Tswv Ntuj lub Ceeb Tsheej ri mus sai.
