34Yes Xus ntuas cov thwj tim tias “Txhob xav tias kuv coj kev thaj yeeb tuaj rau lub ntiaj teb. Kuv tsis coj kev thaj yeeb tuaj, kuv coj hniav ntaj hniav riam tuaj. 35Kuv tuaj ua kom tub sawv los tiv txiv, ntxhais sawv los tiv niam, nyab sawv los tiv poj. 36Yus cov yeeb ncuab yog cov neeg nyob hauv yus tsev. 37Tus nyiam nws niam nws txiv dua kuv, nws tsis tsim nyog nrog kuv; tus nyiam nws tej tub tej ntxhais dua kuv, mas nws tsis tsim nyog nrog kuv. 38Tus tsis kwv nws tus ntoo cuam thiab tsis raws kuv qab, mas nws tsis tsim nyog nrog kuv. 39Tus nrhiav nws txoj sia, nws ua nws txoj sia ploj; tus ua nws txoj sia ploj vim kuv, mas nws nrhiav tau nws txoj sia lawm. 40Tus txais nej mas yog nws kuj txais kuv, tus txais kuv mas yog nws txais tus xa kuv tuaj. 41Tus txais ib tug yaj saub vim tus ntawd yog yaj saub, nws yuav txais koob haum phim tus yaj saub. Tus txais ib tug neeg ncaj vim tus ntawd yog neeg ncaj, mas nws yuav txais koob haum phim tus neeg ncaj. 42Kuv hais tseeb rau nej tias leej twg pub dej rau ib tug neeg me me no haus vim tus no yog ib tug thwj tim, tab yog ib khob dej txiag xwb, nws yeej yuav tau txais koob haum.”
Muaj ib lo lus yog lo lus tias ‘txoj kev thaj yeeb’. Lo lus no muaj ib lub ntsiab dav; txoj kev thaj yeeb uas niaj hnub cov His Xas Lais hais txog mas yog ‘txoj kev vam meej’, ‘txoj kev noj qab nyob zoo’, ‘txoj kev nyob dawb nyob huv’, ‘txoj kev nyob kaj lug’.
Huab Tais Yes Xus yog tus coj txoj kev ntawd tuaj nyob ntiaj teb no!
Nyob hauv zaj no mas Huab Tais Yes Xus tsis xav hais txog txoj kev thaj yeeb uas nws xav pub rau cov neeg ntseeg txog nws. Yes Xus xav hais tias thaum lub ntiaj teb neeg yuav hnov Yes Xus cov lus thiab cov thwj tim tshaj lub Moo Zoo mas lub ntiaj teb neeg yuav sib cav vim tias ib txhia yuav nyiam, ib txhia yuav ntxub. Ntiaj teb neeg yuav sib ncaim: cov xav ua Huab Tais Yes Xus tim khawv yuav tsum tso niam tso txiv tseg, thaum lawv sib tham txog Huab Tais Yes Xus mas lawv yuav muaj lus tsis sib haum.
Huab Tais Yes Xus hais tias yus yuav nyiam Huab Tais Yes Xus tshaj tas puas tsav yam mas yus thiaj yog Huab Tais Yes Xus cov thwj tim. Tus yuav ua tim khawv tau nyob ntawm sawv daws xub ntiag mas nws yuav tsum xub ua thwj tim nyiam Huab Tais Yes Xus tshaj tso.
Huab Tais Yes Xus puas txiav tsis pub nyiam niam thiab txiv?
Lo lus ‘nyiam’ hauv qib no yog hais txog txoj kev nyiam raws ib txog kev tsis tshua zoo, hlub ntau dhau los yog hlub vim tej yam tsis phim. Huab Tais Yes Xus tsis hais txog qhov nyob hauv yus nruab siab tiam sis nws hais txog 2 yam hauj lwm uas yus yuav ua; yam li yus yuav tso yus niam yus txiv tseg vim yus xav raws Huab Tais Yes Xus qab, tab sis yus yuav hlub yuav nyiam yus niam yus txiv. Yus yuav nyiam yus niam yus txiv, tab sis yog muaj ib hnub uas txoj kev nyiam yus niam yus txiv tsis haum txoj kev nyiam Huab Tais Yes Xus mas yus yuav tsum xaiv txoj kev nyiam Huab Tais Yes Xus, yus yuav tsum ua cov hauj lwm haum txoj kev nyiam Huab Tais Yes Xus, tab sis yus nyiam yus niam yus txiv hauv Huab Tais Yes Xus mus li.
Huab Tais Yes Xus hais tias tus xav ua nws thwj tim yuav raws Yes Xus qab mus taug ib txog kev raug txom nyem loj rau tas tsoom sid pom; yog kwv yus tus ntoo cuam.
Cov Los Mas saib txoj kev tuag nyob saum ntoo cuam yog txoj kev tuag raug mob heev tshaj thiab txaj muag tshaj tej. Cov Los Mas txhob txwm muab neeg tua nyob saum ntoo cuam kom tas tsoom sid tau kev thuam. Tus lawv Yes Xus qab, nws yuav paub tias nws yuav raug luag hiam thiab thuam.
Nyob hauv qib 40-42 yog Mas Tais sau cov lus xaus tias Huab Tais Yes Xus muab nws lub hwj huam rau cov Hauv Paus Xa Lus, yog vim li ntawd mas tus twg txais cov Hauv Paus Xa Lus mas nws kuj txais Huab Tais Yes Xus, vim nws txais cov uas Huab Tais Yes Xus xa tuaj, nws txais cov sawv Huab Tais Yes Xus chaw, nws txais Huab Tais Yes Xus cov tim khawv. Tus txais Huab Tais Yes Xus mas nws kuj txais Tswv Ntuj.
Lo lus ‘txais’ yog ‘cheem’ thiab ‘mloog’ cov Hauv Paus Xa Lus. Yog li mas tus twg txais Huab Tais Yes Xus cov thwj tim, tus ntawd yuav txais koob haum vim nws xav hwm Huab Tais Yes Xus nyob hauv cov thwj tim.
