HNUB TSIB LUB LIS PIAM 14 CAIJ NYOB NRUAB XYOO
8Yes Xus hais ntxiv rau cov Hauv Paus Xa Lus tias “Nej kho cov mob kom zoo, nej tsa cov tuag kom ciaj rov los, nej kho cov mob ruas kom huv, nej ntiab dab kom khiav. Nej tau txais dawb, nej rov pub dawb. 9Nej txhob muab kub, muab nyiaj, los muab xim nyiaj qhwv rau hauv duav siv. 10Txhob ris hnab taug kev, txhob nqa ob lub tsho, txhob nqa khau los nrig pas: vim tias tus tub zog tsim nyog txais nws pluas mov los noj. 11Nej mus hauv lub nroog los lub zos twg, nej nug kom tau ib tug neeg muaj meej mom, nej nyob hauv nws tsev mus txog hnub nej rov qab. 12Thaum nej chaws mus hauv luag tsev, nej foom kev kaj lug rau lub tsev ntawd. 13Yog lub tsev ntawd tsim nyog txais, mas nej txoj kev kaj lug yuav nqes los nyob hauv lawv. Yog lub tsev ntawd tsis tsim nyog txais, ces nej txoj kev kaj lug yuav rov los roos nej. 14Leej twg tsis txais nej thiab tsis mloog nej cov lus, nej cia li tawm hauv lub tsev ntawd los lub nroog ntawd mus, nej yuav nchos cov plua av lo nej ko taw pov tseg. 15Kuv hais tseeb rau nej, hnub txiav txim, teb chaws Xos Dos Mas thiab Nkos Mos Las yuav raug txim hnyav tsis cuag li lub nroog uas tsis txais nej.”
Huab Tais Yes Xus qhia tias Ntuj lub Ceeb Tsheej muaj nqis tshaj, mas tus tub tshaj Ntuj Lus coj tus yam ntxwv phim cov neeg saib tas puas tsav yam tsis muaj nqis. Peb mus tshaj Ntuj Lus, peb yuav nco ntsoov tias peb kawg yuav nqa tej yam pab tshaj Ntuj Lus; lwm yam mas txhob yuav. Tab sis cov neeg txais Ntuj Lus mas phim lawv yuav yug tus neeg tshaj Ntuj Lus thiab lub Koom Txoos yuav yug nws vim ‘tus tub zog tsim nyog txais nws pluas mov noj.’
Huab Tais Yes Xus hais tias “Yog lub tsev ntawd tsim nyog txais, mas nej txoj kev kaj lug yuav nqes los nyob hauv lawv”, txhais tias yog lub tsev ntawd txais ib tug tub tshaj Ntuj Lus mas yog lub tsev ntawd mloog tus tub tshaj Ntuj Lus cov lus qhia, ntseeg txog Yes Xus. Tsis yog txais xws li txais ib tug qhua tuaj nyob hauv nws tsev.
Huab Tais Yes Xus tseem hais tias “Nej nchos tej plua av lo nej ko taw”, yog qhia tias yuav tsis nrog cov neeg tsis mloog Ntuj Lus sib fim ntxiv.