HNUB PLAUB LUB LIS PIAM 14 CAIJ NYOB NRUAB XYOO
1Yes Xus hu nws kaum ob leeg thwj tim los cuag nws, nws muab hwj huam kom lawv ntiab tau dab phem tawm, thiab kho tau tej txiab xeeb thiab tej mob nkeeg kom thim. 2Kaum ob leeg Hauv Paus Xa Lus muaj npe li no. Thawj tug yog Xis Moos uas sawv daws hu nws ua Pob Zeb, Xis Moos tus kwv As Nres, Yas Kos uas yog Ntxes Npes Dais tus tub, Yas Kos tus kwv Zam, 3Fis Lis Pos, Npas Tos Los Mas Yos, Tos Mas, Mas Tais tus sau se, Yas Kos uas yog As Fas Yos tub, Les Npas Es Yus tus sawv daws hu ua nws ua Thas Dais Yos, 4Xis Moos tus Ntxes Los, thiab Yus Das Kas Lis Yaus tus muab Yes Xus muag rau luag.
5Yes Xus xa kaum ob leeg no mus tshaj lub Moo Zoo, nws qhia lawv tias “Nej tsis txhob mus cuag cov pej kum neeg, txhob mus hauv ib lub nroog Xas Mas Lias li. 6Nej xub mus cuag cov yaj ploj hauv haiv His Xas Lais. 7Thaum nej mus kev, nej ceeb toom tias ‘Ntuj lub Ceeb Tsheej tuaj txog ze lawm!’
Vim li cas Huab Tais Yes Xus thiaj xaiv 12 tug thwj tim los ua Hauv Paus Xa Lus (Apostles)? Tej zaud yog vim Huab Tais Yes Xus muab tas tsoom neeg yuav ntseeg txog nws los piv rau cov His Xas Lais thaud 12 lub xeem. Cov Hauv Paus Xa Lus yuav muaj ib txog hauj lwm kav 12 lub xeem His Xas Lais tshiab.
Huab Tais Yes Xus ‘muab hwj huam rau lawv’, yog lub hwj huam pab ua txoj hauj lwm tshaj Ntuj Lus; yam li ntiab dab, tshaj lub Ceeb Tsheej tshiab, kho cov neeg mob.
Huab Tais Yes Xus xub xa nws cov thwj tim mus qhia cov His Xas Lais tso vim ib txwm Tswv Ntuj xaiv His Xas Lais los ua nws haiv neeg, phim yuav xub cev txoj kev cai tshiab rau lawv tso; tas 3 xyoos Huab Tais Yes Xus thiaj qhia cov His Xas Lais, tsis kav Huab Tais Yes Xus tsis tso cov pej kum neeg tseg; Huab Tais Yes Xus kuj ua hwj huam pab lawv thiab. Thaum Yes Xus yuav rov mus lawm saum ntuj nws thiaj xa lawv mus qhia tas txhua haiv neeg.
Huab Tais Yes Xus hais tias “Nej tau txais dawb, nej yuav pub dawb”, mas cov thwj tim yuav noj luag nyiaj puas tau?
Huab Tais Yes Xus tsis kheev kom lawv yuav nyiaj. Huab Tais Yes Xus muab hwj huam rau lawv, nws pub dawb, nws kuj pub Ntuj lus qhia dawb rau lawv; cov thwj tim yuav pub tas puas tsav yam dawb rau luag, txhob yuav nyiaj los pauv txoj hauj lwm tshaj Ntuj Lus. Huab Tais Yes Xus tseem qhia cov thwj tim kom coj tus yam ntxwv phim cov neeg nyiam txoj kev pluag. Cov thwj tim kawg yuav nyiam tej yam pab tshaj Ntuj Lus xwb, lawv yuav tsis ua zam, tsis coj tej yam kom luag tej qhuas txog. Cov thwj tim yuav saib tib yam tsim txiaj xwb; yog Yes Xus lub Moo Zoo. Txoj hauj lwm tshaj Ntuj Lus yog ib txog hauj lwm ceev, txhob npaj dab tsi yuav khaum yus kev.
