Aus Nkus Tis Nus yug xyoo 354 hauv Thas Nkas (Thagaste), Nus Mis Dias teb (Numidia) hauv xeev ntuj As Fis Kas Pej. Nws niam yog Leej Ntshiab Mos Nis Kas.
Aus Nkus Tis Nus txiv coj nws mus ua luam, thiab coj mus taug kev plees ua si lom zem xws li tej tub luam. Mos Nis Kas pom tias nws tus tub Aus Nkus Tis Nus tswv yim ntse thiab cim xeeb zoo tas nrho. Nws xav qhuab qhia nws tus tub Aus Nkus Tis Nus kom ua neeg tsim txiaj, thiab kom kawm Yes Xus lub Moo Zoo. Aus Nkus Tis Nus hlub nws niam, tab sis nws tsis mloog nws niam qhuab qhia, nws xav taug kev ua si ntau xws li nws pom nws txiv ua.
Mos Nis Kas thov Ntuj kom Tswv Ntuj tshoj nws tus txiv thiab tus tub kom hloov siab tshiab, qhov kawg tus txiv tig los yuav lub siab tshiab. Thaum ntawd Aus Nkus Tis Nus tab tom muaj 17 xyoo, nws xav ua si heev, nws tsis mloog nws niam cov lus ntuas nws. Nws pom nws niam los kua muag, hos nws tsis muaj peev xwm tso kev plees kev yi pov tseg, raws li nws niam qhia kom nws ua. Mos Nis Kas hais rau nws tus txiv tias nkawd tus tub Aus Nkus Tis Nus tswv yim zoo tshaj luag tej, tsis phim cia nws ua tub lag tub luam nyob Thas Nkas. Tus txiv thiaj pom zoo xa Aus Nkus Tis Nus mus kawm txuj nyob nram lub nroog Kas Tas Nkes (Carthage), nyob tom ntug hiav txwv Mes Dis Tes Las Nes. Kas Tas Nkes kuj yog ib lub nroog vam meej uas muaj tas txhia txoj kev teev dab thiab teev Ntuj, kuj yog lub nroog nto moo tias txiv neej poj niam tau zoo kev ua si ywj siab. Aus Nkus Tis Nus tab tom nyob hauv nws yav hluas, nws nrog ib tug hluas nkauj ua si, nws tau ib tug me nyuam tsaub. Aus Nkus Tis Nus ua si heev, tab sis nws lub siab tsis tiaj tsis tus. Aus Nkus Tis Nus niam cov lus qhuab qhia nyob nraim hauv Aus Nkus Tis Nus nruab siab.
Aus Nkus Tis Nus nyeem ib tug xib hwb hu ua Mas Nis (Mani) cov ntawv, ces nws ntseeg Mas Nis zaj tswv yim (Manichaeism) vim Aus Nkus Tis Nus xav tias tos nws swb kev phem yog vim ib tug tswv ntuj kom nws ua phem xwb. Aus Nkus Tis Nus tsuas tos kom tus tswv ntuj siab zoo tshoj nws kom yeej tus phem, ces Aus Nkus Tis Nus thiaj yuav muaj zog ua qhov zoo. Aus Nkus Tis Nus muab nws cov txhaum rau tus tswv ntuj phem ris tas nrho.
Aus Nkus Tis Nus nyob Kas Tas Nkes 9 xyoos, nws ke kawm txuj ke ua xib hwb qhia Mas Nis zaj tswv yim txog ob tug tswv ntuj sib twv coj lub ntuj lub teb. Aus Nkus Tis Nus pib nto moo vim nws txawj nthuav Mas Nis kev cai nyob Kas Tas Nkes. Aus Nkus Tis Nus tiv Yes Xus lub Koom Txoos, vim Mas Nis kev cai ua yeeb ncuab rau Yes Xus lub Moo Zoo.
Mos Nis Kas pom nws tus tub qhia ib zaj kev cai tiv Yes Xus kev cai mas nws tu siab nrho. Tab sis nws hais tsis tau ib lo lus rau tus tub. Mos Nis Kas teev Ntuj thiab nws quaj rau Tswv Ntuj pom, thiab rau Aus Nkus Tis Nus pom. Aus Nkus Tis Nus ua txuj tias nws coj ib lub neej lom zem. Nws nto koob meej zuj zus. Tab sis hauv Aus Nkus Tis Nus nruab siab muaj kev ntxhov tas nrho.
Aus Nkus Tis Nus ua xib hwb tshaj Mas Nis txoj kev ntseeg, tab sis Aus Nkus Tis Nus tswv yim ntse thiab thoob tsib dua Mas Nis lub tswv yim. Aus Nkus Tis Nus lub ncauj tshaj Mas Nis txoj cai, tab sis lub siab tsis ntseeg lawm. Aus Nkus Tis Nus lub siab paub tias tus ntseeg txoj kev tseem ceeb yog nws niam. Nws niam tsis txawj hais lus ntau npaum li nws, tab sis nws niam cov kua muag hais lus nchav nyob puag hauv Aus Nkus Tis Nus nruab siab. Hos Aus Nkus Tis Nus lub siab tseem dai dhuam rau tej tus poj niam thiab tej tus phooj ywg pus nws mus taug kev ua si.
Xyoo 383 Aus Nkus Tis Nus muaj 29 xyoos lawm, nws cov phooj ywg coj Mas Nis txoj cai hais rau nws tias nws txawj nthuav Mas Nis txoj cai, tsim nyog nws mus tshaj Mas Nis kev cai nyob Los Mas, vim yog thawj lub tuam tsheej nyob tas teb chaws xib fab.
Aus Nkus Tis Nus caij nkoj mus txog Los Mas, nws tsis xis nyob, nws nyob hauv ib lub tsev tsis huv, nws ua npaws ntau zaus. Aus Nkus Tis Nus tsis muaj nyiaj, nws yuav tsum ua xib hwb qhia txuj rau cov neeg nplua nuj tej me nyuam. Nws nyob hauv tej lub tsev tsis huv li qub.
Cov tub nrog nws kawm txuj dag nws, tus puav tsis muab nyiaj hli rau nws. Aus Nkus Tis Nus xav tias nws yuav rov mus nyob rau As Fis Kas teb. Nws nyob txom nyem li ntawd ze ntawm ib xyoos.
Xyoo 384 Aus Nkus Tis Nus muaj 30 xyoo, nws cov phooj ywg coj Mas Nis kev cai hais rau nws tias nyob Is Tas Lias Pej Fab, hauv lub nroog Mis Las Nos (Milan). Thawj tug nom tseem coj txoj kev teev dab Los Mas zoo siab txais Aus Nkus Tis Nus los ua ib tug xib hwb tshaj Mas Nis txoj cai nyob Mis Las Nos. Thawj tug nom Los Mas ntawd tsis coj Mas Nis txoj cai, tab sis yog lub caij uas kev ntseeg txog Yes Xus tab tom huam vam ri mus sai nyob tas Los Mas teb chaws. Tus nom Los Mas zoo siab pab Aus Nkus Tis Nus, vim Aus Nkus Tis Nus tiv kev ntseeg txog Yes Xus. Aus Nkus Tis Nus thiaj mus ua Xib Hwb nyob Mis Las Nos. Nws tuaj txog Mis Las Nos, nws hnov zeej tsoom cav lus zoo txog tus Tswv Qhia hu ua As Nplos Xyus (Ambrose), ces As Nkus Tis Nus mus xyuas Tswv Qhia As Nplos Xyus.
Aus Nkus Tis Nus pom tias Tswv Qhia As Nplos Xyus thoob tsib dua nws, ces nws nyeem As Nplos Xyus tej phau ntawv tshaj Ntuj kev cai. Nws kuj tau nyeem tus kws txuj Hes Las hu ua ‘Plas Tos’ (Plato) tej ntawv hais ntau yam txog Huab Tais Ntuj tsim tas txhia yam thiab nres tas txhia yam, ces nws kub siab thiab ntseeg txog Tswv Ntuj. Thaum ntawd Aus Nkus Tis Nus tseem tsis tau yuav Ntawv Moo Zoo los ua kev cai kav nws lub siab. Aus Nkus Tis Nus pom tias muaj ib tug Tswv Ntuj tiag yog tus tsim ntuj tsim teb. Aus Nkus Tis Nus lub siab muag, nws tso lub ntiaj teb tej kev qab siab pov tseg tsis tau, nws tso tsis tau kev pleev, nws lub cev nqaij ntshaw cov poj niam.
Aus Nkus Tis Nus niam thiab cov me nyuam tuaj nrog Aus Nkus Tis Nus nyob, ces nws niam kom nws ntiab tus poj ntiav nrog nws nyob khiav. Aus Nkus Tis Nus mloog nws niam, ces nws nrauj poj ntiav. Tab sis tos tsis ntev Aus Nkus Tis Nus rov qab yuav lwm tus poj niam los nrog nws nyob. Nws tseg tsis tau txoj kev yos cov poj niam. Nws ua ywj fab ywj fwj li ntawd ob xyoos.
Aus Nkus Tis Nus ntxhov siab kawg, nws hnov zoo li muaj ob tug neeg nyob hauv nws; ib tug neeg pom txoj kev zoo, ib tug neeg tog hauv txoj kev txhaum. Nws hais tias nws zoo li ib tug neeg tsaug zog, txog lub caij yuav sawv tiam sis nws ib lub siab pheej cheem nws cia, ces nws pheej tos pheej tos zoo li ntawd.
Aus Nkus Tis Nus paub tias nws ua tsis zoo, tsis phim lub txiaj ntsim Ntuj pub rau nws; ces muaj ib hnub Aus Nkus Tis Nus mus xyuas ib tug Txiv Plig. Nws piav qhov ntxhov siab rau tus Txiv Plig mloog, ces tus Txiv Plig piav txog ib tug neeg uas nyuam qhuav yuav Ntuj kev cai tau tsis ntev rau Aus Nkus Tis Nus mloog. Tus neeg ntawd yog Tswv Qhia As Nplos Xyus.
Muaj ib hnub Aus Nkus Tis Nus ntsib nws ib tug phooj ywg uas nyuam qhuav pib ua Ntuj kev cai. Tus phooj ywg piav txog cov Txiv Twj Cuab thiab cov Niam Twj Cuab nyob coob hauj sim tsis deb tsis ze ntawd. Nyob hauv cov Txiv Twj Cuab ntwd, muaj ob tug yog qub thawj tub rog; nkawd tau twm ntawv hais txog Ntuj kev cai, ces nkawd tso txoj hauj lwm ua nom pov tseg, nkawd tso nkawd tej hluas nkauj, tso niam tso txiv tseg tuaj mus ua Txiv Twj Cuab.
Aus Nkus Tis Nus hnov txog cov neeg ntawd lub siab nrauj ntiaj teb lub cuab tam, ces nws xav hauv siab tias ‘Ib co poj niam lawv txawj ua li ntawd, ib co tub rog lawv txawj tso tas puas tsav yam tseg kom tau xaiv txoj kev nyiam Huab Tais Ntuj tib leeg xwb. Ua cas kuv yuav tsis txawj ua li lawv?’ Tab sis nws kuj hnov ib lub suab nrov hauv nws siab tuaj tias ‘Yog koj xaiv ib txog kev tshiab, mas koj yuav tsum tso txoj kev plees kev yi tseg mus li; koj yuav rov qab taug tsis tau ib zaug ntxiv.’ Ces Aus Nkus Tis Nus yim ntxhov siab.
Muaj ib hnub hauv lub 3 hlis los lub 4 hlis xyoo 386, Aus Nkus Tis Nus nyob hauv nws lub vaj loog ntawm nws lub tsev nyob Mis Las Nos. Nws ntxhov siab tas nrho. Nws quaj vim nws tsis muaj zog txiav siab los mloog Yes Xus. Nws hnov ib tug me nyuam lub suab hu nkauj nyob hauv lub loog ti nws lub. Tus me nyuam hu nkauj tias “Koj tuav phau ntawv, koj nyeem mog! koj tuav phau ntawv, koj nyeem mog!”
Aus NkusTis Nus hnov cov lus ntawd, nws sawv tsees mus tuav Paj Lug cov tsab ntawv. Nws nthuav phau ntawv ncaj rau cov lus uas Paj Lug sau rau cov ntseeg nyob Los Mas zaj 13 qib 13. Yog ib co lus uas Paj Lug qhuab qhia cov ntseeg nyob Los Mas zoo li no “Nej txhob ua ib cov neeg quav cawv, neeg hu dab, neeg ua dev ua npua. Nej mloog Leej Pleev cov lus. Nej nrauj kev ntshaw mloog nej lub cev nqaij.”
Aus Nkus Tis Nus nyeem cov lus ntawd tas, phau ntawv plam plaws ntawm nws tes. Txoj kev kaj nyab los nyob puv hauv nws siab. Nyem no nws to taub meej tias nws yuav ua dab tsi. Aus Nkus Tis Nus tawm ntawm Mis Las Nos mus nyob rau hauv nws ib tug phooj ywg lub tsev nyob nruab teb. Nws nyob ntawd tau 9 hli. Tsuas muaj nws niam nws tus tub thiab tus tub leej niam nrog nws nyob. Thaum lub caij nws sau siab 9 hli ntawd nws sau ib phau ntawv tseg, nws piav tas txhia yam nws xav hauv nws nruab siab, nws thov Tswv Ntuj pab nws kom tig los yuav lub siab tshiab tiag.
Hnub tim 24 lub 4 hlis xyoo 387, Aus Nkus Tis Nus nrog tsoom neeg ntseeg txog Yes Xus nyob Mis Las Nos ua lub txoos cav txog Yes Xus sawv rov los, Nws txais lub Cim Ntxuav ntawm Tswv Qhia As Nplos Xyus txhais tes.
Aus Nkus Tis Nus rov mus As Fis Kas teb. Nws rov mus txog Kas Tas Nkes thiab txog Thas Nkas. Nws muab nws lub cuab yeej cuab tam muag tas huv si, nws muab cov nyiaj faib rau cov pluag, nws tsim ib lub tsev txais ib pab txiv neej nrog nws teev Ntuj. As Nkus Tis Nus xav nyob ntsiag to teev Ntuj, tsis xav tawm mus qhia Ntuj kev cai rau zeej tsoom, nws hais tias “Tsis muaj ib txog kev zoo dua txoj kev kawm Tswv Ntuj lub tswv yim nyob hauv ib thaj chaw ntsiag to. Yog yus yuav tsum ntuas sawv daws, qhuab qhia sawv daws, tswj sawv daws, yuav nrog sawv daws ntxhov siab tas zog; mas ntshai yuav ceeb laj kawg.”
Nyob hauv xyoo 391, ib tug nom nyob lub nroog His Pos (Hippo) xav ua Ntuj kev cai, ces nws thov kom Aus Nkus Tis Nus tuaj pab qhia Ntuj kev cai rau nws. Aus Nkus Tis Nus ua tsis tau dab tsi, nws thiaj mus raws li tus nom thov.
Tus Tswv Qhia nyob His Pos yog ib tug neeg laus, nws yog neeg Hes Las, nws tsis paub lus Nus Mis Dias. Muaj ib hnub nws ntuas cov neeg nyob hauv lub tsev teev Ntuj, nws nroo tias cov Leej Choj nyob hauv lub nroog tsawg dhau, ces tas tsoom sid thiaj hais kom nws tsa Aus Nkus Tis Nus ua Leej Choj.
Aus Nkus Tis Nus hnov li ntawd, nws xav khiav rov qab mus nyob Thas Nkas, tiam sis sawv daws nthos nws cia thiab coj nws mus txog ze tus Tswv Qhia. Tswv Qhia nyob His Pos thiaj tsa Aus Nkus Tis Nus ua Leej Choj.
Xyoo 395 cov neeg ntseeg nyob His Pos thov kom Aus Nkus Tis Nus ua lawv tus Tswv Qhia, nws tsis yeem, ces muaj ib tug hais rau Aus Nkus Tis Nus tias “Lub teeb ci ci xav nyob hauv ib qho chaw twj cuab, tiam sis lawv tsa nws nyob saum ib tug ncej siab.”Aus Nkus Tis Nus hnov li ntawd, nws thiaj ua ib siab ua tsoom neeg ntseeg hauv His Pos tus Tswv Qhia. Thaum ntawd Aus Nkus Tis Nus lub hnub nyoog muaj 40 xyoo.
Thaum Aus Nkus Tis Nus ua Tswv Qhia, nws coj li cov Txiv Twj Cuab tus yam ntxwv. Tswv Qhia Aus Nkus Tis Nus txoj hauj lwm yog niaj hnub qhuab qhia thiab ntuas sawv daws kom mus raws Ntuj txoj kev cai, ua tus txiav txim rau tsoom ntseeg, ua hauj lwm pab cov neeg pluag, faib txhiam xws rau cov neeg tshaib plab noj, nrhiav nyiaj txhiv cov neeg nyob txim, saib tsoom ntseeg lub cuab tam hauv lub nroog. Ces sawv daws nyiam hais tej lo lus qhuas txog nws, tiam sis Aus Nkus Tis Nus hais rau lawv tias “Nej cov lus qhuas kuv yog zoo li tej nplooj tuaj nyob saum ntoo xwb, kuv xav kom nej ua tej tus ntoo txi txiv thiaj zoo dua.”
Tswv Qhia Aus Nkus Tis Nus tseem uas txoj hauj lwm ntaus rog nrog cov neeg tawm tsam Ntuj kev cai xws li cov yuav Mas Nis kev cai, cov ntseeg ib siab rau Dos Nas zaj tswv yim, thiab cov mloog tus Txiv Twj Cuab Pes Las (Pelage) cov lus qhia. Pes Las qhia tias tus twg xav taug txoj kev zoo los txoj kev txhaum kuj tau. Tus tsis taug txoj kev zoo mas vim nws tsis xav taug xwb. As Das ua txhaum tiam sis peb tsis ua txhaum kuj tau, vim peb muaj ib lub siab txawj zam kev ua txhaum. Ua li mas peb yuav tsis txais lub Cim Ntxuav kuj tau, peb yuav tsis vam txog Ntuj lub txiaj ntsim pab kuj tau. Yes Xus yog ib tug piv txwv zoo xwb. Yes Xus lam tuag nyob saum Ntoo Cuam xwb, nws txoj kev tuag tsis yog kev cawm peb.
Xyoo 430 Tswv Qhia Aus Nkus Tis Nus muaj 75 xyoos, ces nws tuag. Vim Tswv Qhia Aus Nkus Tis Nus tiv lub Koom Txoos cov yeeb ncuaj, mas nws thiaj sau 232 phau ntawv nthuav kev ntseeg; 400 zaj nthuav Ntawv Ntshiab hauv Hnub Chiv thiab 260 tsab ntawv xa mus rau tej tus neeg nug yam ub yam no. Lub Koom Txoos saib Leej Ntshiab Aus Nkus Tis Nus yog Koom Txoos cov kws txuj (Doctor of the Chuch).
Leej Ntshiab Aus Nkus Tis Nus (St. Augustine of Hippo)
