Mos Nis Kas yug xyoo 331 nyob hauv lub nroog Thas Nkas, hauv As Fis Kas Pej. Nws yog ib tug neeg muaj kev ntseeg ruaj heev thiab nws siab zoo. Mos Nis Kas yog ib tug hluas nkauj tsim txiaj thiab paub ntawv, nws nquag nyeem Ntawv Ntshiab. Nws niaj hnub nyeem Yes Xus lub Moo Zoo. Mos Nis Kas tsis hais lus ntau, nws ua yam twg mas nws rau siab ua kom tau.
Muaj ib tug txiv neej laus dua Mos Nis Kas, nws ua luam. Nws thov yuav Mos Nis Kas los ua nws poj niam, nws tsis paub Yes Xus lub Moo Zoo. Tus txiv neej ntawd tsev neeg teev cov dab Los Mas thiab teev cov dab Nus Mis Dias. Mos Nis Kas niam thiab txiv muab nkawd tus ntxhais rau tus tub luam ntawd. Mos Nis Kas yug tau 4 tug me nyuam. Nws xav ua lub Cim Ntxuav rau nws cov me nyuam, tab sis tus txiv tsis kam. Mos Nis Kas xav qhia Yes Xus lub Moo Zoo rau nws tus txiv, tab sis tus txiv tsuas tuag siab rau txoj kev ua luam. Nws kuj nyiam taug kev plees ntau hauj sim.
Mos Nis Kas tu siab 10 tawm xyoo, nws niaj hnub thov Tswv Ntuj tshoj nws tus txiv, kom tus txiv tig los yuav lub siab tshiab. Mos Nis Kas thov ntuj tau 15 xyoos, ces nws tus txiv mam lees tias nws tau coj lub neej tsis tsim txiaj, tsis phim Mos Nis Kas lub neej tsim txiaj thiab thoob tsib. Tus txiv kawm Yes Xus lub Moo Zoo thiab txais lub Cim Ntxuav. Nws kuj ua kom nws tus tub Aus Nkus Tis Nus uas nyiam ua neeg loj leeb nrhiav kev lom zem tig rov los ntseeg thiab.
Mos Nis Kas nquag qhuab qhia nws cov me nyuam kom paub nyiam cov neeg txom nyem. Nws qhia tias Kev pub nyiaj rau cov pluag yog pub rau Tswv Ntuj.
Nws ua siab ntev ua zoo thiab thov Ntuj 16 xyoo, kom yeej nws tus tub, ces txog qhov kawg nws tus tub kuj hloov siab. Nws nrog nws tus tub mus ntau lub teb chaws, ntau qhov chaw, nws tsis ntaus siab yau. Vim nws ntseeg tias kev thov Ntuj yuav hloov tau nws tus tub lub siab.
Mos Nis Kas hais tias “Nyob hauv niam txoj sia, niam tsuas vam tias niam yuav pom niam tus me tub hloov siab tshiab los ntseeg txog Yes Xus.”
Xyoo 387 Mos Nis Kas tau tas sim neej nyob hauv lub nroog Aus Rias, tuam ceeb Los Mas. Ua ntej yuav tuag Mos Nis Kas hais rau Aus Nkus Tis Nus tias “Huab Tais Ntuj pub rau niam ntau dua qhov niam thov: yog Huab Tais Ntuj qhia kom niam tus tub tso cuab tam hauv ntiaj teb no tseg tig los raws Huab Tais Yes Xus.”
Leej Ntshiab Mos Nis Kas (St. Monica)
