HNUB PEB LUB LIS PIAM 11 CAIJ NYOB NRUAB XYOO
43Yes Xus hais rau cov thwj tim tias “Nej hnov tej lus qhia tias ‘Koj yuav nyiam tus nyob ze koj, koj yuav ntxub koj tus yeeb ncuab’. 44Tab sis, kuv hais rau nej tias nej yuav nyiam nej cov yeeb ncuab, nej yuav thov Ntuj rau cov tsim txom nej, 45nej thiaj yog nej Txiv nyob saum ntuj cov me nyuam. Vim nej Txiv ua kom lub hnub tuaj ziab cov neeg phem thiab cov neeg zoo, nws ua kom nag los rau cov siab ncaj thiab cov siab nkhaus. 46Yog nej nyiam cov neeg nyiam nej, mas nej yuav tau koob haum dab tsi? Tab yog cov sau se, lawv kuj txawj nyiam li ntawd. 47Yog nej tshwj zias nej cov lus foom zoo rau nej cov kwv tij xwb, mas nej tau ua dab tsi zoo tshaj luag? Tab yog cov pej kum neeg, los lawv kuj txawj ua li ntawd. 48 Hos nej, mas nej yuav ua kom zoo tshaj, vim nej Txiv nyob saum ntuj yog tus zoo tshaj.”
Nqe lus 43-48 no hais tau tias yog lub ntsiab tseem ceeb tshaj plaws hauv Huab Tais Yes Xus cov lus qhia, cov lus no tsis yog lus qhia xwb tseem yog cov lus txhib kom Huab Tais Yes Xus cov thwj tim coj mus siv nyob hauv lub neej ua neeg ntseeg thiab.
Nyob hauv phau ntawv Les Vis teev tseg cia tias “Koj yuav nyiam tus nyob ze koj, koj yuav ntxub koj tus yeeb ncuab.” Lo lus no mas yeeb vim tias cov His Xas Lais saib cov haiv neeg nyob ncig lawv yog ib cov ‘yeeb ncuab’ (enemy), ces cov His Xas Lais thiaj xav tias yuav ntxub lawv. Cov Fas Lis Xais thiab cov kws ntawv thiaj qhia raws li ntawd, lawv tsuas qhia kom nyiam tus ‘nyob ze’ (neighbor) xwb.
Yog li tus nyob ze cov His Xas Lais yog tus twg? Yog cov His Xas Lais coj Mais Xes txoj cai. Tab sis Huab Tais Yes Xus qhia dua tshiab tias “Nej yuav nyiam nej cov yeeb ncuab, nej yuav thov Ntuj rau cov tsim txom nej”, yog Huab Tais Yes Xus hais rau lawv kom nyiam lwm haiv neeg teev dab/ pej kum neeg (Gentlile) nyob ib puag ncig lawv.
Lo lus ‘ntxub’ (hate) mas yog ‘tsis nyiam’ los yog ‘nyiam tsawg dua’. Li ntawd, Huab Tais Yes Xus thiaj qhia rau peb kom saib tas ib tsoom neeg nyob ntiaj teb no yog cov neeg nyob ze peb, peb yuav nyiam lawv sib luag zos; yog thaum peb nyiam ib tug tsawg dua lwm tus, mas yog peb tab tom ntxub tus ntawd.
Huab Tais Yes Xus qhia kom cov thwj tim nyiam lawv cov yeeb ncaub. Lo lus ‘nyiam’ (love) raws li ntawv Hes Las muaj 4 lo lus: 1) sib nyiam sib hlub vim koom ib lub cuab (Stergein) xws li tej niam tej txiv hlub lawv cov me nyuam los cov me nyuam nyiam niam thiab txiv, 2) sib nyiam li hluas nkauj hluas nraug sib ntshaw (Eros); kev sib nyiam li no Ntawv Cog Lus Tshiab tsis tau hais txog, 3) sib nyiam li kev phooj ywg (Philia), thiab 4) sib nyiam tsis muaj chaw xyeej (Agape); yog kev nyiam Huab Tais Yes Xus tau hais txog.
Huab Tais Yes Xus hais kom nyiam peb tus yeeb ncuab tsis yog vim nws yog peb cuab kwv tij, tsis yog vim peb ntshaw nws, tsis yog vim nws yog peb tus phooj ywg, tab sis peb nyiam tus yeeb ncuab vim nws yog Tswv Ntuj tus duab, peb nyiam peb tus yeeb ncuab vim nws thiab peb yog neeg zoo tib yam.
Tos peb yuav nyiam peb tus yeeb ncuab vim peb xav ua Tswv Ntuj cov me nyuam. Tswv Ntuj twb nyiam tus neeg phem thiab tus neeg zoo tib yam, nws pub lub hnub pub nag rau sawv daws sib npaug, mas peb thiaj yuav xyaum ua zoo li Tswv Ntuj tus yog peb Txiv.
Thaum peb nyiam tus twg yam tsis muaj chaw xyeej, peb yuav cheem tus ntawd kom txhob ua qhov phem, ntuas nws thaum tau ua yuam kev, muab txim rau nws thaum ua tsis yog. Peb ua li ntawd tsis yog vim lub siab npau taws los xav pauj rov qab, tab sis peb ua li ntawd nyob hauv txoj kev nyiam thiab tso siab tias nws yuav hloov ua tus neeg zoo.
Yav thaud cov laus His Xas Lais qhia lawv cov tub ki kom txhob poob hauv txoj kev ua txhaum loj; nyem no Huab Tais Yes Xus tuaj qhia sawv daws kom tsis txhob xub nco tias peb yuav zam kev ua txhaum, tab sis kom peb yoog raws li Huab Tais Tswv Ntuj; peb lub tswv yim yuj plaws rau Tswv Ntuj, peb lub siab nyob hauv Tswv Ntuj, mas Huab Tais Yes Xus thiaj xaus nws cov lus tias “Nej yuav ua kom zoo tshaj (perfect), vim nej Txiv nyob saum ntuj yog tus zoo tshaj.”
