HNUB CHIV THAWJ LUB LIS PIAM CAIJ PLAUB CAUG
12Leej Ntuj Plig txhib Yes Xus kom mus tam sis ntawd rau teb chaws suab puam. 13Yes Xus nyob teb chaws suab puam plaub caug hnub, Xas Tas ntxias nws. Yes Xus nrog cov tsiaj qus nyob; cov Tshiab tsob hwb nws. 14Thaum luag ntes Zam lawm, ces Yes Xus mus Nkas Lis Lais teb. Nws tshaj lub Moo Zoo qhia txog Tswv Ntuj lub Ceeb Tsheej, 15nws hais tias “Txog lub caij teem lawm, Tswv Ntuj lub Ceeb Tsheej los txog ze lawm! Nej hloov siab, nej ntseeg txog lub Moo Zoo mog.”
Huab Tais Yes Xus ua kab ke ntxuav tas, Leej Ntuj Plig Ntshiab nqes zoo li tus nquab los nyob saum Huab Tais Yes Xus taub hau. Leej Ntuj Plig Ntshiab coj Huab Tais Yes Xus mus rau teb chaws suab puam kom Xas Tas tau tuaj ‘ntxias’ (tempt) Huab Tais Yes Xus. Qib lus no qhia tias txhua yam xwv txheej tuaj nphav peb ntawd, tsis yog yuav tuaj ‘rhuav’ tab sis yog tuaj ‘txhawb’ peb kom muaj zog tuaj.
Lo lus ‘plaub caug hnub’ txhais tias ‘ntev hauj sim’ zoo li Hmoob hais tias ‘ob peb hnub’ tab sis tsis tau txhais tias ob hnub los peb hnub xwb.
‘Xas Tas’ (Satan) yog lus Hes Nplaws muaj lub ntsiab tias ‘yeeb ncuab’ los yog ‘tus tiv’ thiab tseem txhais tau tias ‘tus kom neeg’. Tom qab cov Yus Das kawm cov Hes Las tej txuj mas lawv txais cov Hes Las lo lus tias ‘Dais Npos Los’ (Diabolos) los hu txog tus ‘Dab Phem’ (Devil) ces cov Yus Das thiaj ntxiv ib lub ntsiab rau lo lus Xas Tas tias ‘tus haub neeg’. Lub zim txwv cov Yus Das mus nyob txim rau Npas Npis Los, lawv saib tias Tswv Ntuj yog lub zog qhov pom kev, ces Xas Tas yog tus tiv Tswv Ntuj yog li Xas Tas thiaj yog ‘lub zog hauv qhov tsaus ntuj’. Ntawv Cog Lus Tshiab saib Xas Tas yog tus coj txiab xeeb mob nkeeg thiab kev txom nyem txhua tsav tuaj raug rau tib neeg, thiab ntxias neeg mus ua qhov tsis zoo.
Xas Tas tuaj ntxias Huab Tais Yes Xus saib nws yuav xaiv taug Tswv Ntuj txoj kev los yuav xaiv Xas Tas txoj kev, yuav xaiv txoj kev nyiam thiab ntoo cuam los yuav xaiv txoj kev ntxub thiab lub hwj chim. Qhov kawg, Huab Tais Yes Xus xaiv Tswv Ntuj txoj kev; yog kev nyiam thiab tus ntoo cuam.
Huab Tais Yes Xus “Tswv Ntuj lub Ceeb Tsheej los txog ze lawm! Nej hloov siab, nej ntseeg txog lub Moo Zoo.” Lo lus ‘hloov siab’ (repent) lus Hes Las hais tias ‘Mes Tas Nos Ais (metanoia) txhais tias ‘pauv siab’ (to change one’s mind) yam li tig ntsej khiav deb txoj kev txhaum los mus nyob ze Tswv Ntuj, ntxub cov txhaum tau ua tas los thiab txiav txim siab raws Tswv Ntuj.
Lub Koom Txoos qhia tias neeg yuav hloov siab tau mas neeg yuav xub ‘tu siab’ rau neeg cov txhaum tso; tab sis muab hais los mas peb tsis nkag siab zoo tias yam twg yog ‘kev txhaum’ thiab yam twg yog ‘qhov txhaum’. Peb pom tias coob leej tu siab thaum lawv tau ua txhaum tab sis lawv rov qab mus ua txhaum vim lawv ntxub lawv qhov txhaum xwb tsis yog ntxub kev txhaum. Li ntawd, kev hloov siab thiaj yog peb tsum tu siab rau peb cov txhaum thiab peb tsum ntxub txoj kev txhaum, tsis yog tu siab rau yus cov txhaum tab sis nyiam taug txoj kev txhaum.
‘Lub Moo Zoo’ (Good News/ Gospel)Huab Tais Yes Xus hais txog yog ntxeev los ntawm lus Hes Las tias ‘Aws Es Nkes Lis Oos’ (Euaggelion), lus Las Tis Nas hais tias ‘Es Vaas Ntses Lis Us’ (Evangelium) yog hais txog kev txhim Tswv Ntuj lub Ceeb Tsheej nyob hauv ntiaj teb. ‘Tswv Ntuj lub Ceeb Tsheej’ (Kingdom of God) yog Tswv Ntuj lub theej kiab thiab lub hwj chim ua vaj nyob mus li. Tswv Ntuj lub Ceeb Tsheej pib sawv thaum Leej Pleev xeeb los ua neeg thiab yuav hlob tiav hnub Leej Pleev rov qab los. Nyob hauv Tswv Ntuj lub Ceeb Tsheej muaj 3 yam xws li 1) ncaj ncees, 2) kaj lug, 3) xyiv fab. Yog li ntawd, tus twg tau txais kev ncaj ncees, nws nyob kaj lug, thiab lub siab xyiv fab mas zoo li nws tau sab Tswv Ntuj lub Ceeb Tsheej. Tus twg muaj txoj kev nyiam nyob puv nws siab, nws ua ncaj rau lwm tus, nws tsim kev thaj yeeb, thiab muaj lub siab pluag; tus ntawd thiaj tab tom tsim Tswv Ntuj lub Ceeb Tsheej.