Hnub 3 lub Lis Piam 1 caij Nyob Nruab Xyoo.
Tus sau: Txiv Plig Nyiaj Pov (28.04.1997)
29Tam sim ntawd, Yes Xus tawm hauv tsev txoos, nws nrog Yas Kos thiab Zam nkawd mus hauv Xis Moos thiab As Nres nkawd tsev. 30Xis Moos niam tais mob kub cev, nws pw saum txaj. Tam sim ntawd, lawv tham txog tus niam tais rau Yes Xus paub. 31Yes Xus txav los tuav niam tais txhais tes, tsa nws sawv. Tus mob kub cev cia li thim hlo. Ces nws tsob hwb lawv.
32Yav tsaus ntuj, thaum lub hnub poob qho lawm, sawv daws coj tas nrho cov neeg mob thiab cov raug dab huv si tuaj rau Yes Xus. 33Tas lub nroog sau nthwv tuaj nyob ua ke ntawm nws qhov rooj. 34Yes Xus kho neeg coob coob, cov uas nyias raug nyias hom mob, thiab nws tseem ntiab ntau tus dab tawm. Nws tsis pub dab hais lus li, vim cov dab paub nws.
35Thaum sawv ntxov, thaum tseem tsaus ntuj nti, Yes Xus sawv, nws tawm mus rau ib qho chaw tsis muaj neeg, ces nws teev Ntuj nyob ntawd. 36Xis Moos thiab nws cov npawg raws Yes Xus qab. 37Thaum lawv nrhiav tau Yes Xus, lawv hais rau nws tias “Sawv daws nrhiav koj.”
38Yes Xus hais rau lawv tias “Peb mus lwm qhov chaw, hauv cov zej zog nyob tsis deb ntawm no, kom kuv tau kev tshaj lus nyob ntawd thiab, yog vim li ntawd, kuv thiaj tawm tuaj.”
39Ces Yes Xus mus thoob lub xeev Nkas Lis Lais, nws tshaj lus nyob hauv cov tsev txoos, thiab nws ntiab dab phem.
Mas Kos tus piav zaj ntawd nyob hauv nws phau ntawv Moo Zoo, nws hais ib lo lus zoo li no: Yes Xus txwv cov dab kom txhob hais lus, vim lawv paub tias Yes Xus yog leej twg (MK 1: 34). Huab Tais Yes Xus hais ntau zaus rau cov neeg nws kho zoo hlo, kom lawv txhob mus tshaj rau teb chaws tias nws kho lawv zoo hlo. Vim li cas Huab Tais Yes Xus thiaj txwv cov dab kom txhob hais lus, thiab txwv cov neeg kom txhob mus cav txog Huab Tais Yes xus ua hwj huam?
Thaum Huab Tais Yes Xus kho cov neeg mob, los thaum nws ntiab cov dab phem, los thaum nws ua lwm yam hwj huam; nws tsis ua tej ntawd kom luag qhuas txog nws, nws ua tej ntawd kom zeej tsoom tso siab tias nws tuaj ntawm Tswv Ntuj tuaj. Huab Tais Yes Xus cov zaj hwj huam yog tej lub cim pab zeej tsoom ntseeg cov lus uas nws hais txog Tswv Ntuj.
Tab sis cov neeg pom Huab Tais Yes Xus muaj lub hwj huam loj npaum no mas lawv yog ib co neeg tos ib tug huab tais txawj ua kom nyob hauv lawv lub teb chaws sawv daws noj qab nyob zoo, tau mov txaus noj seem noj sos mus li, tsis khwv ncaws av ua qoob ua loo. Huab Tais Yes Xus yeej ua tau kom muaj li ntawd, tab sis lub neej tsim txiaj uas Huab Tais Yes Xus nqa tuaj rau lub ntiaj teb tsis yog ib lub neej xws li sawv daws tos. Lub neej tshiab uas Yes Xus coj tuaj rau sawv daws yog lub neej tig los yuav lub siab tshiab nyiam luag tej thiab nyiam Tswv Ntuj. Huab Tais Yes Xus xav kom peb muab peb lub siab phem tua, nws xav kom peb lub siab xyaum coj lub neej ntshiab thiab huv. Huab Tais Yes Xus txoj kev ua Huab Tais yog coj ntiaj teb neeg kom xyaum ua raws li nws xub ua rau peb pom; yog ‘xyaum muab lub siab phem tua, xyaum ua neeg siab ntshiab’.
Huab Tais Yes Xus tsis tuaj ua tus Huab Tais pub lub neej zoo npaum li ua npau suav. Huab Tais Yes Xus tuaj qhia peb kom peb tig los xyaum ua lub neej kaj siab lug nyob hauv txoj kev sib nyiam sib hlub, nyob hauv txoj kev nyiam peb Txiv Tswv Ntuj.
Hmo ntawd Huab Tais Yes Xus kho cov neeg mob ntau leej, nws ntiab ntau tus dab phem. Nws kuj qhia lawv kom tig los yuav lub siab nyiam Tswv Ntuj thiab hlub neeg. Hmo ntawd Huab Tais Yes Xus pw lig lig.
Tag kis ntuj tsis tau kaj, Huab Tais Yes Xus mus nyob qhov xu kev, nws teev Leej Txiv Tswv Ntuj, vim Huab Tais Yes Xus xav ua piv txwv zoo kom peb nquag teev Tswv Ntuj zoo li nws.
Huab Tais Yes Xus cov thwj tim nrhiav tau nws nyob qhov chaw nws teev Ntuj. Lawv hais tias “Sawv daws nrhiav koj.” Lawv hais li ntawd rau Huab Tais Yes Xus, vim tseem muaj tej tus neeg nyob Kas Fas Naus tuaj thov kom Huab Tais Yes Xus pab kho lawv.
Huab Tais Yes Xus teb tias “Peb mus lwm qhov chaw hauv cov zej zog ib ncig ntawm no kom kuv tau tshaj kuv lub Moo Zoo rau lawv thiab.” Huab Tais Yes Xus xub paub tias nws yuav tsis tau kev qhia zej zog ntev xyoo vim cov neeg siab nkhaus yuav muab nws tua.
Lub caij maj caij nrawm. Huab Tais Yes Xus maj mus qhia ntau lub zos. Nws yuav mus tas zog li ntawd peb xyoos, tsis muaj caij so twj ywm.
Huab Tais Yes Xus tseem hais ib lo lus ntxiv rau nws cov thwj tim tuaj tos nws. Huab Tais Yes Xus hais tias “Peb mus lwm qhov chaw, …. yog vim qhov ntawd kuv thiaj tawm tuaj.”
Huab Tais Yes Xus tawm qhov twg tuaj? Ntshai Pob Zeb lawv to taub tias Huab Tais Yes Xus tawm ntawm nws lub zos Nas Xas Les tuaj kom nws tau mus tshaj nws lub Moo Zoo hauv ntau lub zos. Tab sis Huab Tais Yes Xus lo lus tias ‘yog vim qhov ntawd kuv thiaj tawm tuaj’, muaj ib lub ntsiab tob zoo li no tias ‘yog vim kuv yuav tshaj lub Moo Zoo rau ntiaj teb paub, ces kuv thiaj tawm ntawm kuv Leej Txiv Tswv Ntuj tuaj’ (MK 1: 38). Huab Tais Yes Xus yog Tswv Ntuj Leej Tub ib txwm nrog Leej Txiv nyob tsim lub ntuj lub teb thiab kav lub ntuj lub teb. Yog vim Tswv Ntuj xav cawm peb tsoom neeg, nws thiaj tso nws Leej Tub nqes los ua neeg, yug los nyob Npes Les Hes, hlob nyob Nas Xas Les, tawm mus tshaj Leej Txiv cov lus peb xyoos, ua Leej Txiv cov hauj lwm peb xyoos kom sawv daws paub Tswv Ntuj.
Thaum Huab Tais Yes Xus hais lo lus ‘yog vim qhov ntawd kuv thiaj tawm tuaj’, mas peb yuav to taub tias Huab Tais Yes Xus nqes los ua neeg, nws tawm ntawm Leej Txiv tuaj, yog vim nws xav kom tas ntiaj teb paub Tswv Ntuj.
Huab Tais Yes Xus tawm ntawm Leej Txiv tuaj vim nws xav kom peb tsoom Hmoob paub Leej Txiv Tswv Ntuj. Huab Tais Yes Xus txhob txwm tawm ntawm nws Leej Txiv tuaj vim nws xav kom nej paub nws. Nej puas yuav qhib nej lub siab los txais Huab Tais Yes Xus cov lus?