1 Muaj ib hnub xas npas tos, Yes Xus hla ib co teb npleg. Cov thwj tim tshaib plab, ces lawv pib de tej hnab nplej los noj. 2 Cov Fas Lis Xais pom qhov ntawd, lawv hais rau Yes Xus tias : “Saib, koj cov thwj tim ua tej yam txwv tsis pub ua hnub xas npas tos !” 3 Tab sis, Yes Xus hais rau lawv tias : “Nej tsis tau nyeem qhov Das Vis ua thaum Das Vis thiab nws cov npawg tshaib plab lod ? 4 Lawv tau chaws mus hauv Tswv Ntuj lub tsev li cas, thiab lawv noj cov ncuav mov txi Ntuj, tab sis Das Vis thiab nws cov npawg noj tsis nyog cov mov ntawd, kawg yog cov leej choj xwb thiaj noj tau ? 5 Nej puas tau nyeem hauv Txoj Cai tias, hnub xas npas tos, cov leej choj uas nyob hauv lub Tuam Tsev Teev Ntuj tsis caiv hnub xas npas tos, tsis kav lawv tsis txhaum. 6 Kuv qhia meej rau nej, nyob ntawm no, muaj ib yam loj dua lub Tuam Tsev Teev Ntuj. 7 Lo Lus hais tias : Qhov kuv xav yuav, yog txoj kev khuv leej, tsis yog thaj txi Ntuj. Yog nej paub lo lus no lub ntsiab, mas nej yuav tsis muab txim rau cov neeg tsis txhaum. 8Vim tias, Neeg Leej Tub yog tus tswv kav hnub xas npas tos.”
Nyob hauv zaj 12 no peb yuav pom ntxiv tias cov Yus Das tsis xav txais thiab tsis xav mloog Huab Tais Yes Xus. Lawv nrhiav lus rau Huab Tais Yes Xus. Lawv hais tias Huab Tais Yes Xus raug dab.
Los txog tav no, Mas Tais tsis tau tuav txog hnub Xas Npas Tos lub npe ib zaug li. Nyob hauv zaj 12 no Mas Tais sau lo lus ‘Xas Npas Tos’ txog 7 zaus, vim Mas Tais muab Huab Tais Yes Xus cov lus hais txog hnub Xas Npas Tos los nyob ua ke rau hauv zaj 12. Thiab nyob hauv lub nroog uas Mas Tais qhia Huab Tais Yes Xus cov kev cai, mas cov Yus Das cav txog hnub Xas Npas Tos ntau rau cov neeg hwm Huab Tais Yes Xus, Mas Tais thiaj sau ib zag piav txog ‘txoj cai caiv’ hnub Xas Npas Tos ntau. Lus Kas thiab Mas Kos tsis hais ntau npaum li Mas Tais.
Cov Hmoob sawv daws, ‘Hnub Xya’ yog hnub cov Yus Das hu ua ‘Xas Npas Tos’. Cov Yus Das caiv hnub ntawd vim Tswv Ntuj tsim ntuj tsim teb 6 hnub, ces Tswv Ntuj so hnub xya. Thaum cov Yus Das caiv Hnub Xya mas yog ib lub cim tias lawv ‘hwm’ Tswv Ntuj.
Raws cov His Xas Lais txoj cai mas tsis kheev xuas liag los hlais luag cov nplej, tab sis tsis txwv ‘de’ hnab nplej los noj. Yog li thaum Huab Tais Yes Xus cov thwj tim de tej hnab nplej los noj mas tsis yog lawv tau ua tub sab. Cov Yus Das cav tias yog cov thwj tim tsis caiv hnub Xas Npas Tos.
Cov Hmoob sawv daws, thaum cov Fas Lis Xais hais tias cov thwj tim tsis caiv, mas Huab Tais Yes Xus thiaj hais txog zaj nyob hauv phau ntawv Xas Muas phau 1 zaj 21 qib 1-6 rau lawv mloog. Cov lus ntawd xav qhia tias thaum ub Das Vis hla qhov caiv mas ua li cas ziag no cov thwj tim yuav hla tsis tau. Huab Tais Yes Xus tseem xav hais tias cov nrog Das Vis lawv muaj cai hla txoj cai vim lawv nrog Das Vis; nyem no Huab Tais Yes Xus yog tus tseem vaj Pleev loj dua tus vaj Das Vis. Huab Tais Yes Xus haj yam muaj cai tso nws cov thwj tim hla ib qho caiv.
Cov Hmoob sawv daws, Huab Tais Yes Xus hais tias ‘Nyob ntawm no, muaj ib yam loj dua lub Tuam Tsev Teev Ntuj’, yam ntawd yog Huab Tais Yes Xus ntag. Huab Tais Yes Xus yog tus Pleev, nws yog lub Tuam Tsev Teev Ntuj tus Tswv. Huab Tais Yes Xus yeej hais tias nws cov thwj tim hla txoj cai, tiam sis nyem no Huab Tais Yes Xus tuaj txog lawm, mas txoj cai tshiab yuav hloov txoj cai qub.
Huab Tais Yes Xus hais tus yaj saub Os Xes cov lus tias “Qhov kuv xav yuav yog txoj kev khuv leej, tsis yog thaj txi Ntuj.” Lo lus ‘txi Ntuj’ yog hais txog cov thaj txi Ntuj uas lawv ua nyob hauv lub Tuam Tsev Teev Ntuj thiab yog tas ib puas tsav yam txoj cai me uas cov Yus Das nquag coj. Huab Tais Yes Xus tsis thuam txoj cai txi Ntuj, tiam sis Huab Tais Yes Xus txiav txim rau cov Yus Das uas lawv saib cov kab ke sab nraud loj kawg thiab lawv tsis nco qab ‘hlub’ luag tej, lawv thuam cov neeg me.
Cov phooj ywg Hmoob, yog vim Huab Tais Yes Xus cov thwj tim thiab peb sawv daws ntseeg tias Huab Tais Yes Xus yog Tswv Ntuj mas peb thiaj paub tias nyem no peb tsis caiv dab tsi, peb tsis zwm rau Mais Xes kev cai lawm, peb tsis zwm rau peb Hmoob cov qub kev cai lawm.
Tos Huab Tais Yes Xus tsis kom nws cov thwj tim caiv xws li cov Yus Das thaud, yog vim Huab Tais Yes Xus xav cawm tas txhia haiv neeg. Tas txhua haiv neeg zoo siab mloog Tswv Ntuj cov lus qhia, tab sis lawv tsis kam coj Yus Das txoj cai lawm. Huab Tais Yes Xus xav cawm tas txhua hauv neeg, nws thiaj tso cov Yus Das tej qhov caiv pov tseg.
