HNUB TSIB LUB LIS PIAM 12 CAIJ NYOB NRUAB XYOO/ HNUB CHIV LUB LIS PIAM 9 CAIJ NYOB NRUAB XYOO
21Yes Xus hais rau cov thwj tim tias “Tsis yog cov hu kuv ua ‘Huab Tais, Huab Tais’, yuav tau mus hauv Ntuj lub Ceeb Tsheej, yog cov ua raws li kuv Txiv nyob saum ntuj lub siab nyiam. 22Hnub ntawd, yuav muaj coob leej hais rau kuv tias ‘Huab Tais, Huab Tais, tsis yog peb tuav koj lub npe ua yaj saub lod, tsis yog peb tuav koj lub npe ntiab dab lod, peb ua hwj huam yees ntxwv ntau zaus, tsis yog peb tuav koj lub npe los ua lod?’ 23Ces kuv yuav ncaj qha teb rau lawv tias ‘Kuv tsis paub nej; nej cov tau ua phem, nej txav mus deb kuv.’ 24Leej twg mloog cov lus uas kuv nyuam qhuav hais, thiab nws ua raws li cov lus no, mas tus neeg ntawd piv tau rau ib tug neeg xyuam xim uas nws txhim tsev rau saum tsua zeb. 25Thaum los nag hlob, dej sab siv huam, cua tshuab ntsawj lub tsev, tab sis tsev tsis vau, vim lub tsev cog rau saum tsua. 26Leej twg hnov cov lus kuv nyuam qhuav hais, tab sis nws tsis ua raws li cov lus ntawd, tus neeg ntawd piv tau rau ib tug neeg ruam, nws txhim tsev rau saum tej av suab puam. 27Thaum los nag hlob, dej sab siv huam, cua tshuab ntsawj lub tsev, ces lub tsev vau, nws raug xwv txheej loj.” 28Thaum Yes Xus hais cov lus ntawd tas, tsoom sid qhuas nws cov lus qhia, 29vim nws qhia lawv zoo li neeg muaj hwj chim, tsis zoo li cov kws ntawv.
‘Ntuj lub Ceeb Tsheej’ (Kingdom of Heaven) yog lub teb chaws uas Tswv Ntuj nyob. Hais tiag mas Tswv Ntuj nyob tas qhov txhia chaw, Ntuj lub Ceeb Tsheej kuj nyob tas qhov txhia chaw xws li Tswv Ntuj thiab. Ntuj lub Ceeb Tsheej nyob hauv peb nruab siab, tsuas yog peb nrhiav kev npuab Huab Tais Yes Xus, mas peb tso siab tias peb lub neej no nyob hauv Ntuj lub Ceeb Tsheej.
Huab Tais Yes Xus hais rau cov neeg tuaj ntsauv nws tias hnub ntawd, coob leej yuav hais rau Huab Tais Yes Xus tias Huab Tais! Huab Tais! ‘Hnub ntawd’ yog hnub twg? Hnub ntawd yog hnub uas peb tso ntiaj teb no tseg, peb tus plig mus cuag Tswv Ntuj. Ces cov hauj lwm zoo thiab cov hauj lwm uas peb sim neej tau ua los lawm yuav tawm rau Tswv Ntuj pom xyeem thiab rau peb pom xyeem. Peb cov hauj lwm yuav txiav txim rau peb. Ua li hnub ntawd uas Yes Xus hais peb yog hnub peb mus cuag Tswv Ntuj. Hnub ntawd uas peb yuav mus cuag Tswv Ntuj peb yuav mus nyob kaj lug mus li hauv Ntuj lub Ceeb Tsheej ci ntsa iab, ces peb yuav hu txog Tswv Ntuj los hu txog Huab Tais Yes Xus tias “Huab Tais! Huab Tais!”
Peb yuav taij kom Yes Xus txais peb los nyob hauv nws lub Ceeb Tsheej. Tab sis peb tej hauj lwm yuav txiav txim rau peb yog tias lub caij peb nyob ntiaj teb no peb tau ua cov hauj lwm zoo ntau dua, mas peb yuav chaws mus hauv Ntuj lub Ceeb Tsheej. Yog tias nyob rau ntiaj teb no peb lub ncauj nquag tuav txog Yes Xus lub npe, txog Huab Tais lub npe, tab sis peb tsis tau ua cov hauj lwm xis Huab Tais Leej Txiv lub siab mas Huab Tais Yes Xus yuav hais rau peb tias “Kuv tsis paub nej li, nej yog cov tau ua qhov tsis ncaj nej txav mus deb ntawm kuv.”
Huab Tais Yes Xus hais tias “Tsis yog cov hu kuv ua ‘Huab Tais, Huab Tais’, yuav tau mus hauv Ntuj lub Ceeb Tsheej, yog cov ua raws li kuv Txiv nyob saum ntuj lub siab nyiam. Hnub ntawd, yuav muaj coob leej hais rau kuv tias ‘Huab Tais, Huab Tais, tsis yog peb tuav koj lub npe ua yaj saub lod, tsis yog peb tuav koj lub npe ntiab dab lod, peb ua hwj huam yees ntxwv ntau zaus, tsis yog peb tuav koj lub npe los ua lod?’ Ces kuv yuav ncaj qha teb rau lawv tias ‘Kuv tsis paub nej; nej cov tau ua phem, nej txav mus deb kuv.’ Leej twg mloog cov lus uas kuv nyuam qhuav hais, thiab nws ua raws li cov lus no, mas tus neeg ntawd piv tau rau ib tug neeg xyuam xim uas nws txhim tsev rau saum tsua zeb. Thaum los nag hlob, dej sab siv huam, cua tshuab ntsawj lub tsev, tab sis tsev tsis vau, vim lub tsev cog rau saum tsua. Leej twg hnov cov lus kuv nyuam qhuav hais, tab sis nws tsis ua raws li cov lus ntawd, tus neeg ntawd piv tau rau ib tug neeg ruam, nws txhim tsev rau saum tej av suab puam. Thaum los nag hlob, dej sab siv huam, cua tshuab ntsawj lub tsev, ces lub tsev vau, nws raug xwv txheej loj”, mas muaj 3 zag me: zaj ib; hais txog cov tuav txog Huab Tais lub npe ntau ntau, zaj ob; hais txog cov ua hwj huam yees ntxwv, thiab zaj peb; yog ib zag paj lug hais txog 2 lub tsev.
Mas Tais sau nws phau Ntawv Moo Zoo yog ze ntawm xyoo 80 mas thaum ntawd twb pib muaj neeg xav tias ua Ntuj kev cai los yog ntseeg txog Yes Xus mas yog tuav txog Yes Xus lub npe ntau los tuav txog Tswv Ntuj lub npe ntau, Mas Tais thiaj muab Huab Tais Yes Xus cov lus los ntuas sawv daws kom txhob xav li ntawd. Txhob xav tias tsuav yog yus tuav txog Huab Tais lub npe ntau mas yus thiaj nyob hauv Tswv Ntuj lub Ceeb Tsheej. Yus niaj hnub yuav mloog Tswv Ntuj lus raws li Huab Tais Yes Xus piav mas yus thiaj nyob hauv Tswv Ntuj lub Ceeb Tsheej.
Huab Tais Yes Xus ntuas cov neeg ua hwj huam yam li cov tuav ib txog hauj lwm loj hauv lub Koom Txoos, lawv kav lawv tswj lub Koom Txoos, tiam sis lawv tsis nco qab ua tej yam muaj nqes dua cov hauj lwm ntawd; yam li tsis nco qab ua tas txhia yam uas Huab Tais Yes Xus qhia. Thaum txog hnub txiav txim Huab Tais Yes Xus yuav hais rau lawv tias “Kuv tsis paub nej, kuv tsis xav pom nej, kuv tsis saib nej yog ib co neeg zoo lawm; vim nej tsis tau mloog Tswv Ntuj cov lus qhia raws li kuv piav.”
Huab Tais Yes Xus hais nws cov lus xaus tias “Leej twg hnov cov lus kuv nyuam qhuav hais, tab sis nws tsis ua raws li cov lus ntawd, tus neeg ntawd piv tau rau ib tug neeg ruam, nws txhim tsev rau saum tej av suab puam. Thaum los nag hlob, dej sab siv huam, cua tshuab ntsawj lub tsev, ces lub tsev vau, nws raug xwv txheej loj.”
Huab Tais Yes Xus tsis hais txog cov uas lawv tsis paub, tsis tau hnov nws txoj cai tshiab ntawd, tab sis Huab Tais Yes Xus hais txog cov tau hnov thiab paub lawm; xws li peb cov neeg ntseeg sawv daws. Huab Tais Yes Xus xav kom peb cov neeg ntseeg txog nws ua raws li nws hais. Huab Tais Yes Xus tsis nyiam cov neeg uas lawv lub ncauj hais tias lawv ntseeg tiam sis lawv tsis mloog lus; Huab Tais Yes Xus hu cov zoo li no tias ‘neeg zoo sab nraud’.
Peb cov ua Ntuj kev cai mas tsum ceev faj zoo, peb yog cov hnov Huab Tais Yes Xus cov lus, peb puas ua raws li Huab Tais Yes Xus cov lus? Yog peb hais tias peb ntseeg txog Yes Xus tab sis peb tsis ua raws li Huab Tais Yes Xus qhia, mas peb zoo li lub tsev txhim tsev rau saum tej av suab puam.
