HNUB XYA LUB LIS PIAM 11 CAIJ NYOB NRUAB XYOO
25Yes Xus hais ntxiv rau cov thwj tim tias “Nej txhob txhawj txog nej txoj sia tias yuav muab dab tsi los noj, txhob txhawj txog nej lub cev tias yuav muab dab tsi los hnav. Nej txoj sia tsis muaj nqi dua txhiam xws noj thiab nej lub cev tsis muaj nqi dua tej tsoos hnav lod? 26Nej ntsia cov noog saum ntuj saib, lawv tsis tseb nplej, tsis hlais nplej, tsis sau qoob rau hauv txhab, nej Txiv nyob saum ntuj pub rau lawv noj. Nej tsis muaj nqi dua cov noog ntawd lod? 27Nej leej twg txhawj txhawj, nws puas rub tau txoj sia kom ntev ib tshim ntxiv? 28Hais txog tej tsoos tsho, nej yuav txhawj dab tsi? Nej ntsia cov paj ntoos nyob tom tej nras saib, lawv cia li hlob xwb; lawv tsis khwv, tsis ua maj ua ntuag. 29Kuv hais rau nej, tab yog Xas Los Moos, thaum nws muaj koob meej nto moo lug, tsis kav nws tsis tau hnav zoo npaum li ib lub paj ntoos. 30Tej nroj nruab nrag, hnub no ciaj, tag kis luag twb yuav muab pov hlawv hauv qhov txos, tsis kav Tswv Ntuj tseem muab zam zoo rau lawv hnav. Neeg ntseeg tsis ti txha, Tswv Ntuj tseem yuav tsis ua zoo tshaj rau nej lod? 31Nej txhob txhawj tias ‘Peb yuav muab dab tsi los noj? Yuav muab dab tsi los haus? Yuav muab dab tsi los hnav?’ 32Tej ntawd, yog tas puas tsav yam uas cov pej kum neeg nrhiav. Hos nej Txiv nyob saum ntuj paub tias nej yuav tsum muaj tej ntawd huv si. 33Nej xub nrhiav Tswv Ntuj lub Ceeb Tsheej thiab nws txoj kev ncaj tso, ces Ntuj yuav pub tas puav tsav yam ntawd tib si ntxiv rau nej. 34Nej txhob txhawj txog tag kis, tag kis mam li txhawj rau tag kis. Vim niaj hnub twb muaj kev iab kev khwv txaus ris thawm hnub lawm.”
Huab Tais Yes Xus tsis ntuas peb kom txhob ua hauj lwm thiab nyob dag tos Tswv Ntuj pub rau peb noj peb hnav. Huab Tais Yes Xus ntuas peb kom txhob ntxhov siab, txhob txhawj (don’t anxious).
Huab Tais Yes Xus ntuas tias ‘txoj sia’ (Life) muaj nqi dua txhiam xws noj. Tswv Ntuj twb muab yam muaj nqis tshaj rau peb lawm, nws kuj yuav pub lwm yam ntxiv rau peb thiab, yog li mas peb txhob txhawj. Huab Tais Yes Xus xav kom peb ua raws li cov noog tus lwj lwm; yog ua lub siab kaj lug, yam li cov noog ua hauj lwm nrhiav noj raws li lawv lub zog ces Tswv Ntuj muab ntau yam dua qhov lawv npaj tau rau lawv. Yog peb ua lub siab kaj lug mas Tswv Ntuj yuav pub ntau dua ntawd rau peb. Yog peb tsis ua siab kaj, tab sis peb ua siab fab ntxhov siab tas mus li, mas peb tsis tau dab tsi li; piv li peb txhawj txog peb txoj sia tab sis peb puas yuav rub tau txoj sia kom ntev ntxiv tuaj. Yeej tsis tau, puas yog?
Peb yuav xyaum tso siab rau Tswv Ntuj tus pub txoj sia thiab lub meej mom zoo nkauj rau peb. Kev tso siab rau Tswv Ntuj tsis yooj yim, tsuas yog tus neeg ntseeg ti txha xwb thiaj yuav tso siab tau rau Tswv Ntuj; yog li mas tus twg ua Huab Tais Yes Xus thwj tim, nws yuav ntseeg kom ti txha tiag tiag mas nws thiaj yuav txawj tso siab rau Tswv Ntuj.
Thaum peb txawj tso siab rau Tswv Ntuj lawd, peb lub siab yuav nyob tus, ces peb yuav tsis txhawj txog kev nrhiav noj, nrhiav haus, nrhiav hnav ntxiv.
Cov neeg tsis ntseeg txog Tswv Ntuj, mas lawv yuam kev 2 zaug: lawv tsis paub tias Tswv Ntuj hlub lawv, thiab lawv xav ua zaj ua ntxeev kom tau ntau dua qhov uas Tswv Ntuj npaj yuav pub rau lawv; zoo li lawv nrhiav npaum cas los tsis txaus lawv siab ib zaug li.
Huab Tais Yes Xus cov thwj tim yuav tsis nyob dag, lawv tsis yog tsis txawj xav tom ntej tom qab, tsis yog ib co neeg tsis txawj npaj dab tsi, tsis yog ib co neeg ruam tos ib co mov yuav poob saum ntuj los. Tab sis Huab Tais Yes Xus cov thwj tim yog ib co neeg nrhiav ib yam loj muaj nqis tshaj; yog nrhiav Tswv Ntuj lub Ceeb Tsheej. Yog vim lawv pom tias Tswv Ntuj lub Ceeb Tsheej muaj nqis tshaj mas lawv lub siab thiaj kaj, lawv saib lwm yam me, lawv tso siab. Yog lawv nrhiav Tswv Ntuj lub Ceeb Tsheej tas zog, mas Tswv Ntuj yuav pub tej yam noj, tej yam haus, tej yam hnav rau lawv.
Neeg ntiaj teb yeej hais kam tias “Txhob txhawj txog tag kis, vim niaj hnub twb muaj kev iab kev khwv txaus ris thawm hnub lawm”, ces sawv daws thiaj muaj siab loj nyiaj ris kev iab kev khwv. Tab sis Huab Tais Yes Xus muab ib lub ntsiab tshiab rau; yam li niaj hnub peb ua tiag nyiaj ris kev iab kev khwv tau, yog vim peb tso siab rau Tswv Ntuj; peb paub tias niaj hnub Tswv Ntuj pab peb.
Huab Tais Yes Xus hais tias nyob hauv tib neeg muaj ob yam uas yog tseem ceeb tshaj. Ob yam ntawd yog yus txoj sia thiab yog yus lub cev. Vim peb xav ua txhiam xws los yug peb txoj sia mas peb niaj hnub sawv ntxov mus ua liaj ua teb, thiab vim peb xav muab ris tsho los vov peb lub cev mas peb maj mus tsim toob xib puaj yam zoo muag kom tau nyiaj txiag mus muas tsoos tsho zoo hnav. Huab Tais Yes Xus pom tias coob leej siab fab dhau txog txoj kev ua txhiam xws noj thiab nrhiav tsoos tsho hnav. Huab Tais Yes Xus thiaj muab neeg los piv rau cov noog. Nws hais tias cov noog tsis muaj nqi dab tsi thiab lawv tsis tseb nplej, tsis hlais nplej, tsis muaj txhab rau nplej los rau pob kws, tsis kav peb Txiv nyob saum ntuj yug cov noog. Cov noog nrhiav tau txaus lawv noj.
Tos Yes Xus hais li ntawd rau peb yog kom peb ‘cia siab’ (Trust) rau peb Txiv nyob saum ntuj. Peb Txiv nyob saum ntuj saib peb muaj nqi dua noog; nws pom peb khwv ua dej num. Peb Txiv Tswv Ntuj yog Txiv tiag, nws muaj lub siab zoo li niam thiab txiv hlub tub ki mas nws yeej yuav ua kom peb muaj txaus noj, tsuas yog peb rau siab ua dej num mas txhob ntxhov siab ntxiv.
Huab Tais Yes Xus qhuab qhia tias yog peb rau siab ua peb tej hauj lwm tas mas peb tsis txhob ua siab fab tham tuj taws tias yuav noj dab tsi, yuav haus dab tsi, yuav hnav dab tsi? Vim peb ‘ntseeg tsis ti txha’ (little faith) ces peb tsis cia siab rau Tswv Ntuj, peb ntshai tsam Tswv Ntuj yuav ua rau peb zoo tsis cuag ua rau cov paj ntoos.
Tos peb ua siab fab tham tuj taws tias yuav noj dab tsi, haus dab tsi, hnav dab tsi; yog vim peb tsis xub nrhiav Tswv Ntuj lub Ceeb Tsheej. Huab Tais Yes Xus hais tias “Nej xub nrhiav Tswv Ntuj lub Ceeb Tsheej thiab xub nrhaiv txoj kev ncaj tso ces nej Tswv Ntuj yuav pub puas tsav puas yam tib si ntxiv rau nej. Tswv Ntuj yeej paub tias nej tos tej yam noj tej yam hnav. Tsis tas nej yuav rov hais txog tej ntawd tsis tseg rau nws.”
Huab Tais Yes Xus hais rau peb kom peb txhob txhawj txog hnub qab. Tag kid mam xav txog tag kis. Hnub no peb ris txhia yam tuaj nphav peb hnub no. Tag kis peb yuav ris txhia yam tuaj nphav peb tag kis. Tswv Ntuj yuav yog tus pab peb ris yam tuaj nphav peb, yog peb cia siab rau Tswv Ntuj.
Yog peb niaj hnub rov cia siab rau Tswv Ntuj mas peb lub neej lom zem. Niaj tag kis peb luag ntxhi.
