HAIS SAW MAB LIAB

Dhau hnub xas npas tos lawm, yog thawj hnub hauv lub lis piam, thaum sawv ntxov, Mab Liab Mas Ntas Las thiab lwm tus Mab Liab nkawd mus xyuas lub ntxa. Ib sij huam, av qeeg loj kawg. Huab Tais tus Tshiab nqes saum ntuj los dov daim txiag zeb, nws zaum saud. Nws ib ce ci li xob laim, nws cev tsoos tsho dawb li daus. Cov zov keeb pom, lawv ceeb, lawv ntshai tshee na, zoo li lawv tuag lawm. Tus Tshiab hais rau ob tug poj niam tias “Neb txhob ntshai mog, kuv paub tias neb nrhiav Yes Xus, tus tuag saum ntoo cuam. Nws tsis nyob ntawm no lawm, nws sawv rov los raws li nws tau hais. Neb los xyuas qhov chaw lawv tso nws lub cev saib mas! Neb maj zeeg mus hais rau nws cov thwj tim tias ‘Nws sawv hauv cov tuag los lawm, nws ua nej ntej mus Nkas Lis Lais; nej yuav pom nws nyob ped.’ Kuv hais li no rau neb xwb.” Ob tug poj niam
tso plhuav lub ntxa tseg. Nkawd ntshai thiab zoo siab tas nrho. Nkawd khiav mus xa lub moo ntawd rau cov thwj tim.

Dhau hnub xas npas tos lawm, Mab Liab Mas Ntas Las, Mab Liab uas yog Yas Kos niam, thiab Xas Los Mes lawv muas ib co tshuaj pleev neeg tuag coj mus pleev Yes Xus lub cev. Hnub chiv lub lis piam sawv ntxov, thaum lub hnub nyuam qhuav tawm tuaj, lawv mus tom ntxa. Lawv sib tham tias “Leej twg yuav dov daim txiag zeb kaw rooj ntxas rau peb?” Lawv tsa muag ntsia, lawv pom tias daim txiag zeb twb dov rau ib sab lawm; daim txiag zeb ntawd loj kawg. Lawv nkag mus hauv ntxa, lawv pom ib tug hluas zaum sab xis, nws hnav ib lub tsho dawb ntev, lawv ntshai tas nrho. Tab sis tus hluas hais rau lawv tias “Nej txhob ntshai! Nej nrhiav Yes Xus Nas Xas Les, tus uas luag muab tua saum ntoo cuam; nws sawv rov los lawm, nws tsis nyob ntawm no. Saib qhov chaw no, yog lub chaw lawv tso nws lub cev. Nej mus hais rau nws cov thwj tim thiab hais rau Pob Zeb tias, nws ua nej ntej mus Nkas Lis Lais, nej yuav pom nws nyob ntawd, raws li nws tau hais rau nej.” Cov poj niam tawm los nraum no, lawv khiav ntawm ntxa mus, lawv ib ce xob tas, lawv tshee tshee. Lawv tsis hais lus rau leej twg li, vim lawv ntshai kawg.

Cov poj niam rov ntawm ntxa mus tsev. Lawv qhia tej yam ntawd tib si rau Pab Kaum Ib thiab rau lwm cov. Yog Mab Liab Mas Ntas Las, Zag, thiab Mab Liab uas yog Yas Kos niam. Lwm cov poj niam uas nrog lawv ua ke, kuj hais ib yam li ntawd rau cov Hauv Paus Xa Lus. Tab sis cov Hauv Paus Xa Lus saib tej lus no zoo li neeg tsis meej pem hais, ces lawv tsis ntseeg cov poj niam. Pob Zeb sawv tsees, nws khiav mus tom ntxa. Nws khoov xauj hauv, nws tsuas pom cov hlua pav xwb. Nws rov mus tsev, nws xav tsis thoob txog tej xwm uas tshwm tuaj zoo li ntawd.

Tib hnub ntawd thaum tsaus ntuj, uas yog thawj hnub pib lub lis piam, cov qhov rooj hauv qhov chaw cov thwj tim nyob kaw tas, vim lawv ntshai cov Yus Das. Yes Xus los sawv hauv nruab nrab, nws hais rau lawv tias “Nej nyob kaj lug.” Thaum Yes Xus hais lo lus ntawd tas,
nws muab nws ob txhais tes thiab nws phab tav rau lawv saib. Cov thwj tim pom Huab Tais, lawv zoo siab kawg. Yes Xus rov hais rau lawv tias “Nej nyob kaj lug! Kuv xa nej mus xws li Leej Txiv xa kuv tuaj.” Yes Xus hais li tas, nws tshuab pa rau lawv, nws hais rau lawv tias “Nej txais
Leej Ntuj Plig Ntshiab. Nej daws txhaum rau leej twg, mas nws cov txhaum yuav daws. Nej tsis daws leej twg cov txhaum, mas nws cov txhaum yuav nyob.

1. Yes Xus sawv rov los (LK 24: 6).
2. Yes Xus tawm tuaj xyuas cov thwj tim, nws hais tias “Nej nyob kaj lug” (Z 20: 19).
3. Yes Xus tseem tawm los rau tsib puas leej ib txhij pom (1KLN 15: 6).
4. Leej Pleev tsis tau sawv rov los, mas peb txoj kev ntseeg yog ib zag cuav (1KLN 15: 14).
5. Tos Mas tsis ntseeg, nws hais tias “Yog kuv tsis pom mas kuv tsis ntseeg” (Z 20: 25).
6. Yes Xus tawm los rau Tos Mas thiab cov thwj tim pom, nws hais rau Tos Mas tias “Cov uas tsis tau pom tab sis lawv ntseeg, mas lawv txoj hmoov zoo” (Z 20: 29).
7. Yes Xus hais tias “Tus twg ntseeg thiab txais lub Cim Ntxuav, mas Ntuj yuav cawm nws” (MK 16: 16).
8. Vim peb muaj lub siab ntseeg mas peb thiaj tau txais lub txiaj ntsim cawm peb (EFX 2: 8).
9. Yes Xus hais tias “Tus ntseeg txog kuv, nws yuav tsis tuag” (Z 11: 26).
10. Peb yuav hais lo lus li no tias “Huab Tais, kuv ntseeg, thov koj pab kuv vim kuv ntseeg me me xwb” (MK 9: 23).

Pab Kaum Ib leeg mus txog Nkas Lis Lais teb. Lawv mus saum lub roob uas Yes Xus teem rau lawv. Lawv pom Yes Xus, lawv pe; ib txhia tseem ua xyem xyav. Yes Xus txav los ze lawv, nws hais cov lus no rau lawv “Ntuj pub ib puas tsav yam hwj huam rau kuv nyob saum ntuj thiab nyob ntiaj teb no. Nej mus, nej ua kom tas ib tsoom haiv neeg los ua kuv thwj tim. Nej hu txog Leej Txiv, Leej Tub thiab Leej Ntuj Plig Ntshiab lub npe, nej ntxuav lawv. Nej qhia kom lawv coj tas puas tsav yam uas kuv qhia rau nej. Hos kuv, mas kuv niaj hnub nrog nej nyob mus txog lub zim txwv ntiaj teb kawg.”

Yes Xus hais rau lawv tias “Nej mus thoob qab ntuj, nej tshaj lub Moo Zoo rau txhua leej txhua tus. Tus twg ntseeg thiab txais lub cim ntxuav, mas Ntuj yuav cawm nws, hos tus tsis ntseeg yuav raug txim. Cov cim no yuav nrog nraim cov uas yuav ntseeg; lawv hu txog kuv lub npe, lawv yuav ntiab dab tau, lawv yuav hais ib co lus tshiab, lawv yuav tuav nab tau, yog lawv haus tshuaj lom neeg, tshuaj yuav tsis ua xwv txheej rau lawv, thaum lawv tsa tes rau saum cov neeg mob, mas cov mob yuav zoo.” Thaum Huab Tais Yes Xus hais cov lus no tas rau lawv, Ntuj nqa nws nce mus saum ntuj. Nws zaum ntawm Tswv Ntuj sab xis.

Yes Xus coj lawv mus txog Npes Tas Nias, ces nws tsa tes foom hmoov zoo rau lawv. Thaum nws tseem tab tom foom hmoov zoo, mas nws txav ntawm lawv mus. Ces Ntuj nqa nws mus saum ntuj. Hos lawv, mas lawv txhos caug pe Yes Xus. Lawv rov qab mus Yes Lus Xas Les, lawv zoo siab tas nrho. Lawv nyob hauv lub Tuam Tsev Teev Ntuj tas mus li cav txog Tswv Ntuj.

Yes Xus hais cov lus no tas, nws nce zuj zus ntawm lawv qhov muag. Muaj ib tw huab los thaiv ces lawv tsis pom nws lawm. Thaum Yes Xus nce mus saum ub lawm, mas lawv nyob ntsia ntsoov lub ntuj, ces muaj ob tug neeg hnav tsoos dawb los cuag lawv. Nkawd hais tias “Cov Nkas Lis Lais, vim li cas nej nyob ntsia ntsoov lub ntuj zoo li no? Tus Yes Xus uas ntuj nqa nws hauv nej mus rau saum ntuj lawd, nws yuav rov los zoo nkaus li nej pom nws nce mus saum ntuj thiab.”

1. Yes Xus hais tias “Kuv yuav mus cuag kuv Txiv thiab nej Txiv, kuv tus Tswv Ntuj thiab nej tus Tswv Ntuj” (Z 20: 17).
2. Yes Xus hais tias “Kuv mus npaj ib chav rau nej” (Z 14: 2).
3. Yes Xus hais tias “Kuv nyob qhov twg, mas nej nyob qhov twg” (Z 14: 3).
4. Yes Xus txib cov thwj tim tias “Nej ua kom tas ib tsoom haiv neeg los ua kuv thwj tim” (MT 28: 19).
5. Yuav muaj ib pab yaj thiab ib tug tswv zov yaj xwb (Z 10: 16).
6. Yes Xus hais tias “Kuv yuav nrog nej nyob mus li” (MT 28: 20).
7. Yes Xus hais tias “Tsis yog nej xaiv kuv, yog kuv xaiv nej” Z 15: 16).
8. Yes Xus hais tias “Kuv yog txoj kev, qhov tseeb, thiab txoj sia” (Z 14: 6).
9. Yes Xus nce mus saum ntuj, zaum ntawm Leej Txiv phab xis (MK 16: 19).
10. Yes Xus hais tias “Kuv yuav rub tas ib tsoom neeg los cuag kuv” (Z 12: 32).

Thaum txog lub Hnub Nyoog Tsib Caug, tas cov thwj tim huv tib si tuaj sib txoos ua ke. Ib sij huam, txawm muaj ib lub suab nrov saum ntuj tuaj xws li ib nthwv cua hlob hlob ntsawj, lub suab ntawd nrov thoob plaws lub tsev uas lawv nyob. Ces lawv pom tej ntshua nplaim zoo li
nplaim taws, ncau ua tej tus nplaim me ya tuaj tsaws saum cov thwj tim txhua tus. Lawv sawv daws tau txais Leej Ntuj Plig Ntshiab puv hauv lawv, ces lawv pib hais ntau xeem lus raws li Leej Ntuj Plig pub kom lawv hais tau.

1. Hnub Tsib Caug, cov thwj tim thiab niam Mab Liab sib txoos ua ke teev Ntuj (HL 2: 1).
2. Thaum lawv teev Ntuj, ib lub suab nrov saum ntuj tuaj thoob plaws lub tsev (HL 2: 2).
3. Muaj tej ntshua nplaim taws ncau ua tej tus nplaim taws me yaj tuaj taws saum lawv (HL 2: 3).
4. Cov thwj tim sawv daws tau txais Leej Ntuj Plig Ntshiab puv hauv lawv (HL 2: 4).
5. Cov neej tuaj nyob ntawd, lawv hnov cov thwj tim nyias hais nyias xeem lus (HL 2: 6).
6. Cov thwj tim muaj lub siab tawv tshaj lub Moo Zoo (HL 4: 19).
7. Pob Zeb tshaj tias “Tswv Ntuj tsa Yes Xus uas nej tau dai saum Ntoo Cuam ua Huab Tais thiab ua Leej Pleev” (HL 2: 6).
8. Paj Lug hais tias “Nej sawv daws puav leej yog Tswv Ntuj cov me nyuam nyob hauv txoj kev ntseeg txog Yes Xus” (NLT 3: 26).
9. Yes Xus hais tias “Nej sis nyiam sis hlub zoo li kuv tau nyiam tau hlub nej” (Z 15: 12).
10. Yes Xus hais ntxiv tias “Nej nyiam nej tus yeeb ncuab ib yam li nej nyiam nej” (MT 5: 44).

Cov neeg uas mus pw tsaug zog nyob hauv Yes Xus, mas Tswv Ntuj yuav coj lawv mus nrog Tswv Ntuj nyob. Ntuj yuav nqa lawv nce mus saum cov huab, mus cuag Huab Tais nyob saum ntuj.

1. Tswv Ntuj yuav tsis tso cov neeg pheej xeeb rau Tswv Ntuj pov tseg rau ntuj txias teb tsaus (NPN 16: 10).
2. Niam Mab Liab tau mloog Tswv Ntuj coj nws kev, ces nws yog Yes Lus Xas Les lub koob meej thiab yog tus ua kom peb muaj koob meej (JD 15: 9).
3. Tswv Ntuj hais rau niam Mab Liab tias “Koj sawv tsees, kuv leej muam zoo nkauj. Los mas, nyem no lub caij ntuj no dhau lawm, nag twb tu lawm” (KwT 2: 10).
4. Tswv Ntuj hais rau Mab Liab tias “Koj yog tus zoo nkauj tas nrho, nyob hauv koj tsis muaj ib qho xyeej” (KwT 4: 7).
5. Tus poj vaj sawv ntawm Tswv Ntuj sab xis (NPN 45: 10).
6. Tswv Ntuj tau foom ib lo lus zoo dua tas txhua tus leej pom niam nyob ntiaj teb no rau Mab Liab (JD 13: 18).
7. Tswv Ntuj foom lo lus zoo tias “Koj nyob kaj lug, tus tau txiaj ntsim puv siab, Huab Tais nrog koj nyob” (LK 1: 28).
8. Peb nrog Leej Pleev tuag, peb thiaj yuav nrog Leej Pleev sawv rov los (LM 6: 5).
9. Yes Xus cog lus tias “Kuv yuav rov los coj nej mus nrog kuv nyob” (Z 14: 3).
10. Tswv Ntuj lub Tuam Tsev nyob saum ntuj qhib los, lub Xab Cog Lus hauv Kem Ntshiab tawm los (QYTN 11: 19).

Muaj ib lub cim loj kawg tshwm sim nyob saum ntuj; yog ib tug Poj Niam hnav lub hnub. Lub hli nyob hauv nws qab xib taws, kaum ob lub hnub qub vij nws taub hau.

1. Muaj ib lub cim loj tas nrho tshwm nyob saum ntuj, yog ib tug poj niam hnav lub hnub (QYTN 12: 1).
2. Lub hli nyob hauv tus poj niam qab xib taws, kaum ob lub hnub qub vij nws lub taub hau (QYTN 12: 1).
3. Mab Liab nyob saum txheej ntuj siab, nws lub theej kiab nyob saum tus ncej huab (NXL 24: 4).
4. Mab Liab yog kev hlub dawb huv tus leej niam (NXL 24: 24).
5. Mab Liab yog kev txawj kev ntse tus leej niam (NXL 24: 24).
6. Mab Liab yog kev vam khom tus leej niam (NXL 24: 24).
7. Mab Liab yog tus vaj kav Yas Kos tsev neeg leej niam (LK 1: 32).
8. Tus nrhiav yuav ntsib Mab Liab (CPL 8: 17).
9. Tus tsob hwb Mab Liab yuav tsis ntog hauv qhov txhaum (NXL 24: 21).
10. Tus ntsib Mab Liab yuav pom txoj sia (CPL 8: 35).

Lub rau hli, Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais. Lub zos ntawd hu ua Nas Xas Les. Tus ntxhais ntawd, lawv muab qhaib rau ib tug txiv neej hu ua Yos Xes, xeem Das Vis. Hos tus ntxhais lub npe hu ua Mab Liab. Tus Tshiab chaws mus hauv Mab Liab tsev, nws hais rau Mab Liab tias “Koj nyob kaj lug, tus tau txiaj ntsim puv siab! Huab Tais nrog koj nyob.” Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. Tus Tshiab hais rau Mab Liab tias “Mab Liab, koj tsis txhob ntshai. Tswv Ntuj saib koj ntxim Tswv Ntuj siab. Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. Nws yuav yog ib tug loj, luag yuav
hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws. Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg.” Mab Liab hais rau tus Tshiab tias “Qhov ntawd yuav muaj tuaj zoo li cas, vim kuv tsis paub ib tug txiv neej.” Tus Tshiab teb rau Mab Liab tias “Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. Saib! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau.” Ces Mab Liab hais tias “Kuv yog Huab Tais tus ntxhais txib. Kuv xav kom muaj raws li koj hais.”

1. Tib neeg tsis mloog lus mas kev txhaum tau tshwm sim los nyob hauv lub ntiaj teb (LM 5: 12).
2. Leej Txiv hlub lub qab ntuj neeg mas nws xa Leej Tub tuaj cawm cov neeg ntseeg txog Leej Tub (Z 3: 17).
3. Tswv Ntuj kom tus Tshiab Nkas Nplias xa xov tuaj rau Mab Liab (LK 1: 26, 27).
4. Tus Tshiab hais rau Mab Liab tias “Koj yuav xeeb tub, koj yuav tis nws npe hu ua Yes Xus” (LK 1: 31).
5. Tus Tshiab hais tias “Nws yog Tswv Ntuj Leej Tub” (LK 1: 32).
6. Mab Liab pom zoo raws li tus Tshiab hais, ces nws teb tias “Kuv yog Huab Tais tus ntxhais txib, kuv xav kom muaj raws li koj hais” (LK 1: 38).
7. Tswv Ntuj Leej Tub mloog Leej Txiv mas nws thiaj xeeb los ua neeg (LK 1: 35).
8. Leej Tub kev mloog lus mas coob leej thiaj tau txais cawm (LM 5: 19).
9. Mab Liab mloog Tswv Ntuj lus mas nws rais mus ua Tswv Ntuj tus Leej Niam (LK 1: 35).
10. Tsis muaj ib yam dab tsi Tswv Ntuj ua tsis tau (LK 1: 37).

Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. Ces Es Lis Xas Npes tsa suab hlo hais nrov nrov tias “Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. Ua cas Ntuj thiaj pub kom kuv tus Huab Tais leej niam tuaj xyuas kuv? Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo!”

1. nco txog Mab Liab mus xyuas tus phauj Es Lis Xas Npes xeeb tub thaum hnub nyoog laus lawm (LK 13: 40).
2. Es Lis Xas Npes yug nws tus tub Zam (LK 1: 13).
3. Es Lis Xas Npes hais rau Mab Liab tias “Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo” (LK 1: 45).
4. Yog Leej Ntuj Plig Ntshiab ua kom Mab Liab xeeb tub (MT 1: 18).
5. Mab Liab hais tias “Kuv tus plig cav txog Huab Tais lub hwj chim” (LK 1: 46).
6. Mab Liab hais tias “Huab Tais lub siab hlub roos cov neeg hwm nws tiam dhau tiam” (LK 1: 50).
7. Mab Liab yog Tswv Ntuj tus Leej Niam, nws nrog Es Lis Xas Npes nyob kom tau pab tu Es Lis Xas Npes thaum tseem nyob hli (LK 1: 56).
8. Mab Liab tut us phauj Es Lis Xas Npes tas mas nws mam rov mus tsev (LK 1: 56).
9. Thaum peb tseem muaj sij hawm ua qhov zoo rau sawv daws, mas peb kav tsij ua mus (NLT 5: 10).
10. Peb nrog sawv daws nyob haum pheej raws li peb ua tau (LM 12: 18).

Yes Xus yug los nyob Npes Les Hes, Yus Das teb, yog lub caij Hes Los ua vaj. Muaj ib co kws hnub qub tuaj Toob Fab tuaj txog Yes Lus Xas Les. Lawv nug tias “Tus vaj Yus Das uas nyuam qhuav yug los nyob qhov twg? Peb pom nws lub hnub qub tawm nyob Toob Fab, peb tuaj hawm nws.” Tus vaj Hes Los hnov li ntawd, nws lub siab nphau npog. Hes Los hu cov kws hnub qub twj ywm tuaj. Nws kom lawv qhia meej lub sij hawm uas lub hnub qub tau tawm tuaj. Ces nws cia lawv mus Npes Les Hes. Tus vaj tso lus li ntawd, ces lawv sawv kev mus. Thaum ntawd, lub hnub qub uas lawv tau pom nyob Toob Fab rov mus ua lawv ntej. Nws mus nres saum qhov chaw uas tus me nyuam nyob. Lawv rov pom lub hnub qub, mas lawv zoo siab kawg. Lawv chaws mus hauv tsev, lawv pom tus me nyuam thiab nws niam Mab Liab, lawv pe, lawv hawm nws. Lawv qhib lawv cov phij xab, lawv cev kub, cev txab ntoo xyab, thiab cev txab txiv yoov ua paj tshab rau nws.

Lub zwj ceeb ntawd, vaj ntxwv Xes Ntxas Aus Nkus Tus tshaj lus ceeb toom kom tas ntiaj teb txheeb tsoom mej hwm. Yos Xes kuj sawv kev hauv lub nroog Nas Xas Les, xeev Nkas Lis Lais mus pem Das Vis lub nroog hu ua Npes Les Hes, nyob hauv xeev Yus Das, vim Yos Xes yog Das Vis tsev neeg thiab Das Vis caj ces. Yos Xes xav muab Mab Liab lub npe sau nrog nws lub npe, vim Mab Liab yog tus nws qhaib thiab Mab Liab cev hnyav lawm. Thaum nkawd nyob Npes Les Hes, txog lub caij Mab Liab yuav daws cev. Nws yug nws tus tub, nws muab ntaub qhwv, thiab muab tso pw hauv ib lub dab nyuj, vim lub tsev txais qhua tsis muaj chaw rau nkawd so. Nyob thaj tsam ntawd, muaj ib co neeg zov yaj. Lawv nyob nruab teb. Hmo ntuj, lawv nyob zov lawv pab yaj. Huab Tais tus Tshiab tawm los rau lawv pom, Huab Tais lub hwj chim ci dawb paug ncig lawv, lawv ntshai kawg. Tus Tshiab hais rau lawv tias “Nej txhob ntshai, vim kuv tuaj xa ib tsab xov zoo uas yuav ua kom nej zoo siab thiab ib tsoom neeg zoo siab. Hnub no, nyob hauv Das Vis lub nroog, tus Cawm nej yug los lawm, nws yog Leej Pleev, thiab yog Huab Tais. Lub cim yuav ua kom nej paub yog lub cim no; nej yuav pom ib tug me nyuam mos qhwv ntaub pw hauv ib lub dab nyuj.” Ib sij huam, txawm muaj ib pab Tshiab coob coob tuaj nrog tus Tshiab xa xov cav lus zoo txog Tswv Ntuj tias “Nyob saum cov txheej ntuj siab, Tswv Ntuj nto meej nto moo, nyob ntiaj teb, tsoom neeg Tswv Ntuj nyiam, nyob thaj yeeb.” Thaum cov Tshiab tso cov zov yaj tseg rov mus saum ntuj lawm, cov zov yaj sib yaum tias “Peb mus Npes Les Hes, mus xyuas yam xwm uas Huab Tais tuaj qhia peb ntawd saib.” Ces lawv maj zeeg tuaj mus. Lawv pom Mab Liab thiab Yos Xes, thiab pom tus me nyuam mos pw hauv dab nyuj. Thaum lawv pom li ntawd, lawv piav lo lus uas tus Tshiab tau qhia rau lawv txog tus me nyuam. Mab Liab, nws ua tib zoo khaws tej lus no huv si cia rau nruab siab.

1. Tus kav Tswv Ntuj haiv neeg yuav yug los nyob hauv lub zos Npes Les Hes (MiK 5: 1).
2. Yos Xes thiab Mab Liab sawv kev ntawm lub zos Nas Xas Les mus rau Npes Les Hes kom tau sau Mab Liab npe nrog nws lub npe (LK 2: 4).
3. Mab Liab yug nws tus tub nyob Npes Les Hes (LK 2: 7).
4. Nyob Npes Les Hes tsis muaj chaw rau Mab Liab thiab Yos Xes so, ces Mab Liab muab ntaub qhwv tus me nyuam thiab muab tso pw hauv lub dab nyuj (LK 2: 7).
5. Cov Tshiab tawm tuaj hais rau cov zov yaj tias “Hnub no, tus Cawm nej yug los lawm” (LK 2: 10, 11).
6. Cov Tshiab cav lus zoo txog Tswv Ntuj tias “Nyob saum cov txheej ntuj siab, Tswv Ntuj nto meej nto moo; nyob ntiaj teb, tsoom neeg Tswv Ntuj nyiam nyob thaj yeeb” (LK 2: 14).
7. Cov kws hnub qub tuaj Toob Fab tuaj nrhiav tus Pleev yuav yug los (MT 2: 1, 2).
8. Cov kws hnub qub chaws los hauv tsev, ces lawv hawm tus me nyuam Yes Xus (MT 2: 11).
9. Tas txhua haiv neeg yuav tsob hwb Leej Pleev (NPN 72: 11).
10. Tus twg txais Leej Pleev mas tus twg los ua Tswv Ntuj cov me nyuam (Z 1: 12).

Thaum txog lub caij yuav ua kab ke ntxuav ob niam tub raws li Mais Xes Txoj Cai, Mab Liab thiab Yos Xes nkawd coj Yes Xus mus pem Yes Lus Xas Les, kom tau cev tus me nyuam rau Huab Tais. Thaum ntawd nyob Yes Lus Xas Les, muaj ib tug txiv neej hu ua Xis Mes Oos.
Tus neeg ntawd yog neeg ncaj thiab nyiam teev Ntuj. Nws tos tus yuav tuaj nplij His Xas Lais. Leej Ntuj Plig Ntshiab nyob roos nws. Leej Ntuj Plig Ntshiab tshoj nws ces nws paub tias yog nws tsis tau pom Huab Tais tus Pleev, mas nws yuav tsis tuag. Leej Ntuj Plig coj nws tuaj nyob hauv lub Tuam Tsev Teev Ntuj. Thaum Mab Liab thiab Yos Xes nkawd coj tus me nyuam mos Yes Xus tuaj ua cov kab ke raws Txoj Cai, Xis Mes Oos txais tus me nyuam los rau hauv nws ob txhais npab, nws cav lus zoo txog Tswv Ntuj tias “Txiv Tswv, nyem no koj tso koj tus tub txib
mus kaj lug, raws li koj lo lus, vim kuv qhov muag tau pom koj txoj kev cawm neeg, uas koj npaj nyob ntawm ib tsoom haiv neeg xub ntiag, yog qhov pom kev tawm tuaj kaj cov pej kum haiv neeg, yog koj tsoom pej xeem His Xas Lais lub koob meej.” Xis Mes Oos foom hmoov zoo rau lawv, nws hais rau Mab Liab, Yes Xus niam tias “Koj ntsia! Tus me nyuam no yuav ua chaw rau ntau leej His Xas Lais ntog thiab ntau leej rov sawv. Nws yog ib lub cim ua kom sawv daws sib cav. Hos ntawm koj, mas ib rab ntaj yuav hno koj tus plig, kom xwv tej lus uas coob leej
xav tuaj nruab siab tawm los rau sawv daws paub.” Tseem muaj ib tug yaj saub poj niam, hu ua As Nas, yog Fas Nus Ees tus ntxhais, xeem As Ntxes. Nws lub hnub nyoog laus kawg. Dhau lub caij nws nyob ua nkauj xwb lawm, mas nws nrog nws tus txiv nyob xya xyoo, ces nws ua poj
ntsuam laus li ntawd txog yim caum plaub xyoos. Nws tsis nrug ntawm lub Tuam Tsev Teev Ntuj li. Nws yoo mov thiab hais cov zaj teev Ntuj los hawm Tswv Ntuj thawm hnub thawm hmo. Tib lub sij hawm ntawd, As Nas kuj tuaj nyob ntawd thiab, nws cav lus zoo txog Tswv Ntuj, nws
hais txog tus me nyuam rau txhia leej txhia tus uas tos txog txoj kev txhiv Yes Lus Xas Les.

1. Thaum tus me nyuam Yes Xus yug tau 8 hnub, lawv ua kab ke txiav rau nws (LK 2: 21).
2. Lawv tis lub npe rau tus me nyuam hu ua Yes Xus (LK 2: 21).
3. Tsuas muaj lub npe ‘Yes Xus’ tib lub npe xwb thiaj cawm tau ntiaj teb neeg (HL 4: 12).
4. Yes Xus hais rau peb tias yog peb tuav txog Yes Xus lub npe thov dab tsi ntawm Leej Txiv, mas Leej Txiv yuav pub rau peb (Z 16: 23).
5. Tus twg hu txog Huab Tais, Huab Tais yuav mloog thiab zam lub txim pub rau nws (NPN 86: 5).
6. Yos Xes thiab Mab Liab coj tus me nyuam Yes Xus mus cev rau Tswv Ntuj (LK 2: 22).
7. Tus yawg Xis Mes Oos ua Yaj Saub hais tias Yes Xus yuav ua chaw rau ntau leej ntog thiab ntau leej rov sawv (LK 2: 34).
8. Tus yawg Xis Mes Oos tseem hais rau Mab Liab tias muaj ntau rab ntaj yuav hno Mab Liab tus plig (LK 2: 35).
9. Yos Xes thiab Mab Liab coj tus me nyuam Yes Xus mus nyob hauv lub zos Nas Xas Les (LK 2: 39).
10. Peb ua dab tsi mas peb yuav tuav txog Yes Xus lub npe (KLX 3: 17).

Thaum Yes Xus muaj kaum ob xyoos lawm, lawv mus ua lub Ntees Hla pem Yes Lus Xas Les raws li kev cai ua Ntees Hla. Dhau cov hnub ntawd tas, ces Yos Xes thiab Mab Liab nkawd sawv kev rov mus, hos tus me tub Yes Xus tseem nyob Yes Lus Xas Les, nws niam thiab nws txiv tsis paub. Nkawd xav tias nkawd tus tub nrog pab neeg tuaj ua ke rov qab lawm. Ces nkawd mus ib hnub ke, nkawd mam li pib nrhiav nkawd tus tub hauv cov txheeb ze thiab cov swm neeg. Nkawd nrhiav tsis tau, nkawd rov mus nrhiav nws pem Yes Lus Xas Les. Nkawd nrhiav peb hnub, thiaj nrhiav tau Yes Xus nyob hauv lub Tuam Tsev Teev Ntuj. Nws zaum hauv nruab nrab cov kws Txoj Cai, nws mloog lawv thiab nug lawv. Cov neeg uas tau hnov Yes Xus hais lus, puav leej yoob tas rau nws lub tswv yim ntse thiab nws cov lus teb. Thaum nkawd pom Yes Xus, nkawd xav tsis thoob, ces Yes Xus niam hais rau Yes Xus tias “Me tub, vim li cas koj ua li ntawd rau wb? Saib! Koj txiv wb nrhiav koj, wb ntxhov siab tas nrho.” Yes Xus hais rau nkawd tias “Vim li cas neb nrhiav kuv? Neb tsis paub tias kuv yuav leg kuv Txiv cov hauj lwm lod?” Mab Liab thiab Yos Xes nkawd tsis to taub lo lus uas Yes Xus hais rau nkawd. Yes Xus nrog nkawd rov mus Nas Xas Les. Nws mloog nkawd lus. Yes Xus niam khaws tej ntawd huv tib si cia rau nruab siab. Hos Yes Xus hlob hauv kev thoob tsib, nws hlob cev thiab hlob hauv Ntuj lub txiaj ntsim, nyob ntawm Tswv Ntuj thiab ntawm zeej tsoom xub ntiag.

1. Yes Xus muaj 12 xyoos ces nws nrog nws niam thiab nws txiv mus pem Yes Lus Xas Les (LK 2: 42).
2. Yes Xus nyob pem Yes Lus Xas Les, nws niam thiab nws txiv tsis paub (LK 2: 43).
3. Mab Liab thiab Yos Xes nrhiav tsis pom Yes Xus, ces nkawd rov los nrhiav pem Yes Lus Xas Les (LK 2: 45).
4. Mab Liab thiab Yos Xes nrhiav tau Yes Xus nyob hauv lub Tuam Tsev Teev Ntuj (LK 2: 46).
5. Yes Xus hais tias nws leg Leej Txiv cov hauj lwm nyob hauv lub Tuam Tsev Teev Ntuj (LK 2: 49).
6. Yim neeg ntshiab rov los nram Nas Xas Les (LK 2: 51).
7. Yes Xus yog Tswv Ntuj Leej Tub, nws mloog nws niam nws txiv (LK 2: 51).
8. Tswv Ntuj hais rau peb tias “Nej hwm nej niam nej txiv” (MT 15: 4).
9. Yes Xus kuj hais rau peb tias “Yog nej nyiam kuv mas nej yuav coj rawv kuv cov lus qhia” (Z 14: 15).
10. Peb txhob muab lo lus thiab tus nplaig los nyiam xwb, peb ua kiag tej yam hauj lwm los nyiam kom tseeb (1Z 3: 18).

Yes Xus nrog cov thwj tim mus txog ib qho chaw hu ua Nkes Txes Mas Nis. Yes Xus coj Pob Zeb thiab Ntxes Npes Dais ob tug tub nrog nws mus. Nws pib tu siab thiab pib txhawj. Nws hais rau lawv tias “Kuv tus plig tu siab yuav tuag, nej nyob ntawm no, nej nrog kuv zov hmo.” Yes Xus mus deb me ntsis ntawm lawv, nws khoov ntsej muag ti av. Nws thov Ntuj li no “Kuv Txiv, yog koj kheev no, thov kom lub ntim no hla mus deb ntawm kuv! Tab sis, txhob ua raws li kuv xav, koj ua raws li koj xav.” Yes Xus rov los ntawm nws cov thwj tim. Nws pom lawv tsaug zog. Nws hais rau Pob Zeb tias “Ua li mas, nej tsis muaj peev xwm nrog kuv zov hmo ib teev. Nej zov hmo mas, nej teev Ntuj kom nej txhob poob rau hauv txoj kev ntxias. Lub tswv yim kub lug, tab sis lub cev nqaij tsis muaj zog.” Yes Xus rov mus teev Ntuj dua, zaum ob. Nws hais tias “Kuv Txiv, yog kuv tsis haus, lub ntim no yuav tsis hla mus, mas cia ua raws li koj lub siab xav.” Yes Xus rov qab los, nws pom cov thwj tim rov tsaug zog, vim lawv qhov muag tawv. Yes Xus cia lawv nyob lawv, nws rov mus. Nws rov teev Ntuj dua zaum peb. Nws rov hais tib co lus li qub.

Yes Xus lawv tuaj txog ib thaj chaw hu ua Nkes Txes Mas Nis, Yes Xus hais rau nws cov thwj tim tias “Nej zaum ntawm no, kuv yuav teev Ntuj.” Ces Yes Xus coj Pob Zeb, Yas Kos thiab Zam nrog nws mus. Nws pib ntshai heev thiab txhawj kawg. Ces Yes Xus hais rau lawv tias “Kuv tus plig ntxhov siab yuav tuag, nej nyob ntawm no, nej zov hmo.” Yes Xus txav mus deb me ntsis, nws khooj hauv pem teb, ces nws thov saib lub sij hawm ntawd hla mus deb nws puas tau. Yes Xus hais tias “As Npas, Txiv! Koj ua tau tas ib puas tsav yam; thov koj tshem lub ntim no mus deb kuv. Tab sis, txhob ua raws li kuv xav, koj ua raws li koj xav!” Yes Xus los pom peb leeg thwj tim tab tom tsaug zog, nws hais rau Pob Zeb tias “Xis Moos, koj tsaug zog lod? Koj tsis muaj peev xwm zov hmo ib teev lod? Nej zov hmo, thiab nej teev Ntuj kom nej txhob nkag mus
rau hauv txoj kev ntxias; lub tswv yim kub lug, tab sis cev nqaij tsis muaj zog.” Ces Yes Xus rov mus, nws rov qab teev Ntuj, nws rov hais tib co lus li qub. Yes Xus rov qab los pom cov thwj tim tsaug zog, vim lawv qhov muag tawv, lawv tsis paub teb dab tsi rau Yes Xus. Yes Xus rov los zaum peb, nws hais rau lawv tias “Nej tseem tsaug zog thiab tseem so lod? Nej tsum mog. Txog caij lawm. Neeg Leej Tub yuav poob rau hauv cov neeg txhaum txhais tes. Nej sawv! Peb mus! Tus muab kuv muag tuaj yuav txog.”

Yes Xus tawm mus pem lub Roob Txiv Ntoo Roj, xws li nws ua kam. Nws cov thwj tim kuj raws nws mus thiab. Yes Xus tuaj txog qhov chaw ntawd, nws hais rau cov thwj tim tias “Nej teev Ntuj mog, kom nej txhob swb txoj kev ntxias.” Ces Yes Xus ncaim ntawm lawv rau ib qho,
kwv yees deb li txawb ib pob zeb. Yes Xus txhos caug, nws teev Ntuj. Nws hais tias “Txiv, yog koj pom zoo, thov koj tshem lub ntim no mus deb kuv. Tab sis, koj txhob ua raws li kuv xav. Koj ua raws li koj xav.” Ces ib tug Tshiab nqes saum ntuj los rau nws pom, pab nws ua siab loj.
Thaum ntawd, Yes Xus txhawj kawg. Nws teev Ntuj heev dua, nws tawm tej cev hws xws li tej tee ntshav nrog rau hauv pem teb. Yes Xus teev Ntuj tas, nws sawv los cuag cov thwj tim, nws pom lawv tsaug zog vim lawv tu siab. Ces Yes Xus hais rau lawv tias “Vim li cas nej tsaug zog?
Nej sawv, nej teev Ntuj kom nej txhob swb txoj kev ntxias.”

1. Yes Xus thiab cov thwj tim mus pem lub vaj Kes Txes Mas Nis (MT 26: 36).
2. Yes Xus coj Pob Zeb, Yas Kos thiab Zam mus teev Ntuj rau ib cag (MT 26: 37).
3. Yes Xus hais rau lawv tias “Kuv tus plig tu siab yuav tuag” (MT 26: 38).
4. Yes Xus hais rau Leej Txiv tias “Kuv Txiv, yog koj kheev no, thov kom lub ntim no hla mus deb ntawm kuv” (MT 26: 39).
5. Yes Xus rov hais rau Leej Txiv tias “Tab sis txhob ua raws li kuv xav, koj ua raws li koj xav” (MT 26: 39).
6. Yes Xus hais rau cov thwj tim tias “Nej tsis muaj peev xwm nrog kuv zov hmo ib teev lod?” (MT 26: 40).
7. Yes Xus hais ntxiv tias “Nej zov hmo thiab nej teev Ntuj kom nej txhob poob rau hauv txoj kev ntxias” (MT 26: 41).
8. Yus Das ntxeev siab rau Yes Xus, nws nwj Yes Xus (MT 26: 48).
9. Lawv ntes Yes Xus mus tom tus tuam leej choj tsev (LK 22: 54).
10. Yes Xus cov thwj tim tso Yes Xus pov tseg, lawv khiav tas (MT 26: 56).

Pab neeg tuaj ntes Yes Xus coj Yes Xus mus hauv tus Tuam Leej Choj Kais Fas tsev. Cov thoob xwm ntawv thiab cov txwj laus tuaj sib sau nyob hauv. Cov thawj leej choj thiab cov txwj laus Xas Nes Nrees sib koom nrhiav ib zag liam rau Yes Xus, kom tau kev muab nws tua. Nyob nyob, muaj ob tug tuaj txog. Nkawd hais tias “Tus neeg ntawd hais tias ‘Kuv muaj peev xwm rhuav Tswv Ntuj lub tsev Ntshiab. Peb hnub kuv rov txhim tau.’” Ces tus Tuam Leej Choj sawv los hais rau Yes Xus tias “Koj tsis teb dab tsi lod? Cov neeg no ua pov thawj liam dab tsi rau
koj?” Yes Xus tsis teb. Tus Tuam Leej Choj hais rau Yes Xus tias “Kuv hu txog tus Tswv Ntuj muaj Txoj Sia, koj hais meej rau peb saib koj puas yog Leej Pleev, puas yog Tswv Ntuj Leej Tub?” Yes Xus teb rau nws tias “Yog li koj hais ntawd. Kuv tseem hais rau nej tias txij no mus, nej yuav pom Neeg Leej Tub zaum ntawm Leej Muaj Hwj Huam sab xis, thiab los saum cov huab saum ntuj los.” Ces tus Tuam Leej Choj dua nws tej tsoos tsho, nws hais tias “Nws thuam Ntuj! Peb tseem yuav nrhiav tim khawv ua dab tsi? Nej nyuam qhuav hnov nws lo lus thuam Ntuj! Nej xav li cas?” Lawv teb tias “Nws tsim nyog tuag.” Ces lawv nto aub ncaug rau Yes Xus ntsej muag. Lawv ob peb ncuav pias rau Yes Xus. Muaj ib txhia ntaus Yes Xus, thiab lawv hais tias “Leej Pleev! Koj ua yaj saub qhia peb saib tus ntaus koj yog leej twg?”

Lawv coj Yes Xus mus hauv tus tuam leej choj lub tsev. Tas cov thawj leej choj, cov txwj laus thiab cov kws Ntawv Ntshiab tuaj sib sau nyob hauv. Pob Zeb nyas deb raws Yes Xus qab mus txog hauv tus tuam leej choj lub loog. Nws nrog cov tub zov keeb zaum nte taws ntawm lub
cub tawg. Cov thawj leej choj thiab cov txwj laus xas nes nrees nrhiav ib zag liam rau Yes Xus kom tau kev muab nws tua, tab sis lawv nrhiav tsis tau. Muaj ob peb tug sawv los liam cuav rau Yes Xus tias “Peb hnov tus ntawd hais tias ‘Kuv yuav rhuav lub Tsev Ntshiab no, uas yog neeg
txhais tes ua, kuv ua peb hnub txhim tau lub uas tsis yog neeg txhais tes ua.’” Tab yog zaj liam no, lawv cov lus kuj tsis sib haum thiab. Ces tus tuam leej choj sawv ntsug hauv nruab nrab sawv daws, nws nug Yes Xus tias “Koj tsis teb dab tsi lod? Cov neeg no ua pov thawj liam dab tsi rau koj?” Tab sis Yes Xus nyob ntsiag to, tsis teb ib lo lus. Tus tuam leej choj rov nug Yes Xus tias “Koj puas yog Leej Pleev, puas yog tus Nto Moo Zoo Leej Tub?” Yes Xus hais tias “Kuv yog. Nej tseem yuav pom Neeg Leej Tub zaum ntawm tus Muaj Hwj Huam sab xis, thiab nrog cov
huab nqes saum ntuj los.” Ces tus tuam leej choj dua nws tej tsho, nws hais tias “Peb tseem yuav nrhiav tim khawv ua dab tsi? Nej twb hnov nws cov lus thuam Ntuj lawm, nej xav li cas?” Sawv daws txiav txim tias nws tsim nyog tuag. Muaj ib txhia nto aub ncaug rau Yes Xus. Lawv
muab ib daim ntaub vov nws ntsej muag. Lawv xuas nrig ntaus nws.

Lawv ntes Yes Xus, lawv coj nws mus. Lawv coj nws mus hauv tus Tuam Leej Choj lub tsev. Thaum ntawd, cov neeg zov Yes Xus thuam nws thiab ntaus nws. Lawv muab ib daim ntaub npog Yes Xus ntsej muag, lawv nug nws tias “Ua yaj saub saib, tus ntaus koj yog leej twg?”
Lawv tseem hais ntau lo lus thuam Yes Xus. Thaum kaj ntug, pej xeem cov txwj laus, nrog cov Thawj Leej Choj thiab cov Kws Ntawv Ntshiab sib sau ua rooj sab laj. Lawv coj Yes Xus mus rau lub rooj txwj laus Xas Nes Nrees. Lawv hais rau Yes Xus tias “Saib koj yog Leej Pleev no, mas
koj qhia peb.” Yes Xus hais rau lawv tias “Yog kuv hais qhia nej, los nej yuav tsis ntseeg. Yog kuv nug nej, los nej yuav tsis teb. Txij no mus, Neeg Leej Tub yuav zaum ntawm Tswv Ntuj lub hwj huam sab xis.” Ces tas lawv sawv daws hais tias “Ua li mas koj yog Tswv Ntuj Leej Tub puas tiag lod?” Yes Xus hais rau lawv tias “Nej hais nej tias kuv yog.” Ces lawv hais tias “Peb tseem yuav nrhiav tim khawv ua dab tsi? Peb twb hnov kiag ntawm nws lub ncauj lawm.”

Tus Tuam Leej Choj nug Yes Xus txog nws cov thwj tim thiab nws cov lus qhia. Yes Xus teb rau tus Tuam Leej Choj tias “Kuv tab meeg hais lus rau lub qab ntuj neeg. Kuv niaj hnub qhia nyob hauv cov tsev txoos thiab hauv lub Tuam Tsev Teev Ntuj uas tas tsoom Yus Das tuaj sib txoos. Kuv tsis tau nyiag hais ib yam dab tsi. Tim li cas koj nug kuv? Koj nug cov uas tau hnov tej lus kuv hais rau lawv. Cov ntawd paub tias kuv tau hais dab tsi.” Thaum Yes Xus hais li ntawd, mas cov zov keeb uas sawv ntsug nyob ntawd, muaj ib tug ib tawg ncuav rau Yes Xus, nws hais rau Yes Xus tias “Koj teb li ntawd rau tus Tuam Leej Choj lod!” Yes Xus teb rau tus zov keeb tias “Yog kuv hais lus phem, koj ua pov thawj qhia saib qhov twg phem. Hos yog kuv hais raug lawm, vim li cas koj thiaj ntaus kuv?”

1. Lawv coj Yes Xus mus sawv ntawm As Nas xub ntiag, muaj ib tug zov keeb ib tawg ncuav pias rau Yes Xus sab plhu (Z 18: 22).
2. Tus tuam leej choj xa Yes Xus mus cuag tus tuam leej choj Kais Fas (Z 18: 24).
3. Cov thawj leej choj thiab cov txwj laus nrhiav ib zag liam rau Yes Xus kom tau kev muab Yes Xus tua (MT 26: 59).
4. Pob Zeb tsis lees paub Yes Xus 3 zaug (Z 18: 17, 25, 27).
5. Lawv coj Yes Xus mus cuag Pis Las Tos (Z 18: 31).
6. Pis Las Tos tsis pom tias Yes Xus muaj txhaum (Z 18: 39).
7. Pis Las Tos xav kom cov Yus Das txaus siab, ces nws muab Yes Xus rau lawv nplawm (Z 19: 1).
8. Yes Xus yeem ris peb tej kev mob, yeem nyiaj peb tej kev txom nyem (HX 53: 4).
9. Yes Xus raug nkaug vim peb cov hauj lwm phem, Yes Xus raug tsuj vim peb cov txhaum (HX 53: 5).
10. Yes Xus tej thaj doog ua kom peb tej mob nkeeg zoo hlo (HX 53: 5).

Tus nom tswj teb chaws cov tub rog coj Yes Xus nrog lawv mus hauv lub tshav txiav txim. Lawv txhib tas npoj peeb zeej los hiam Yes Xus. Cov tub rog hle Yes Xus cov ris tsho, lawv muab ib lub tsho tshaj sab liab los rau nws hnav. Lawv muab ib co pos sib qhaib ua ib lub kauj tso saum nws taub hau. Lawv muab ib rab pas tauj rau nws sab tes xis tuav. Cov tub rog txhos caug ntawm Yes Xus xub ntiag, lawv thuam Yes Xus tias “Nyob kaj lug, cov Yus Das tus vaj!” Lawv nto aub ncaug rau Yes Xus, lawv muab rab pas tauj ntaus Yes Xus taub hau. Thaum lawv thuam Yes Xus tas, lawv muab lub tsho tshaj sab liab hle, lawv rov muab Yes Xus cov ris tsho rau Yes Xus hnav. Ces lawv coj Yes Xus mus dai saum ntoo cuam.

Cov tub rog coj Yes Xus mus rau hauv lub plawv loog, uas yog lub tshav txiav txim. Lawv hu tas nrho pab peeb zeej tuaj. Lawv muab ib daim ntaub liab dub rau Yes Xus hnav. Lawv muab pos los sib qhaib ua ib lub kauj, lawv muab tso saum Yes Xus taub hau. Ces lawv hawm nws tias “Nyob kaj lug, cov Yus Das tus vaj!” Lawv xuas ib rab pas tauj ntaus nws taub hau, lawv nto aub ncaug rau nws, lawv kim caug hawm nws. Thaum lawv thuam Yes Xus tas, lawv hle daim ntaub liab dub, lawv rov muab nws cov ris tsho rau nws hnav. Ces lawv coj Yes Xus tawm mus sab nraud kom tau muab nws dai saum ntoo cuam. Lawv yuam ib tug neeg dua kev kwv Yes Xus tus ntoo cuam. Tus ntawd yog Xis Moos nyob Xis Les Nas, nws mus ua teb rov los txog ntawd. Xis Moos nyob Xis Les Nas yog As Les Xas Nros thiab Luj Fus nkawd txiv. Ces lawv coj Yes Xus mus txog ib qho chaw hu ua Nkos Nkos Tas, txhais tias chaw Khauj Khaum Taub Hau.

Pis Las Tos coj Yes Xus mus, nws kom lawv nplawm Yes Xus. Cov tub rog xuas ib co pos ntxias ua ib lub kauj, lawv muab tso saum Yes Xus taub hau. Lawv muab ib lub tsho ntev liab tshiab rau Yes Xus hnav. Lawv txav los ze nws, lawv hais tias “Nyob kaj lug, cov Yus Das tus vaj.” Ces lawv ntaus nws tej niag teg.

1. Yes Xus hais rau Pis Las Tos tias nws yog tus vaj, tab sis nws lub Ceeb Tsheej tsis yog nyob hauv lub qab ntuj no (Z 18: 36).
2. Cov tub rog thuam Yes Xus, lawv muab lub kauj pos rau Yes Xus ntoo (MT 27: 29).
3. Cov tub rog muab ib rab pas tauj rau Yes Xus tuav (MT 27: 29).
4. Cov tub rog txhos caug thuam Yes Xus tias “Koj nyob kaj lug, cov Yus Das tus vaj” (MT 27: 29).
5. Cov tub rog nto aub ncaug rau Yes Xus (MT 27: 30).
6. Pis Las Tos coj Yes Xus los sawv rau sawv daws ntsia, nws hais tias “Nej ntsia tus neeg no” (Z 19: 5).
7. Tsoom sid qw qw tias “Muab nws dai saum ntoo cuam” (Z 19: 6).
8. Pis Las Tos nug sawv daws tias “Kuv yuav muab nej tus vaj dai saum ntoo cuam lod?”
9. Sawv daws hais tias “Peb tsuas nuaj Xes Ntxas ua peb tus vaj xwb” (Z 19: 15).
10. Tab txawm Yes Xus raug hiam heev kawg, tab sis nws tsis qhob ncauj. (HX 53: 7).

Thaum lawv tawm mus lawm sab nraud, lawv pom ib tug neeg tuaj Xis Les Nas tuaj. Nws hu ua Xis Moos. Lawv kom Xis Moos kwv Yes Xus tus ntoo cuam. Lawv mus txog ib thaj chaw hu ua Nkos Nkos Tas, txhais tias chaw Khauj Khaum Taub Hau, lawv muab ib co cawv xyaw tsib rau Yes Xus haus. Yes Xus saj me ntsis, nws tsis xav haus.

Thaum lawv thuam Yes Xus tas, lawv hle daim ntaub liab dub, lawv rov muab nws cov ris tsho rau nws hnav. Ces lawv coj Yes Xus tawm mus sab nraud kom tau muab nws dai saum ntoo cuam. Lawv yuam ib tug neeg dua kev kwv Yes Xus tus ntoo cuam. Tus ntawd yog Xis Moos nyob Xis Les Nas, nws mus ua teb rov los txog ntawd. Ces lawv coj Yes Xus mus txog ib qho chaw hu ua Nkos Nkos Tas, txhais tias chaw Khauj Khaum Taub Hau. Lawv muab ib co cawv tov me ntsis txab txiv yoov rau Yes Xus haus, tab sis nws tsis haus. Ces lawv muab nws tsa saum ntoo cuam. Lawv muab Yes Xus cov ris tsho los sib faib, lawv twv saib leej twg yuav tau daim twg. Thaum lawv tsa Yes Xus rau saum ntoo cuam, mas tav li cuaj teev sawv ntxov. Lawv sau ib co npe ntawv piav txog Yes Xus lub txim li no ‘Cov Yus Das tus vaj.’ Lawv kuj muab ob tug tub sab dai nrog Yes Xus rau saum ntoo cuam thiab, ib tug nyob sab xis, ib tug nyob sab laug. Cov neeg dua kev co taub hau tsawm Yes Xus tias “Koj yog tus yuav rhuav lub Tsev Ntshiab thiab peb hnub, rov txhim tau li qub. Koj rov cawm koj mas! Koj nqes saum ntoo cuam los saib!” Cov thawj leej choj nrog cov kws Ntawv Ntshiab ua ke hnyos tias “Nws cawm tau luag tej, nws rov cawm tsis tau nws! Leej Pleev, Vaj His Xas Lais! Kom nws nqes saum ntoo cuam los rau peb pom, peb thiaj ntseeg!” Tab yog ob tug tub sab uas dai saum ntoo cuam zoo li Yes Xus,
kuj thuam Yes Xus.

Thaum lawv coj Yes Xus mus, lawv nthos ib tug txiv neej hu ua Xis Moos tuaj Xis Les Nas tuaj. Nws mus ua teb rov los. Lawv muab tus ntoo cuam rau nws, kom nws kwv lawv Yes Xus qab. Ib pab pej xeem coob coob raws Yes Xus mus. Muaj ib co poj niam ntaus lawv hauv siab thiab quaj hlub Yes Xus. Yes Xus tig mus ntsia cov poj niam, nws hais tias “Cov ntxhais nyob Yes Lus Xas Les, nej txhob quaj hlub kuv, nej quaj hlub nej thiab hlub nej cov me nyuam mog! Vim yuav muaj tej hnub uas luag hais tias cov tau txoj hmoov zoo, yog cov poj niam tab seeb,
yog lub plab uas tsis yug tub ki, thiab ob lub mis uas tsis muaj me nyuam noj! Thaum ntawd, lawv yuav hais rau cov roob tias nej vau los tsuam peb mas! Thiab hais rau cov pov roob tias nej nphau los vov peb mas! Vim tias yog luag ua li no rau tus ntoo nyoos, luag yuav ua li cas rau tus ntoo qhuav?”

Hnub ntawd, yog Hnub Npaj ua lub Ntees Hla. Thaum ntawd kwv yees ze kaum ob teev tav su. Pis Las Tos hais rau cov Yus Das tias “Nej ntsia nej tus vaj.” Cov Yus Das nthe nrov nrov tias “Muab tua! Muab tua! Muab dai saum ntoo cuam!” Pis Las Tos hais rau lawv tias “Kuv yuav muab nej tus vaj dai saum ntoo cuam lod?” Cov thawj Leej Choj teb hais tias “Peb tsuas muaj Xes Ntxas ua peb tus vaj xwb.” Ces Pis Las Tos muab Yes Xus rau lawv, kom lawv coj nws mus dai saum ntoo cuam. Lawv thiaj li coj Yes Xus mus. Yes Xus kwv nws tus ntoo cuam. Nws tawm mus txog qhov chaw hu ua Khauj Khaum Taub Hau, uas lus Hes Nplaws hu ua Nkos Nkos Thas.

1. Yes Xus kwv nws tus Ntoo Cuam mus pem lub roob Nkos Nkos Tas (Z 19: 17).
2. Yes Xus tau hais tseg tias “Leej twg tis kwv nws tus ntoo cuam thiab tsis lawv kuv qab, mas nws ua tsis tau kuv thwj tim” (LK 14: 27).
3. Yes Xus tseem hais tias “Nej txais kuv tus quab, nej tus plig yuav nrhiav tau chaw so los siav” (MT 11: 29).
4. Yes Xus kuj hais tias “Kuv tus quab kwv yooj yim thiab kuv lub nra sib” (MT 11: 30).
5. Yes Xus kuj hais tias “Tus nrhiav nws txoj sia, nws ua nws txoj sia ploj. Tus ua nws txoj sia ploj vim kuv, mas nws nrhiav tau nws txoj sia lawm” (MT 10: 39).
6. Txoj kev txom nyem uas peb ris lub caij no yuav muab los piv tsis tau rau lub hwj chim uas yuav tawm tuaj rau luag pom xyeem nyob hauv peb (LM 8: 18).
7. Tus yawg Xis Mes Oos nyob Xis Les Nas pab Yes Xus kwv tus Ntoo Cuam (LK 23: 26).
8. Yes Xus hais rau cov poj niam tias “Nej txhob quaj hlub kuv, nej quaj hlub nej thiab hlub nej cov me nyuam mog” (LK 23: 28).
9. Yog kuv xav tau ntsej muag, mas kuv kawg xav kom tau nyob hauv peb tus Huab Tais Yes Xus Pleev tus Ntoo Cuam xwb (NLT 6: 14).
10. Ntiaj teb cov tib neeg yog cov yeeb ncuab ntxub Yes Xus tus Ntoo Cuam (FLP 3: 18).

Thaum cov tub rog muab Yes Xus ntsia rau saum ntoo cuam tas, lawv ntaus kuam sib faib Yes Xus cov ris tsho. Ces cov tub rog zaum, lawv nyob zov Yes Xus. Lawv sau ntawv dai rau ntawm Yes Xus taub hau, piav txog Yes Xus lub txim tias ‘Tus no yog Yes Xus, cov Yus Das tus vaj.’ Lawv muab ob tug tub sab dai saum ntoo cuam zoo li Yes Xus thiab; ib tug nyob sab xis, ib tug nyob sab laug. Cov neeg dua kev co taub hau thuam Yes Xus, lawv hais tias “Koj yog tus yuav rhuav lub Tuam Tsev Ntshiab, rov txhim peb hnub tau li qub, koj rov cawm koj mas! Saib koj yog Tswv Ntuj Leej Tub no, koj nqes saum ntoo cuam los!” Cov thawj leej choj nrog cov thoob xwm ntawv thiab cov txwj laus hnyos Yes Xus tias “Nws cawm tau luag tej, nws rov cawm tsis tau nws! Saib nws yog His Xas Lais tus vaj no, kom nws nqes saum ntoo cuam los nyem no, peb thiaj yuav ntseeg txog nws! Nws tso siab rau Tswv Ntuj; nyem no cia Tswv Ntuj tuaj npo nws dim, saib Tswv Ntuj puas nyiam nws! Nws yeej hais tias ‘Kuv yog Tswv Ntuj Leej Tub!’” Tab yog
ob tug tub sab uas dai saum ntoo cuam nrog Yes Xus, kuj thuam Yes Xus. Ze ntawm peb teev, Yes Xus qw ib suab nrov nrov tias “Kuv tus Tswv Ntuj, kuv tus Tswv Ntuj, ua cas koj tso kuv pov tseg?” Tam sis ntawd muaj ib tug khiav mus muab ib qho rwb coj mus tub dej qaub, nws muab chob rau ntawm ib tug ntsis pas tauj cev mus rau Yes Xus haus. Yes Xus rov qw ib suab nrov nrov tas, ces nws txoj sia tu.

Thaum peb teev Yes Xus qw ib suab nrov nrov tias “Kuv tus Tswv Ntuj, kuv tus Tswv Ntuj, ua cas koj tso kuv pov tseg?” Muaj tus puav nyob ze ntawd hnov, lawv hais tias “Saib, nws hu Es Lias.” Muaj ib tug neeg khiav ceev mus muab ib daim ntaub tub dej qaub, nws muab chob rau ib tog ntsis pas tauj, nws cev rau Yes Xus haus, nws hais tias “Tos saib! Peb puas pom Es Lias tuaj txo nws nqes los.” Ces Yes Xus qw ib suab nrov, nws txoj sia tu.

Thaum lawv mus txog qhov chaw hu ua Khauj Khaum Taub Hau, lawv muab Yes Xus dai rau saum ntoo cuam. Lawv kuj muab ob tug neeg tau ua phem dai saum ntoo cuam thiab, ib tug nyob sab xis, ib tug nyob sab laug. Yes Xus hais tias “Txiv, koj zam rau lawv, vim lawv tsis paub lawv ua dab tsi?” Tsoom pej xeem sawv ntsug ntawd ntsia. Cov thawj coj hnyos Yes Xus, lawv hais tias “Nws cawm tau luag tej. Yog tias nws yog Tswv Ntuj Leej Pleev thiab tus Xaiv tiag, kom nws rov cawm nws mas!” Cov tub rog kuj thuam Yes Xus. Lawv txav los, lawv cev ib co dej qaub rau Yes Xus. Lawv hais tias “Saib koj yog cov Yus Das tus vaj no, koj cia li cawm koj mas!” Tseem muaj ib co npe ntawv sau nyob siab me ntsis saum Yes Xus taub hau, hais tias “Tus no yog cov
Yus Das tus Vaj.” Ob tug neeg phem dai saum ntoo cuam, muaj ib tug tsawm Yes Xus tias “Koj tsis yog Leej Pleev lod? Koj rov cawm koj, thiab cawm wb mas.” Tab sis lwm tus qhib ncauj hais lus, nws cem tias “Koj tseem tsis ntshai Tswv Ntuj lod? Koj twb raug tib lub txim zoo li nws thiab! Wb mas, wb lub txim yog txoj kev ncaj, vim wb tau ua tej yam tsim nyog raug txim. Hos nws tsis tau ua dab tsi phem li.” Ces nws hais tias “Yes Xus, thaum koj mus txog hauv koj lub Ceeb Tsheej, thov koj nco txog kuv.” Ces Yes Xus hais rau nws tias “Kuv hais tseeb rau koj; hnub no, koj yuav nrog kuv nyob hauv lub Nras Lom Zem.” Kwv yees txij tav su, ces lub hnub ploj ntais lawm. Tas lub ntiaj teb tsaus ntuj nti mus txog peb teev hnub qaij. Yes Xus hu ib suab nrov nrov hais tias “Txiv, kuv tso kuv txoj sia rau hauv koj txhais tes.” Yes Xus hais li ntawd tas, nws txoj sia tu nrho.

Lawv muab Yes Xus dai rau saum ntoo cuam. Lawv muab ob tug neeg dai saum ntoo cuam xws li nws thiab, ib tug nyob ib sab, Yes Xus nyob nruab nrab. Pis Las Tos sau ntawv rau saum ib daim txiag; nws kom muab tso saum tus ntoo cuam. Cov npe ntawv saum daim txiag sau hais tias ‘Yes Xus Nas Xas Les, cov Yus Das tus vaj.’ Yes Xus niam thiab nws niam tus niam hluas, nrog Mab Liab uas yog Khos Pas poj niam, thiab Mab Liab Mas Ntas Las, lawv sawv ze tus ntoo cuam. Yes Xus pom nws niam, thiab pom tus thwj tim uas nws nyiam sawv ze nws niam, ces nws hais rau nws niam tias “Niad, tus ntawd yog koj tus tub.” Thiab Yes Xus hais rau tus thwj tim tias “Tus ntawd yog koj niam.” Txij lub sij hawm ntawd los, tus thwj tim coj Mab Liab mus nyob hauv nws tsev. Ua li ntawd tas, Yes Xus paub tias zaum no ib puas tsav yam tiav tas lawm, nws hais tias “Kuv nqhis dej.” Muaj ib hub kua qaub puv nkaus nyob ntawd. Lawv muab ib thooj rwb tub kua qaub chob rau ib tug ntsis pas tauj cev mus rau Yes Xus qhov ncauj. Thaum Yes Xus haus qhov kua qaub tas, nws hais tias “Ib puas tsav yam tiav tas lawm.” Ces Yes Xus nyo taub hau, nws tso nws tus ntsuj plig tawm mus.

1. Yes Xus raug ntsia saum Ntoo Cuam (LK 23: 33).
2. Yes Xus hais tias “Txiv, koj zam rau lawv” (LK 23: 34).
3. Yes Xus hais rau tus tub sab hloov siab tshiab tias “Hnub no koj yuav nrog kuv nyob hauv lub nras lom zem” (LK 23: 43).
4. Yes Xus ntsia nws niam, nws hais tias “Niad, tus ntawd yog koj tus tub” (Z 19: 26).
5. Yes Xus hais rau tus thwj tim nws nyiam tias “Tus ntawd yog koj niam” (Z 19: 27).
6. Yes Xus raug dai saum Ntoo Cuam txij tav su mus txog peb teev (MT 27: 45).
7. Thaum Yes Xus raug dai nyob saum tus Ntoo Cuam, mas lub sim ceeb quaj nyiav tu siab ces ntiaj teb tsaus ntuj nti (MT 27: 45).
8. Nco txog Yes Xus lo lus tau hais tseg tias “Tsis muaj leej twg muaj txoj kev nyiam loj dua tus uas siv nws txoj sia rau nws cov phooj ywg” (Z 15: 13).
9. Yes Xus hais tias “Ib puas tsav yam tiav tas lawm” (Z 19: 30).
10. Yes Xus hu ib suab nrov nrov tias “Txiv, kuv tso kuv txoj sia rau hauv koj txhais tes” ces Yes Xus txoj sia tu nrho (LK 26: 46).

Yes Xus tawm hauv xeev Nkas Lis Lais mus cuag Zam ntawm tus dej Yos Las Das, kom Zam ua kab ke ntxuav rau nws. Zam tsis kam, Zam hais tias “Kuv yog tus yuav tsum thov koj ntxuav kuv, tab sis, koj ho tuaj cuag kuv.” Yes Xus teb rau Zam tias “Nyem no, cia koj ua rau kuv; wb thiaj tau ua raws txoj kev ncaj.” Ces Zam ua raws li Yes Xus hais. Yes Xus txais kab ke ntxuav tas, nws tawm hauv dej los tim ntug nqhuab tam sis ntawd. Ces ntuj qhib plho; Zam pom Tswv Ntuj tus Ntsuj Plig nqes xws li ib tug nquab los rau saum Yes Xus. Thiab ib lub suab nrov saum ntuj tuaj hais tias “Tus no yog kuv Leej Tub uas kuv nyiam. Nws yog kuv qhov chaw zoo siab.”

Yes Xus tuaj ntawm Nas Xas Les xeev Nkas Lis Lais mus txais kab ke ntxuav ntawm Zam, nyob hauv tus dej Yos Las Das. Thaum Yes Xus tawm hauv dej los, ib ziag ntawd, Zam pom lub ntuj dua rhe, thiab Leej Ntuj Plig nqes xws li ib tug nquab los rau saum Yes Xus, Ib lub suab nrov saum ntuj tuaj hais tias “Koj yog kuv leej Tub uas kuv nyiam kawg, koj yog kuv qhov chaw zoo siab.”

Thaum uas tsoom pej xeem txais kab ke ntxuav tas, thiab Yes Xus kuj txais kab ke ntxuav tas lawm, ces Yes Xus teev Ntuj. Lub ntuj qhib plho los, ces Leej Ntuj Plig Ntshiab yees ua ib lub cev, xws li ib tug nquab, nqes los saum Yes Xus. Ib lub suab nrov saum ntuj tuaj tias “Koj yog kuv Leej Tub. Hnub no kuv xeeb koj.”

1. Muaj ib lub suab hu hauv teb chaws suab puam (MK 1: 3).
2. Lub suab ntawd yog tus Ntxuav Plig Zam, nws ntuas sawv daws kom hloov siab tshiab (MT 3: 1-2).
3. Zam tshaj tias yuav muaj ib tug tuaj tom qab, Zam tsis tsim nyog yuav daws nws txoj hlua khau (MK 1: 7).
4. Yes Xus tuaj cuag Zam kom tau ua kab ke ntxuav (MT 3: 13).
5. Zam hais tias nws tsum yog tus thov Yes Xus ntxuav nws (MT 3: 14).
6. Yes Xus hais tias cia Zam ntxuav Yes Xus, mas nkawd thiaj ua raws txoj kev ncaj (MT 3: 15).
7. Yes Xus ua kab ke ntxuav ntawm Zam tas mas lub ntuj qhib nplho, ces Leej Ntuj Plig nqes los rau saum Yes Xus (MT 3: 16).
8. Muaj ib lub suab nrov saum ntuj tias “Tus no yog kuv Leej Tub uas kuv nyiam, nws yog kuv qhov chaw zoo siab” (MT 3: 17).
9. Peb ntseeg tias muaj tib tug Huab Tais, tib txoj kev ntseeg, tib lub Cim Ntxuav (EFX 4: 5).
10. Peb txais lub Cim Ntxuav mas peb nrog Yes Xus tuag, ces peb yuav coj ib lub neej tshiab xws li Leej Pleev sawv hauv yeeb ceeb rov los (LM 6: 4).

Peb hnub tom qab, muaj ib rooj tshoob hauv lub zos Kas Nas xeev Nkas Lis Lais. Yes Xus niam nrog lawv noj tshoob nyob ntawd. Lawv caw Yes Xus thiab nws cov thwj tim mus noj tshoob thiab. Lawv tsis tshuav cawv ntxiv lawm, Yes Xus niam hais rau Yes Xus tias “Lawv tsis muaj cawv ntxiv lawm.” Ces Yes Xus hais rau nws niam tias “Niad, tsis yog wb hauj lwm. Kuv lub sij hawm tseem los tsis tau txog.” Yes Xus niam hais rau cov tub ce cawv tias “Yes Xus kom nej ua yam twg, mas nej ua huv tib si mog.” Nyob ntawd, muaj rau lub hub zeb teem dej rau cov Yus Das siv raws li lawv tej kev cai ntxuav tes. Ib lub hub ntim tau peb los plaub thoob dej. Yes Xus hais rau cov tub ce cawv tias “Nej hliv dej kom puv cov hub no.” Ces lawv hliv dej puv nkaus cov hub. Yes Xus hais rau lawv tias “Zaum no, nej ce cov dej no nqa mus rau txiv thiaj com.” Ces lawv ce cov dej ntawd nqa mus. Thaum txiv thiaj com saj cov dej txia ua cawv, mas nws tsis paub cov cawv los qhov twg los. Tab sis cov tub ce cawv paub lawm, vim lawv yog cov ce. Txiv thiaj com hu nraug vauv los. Nws hais rau nraug vauv tias “Sawv daws ce cov cawv qab los haus tso. Thaum cov neeg qaug cawv lawd, mam li ce cov qab tsis heev los haus. Hos koj, koj muab cov cawv qab cia txog tav no.” Yes Xus thawj lub cim yog zoo li ntawd. Nws ua thawj lub cim nyob Kas Nas xeev Nkas Lis Lais. Nws ua nws lub hwj chim tawm los rau pom, ces nws cov thwj tim ntseeg txog nws.

1. Rooj tshoob nyob hauv lub zos Kas Nas (Z 2: 1).
2. Cov cawv yuav tas, ces Mab Liab los hais rau Yes Xus paub (Z 2: 3).
3. Yes Xus hais tias tsis tau txog nws lub caij (Z 2: 4).
4. Mab Liab hais rau cov tub ce cawv kom ua raws li Yes Xus hais (Z 2: 5).
5. Yes Xus hais kom lawv hliv dej kom puv cov hub (Z 2: 6).
6. Txiv thiaj com hais tias cov cawv tom qab yog cov cawv qab (Z 2: 10).
7. Yes Xus thawj lub cim yog ua kom dej txia ua cawv (Z 10: 11).
8. Yes Xus hais tias “Kuv yuav qhaib koj nyob hauv txoj kev ntseeg” (OX 2: 20).
9. Cov ua txiv yuav hlub lawv cov poj niam xws li Leej Pleev hlub lub Koom Txoos (EFX 5: 25).
10. Cov tau txoj hoov zoo yog cov uas Ntuj caw lawv tuaj noj Leej Yaj rooj tshoob (QYTN 19: 9).

zaum. Cov thwj tim txav los ze Yes Xus. Ces Yes Xus tsa ncauj qhia lawv hais tias “Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li. Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug. Cov tau txoj hmoov zoo, yog cov quaj ntsuag, vim Ntuj yuav nplij lawv. Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis. Cov tau txoj hmoov zoo, yog cov hlub luag tej, vim Ntuj yuav hlub lawv. Cov tau txoj hmoov zoo, yog cov siab huv, vim lawv yuav pom Tswv Ntuj. Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov tub ki. Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug. Thaum luag thuam nej, hiam nej, thiab liam ntau
yam phem rau nej vim kuv, mas nej txoj hmoov zoo. Nej zoo siab thiab nej hom khaj mog, vim nej yuav tau txais koob haum loj nyob saum ntuj. Cov yaj saub ua nej ntej, kuj raug luag hiam zoo li ntawd thiab.

Yes Xus mus Nkas Lis Lais teb, nws tshaj lub Moo Zoo qhia txog Tswv Ntuj. Nws hais tias “Txog lub caij teem lawm, Tswv Ntuj lub Ceeb Tsheej los txog ze lawm, nej hloov siab tshiab, nej ntseeg txog lub Moo Zoo mog.”

Thaum Yes Xus tab tom qhia sawv daws, muaj ib pab neeg kwv ib tug tuag ceg saum ib lub txaj tuaj. Lawv nrhiav kev nqa tus tuag ceg mus hauv tsev, coj nws mus tso ntawm Yes Xus xub ntiag. Tab sis lawv tsis tau kev nqa tus tuag ceg mus rau sab hauv, vim neeg coob dhau. Ces
lawv nce mus saum ruv tsev, lawv dawj cov thwv cib vov tsev, lawv dauv tus tuag ceg pw hauv nws lub txaj nqes mus hauv nruab nrab, rau ntawm Yes Xus xub ntiag. Yes Xus pom lawv ntseeg, nws hais tias “Me kwv, kuv daws koj cov txhaum tas lawm.” Cov Kws Ntawv Ntshiab thiab cov Fas Lis Xais xav twj ywm rau nruab siab tias “Tus neeg ntawd yog leej twg, nws thiaj thuam Ntuj? Leej twg yuav daws txhaum tau? Kawg yog Tswv Ntuj tib leeg xwb.” Yes Xus twb paub qhov lawv xav hauv nruab siab, nws hais rau tus tuag ceg tias ‘Kuv hais rau koj; koj sawv,
koj nqa koj lub txaj, koj rov mus tsev.” Tam sis ntawd, tus tuag ceg sawv tsees ntawm sawv daws xub ntiag, nws nqa lub txaj uas thaum tuaj nws pw, nws rov mus tsev, nws cav txog Tswv Ntuj. Sawv daws yoob tas, lawv cav txog Tswv Ntuj.

Yes Xus rov mus hauv lub Tuam Tsev Teev Ntuj. Tas tsoom pej xeem tuaj cuag nws. Yes Xus zaum, nws thiaj pib qhia lawv. Cov Kws Ntawv Ntshiab thiab cov Fas Lis Xais coj ib tug poj niam tuaj rau Yes Xus; luag ntes nws thaum tab tom deev hluas nraug. Lawv coj tus poj niam tuaj sawv ntsug hauv nruab nrab. Lawv hais rau Yes Xus tias “Xib Hwb, tus poj niam no, luag pom nws tab tom deev hluas. Nyob hauv Txoj Cai, mas Mais Xes kom peb xuas pob zeb txawb cov poj niam zoo li ntawd. Koj ne, koj hais li cas?” Lawv hais li ntawd vim lawv xav sim Yes Xus, lawv thiaj li tau kev mus kom nws. Tab sis Yes Xus khoov, nws xuas ntiv tes sau npe ntawv rau hauv pem teb. Lawv pheej rov nug tsis tseg, ces Yes Xus sawv ntsug, nws hais rau lawv tias “Nyob hauv nej, yog leej twg tsis muaj txhaum, mas kom nws xub txawb ib lub pob zeb rau tus poj niam ntawd.” Ces Yes Xus rov khoov, nws rov sau npe ntawv hauv pem teb. Thaum lawv hnov hais li ntawd, lawv nyias rov mus nyias zuj zus. Cov xub mus yog cov laus dua. Tshuav Yes Xus tib leeg thiab tus poj niam uas sawv hauv nruab nrab xwb. Yes Xus rov sawv ntsug, nws hais rau tus poj niam tias “Me ntxhais, lawv dua twg tas lawm? Tsis muaj leej twg muab txim rau koj lod?” Tus poj niam teb tias “Huab Tais, tsis muaj leej twg.” Ces Yes Xus hais tias “Kuv kuj tsis
muab txim rau koj thiab. Koj rov mus. Txij no mus koj txhob ua txhaum ntxiv lawm mog.”

1. Yes Xus tshaj tias “Tswv Ntuj lub Ceeb Tsheej los txog ze lawm, nej hloov siab tshiab los mloog lub Moo Zoo” (MK 1: 15).
2. Yes Xus mus tshaj txog lub Ceeb Tsheej rau Nkas Lis Lais teb (MT 4: 23).
3. Yes Xus qhia txog cov tau txoj hmoov zoo (MT 5: 1-12).
4. Yes Xus ntuas cov thwj tim kom ua ntsev las lub ntiaj teb thiab ua lub teeb kaj lub sim ceeb (MT 5: 13-16).
5. Yes Xus hais tias “Tsis yog tus hu kuv ua Huab Tais yuav tau mus hauv Ntuj lub Ceeb Tsheej, yog cov ua raws li kuv Txiv lub siab nyiam” (MT 7: 21-23).
6. Yes Xus xa cov thwj tim mus tshaj txog Ntuj lub Ceeb Tsheej (MT 10: 7).
7. Yes Xus hais rau cov thwj tim tias “Yog vim kuv yuav tsum mus tshaj Tswv Ntuj lub Ceeb Tsheej rau lwm qhov thiab, mas kuv thiaj tawm tuaj” (LK 4: 43).
8. Yes Xus hais tias yog peb tsis txais Tswv Ntuj lub Ceeb Tsheej xws li cov me nyuam yaus, mas peb yuav mus hauv Tswv Ntuj lub Ceeb Tsheej tsis tau (MK 10: 15).
9. Yes Xus xa cov thwj tim mus tshaj txog lub Ceeb Tsheej thiab kho lawv cov txiab mob (LK 9: 2).
10. Cov Hauv Paus Xa Lis tawm mus tshaj txog Yes Xus sawv rov los (HL 2: 32).

Tau rau hnub tom qab, Yes Xus coj Pob Zeb, Yas Kos thiab nws tus kwv Zam mus rau ib qho, ces lawv nce mus saum ib lub roob siab. Yes Xus ib ce hloov tas nyob ntawm lawv xub ntiag; nws lub ntsej muag ci ntsa iab zoo li lub hnub, nws cov ris tsho ci dawb paug li qhov pom kev. Ces Mais Xes thiab Es Lias nkawd tawm los rau lawv pom. Nkawd nrog Yes Xus tham. Pob Zeb hais rau Yes Xus tias “Huab Tais, peb nyob ntawm no mas zoo tas nrho. Yog koj kheev no, kuv yuav ua peb lub tsev tsam phooj, ib lub rau koj, ib lub rau Mais Xes, ib lub rau Es Lias.” Pob Zeb tseem tab tom hais li ntawd, ces muaj ib tw huab ci dawb paug los ntxoov npog nkaus lawv, ces ib lub suab hais hauv twv huab tuaj tias “Tus no, yog kuv leej tub uas kuv nyiam, nws yog kuv qhov chaw zoo siab, nej mloog nws mog!” Cov thwj tim hnov lub suab ntawd, lawv khoov ntsej muag ti av, lawv ntshai kawg. Tab sis Yes Xus txav los plhws lawv, thiab nws hais rau lawv tias “Nej sawv, nej txhob ntshai.” Ces lawv tsa muag ntsia, tsis pom leej twg li, kawg tshuav Yes Xus tib leeg xwb.

Tau rau hnub tom qab, Yes Xus coj Pob Zeb, Yas Kos, thiab Zam lawv rau ib qho, nws coj lawv mus saum ib lub roob siab. Nws ib ce hloov tas rau ntawm lawv xub ntiag. Nws cov ris tsho ci dawb paug, yog yam dawb ci uas nyob ntiaj teb no tsis muaj tshuaj yuav ua tau kom dawb
li ntawd. Es Lias thiab Mais Xes nkawd tawm los rau lawv pom, nkawd nrog Yes Xus tham. Ces Pob Zeb hais rau Yes Xus tias “Xib Hwb, peb nyob ntawm no mas hmoov zoo kawg. Cia peb ua peb lub tsev tsam phooj; ib lub rau koj, ib lub rau Mais Xes, ib lub rau Es Lias.” Pob Zeb tsis paub hais dab tsi, vim lawv ntshai kawg. Ces ib twv huab los ntxoov roos lawv, thiab ib lub suab nrov hauv twv huab tuaj tias “Tus no yog kuv Leej Tub uas kuv nyiam; nej mloog nws mog.” Ib sij huam, lawv ntsia ib ncig tsis pom leej twg li, tsuas pom Yes Xus tib leeg nrog lawv
nyob xwb.

Yes Xus hais cov lus ntawd kwv yees tau yim hnub lawm, nws coj Pob Zeb, Zam, thiab Yas Kos nrog nws, ces nws nce mus teev Ntuj saum roob. Thaum Yes Xus teev Ntuj, nws lub ntsej muag hloov, nws cev ris tsho ci dawb paug ntsa iab. Ib sij huam, muaj ob tug neeg nrog Yes Xus tham; yog Mais Xes thiab Es Lias. Nkawd tawm los muaj hwj chim, nkawd nrog Yes Xus tham txog txoj hauj lwm uas nws yuav sawv kev mus lis kom tiav nyob Yes Lus Xas Les. Pob Zeb thiab nws cov npawg qaug dab ntub. Tab sis lawv meej pem kawg. Ces lawv pom Yes Xus lub hwj chim thiab pom ob tug neeg uas nrog Yes Xus ua ke. Thaum ob tug ntawd yuav ncaim ntawm Yes Xus, mas Pob Zeb hais rau Yes Xus tias “Xib Hwb, peb nyob ntawm no mas zoo kawg! Cia peb tsa peb lub tsev tsam phooj, ib lub rau koj, ib lub rau Mais Xes, ib lub rau Es Lias.” Pob Zeb tsis paub nws hais dab tsi. Thaum Pob Zeb tab tom hais li ntawd, mas muaj ib twv huab tuaj vov nkaus lawv. Thaum lawv nyob hauv twv huab, lawv ntshai kawg. Muaj ib lub suab nrov hauv twv huab tuaj tias “Tus no yog kuv Leej Tub, yog tus kuv Xaiv, nej mloog nws mog.” Thaum lub suab hais li ntawd tas, tshuav Yes Xus tib leeg xwb. Hnub ntawd, cov thwj tim ua twj ywm tsis qhia dab tsi rau leej twg txog qhov lawv tau pom.

1. Yes Xus coj 3 tus thwj tim nce mus saum roob (MT 17: 1).
2. Yes Xus ib ce hloov tas nyob ntawm lawv xub ntiag (MT 17: 2).
3. Mais Xes thiab Es Lias tawm los rau lawv pom (MK 9: 4).
4. Pob Zeb hais tias nws yuav txhim peb lub tsev tsam phooj rau Yes Xus, Mais Xes, thiab Es Lias nyob (MT 17: 4).
5. Muaj ib twv huab vauv Pob Zeb lawv cia, lawv ntshai (LK 9: 34).
6. Muaj ib lub suab hais tias “Tus no yog kuv Leej Tub uas kuv nyiam, nws yog kuv qhov chaw zoo siab” (MT 17: 5).
7. Cov thwj tim hnov lub suab ntawd mas lawv ntshai kawg (MT 17: 6).
8. Yes Xus txav los plhws lawv thiab hais rau lawv tias “Nej sawv, nej txhob ntshai” (MT 17: 7).
9. Pob Zeb ntuas tias “Yog nej raug luag tsawm vim Leej Pleev lub npe, mas nej txoj hmoov zoo” (1PZ 4: 14).
10. Cov Hauv Paus Xa Lus zoo siab vim Ntuj saib lawv tsim nyog raug luam hiam vim lub npe (HL 5: 41).

Thaum lawv noj mov txog tog, Yes Xus tuav lub ncuav mov, nws hais zaj foom hmoov zoo, nws muab ntais, thiab nws cev rau cov thwj tim, nws hais tias “Nej txais, nej noj, qhov no yog kuv lub cev.” Yes Xus kuj tuav ib lub ntim, nws ua ntuj tsaug, nws cev rau lawv, nws hais tias “Nej sawv daws haus, vim qhov no yog kuv cov ntshav, yog cov ntshav cog lus, uas yuav ntws los daws coob leej cov txhaum. Kuv hais rau nej, txij no mus, kuv yuav tsis tau haus cov kua txiv cawv no ntxiv, mus txog hnub kuv yuav rov nrog nej haus dua nyob hauv kuv Txiv lub Ceeb
Tsheej.”

Thaum lawv tab tom noj mov, Yes Xus tuav lub ncuav mov, nws hais zaj foom hmoov zoo rau, nws muab ntais, thiab muab faib rau nws cov thwj tim, nws hais tias “Nej txais, qhov no yog kuv lub cev.” Yes Xus tuav ib lub ntim, nws ua Ntuj tsaug, nws muab cev rau cov thwj tim, ces sawv daws haus hauv lub ntim ntawd. Yes Xus hais rau lawv tias “Qhov no yog kuv cov ntshav, yog cov ntshav cog lus, cov ntshav no yuav ntws mus cawm coob leej. Kuv hais tseeb rau nej; txij no mus, kuv yuav tsis haus cov kua txiv cawv no ntxiv, mus txog hnub kuv rov haus cov cawv tshiab nyob hauv Tswv Ntuj lub Ceeb Tsheej.”

Thaum txog caij lawm, Yes Xus mus zaum ntawm rooj mov, cov Hauv Paus Xa Lus kuj nrog nws zaum thiab. Yes Xus hais rau lawv tias “Kuv xav nrog nej noj pluas Hla no kawg, kuv mam li mus txais kev tsim txom. Kuv hais rau nej; txij no mus kuv yuav tsis tau noj rooj qav Hla mus txog thaum lub Ntees Hla tiav tas nyob hauv Tswv Ntuj lub Ceeb Tsheej.” Yes Xus tuav ib lub ntim, nws ua Ntuj tsaug tas, nws hais tias “Nej txais qhov no, nej sib faib haus. Kuv hais rau nej, txij no mus kuv yuav tsis haus kua txiv cawv mus txog thaum Tswv Ntuj lub Ceeb Tsheej los txog.” Yes Xus tuav lub ncuav mov, nws ua Ntuj tsaug, nws muab ntais, nws cev rau lawv, nws hais tias “Qhov no yog kuv lub cev, uas kuv muab pub rau nej. Nej ua qho no kom nej nco txog kuv.” Noj hmo tas, Yes Xus kuj tuav lub ntim ib yam li ntawd thiab, nws hais tias “Lub ntim no yog kev Cog Lus Tshiab hauv kuv cov ntshav, yog cov ntshav nchuav los cawm nej.”

Cov lus kuv qhia rau nej, yog cov lus kuv txais ntawm Huab Tais los. Yam li, hmo lawv muab Huab Tais Yes Xus rau cov nom ntes, Huab Tais tuav ib lub ncuav mov, nws ua Ntuj tsaug, nws muab lub ncuav mov ntais, nws hais tias ‘Qhov no yog kuv lub cev uas cia cawm nej. Nej ua
qhov no kom nej nco txog kuv.’ Thaum noj hmo tas Huab Tais Yes Xus tuav lub ntim cawv, nws hais tias ‘Lub ntim cawv no yog zaj cog lus tshiab nyob hauv kuv cov ntshav; nej haus lub ntim no thaum twg, mas nej haus kom nej nco txog kuv.’ Kwv tij, txij no mus, nej noj cov ncuav
mov no thaum twg, thiab nej haus cov cawv no thaum twg, mas nej tshaj Huab Tais txoj kev tuag, nej ua li no mus txog hnub Huab Tais rov los.

1. Lub caij noj ncuav mov tsis xyaw poov xab los txog ze lawm (LK 22: 1).
2. Yes Xus xa cov thwj tim mus npaj pluas Hla (MT 26: 17-18).
3. Yav tsaus ntuj Yes Xus nrog cov thwj tim noj nplua Hla (MT 26: 19-20).
4. Yes Xus hais rau lawv tias nws yuav tsis noj rooj qav Hla mus txog thaum lub ntees Hla tiav (LK 22: 16).
5. Yes Xus ntxuav cov thwj tim taw (Z 13: 5-6).
6. Yes Xus ntais lub ncuav mov faib rau cov thwj tim, nws hais tias “QHov no yog kuv lub Cev” (LK 22: 19).
7. Yes Xus kuj tuav lub ntim, nws hais tias “Qhov no yog kuv cov Ntshav” (LK 22: 20).
8. Yes Xus hais tias “Kuv hais qhov tseeb tiag rau nej, yog nej tsis noj Neeg Leej Tub lub Cev thiab tsis haus nws cov Ntshav, mas nej yuav tsis muaj txoj sia nyob mus li” (Z 6: 53).
9. Lub ntim foom hmoov tsis ua kom peb koom siab nyob hauv Leej Pleev cov Ntshav lod? Cov mov uas peb muab ntais tsis ua kom peb koom siab nyob hauv Leej Pleev lub Cev lod? (1KLN 10: 16).
10. Txij no mus peb noj cov ncuav mov no thaum twg thiab peb haus cov cawv no thaum twg, mas peb tshaj Huab Tais txoj kev tuag, peb ua li no mus txog hnub Huab Tais rov tuaj (1KLN 11: 26).