Xas Muas yog ib tug Txwj Laus Tiv Thaiv. Yav yau nws nrog tus Leej Choj Es Lis nyob Xis Laus, nws nrog Es Lis saib lub Xab Cog Lus.
Lub caij cov Fes Lis Tis nyob ze ntug hiav txwv Mes Dis Tes Las Nes coob zuj zus, lawv ri los txeeb cov His Xas Lais tej liaj teb. Xyoo 1050 cov Fes Lis Tis tua cov His Xas Lais coob kawg nyob As Fes (Aphek). Cov His Xas Lais tawg tas ces lub Xab Cog Lus poob hauv cov Fes Lis Tis tes. Cov His Xas Lais ntshai, lawv ntaus siab me, lawv tsiv nraim, lawv tsis muaj cuab kav sib yaum los tiv cov Fis Lis Tis. Lub caij ntawd, Xas Muas txog ib nrab neej, nws ua xws li cov Txwj Laus Tiv Thaiv ua nws ntej; nws txhib cov His Xas Lais kom ua siab loj, nws hais kom cov His Xas Lais sib haum xeeb, kom lawv 12 lub xeem koom xaiv ib tug coj lawv mus tiv cov Fis Lis Tis.
Xas Muas ua Leej Choj hloov Es Lis thiab nws kuj ua Yaj Saub cev Tswv Ntuj cov lus rau cov His Xas Lais. Xas Muas tsis pom zoo tsa ‘Xas Ws’ ua vaj, nws xav kom cov His Xas Lais saib Xas Ws yog tus coj lawv mus ntaus rog xwb. Xas Muas xav tias cov His Xas Lais tus vaj yog Tswv Ntuj, tsis phim yuav muaj ib tug neeg ua vaj His Xas Lais. Tab sis Tswv Ntuj pab Xas Muas kom nws to taub tias yuav tsum zam rau cov His Xas Lais vim thaum cov His Xas Lais tsis muaj ib tug vaj mas tsis txaus lawv siab; yuav tsum tos ntau pua xyoo cov neeg teev Tswv Ntuj thiaj yuav to taub tias Tswv Ntuj haiv neeg tsis yuav ib tug vaj kav lawv nyob ntiaj teb no, ces Xas Muas tsa Xas Ws ua vaj. Thaum ntawd yog xyoo 1030. Xas Ws yuav ua vaj li 20 xyoo.
Xws Ws ua ib tug vaj siab tsis ncaj tsis tus, ces Tswv Ntuj tsis yuav Xws Ws ua vaj ntxiv, Xas Muas thiaj pleev roj tsa Das Vis ua vaj hloov Xas Ws, ces Xas Muas mam tuag.
Lub caij Das Vis thiab Xas Los Moos ua vaj, mas lawv pib khaws cov kwv huam tseg, ces lawv muab los sau ua tej zaj cia. Muaj ob peb pab kwv huam qhia lawv zaj, mas thiaj muaj tej zaj tsis tshua sib haum nyob hauv ntawv Xas Muas, thiab muaj tej zaj lawv piav qhov qub ob peb zaug.
Xyoo 700 ua Yes Xus ntej, cov kws zaj kwv huam Txoj Cai Ob yog cov sau ntawv Xas Muas. Lawv sau ua tib phau xwb, tab sis cov kws Ntawv Ntshiab thaum lawv ntxeev ntawv Xas Muas los ua lus Hes Las mas lawv muab ntawv Xas Muas faib ua 2 phau; yog Xas Muas phau Ib thiab Xas Muas phau Ob.
Xas Muas phau Ib yog txij xyoo 1050 ua Yes Xus ntej txog xyoo 1010 ua Yes Xus ntej. Muaj tag nrho 8 ntu:
1. Xas Muas yav yau (1XM 1-3).
2. Cov Fis Lis Tis txeeb tau lub Xab Cog Lus (1XM 4-7).
3. Xas Muas tsa Xws Ws ua vaj (1XM 8-12).
4. Xas Ws ua vaj, nws ua tsis zoo (1XM 13-15).
5. Das Vis (1Xm 16-19).
6. Das Vis nyob tsis tau hauv Xas Ws tsev (1XM 19-21).
7. Das Vis tsiv nraim tus vaj Xws Ws (1XM 22-26).
8. Das Vis khiav mus nyob hauv cov Fis Lis Tis teb chaws (1XM 27-31).
Xas Muas phau Ob yog txij xyoo 1010 ua Yes Xus ntej txog xyoo 972 ua Yes Xus ntej. Muaj 5 ntu:
1. Das Vis hnov lub moo tias Xas Ws tuag lawm (2XM 1).
2. Das Vis ua vaj kav Yus Das teb (2XM 2-4).
3. Das Vis ua vaj kav Yus Das teb thiab His Xas Lais teb (2XM 5-8).
4. Das Vis cov tub xav hloov lawv txiv ua vaj (2XM 9-20).
5. Tej xwm tshwm sim lub caij Das Vis laus lawm (2XM 21-24).
Ntawv Xas Muas qhia dab tsi txog kev cawm neeg?
Ntawv Xas Muas qhia tias cov His Xas Lais xav muaj ib tug vaj mas lawv yuav saib tus vaj yog ib tug vaj sawv Tswv Ntuj chaw nyob ze lawv. Tus vaj His Xas Lais yuav npuab Tswv Ntuj zoo; yog vim ntshai tsam cov vaj ncaim ntawm Tswv Ntuj, ces Tswv Ntuj thiaj tso tej tus Yaj Saub tuaj ntuas cov vaj. Cov His Xas Lais yuav muaj Yaj Saub los ntuas lawv cov vaj mus li.
Cov Yaj Saub lawv tau cav txog tus vaj His Xas Lais yog Tswv Ntuj tus Pleev. Tab sis tsis tau muaj ib tug vaj uas muaj lub siab dawb thiab huv xws li cov Yaj Saub cav txog. Tab yog Das Vis nws tsis yog tus vaj siab ntshiab xws li cov Yaj Saub hais. Yog vim cov Yaj Saub, thaum Tswv Ntuj tuaj tshoj lawv txog tus vaj Pleev mas lawv pom ib tug vaj siab ntshiab nyob hauv lawv nruab siab, lawv xav tias Das Vis yuav yog tus vaj siab ntshiab ntawd. Tab sis Das Vis yog ib tug neeg txawj ua txhaum.
Tus vaj Pleev siab ntshiab xws li cov Yaj Saub xub cav txog mas yog Yes Xus. Yog vim qhov ntawd Yes Xus thiaj hais tias nws yog Das Vis Leej Tub, vim thaum cov Yaj Saub cav txog Das Vis mas qhov tseem ceeb yog lawv cav txog Yes Xus.
Tab sis Yes Xus kuj hais tias nws yog Das Vis tus Huab Tais thiab!
