Nyob hauv hnub tim 3 lub 9 hli tas los no, Vaj Qhia Les Os 14 rov tawm tuaj qhia Ntuj kev cai nyob hauv Leej Ntshiab Pob Zeb lub tshav puam. Hnub no Vaj Qhia hais txog Huab Tais Yes Xus lo lus nws hais nyob saum tus Ntoo Cuam, yog lo lus tias “Kuv nqhis dej” (Z 19: 28) thiab lo lus tias “Ib puas tsav yam tiav tas lawm” (Z 19: 30).
Vaj Qhia Les Os 14 hais tias thaum Huab Tais Yes Xus hais ob lo lus ntawd, tsis yog tsom txog Huab Tais Yes Xus txoj kev swb rau neeg kev txom nyem thiab kev tuag, tab sis yog tsom kom pom tias Tswv Ntuj Leej Tub yog tus nyob (existence of the Son of God). Nyob saum Ntoo Cuam, Huab Tais Yes Xus tsis zoo li tus neeg muaj yeej, tab sis Huab Tais Yes Xus dai saum Ntoo Cuam kom tau taij thov kev hlub (supplicant for love). Huab Tais Yes Xus tsis tau tshaj (proclaim), yws (condemn), los tiv thaiv tus kheej (defend himself). Yam Huab Tais Yes Xus ua mas yog nws ua tus neeg me thov (ask) yam nws tsis yuav rov pub rau nws tau.
Huab Tais Yes Xus raug ntsia saum Ntoo Cuam, nws kev tshaib nqhis dej (thirst) yog vim nws lub cev raug tsim txom thiab nws lub tswv yim ntshaw (desire) txog kev hlub (love), kev khaub zig (relationship), thiab kev sib koom (communion). Qhov no yog Tswv Ntuj lub suab quaj ntsiag to (the silent cry) vim Tswv Ntuj xav (wish) nrog peb faib tib neeg lub neej, Tswv Ntuj yeem cia kev tshaib nqhis muaj zog loj dua, mas Huab Tais Yes Xus thiaj li tsis txaj muag taij thov dej haus. Kheev kom txoj kev hlub yog qhov tseeb (true), Huab Tais Yes Xus thiaj li tsis yog pub (give) xwb, nws tsum thov thiab.
Huab Tais Yes Xus hais tias “Kuv nqhis dej”, yog Huab Tais Yes Xus tab tom ua raws li nws yog tseem tib neeg xws li peb sawv daws. Nyob hauv peb kuj zoo li ntawd, peb tsis muaj leej twg yuav rov pab yus tus kheej tau. Neeg txoj sia (life) yuav puv npo (fulfill) tau, tsis yog thaum neeg muaj zog nchav, tab sis yog thaum neeg kawm kom paub ‘txais’ (receive). Thaum Huab Tais Yes Xus haus qhov kua qaub tas, nws hais tias “Ib puas tsav yam tiav tas lawm.” Vim txoj kev hlub pluag, mas txoj kev hlub thiaj li ua nws cov dej num tiav tau.
Vaj Qhia hais tias qhov zoo li no yog qhov cov nyom (paradox) nyob hauv lub neej ua neeg ntseeg. Tswv Ntuj tsis ua kiag ib yam dab tsi los pab cawm neeg, tab sis Tswv Ntuj cia neeg nqes tes ua mas Tswv Ntuj thiaj li cawm tau neeg. Tswv Ntuj tsis muab lub zog nchav los tswj txoj kev phem, tab sis Tswv Ntuj muab kev nyiam kev hlub lub zog muag los tswj txoj kev phem. Nyob saum Ntoo Cuam, Huab Tais Yes Xus qhia peb tias tib neeg tsis txhob tso siab rau tib neeg lub zog, tab sis tib neeg tsum tso siab rau lwm tus lub zog, txawm tias lawv yog yeeb ncuab thiab lawv tsis yog yus ib tog. Yus txais txoj kev cawm tsis yog vim yus muaj peev xwm ua tau, tab sis yus txais txoj kev cawm vim yus ras tau tias yus yog ib tug tsis muaj peev xwm thiab yus vam txog luag lwm tus.
Peb yuav tsheej xeeb leej tib neeg tau raws li Tswv Ntuj npaj tseg, mas yog thaum peb muaj kev tso siab. Peb pom tias Huab Tais Yes Xus tsis ua hwj huam pab cawm nws, tab sis Huab Tais Yes Xus xaiv ua dua lwm yam.
Niaj hnub no peb ua neej nyob hauv lub ntuj sawv daws hais tias tus tsim nyog txais koob haum yog tus neeg tsis vam txog luag tej peb, yog tus muaj peev xwm ua tau. Txawm li ntawd, los lub Moo Zoo qhia peb tias peb cov hauj lwm peb ua tau tsis yog tus twj ntsuas peb kev ua tib neeg, yam yuav ntsuas tau peb tias peb puas tsheej tib neeg mas yog saib peb puas yeem cia peb tau txais luag lwm tus txoj kev nyiam kev hlub, los yog txais kev pab ntawm luag thaum peb ti tes ti taw.
Huab Tais Yes Xus cawm peb, nws qhia kom peb pom tias kev thov tsis yog ib yam tsis tsim nuj (unworthy), tab sis kev thov yog ib yam daws tso (liberate). Kev thov yog txoj kev coj peb tawm hauv kev txhaum zais ntshis, kom tau rov los nyob hauv kev sib koom. Kev txhaum (sin) chiv kev txaj muag (shame). Kev zam txhaum (forgiveness) tawm tuaj thaum peb tim ntsej nrog peb kev xav tau (need) thiab tsis ntshai kev tsis kam lees (no fear rejection).
Li ntawd, Huab Tais Yes Xus kev tshaib nqhis nyob saum tus Ntoo Cuam thiaj li yog peb kev tshaib nqhis, yog ntiaj teb neeg lub suab hu nrhiav dej cawm siav. Kev tshaib nqhis no tsis ntiab peb kom khiav deb Tswv Ntuj, tab sis kev tshaib nqhis no rub peb kom los nyob hauv Tswv Ntuj. Yog peb muaj cuab kav lees tias peb tshaib nqhis, mas peb kev tshaib nqhis no yuav txia ua tus choj rau peb nce mus saum ntuj. Kev thov tsis yog kev tswj kav (possess), kev thov yog kev twj lij txoj kev qhib rau peb vim tias thaum peb thov mas yog peb lees tias peb tsis muaj peev xwm rov vam txog peb tau.
Yog li mas peb tsis txhob ntshai tsa ncauj thov, tshwj xeeb mas yog thaum peb paub tias peb tsis tsim nyog txais yam peb thov ntawd. Peb tsis txhob txaj muag cev tes mus txais yam uas muaj txoj kev cawm zais ntshis nyob.