Tus sau: TP. Nyiaj Pov (Tim 25 lub 9 hlis 1997)
Kwv tij, hnub ntawd tus caw Yes Xus tuaj noj mov hauv nws tsev yog ib tus Fas Lis Xais. Nyob hauv lub teb chaws Yes Xus nyob, lub nroog twg los lub zog twg muaj tej tus Fas Lis Xais. Cov Fas Lis Xais tsis yog lwm haiv neeg, hos lawv yog haiv neeg Yus Das xws li Yes Xus. Cov Fas Lis Xais yog ib co neeg paub Phau Ntawv Ntshiab Cog Qub Lus. Lawv paub Mais Xes txog cai. Lawv nquag kawm cov ntawv piav txog Phau Ntawv Ntshiab.
Tsoom pej xeem paub cov Fas Lis Xais vim lawv tab meem teev Ntuj ntau, lawv hnav tsoos tsho muaj tej txwm ntawv pab nco txog Mais Xes txoj cai.
Tsoom pej xeem hwm cov Fas Lis Xais vim cov Fas Lis Xais kheev cav lus zoo txog Mais Xes txoj cai. Hos tsoom pej xeem thuam cov neeg sau se, thuam cov poj ntiav, thuam cov pej kum neeg.
Ntawm Yes Xus mas nws tsis xub txiav txim rau leej twg. Yes Xus tsis faib cov neeg ua ob pab, yam li Yes Xus tsis hais pab neeg no yog neeg phem, pab neeg tod yog neeg zoo. Yes Xus saib sawv daws yog Tswv Ntuj tsim, yog Tswv Ntuj pov hwm. Tswv Ntuj tos kom sawv daws nyiam Tswv Ntuj thiab nyiam neeg.
Vim li ntawd thaum ib co neeg sau se caw Yes Xus tuaj noj mov hauv lawv tsev mas Yes Xus mus noj mov hauv lawv tsev. Yes Xus tsis hais tias cov neeg sau se yog ib co neeg phem vim lawv pab cov nom pej kum Los Mas, ces Yes Xus yuav tsis kam nkag hauv lawv tsev.
Yes Xus zoo siab mus fim cov Fas Lis Xais. Yes Xus paub tias cov neeg txhaum txawj tig los yuav lub siab tshiab hwm Ntuj hwm neeg. Yes Xus kuj paub tias nyob hauv cov neeg niaj hnub teev Ntuj ntau muaj tej tus tsis txawj hlub luag tej.
Li ntawd, hnub ntawd Yes Xus mus noj mov nyob hauv ib tug Fas Lis Xais lub tsev. Tab sis tus ua Yes Xus yuav pub txiaj ntsim loj rau puas yog tus Fas Lis Xais no, los puas yog lwm tus neeg ?
Tus Fas Lis Xais hu Yes Xus tuaj noj mov hauv nws tsev, nws ua ib pluas mov loj, npaj rooj mov xws li cov neeg muaj ua kam lub caij ntawd : sawv daws pw ncig lub mej tsum, taub hau nyob ze mej tsum, nyob ze lub rooj, ko taw nyob ib ncig nraud.
Sawv daws tab tom noj mov ces muaj ib tug poj niam chaw los hauv tsev. Nws zoo nkauj, nws hnav zoo hauj sim, nws tseem hluas. Nws nqa ib hwj tshuaj tsw qab uas nws nyuam qhuav mus yuav hauv lub nroog. Tus poj niam ntsej muag zoo li mluas me ntsis. Nws tsis ntsia leej twg, nws tsuas nrhiav Yes Xus nyob qhov twg. Nws pom Yes Xus. Nws ncaj qhas mus txhos caug ntawm Yes Xus ko taw. Nws los kua muag, nws qhib lub lam hwj, nws muab tshuaj tsw qab los pleev rau Yes Xus ob txhais taw, ke xuas tes pleev tshuaj, ke tso kua muag ntus los saum Yes Xus taw. Nws maj mam ua ntev loo, quaj tsis paub tas, tsis hais ib lo lus. Nws tseem nwj Yes Xus ob txhais taw thiab. Cov neeg noj mov ntsia tus poj niam ua li ntawd, tsis muaj leej twg hais lus. Sawv daws paub tus poj niam ntawd, tab sis hnub ntawd tsis muaj leej twg muaj cuab kav hais ib lo lus rau nws. Sawv daws poob siab xwb.
Lawv pom tus poj niam daws cov plaub hau muab nws cov plaub hau los so Yes Xus taw, ke quaj los kua muag, ke nwj thiab ntxais, ke plhws thiab so Yes Xus ob txhais taw.
Tus tsis zoo siab tshaj yog tus tswv tsev, tus Fas Lis Xais.
Nws ntsia tus poj niam ua tej ntawd ntev ntev. Nws xav ntiab tus poj niam tab sis nws ntiab tsis tau vim tus poj niam tab tom ua zoo heev rau tus uas nws caw los noj mov hauv nws tsev. Tus Fas Lis Xais tsuas xav hauv nws nruab siab tias : “Ua cas ! Yog Yes Xus ua Yaj saub tiag xws zeej tsoom hais, vim li cas nws cia tus poj niam ntawd kov nws npawm no ? Phim Yes Xus yuav paub tias tus poj niam ntawd phem. Tas zej zog paub tias yog ib tug neeg nruab hnub hmo ntuj ua txhaum.”
Tus Fas Lis Xais xav li ntawd, tab sis nws hais tsis tau dab tsi vim tus poj niam nto moo phem no tab tom pe thiab tsob hwb Yes Xus. Tab sis nws tsuas ua tej yam zoo tas nrho rau Yes Xus.
Tus xub hais lus yog Yes Xus. Yes Xus tsis xub hais lus rau tus poj niam vim nws paub tias tus poj niam tig los yuav lub siab tshiab. Yes Xus yuav xub hais lus rau tus Fas Lis Xais yeej muaj lub tswv yim xws li cov Fas Lis Xais coob leej. Tus Fas Lis Xais xav hauv nruab siab tias “nws yog tus neeg zoo, cov poj ntiav yog cov neeg phem : kawg li no xwb ! Neeg nyob ntiaj teb , ib txhia zoo, ib txhia phem. Kuv yog nyob hauv cov zoo. Tus poj niam ntawd nyob hauv cov txhaum. Yes Xus xav pab tus Fas Lis Xais kom nws xav tswv yim zoo dua. Yes Xus nug tus Fas Lis Xais zoo li no :
“Muaj ib tug txais nyiaj rau ob tug neeg. Tus ib tshuav tus tswv nuj nqes 500 lub txiaj. Tus ob tshuav 50 lub. Nkawd tsis muaj dab tsi yuav them rov qab. Tus tswv thiaj zam rau nkawd. Ob leeg ntawd yog leej twg yuav nyiam tus tswv dua ?”
Tus Fas Lis Xais teb tias : “Ntshai yog tus uas tswv zam ntau dua rau.”
Yes Xus hais tias : “Koj txiav raug zoo.”
Yes Xus tseem hais li no ntxiv rau tus Fas Lis Xais : “Kuv chaws los hauv koj tsev, koj tsis ce dej rau kuv ntxuav taw, hos tus poj niam no muab nws tej kua muag yaug kuv taw, xuas nws plaub hau los so. Koj tsis tau nwj kuv, hos nws nwj kuv taw, nws muab roj los pleev kuv taub hau, hos nws muab tshuaj tsw qab los pleev kuv taw.”
Yes Xus hais ib co lus zoo li ntawd rau tus Fas Lis Xais.
Tus Fas Lis Xais puas to taub tias nws nyiam Yes Xus tsis npaum li tus poj niam vim nws saib nws yog tus zoo tsis muaj txhaum ?
Kwv tij, yog yus rov saib yus yog tus zoo tsis muaj txhaum mas yus yuav tsum ceev faj : ntshai tsam yus tsis txawj nyiam Yes Xus zoo. Ntshai tsam yus tsis pom yus cov txhaum thiab yus tsis pom tias Yes Xus zam txhaum ntau rau yus.
Kwv tij, Yes Xus tseem hais lo lus no rau tus Fas Lis Xais :
“Tus poj niam no cov txhaum ntau, nws cov txhaum daws tas lawm ces nws nyiam Ntuj heev.”
Tus poj niam paub tias nws cov txhaum daws tas lawm.
Vim li cas nws thiaj paub tias nws cov txhaum daws tas lawm ? – Yog vim tias hnub no tsis yog thawj zaug uas nws pom Yes Xus. Tos nws tuaj hnub no yog vim nws tau xub hnov Yes Xus qhuab qhia zeej tsoom ntawm lub tshab puam hauv lub nroog. Nws hnov Yes Xus piav cov zaj txhais hais txog tus tub mus phob nws leej txiv cov nyiaj txiag nrog cov poj ntiav thiab rov qab los cuag leej txiv : leej txiv zoo siab zam txhaum rau tus tub, nws tua tus thav nyuj rog rog los ua ib roog qav txais nws leej tub. Tus poj niam tau hnov Yes Xus lub suab nkig tuav neeg lub nruab plawv. Tej zaud tus poj ntiav no tau hnov luag piav tias muaj ib hnub cov Fas Lis Xais xav muab ib tug poj niam tua vim lawv ntes nws tab tom deev luag tus txiv tab sis Yes Xus tau hais rau cov neeg liam ntawd tias : “Nej tus twg tsis tau ua txhaum ib zaug li mas kom nws txhawb thawj lub pob zeb tua tus poj niam ntawd.” Hos lawv tsis muaj leej twg txhawb tau thawj lub pob zeb.
Tus poj niam tuaj pe Yes Xus no tau hnov Yes Xus piav ntau yam txog Tswv Ntuj tos kom cov neeg txhaum tig los yuav lub siab dawb thiab huv. Ces tus poj niam nyob tsis tau ua nws lub neej txhaum ntxiv. Nws hnov tias Yes Xus rov los hauv lub nroog, Yes Xus noj mov hauv tus Fas Lis Xais tsev. Tus poj niam mloog nws lub siab nyiam Yes Xus cov lus ntshiab huv, nws ua ib siab chaws mus hauv lub tsev ua cov txiv neej thuam nws, nws quaj. Yes Xus tsis nug nws ib lo lus. Yes Xus to taub tias tus poj niam uas sawv daws thuam no nyem no nws muaj ib lub siab ntshiab dua lawv sawv daws hauv lub tsev ntawd. Leej Txiv Tswv Ntuj saib nws yog nws tus ntxhais rov muaj lub siab dawb.
Yes Xus thiaj hais tib lo lus no rau tus poj niam tig los yuav lub siab tshiab. Yes Xus hais tias : “Koj lub siab ntseeg cawm koj lawm.”
Yes Xus hais rau tus poj niam tias yog vim tus poj niam tau ntseeg Yes Xus cov lus hais tias Tswv Ntuj nyiam zam txhaum rau neeg ces tus poj niam ntsib kev cawm nws.
Kwv tij Hmoob sawv saws, tsis hais txiv neej los poj niam, peb yuav tsis txhob yoog raws li tus Fas Lis Xais uas nws xav tias nws yog tus zoo tsis muaj txhaum, ces nws nyiam Yes Xus tsis heev vim nws tsis muaj txhaum loj uas Yes Xus zam rau nws.
Kwv tij, tsis hais txiv neej los poj niam, peb yuav yoog raws li tus poj niam txhaum tus piv txwv : peb yuav lees ntawm Yes Xus tias peb yeej muaj txhaum ntau. Peb niaj hnub ua ntau yam txhaum. Peb thov kom Yes Xus pab peb dim ntawm peb cov txhaum. Peb txiav siab ua cov hauj lwm uas Yes Xus tos kom peb ua.
Peb yuav muaj lub siab kub lug tig los coj lub neej nyiam Yes Xus thiab nyiam luag tej. Peb tej hauj lwm nyiam luag tej vim Yes Xus tos kom peb nyiam lawv yuav yog zoo li cov tshuaj tsw qab ua peb hli rau saum Yes Xus ko taw, yuav yog peb txoj kev nyiam Yes Xus thiab ntxais nws ko taw.
Kwv tij, kom nej lub siab ntseeg mog, nej thiaj yuav nyob kaj siab lug.