Tus sau: TP. Nyiaj Pov (Tim 21 lub 8 hli 1998)
Kwv tij, Yes Xus hais tias : “Tus tswv qhuas nws tus tim xyoob siab nkhaus txawj ua neeg ntse.” Puas yov vim Yes Xus xav kom peb ua neeg siab nkhaus xws li tus tim xyoob ntawd ?
Tsis yog zoo li ntawd. Hos yog tias Yes Xus tsuas xav kom peb rau siab ua neeg ntse xws li tus tim xyoob. Lo lus loj nyob hauv zaj txhais yog lo lus xaus zaj. Yes Xus hais li no : “Ntiaj teb no tsoom tub lawv ntse dua txoj kev kaj tsoom tub.”
Yes Xus hais rau cov neeg tuaj sib sau mloog nws cov lus ntuas tias : “Nej yog txoj kev kaj tsoom tub tsoom ntxhais. Nej xav ua Leej Txiv Tswv Ntuj cov tub cov ntxhais. Mas nej yuav rau siab tas zog. Nej yuav siv zog mloog Tswv Ntuj lo lus, siv zog kawm Tswv Ntuj lo lus. Nej yuav siv zog xws li tus tim xyoob nrhiav neeg pab nws. Niaj hnub nej siv zog nrhiav nyiaj txiag. Nej yuav tsum siv zog nrhiav Tswv Ntuj txoj kev ncaj, xws li nej rau siab nrhiav nyiaj txiag.
Kwv tij Hmoob, nej yog ib co neeg nquag nrhiav noj nrhiav haus, nrhiav nyiaj txiag mas nej kuj yuav nco ntsoov ua neeg nquag nrhiav Tswv Ntuj txoj kev kaj, txoj kev ncaj.
Hais txog nyiaj txiag, Yes Xus tseem muaj ib lo lus zoo li no : Kuv hais rau nej tias : nyiaj txiag yog ib yam tsis ncaj : tab sis nej muab nyiaj txiag los sau tij zeem tsav : li ntawd hnub nyiaj txiag ploj tas lawm, lawv yuav txais nej los nyob hauv cov tsev tsam phooj nyob mus li.
Kwv tij, vim li cas Yes Xus hais tias nyiaj txiag yog ib yam tsis ncaj ?
Yog vim ntau zaus tib neeg muaj nyiaj txiag ntau ntau yog vim nws ua tej yam tsis tshua ncaj, los yog vim nws noj luag zog.
Yes Xus hais tias muab nej cov nyiaj txiag los sau tij zeem tsav. Yam li : “Nej muab nej cov nyiaj los pab luag tej ces nej yuav muaj neeg ua nej phooj ywg zoo npaum li cov kwv tij los neej tsa.”
Yes Xus hais tias : “Hnub uas nyiaj txiag ploj ntais lawm”, yam li yog hnub nej tso ntiaj teb no tseg mas nej yuav tsis nqa nej cov nyiaj mus. Nej cov nyiaj ploj ntais tas lawm. Ces hnub ntawd cov neeg uas nej muab nej cov nyiaj los pab lawv, lawv yuav txais nej nyob hauv cov tsev tsam phooj nyob mus li. Cov tsev tsam phooj nyob mus li ntawd yog cov tsev uas nyob saum ntuj lub Ceeb Tsheej.
Yes Xus zaj paj lug luv luv no lub ntsiab yog zoo li no : “Nej yuav tsum saib nyiaj txiag yog ib yam tsis ncaj, tsis tseeb pes tsawg. Nej muab nej cov nyiaj los pab luag tej. Ces hnub nej tso ntiaj teb no tseg, nej cov nyiaj ploj lawm, tab sis nej yuav muaj ib co phooj ywg txais nej los nrog lawv nyob hauv Tswv Ntuj lub Ceeb Tsheej. Thiab Tswv Nstuj kuj yuav txais nej nyob hauv nws lub Ceeb Tsheej.
Kwv tij, lo lus tim peb uas Yes Xus hais txog nyiaj txiag yog ib lo lus ntxhov me ntsis. Tab sis yog nej muab siab rau mloog mas nej kuj yuav to taub zoo thiab. Yog zoo li no :
“Tus neeg twg uas tsim nyog tso siab rau nws vim nws ua ncaj saib tej yam me, mas tsim nyog yuav tso siab rau nws los saib tej yam loj. Hos tus neeg twg, thaum nws saib ib yam me nws dag mas thaum nws saib tej yam loj nws kuj yuav dag. Thaum nej saib cov nyiaj txiag uas yog yam tsis tseeb, yog nej ua neeg tsis tsim nyog yuav tso siab rau nej, mas leej twg yuav muab lub cuab tam tseem ceeb rau nej saib ?
Thaum nej saib lub cuab tam uas nyob nej sab nraud, yog nej ua neeg tsis tsim nyog tso siab rau mas leej twg yuav muab nej lub cuab tam tseem ceeb rau nej saib ?”
Kwv tij, cov lus Yes Xus hais saum no yog ib co paj lug. Yuav txhais zoo li no :
Yam me uas peb saib yog nyiaj txiag, hos yam loj uas Tswv Ntuj xav pub rau peb saib mus li yog ntuj txoj sia.
Nyiaj txiag yog yam tsis tseeb tsis meej.
Lub cuab tam tseem ceeb yog Tswv Ntuj cov txiaj ntsha txiaj ntsim.
Lub cuab tam uas nyob yus sab nraud yog nyiaj txiag, vim nyiaj txiag yeej nyob yus sab nraud xwb, nws tsis nyob hauv yus lub cev, tsis nyob hauv yus tus plig, tsis nyob hauv yus txoj sia.
Li ntawd, nyob hauv zaj paj lug no Yes Xus qhia koj tias yog koj ua ncaj saib nyiaj txiag mas Tswv Ntuj kuj yuav muab nws tej txiaj ntsim rau koj. Yog koj tsis ua siab ncaj saib nyiaj txiag uas yog yam me, mas Tswv Ntuj kuj yuav tsis muab nws txiaj ntsim uas yog yam loj rau koj.
Kwv tij Hmoob nej ua ncaj saib tias nyiaj txiag tsuas muaj nqes xws li Yes Xus hais, ces Tswv Ntuj yuav pub nws tej txiaj ntsim tsim txiaj rau nej.
Yes Xus hais txog nyiaj txiag yog zoo li no : Tsis muaj ib tug tub txib yuav tsob hwb ob tug tswv tau : nws yeej yuav ntxub ib tug, nyiam lwm tus. Nws yeej yuav npuab ib tug, hos thuam ib tug. Nej ib txhij yuav tsob hwb Tswv Ntuj thiab nyiaj txiag mas tsis leej tau.”
Kwv tij, lo lus no tsis tas yuav piav ntau. Peb niaj hnub pom cov neeg saib nyiaj txiag loj dhau mas lawv tsis hwm ntuj thiab tsis hwm neeg, lawv tsuas tuag siab rau txoj kev nrhiav nyiaj txiag. Tab lawv txawm tuaj teev Ntuj ho lawv tsis muab lawv cov nyiaj los pab lub Koom Txoos, lawv tsis muab lawv cov nyiaj los pab cov neeg pluag thiab cov neeg txom nyem, lawv tseem tsis pab tsoom kwv tij neej tsa. Lawv qia dub, lawv xav xav noj luag zog dawb xwb. Muaj tiag zoo li Yes Xus hais : Peb yuav ib txhij tsob hwb Tswv Ntuj thiab nyiaj txiag tsis leej tau. Peb kav tsij xaiv txoj kev nyiam Tswv Ntuj heev dua nyiam nyiaj txiag mog !
Yes Xus hais txog nyiaj txiag yog zoo li no :
Cov Fas Lis Xais nyiam nyiaj txiag, lawv hnov cov lus ntawd lawv hnyos Yes Xus. Yes Xus hais rau lawv tias : “Nej yog ib co neeg hais nyob ntawm tsoom sid xub ntiag tias nej siab ncaj. Tab sis Tswv Ntuj paub nej siab. Yam twg ib zeej tsoom saib siab, mas tej ntawd dhuav Tswv Ntuj siab kawg.”
Kwv tij, peb yuav tsum mloog Yes Xus qhia peb. Peb yuav tsis txhob saib nyiaj txiag loj. Qhov peb yuav saib loj yog cov hauj lwm nyiam Tswv Ntuj, thiab yog cov hauj lwm hlub tib neeg.
Ntiaj teb neeg feem coob saib nyiaj txiag loj dhau. Qhov ntawd ua kom dhuav Tswv Ntuj siab.
Yes Xus hais txog nyiaj txiag yog zaj txhais piav txog tus nplua nuj thiab tus pluag Las Ntxas Los.
Nej mloog zaj txhais no :
Muaj ib tug neeg nplua nuj, nws hnav ntaub tsuj ntaug npuag; nws niaj hnub noj tej rooj qav zoo tas nrho. Hos muaj ib tug pluag hu ua Las Ntxas Los pwm ntawm tus nplua nuj lub rooj loog. Las Ntxas Los ib ce mob kiav txhab tas huv si. Nws ntshaw noj tej yam poob ntawm tus nplua nuj lub rooj mov los. Cov dev los pheej tuaj yaim nws tej kiav txhab thiab.
Nyob nyob, tus pluag tuag, Ntuj cov Tshiab nqa nws mus nyob hauv Has Nplas xub ntiag. Tus nplua nuj kuj tuag thiab. Luag muab nws pam thiab coj mus los.
Tus nplua nuj nyob hauv nruab yeeb raug txom nyem loj kawg. Nws tsa muag ntsia pom Has Nplas Has nyob deb, thiab pom Las Ntxas Los nyob hauv Has Nplas Has xub ntiag. Nws hu nrov tias : Yawg Has Nplas Has, thov koj hlub kuv mas ! Kuv txom nyem nyob hauv cov hluav taws no ; koj kom Las Ntxas Los muab nws ntiv tes tub dej tuaj chwv kuv tus nplaig kom txias :”
Tab sis Has Nplas Has teb tias : ‘Tub, koj yuav nco ntsoov tias tas koj sid koj muaj cuab yeej cuab tam ntau, hos Las Ntxas Los tau kev txom nyem. Nyem no Las Ntxas Los txais kev nplij nyob qhov no, hos koj raug kev txom nyem. Peb nyob ib sab, nej nyob ib sab, nyob nruab nrab muaj ib lub qhov ntuj tob kawg. Leej twg nyob sab no xav hla lawm sab tim nej tsis tau. Leej twg nyob sab tim nej xav hla tuaj sab no kuj tsis tau.’
Tus nplua nuj hais tias : ‘Yawg, kuv thov koj ! Koj xa Las Ntxas Los mus txog kuv txiv tsev. Kuv tseem muaj ib tug kwv. Nws yuav qhia lawv kom lawv txhob tuaj nyob hauv lub teb chaws txom nyem no.’
Has Nplas Has hais tias : ‘Lawv muaj Mais Xes thiab cov Yaj Saub.’
Tus nplua nuj hais tias : ‘Yawg Has Nplas Has, lawv yuav tsis mloog ! Tab sis yog muaj ib tug sawv hauv cov tub tuag rov mus cuag kuv cov kwv mas lawv yuav tig los yuav lub siab tshiab.’
Has Nplas Has hais rau tus nplua nuj tias :’Yog lawv tsis mloog Mais Xes thiab cov Yaj Saub, mas muaj ib tug sawv hauv cov tub tuag rov los mas lawv yeej yuav tsis ntseeg thiab.”
Kwv tij, nyob hauv zaj txhais no Yes Xus qhia peb meej kawg tias Tswv Ntuj ua zoo li cas rau cov neeg saib nyiaj txiag loj dhau. Thaum tiam neeg no tas lawm mas lawv yuav tsis mus nrog Tswv Ntuj nyob. Nyiaj txiag nyob puv hauv lawv lub tswv yim thiab puv hauv lawv lub siab. Nyob hauv lawv lub siab tsis tshuav ib qho chaw me me cia rau lawv nco txog Tswv Ntuj thiab cia rau hlub neeg. Ces lwm tiam Tswv Ntuj txais lawv tsis tau. Lawv twb xaiv txoj kev nyiam nyiaj txiag ib sim neej lawm.
Kwv tij sawv daws, nej paub tias nyiaj txiag yog ib yam uas peb yuav tsum muaj. Cov neeg ua liaj ua teb, tab yog lawv tsis muaj nyiaj ntau lawm mam nyob tau vim lawv tsis siv nyiaj los yuav tej yam noj. Lawv tsuas siv nyiaj los yuav ris tsho hnav, xa cov me nyuam mus kawm ntawv. Sawv daws yuav tsum muaj nyiaj thiaj ua tau lub neej. Cov neeg tsis ua liaj ua teb lawv haj yam yuav tsum muaj nyiaj txaus yuav txhiam xws noj.
Yes Xus paub qhov ntawd zoo. Yes Xus thiab nws cov thwj tim kuj tau siv nyiaj txiag. Yes Xus kuj tsis tau loj xov cem cov neeg nplua nuj. Zaum puav nws tau mus so hauv cov neeg muaj lawv tej tsev.
Tab sis cov neeg uas Yes Xus qhuab qhia lawv nruj yog cov neeg saib nyiaj txiag loj dhau, saib nyiaj txiag muaj tsim dua Tswv Ntuj, muaj nqi dua kev mloog Tswv Ntuj thiab hlub neeg. Lo lus kawg uas peb yuav khaws tseg yog lo lus ntawd.
Kwv tij Hmoob sawv daws, peb nco ntsoov lo lus no :
Tswv Ntuj lo lus muaj nqe dua nyiaj txiag. Peb xub muab siab rau nrhiav Tswv Ntuj lub Ceeb Tsheej. Ces Leej Txiv Tswv Ntuj yuav pub lwm yam ntxiv rau peb kom peb nyob tau.