Hnub chiv tim 7 lub 9 hli 2025 Vaj Qhia Les Os 14 ua tswv cuab coj lub Txoos Txi Ntuj tsa ob tus neeg ntseeg ua Leej Ntshiab; yog Fas Xas Tis (Pier Giorgio Frassati) thiab As Khus Tis (Carlo Acutis). Fas Xas Tis raug tus mob tuag tes tuag taw, ces nws tuag nyob hauv xyoo 1925 thaum muaj 25 xyoos. Ntawm As Khus Tis mas nws mob ntshav ces xyoo 2006 thaum nws muaj 15 xyoos nws tso ntiaj teb tseg.
Vaj Qhia tau muab Fas Xas Tis thiab As Khus Tis lub neej los piv rau cov zaj nyeem hauv phau ntawv Thoob Tsib (ThT 9: 13-18) thiab Lus Kas Ntawv Moo Zoo (LK 14: 25-33) tias tab txawm peb muaj txhua yam xws li tus vaj Xas Los Moos tsis kav yog peb tsis muaj Tswv Ntuj kev thoob tsib, mas peb txoj sia kawg yuav zaj ntshis.
Huab Tais Yes Xus hais tias tus xav raws nws qab, nws yuav muab tas nws txoj sia los nyiam Huab Tais Yes Xus, nws yuav tsis muab lwm yam los ua chaw khuam, tsis ua xyem xyav txog txhua yam tuaj raug nws. Huab Tais Yes Xus hu peb kom ua zoo li ntawd. Cov Leej Ntshiab lawv kuj ua zoo li ntawd, piv li Leej Ntshiab Fas Ntshis Kus nyob As Xis Xis thiab Leej Ntshiab Aus Nkus Tis Nus, thaum nkawd hnov Tswv Ntuj lub suab hu mas nkawd tau hloov nkawd lub neej mus raws Huab Tais Yes Xus.
Ntawm ob tus Leej Ntshiab tshiab hauv hnub no, tab txawm tias nkawd nyias yuav muaj txoj sia nyob nyias tiam, tab sis muaj ib yam nkawd muaj zoo tib yam; yog nkawd nyiam Huab Tais Yes Xus tas siab thiab zoo siab cev tas txhua yam rau Huab Tais Yes Xus. Fas Xas Tis thiab As Khus Tis nkawd cog lub noob nyiam Tswv Ntuj thiab nyiam luag tej rau hauv nkawd tus yeeb yam. Sawv daws puav leej ua tau zoo li nkawd, yam li nquag mus koom lub Txoos Txi Ntuj, muab siab rau thov Ntuj, thiab tshwj xeeb mas yog mus teev lub Cim Yug.
Leej Ntshiab Fas Xas Tis yog tus nyiam cov neeg pluag txom nyem, nws hais tias “Thaum kuv ntsia ib ncig cov neeg pluag thiab cov neeg mob, mas kuv pom ib yam ci ci nyob ncig lawv. Qhov ci ntawd, kuv tsis pom muaj nyob hauv peb.” Leej Ntshiab As Khus Tis tau hais tseg tias “Thaum koj tiv tshav, koj tawv nqaij yuav hloov ua tsos txho liab tseb. Thaum koj nyob ntawm lub Cim Yug, koj yuav txia ua Leej Ntshiab. Thaum koj rov ntsia koj, mas koj yuav muaj kev iab siab. Thaum koj ntsia Tswv Ntuj, koj yuav muaj kev zoo siab. Koj yuav hloov siab tshiab tau, thaum koj txiav siab los ntsia yam tuaj suam ntuj tuaj.”
Leej Ntshiab Fas Xas Tis thiab Leej Ntshiab As Khus Tis tab txawm tias thaum nkawd txoj sia yuav tu, nkawd tseem cev nkawd rau Tswv Ntuj. Leej Ntshiab Fas Xas Tis hais txog qhov no li no “Hnub kuv tso ntiaj teb tseg yog hnub zoo nkauj tshaj nyob hauv kuv txoj sia.” Leej Ntshiab As Khus Tis nyiam nyiam hais tias “Ntuj Ceeb Tsheej tos nrhw peb.”
Nkawd ob tug no lub neej zoo yaum peb sawv daws, tshwj xeeb cov tub ntxhais hluas, kom sawv daws ua neej taw ntsoov mus rau Ntuj Ceeb Tsheej, thiab muab sawv daws lub neej los ua ib txog num zoo txhij pub rau Tswv Ntuj.