Xyoo no yog cov Xib Hwm qhia Ntuj kev cai xyoo ntshiab, Vaj Qhia Les Os 14 cav txog cov nrhiav kev nrog cov neeg ntseeg taug kev mus ua ke, thiab txhib cov ntseeg sib pab kawm kom muaj kev ntseeg, kev tso siab, thiab kev nyiam.
Hnub Chiv tim 28 lub 9 hli 2025 no Vaj Qhia Les Os 14 ua tswv cuab coj lub Txoos Txi Ntuj ua hmoov xyoo ntshiab rau cov Xib Hwb qhia Ntuj kev cai nyob hauv Leej Ntshiab Pob Zeb lub tshav puam. Tom qab ntawd, Vaj Qhia tau tsa 39 tus tub kawm ua Xib Hwb.
Lub Moo Zoo hnub no Huab Tais Yes Xus piav zaj paj lug txog tus npluas nuj thiab Las Ntxas Las (LK 16: 19-31), mas Vaj Qhia muab piv rau cov Xib Hwb txoj hauj lwm qhia Ntuj kev cai tias lub Moo Zoo qhia peb kom paub tias Tswv Ntuj tsis yog ntsia ntiaj teb neeg lub neej xwb, Tswv Ntuj tseem ntsia txog neeg lub siab thiab. Las Ntxas Los nyob ntawm tus nplua nuj lub qhov rooj, tsis kav tus nplua nuj ntsia tsis pom Las Ntxas Los. Txawm tias tus nplua nuj tsis pom Las Ntxas Los, tab sis ntawm Tswv Ntuj mas nws ntsia pom. Tswv Ntuj nco txog Las Ntxas Los tab sis tsis nco txog tus nplua nuj vim tias thaum tseem ua neej nyob, tus nplua nuj tsis nco txog tus pluag nyob ib ncig nws, tus nplua nuj nco txog nws tus kheej xwb, nws tsis muaj lub siab nyiam luag tej li. Tus nplua nuj ua li no mas yog nws tau ua nws lub npe ploj lawm.
Yog tias tus nplua nuj lam ntsia pom Las Ntxas Los thiab hlub txog Las Ntxas Los, mas ntshai nws twb tau ua qhov zoo lawm; nws tsis yog ua qhov zoo rau Las Ntxas Los, tab sis yog nws tau ua qhov zoo rau nws. Yog tias tus nplua nuj yog ib tug ntseeg txog Tswv Ntuj, mas ntshai Tswv Ntuj twb pab cawm nws hauv cov hluav taws lawm; tab sis vim tus nplua nuj muab nws lub neej dai rau ntiaj teb lub cuab tam, mas ntiaj teb lub cuab tam tau lwg nws kev tso siab rau qhov zoo thiab txoj sia nyob mus li ntawm nws mus.
Niaj hnub no muaj cov neeg zoo li Las Ntxas Los nyob ib puag ncig peb, lawv ua xws li yog Huab Tais Yes Xus cov lus qhia pub rau peb.
Vaj Qhia hais txog lo lus ‘Xib Hwb qhia Ntuj kev cai’ (Catechist) tias txhawv ntawm lo lus Hes Las tias ‘Katechein’ txhais tias ‘ua kom nrov ncha’. Yog li thiaj hais tau tias Xib Hwb qhia Ntuj kev cai yog Lo Lus tus leej neeg vim tias tus Xib Hwb tshaj lo lus tawm ntawm nws lub neej los rau sawv daws paub. Thawj thawj tus Xib Hwb qhia Ntuj kev cai rau peb mas yog peb niam peb txiv. Kev tshaj txog txoj kev ntseeg yog xub tawm hauv peb tsev neeg tuaj. Thaum peb qhia Ntuj kev cai, tsis yog peb hais cov lus ntuas luag xwb, peb tseem muab Lo Lus coj mus tso rau hauv luag nruab siab thiab, kom Lo Lus tuaj kaus thiab tawg paj txi txiv hauv luag lub neej.
Vaj Qhia rov ntuas cov Xib Hwb kom nco tias lawv txoj hauj lwm qhia Ntuj kev cai lub plawv yog tshaj txog Huab Tais Yes Xus kev Hla.
Vaj Qhia tseem txhib cov Xib Hwb kom lawv ua ib tug piv txwv zoo, tshwj xeeb mas yog kev koom tes saib xyuas cov ntseeg hauv lub Koom Txoos; yam li mloog lub Koom Txoos thiab tsob hwb lub Koom Txoos, tshaib nqhis txoj kev ncaj thiab qhov tseeb hauv neeg nruab siab. Cov ntseeg yuav tsum muaj lub siab ntseeg puv npo, mas lawv thiaj li yuav pab tau lwm tus kom tshais ruam mus lawm tom ntej tau nyob hauv txoj kev ntseeg.
Vaj Qhia Les Os 14 muab Leej Ntshiab Aus Nkus lo lus hais rau Leej Tsob Hwb Des Os Nkas Tias (Deacon Deogratias) los ntuas sawv daws tias “Tshab txhais rau tus mloog koj kom to taub, ces nws yuav ntseeg; thaum nws ntseeg lawm, nws yuav tso siab; thaum nws tso siab lawm, nws yuav muaj lub siab nyiam.”