Lo lus ‘Koom Txoos’ ntxeev los ntawm lo lus Hes Las tias ‘ekklesia’ txhais tias ‘hu los sib txoos ua ke’. Yog li Yes Xus lub Koom Txoos yog dab tsi? Yes Xus lub Koom Txoos yog tas cov neeg Yes Xus hu lawv kom los sib txoos ua ib npoj.

Tus twg yog tus Yes Xus hu? Yog tus txais lub Cim Ntxuav thiab ntseeg txog Yes Xus, lawv saib Yes Xus yog lawv tus Huab Tais. Yes Xus hu lawv los ua nws lub cev tes taw raws li Leej Ntshiab Paj Lug hais tias ‘Leej Pleev yog lub taub hau nyob saum lub cev. Lub cev yog lub Koom Txoos’ (KLX 1: 18).

Yes Xus tsim nws lub Koom Txoos nyob ntiaj teb no, mas Yes Xus xub hu 12 leeg thwj tim nrog nws nyob, Yes Xus qhia tas puas tsav yam rau lawv, ces ze ze lub caij Yes Xus yuav txais kev tuag, mas nws tsa Pob Zeb ua tus saib lub Koom Txoos nyob ntiaj teb no. Yes Xus hais rau Peb Zeb tias “Koj yog Pob Zeb, kuv yuav txhim kuv lub Koom Txoos rau saum lub pob zeb no. Dab phem teb cov qhov rooj yuav tiv tsis taus lub pob zeb no. Kuv yuav muab Ntuj lub Ceeb Tsheej cov yawm sij rau koj”  (MT 16: 18-19).

Ntawv Cov Hauv Paus Xa Lus Cov Hauj Lwm lub ntsiab yog zoo li no: Hnub uas cov Yus Das ua lub hnub nyoog Tsib Caug, cov Hauv Paus Xa Lus nyob ua ke nyob Yes Lus Xas Les; Leej Ntuj Plig Ntshiab nqes los nyob hauv lawv. Tam sim ntawd, Pob Zeb pib qhia txog Yes Xus rau sawv daws mloog. Pob Zeb hais tias “Cov His Xas Lais, nej mloog cov lus no: Yes Xus Nas Xas Les tau ua ntau yam hwj huam yees ntxwv rau nej pom. Yog Tswv Ntuj pub nws ua tej ntawd kom nej ntseeg txog nws tau. Nej tau muab nws tua, nej tau vam txog cov neeg tsis hwm Ntuj los ntsia Yes Xus rau saum ntoo cuam. Tiam sis Tswv Ntuj twb tsa nws sawv rov los lawm. Peb sawv daws ua taus tim khawv. Nyem no Tswv Ntuj txhais tes xis tsa Yes Xus nyob siab. Nws tau txais Leej Ntuj Plig Ntshiab ntawm Leej Txiv, vim Leej Txiv yeej cog lus li ntawd. Yes Xus thiaj tso Leej Ntuj Plig nqe los rau saum sawv daws raws li nej pom thiab hnov. Tas tsoom Hais Xas Lais, nej yuav paub tseeb tias tus Yes Xus uas nej muab tua saum ntoo cuam, mas Tswv Ntuj tsa nws ua Huab Tais thiab ua Leej Pleev.”

Pob Zeb cov lus raug sawv daws siab. Lawv nug Pob Zeb tias lawv yuav ua dab tsi, ces Pob Zeb teb rau lawv tias “Nej yuav thov txhaum ntawm Ntuj. Thiab nej sawv daws yuav thov txais lub Cim Ntxuav nyob hauv Yes Xus Pleev lub npe, kom tau daws nej cov txhaum, ces nej yuav txais Leej Ntuj Plig Ntshiab lub txiaj ntsim.”

Hnub ntawd, muaj txog 3,000 leej tau ntseeg txog Yes Xus.

Cov Hauv Paus Xa Lus ua hwj huam yees ntxwv, niaj hnub muaj neeg ntseeg txog Yes Xus ntxiv. Cov Leej Choj pom cov pej xeem ntseeg cov Hauv Paus Xa Lus coob zuj zus, mas lawv xav txwv cov Hauv Paus Xa Lus kom lawv txhob tshaj Yes Xus lus ntxiv. Cov Hauv Paus Xa Lus teb tias lawv yuav nyob twj ywm tsis tau. Lawv hais tias “Peb yuav tsum xub mloog Tswv Ntuj lus dua mloog neeg lus.” 

Cov txwj laus Yus Das mus ntes Pob Zeb coj los kaw, ces ib tug Tshiab tuaj pab Pob Zeb kom dim ntawm tsev loj faj. Cov txwj laus muab cov Hauv Paus Xa Lus nplawm, mas cov Hauv Paus Xa Lus zoo siab vim Huab Tais Tswv Ntuj saib lawv tsim nyog raug txom nyem kom Yes Xus lub npe nto moo loj zuj zus. 

Cov neeg ntseeg niaj hnub tuaj mloog cov Hauv Paus Xa Lus, lawv ua ke teev Ntuj thiab ua cov kab ke ‘lov mov’ xws li Yes Xus qhia kom lawv ua. Lawv koom siab koom ntsws xws li ib pab kwv tij. Lawv muab lawv tej cuab yeej cuab tam muag, thiab coj los tso ua ke, lawv muab faib rau txhia leej raws li nws tej chaw siv. Niaj hnub sawv daws koom ib lub siab, sawv daws zoo siab noj luag ntxhwb ntxhi xws li cov neeg siab kaj, lawv cav txog Tswv Ntuj. 

Cov Hauv Paus Xa Lus qhia kev cai thiab faib mov rau sawv daws noj, lawv kov tsis yeej mas lawv thiaj tsa ib co Thoob Xwm pab lawv. Cov Hauv Paus Xa Lus hais tias “Tsis phim peb yuav tso Tswv Ntuj lo lus pov tseg, mus saib cov rooj noj mov. Kwv tij, nej yuav nrhiav 7 leej uas yog cov neeg thoob tsib, nto moo zoo, thiab muaj Leej Ntuj Plig Ntshiab puv hauv lawv. Peb yuav tsa lawv ua txoj hauj lwm ntawd. Ntawm peb, mas peb yuav muab siab npuab txoj kev teev Ntuj thiab tshaj Ntuj lus.”

Sawv daws pom zoo, ces lawv xaiv tau 7 leej los; yog Tes Fas Nos, Fis Lis Pos, Plos Kos Los, Nis Kas Nos, Tis Moos, Pas Mes Nas, thiab Nis Kos Las uas yog ib tug neeg ntseeg nyob As Nthias Kias (Stephen, Phillip, Prochorus, Nicanor, Timon, Parmenas, Nicolas). Thaum teev Ntuj tas mas cov Hauv Paus Xa Lus tsa tes rau saum 7 leej ntawd, tsa lawv ua ‘Tub Tsob Hwb’.

Tes Fas Nos yog ib tug neeg muaj txiaj ntsim thiab hwj chim, nws kub siab qhia kev cai, ces cov Yus Das muab nws tua. Tes Fas Nos thiaj yog thawj tus neeg tuag ua Yes Xus tim khawv. 

Cov Yus Das hiam cov neeg ntseeg txog Yes Xus nyob Yes Lus Xas Les, tus vaj Hes Los kuj muab tus Hauv Paus Xa Lus Yas Kos tua. Cov ntseeg txog Yes Xus thiaj li tso Yes Lus Xas Les tseg, lawv tsiv mus nyob Das Mas, nyob Xas Mas Lias, nyob tom lub pov txwv Kws Plos, thiab nyob As Nthias Kias. 

Pob Zeb ua lub Cim Ntxuav rau tus Xab Txheeb Los Mas hu ua ‘Kos Nes Lias’ nyob Yos Pes. Fis Lis Pos kuj ua lub Cim Ntxuav rau ib tug nom Es Thes Pias. 

Nyob As Nthias Kias, cov neeg teev dab pib hu cov neeg ntseeg txog Yes Xus ua ‘Cov Pleev’ (Christian).

Ib tug Yus Das hu ua Xauv hiam cov neeg ntseeg txog Yes Xus. Muaj ib hnub Yes Xus yees hu Xauv kom yuav ib lub siab tshiab, Xauv thiaj ntseeg txog Yes Xus thiab tas nws sim neej mas nws qhia kev cai rau cov Yus Das thiab rau cov coj pej kum kev cai.

Xyoo tim 49 cov Hauv Paus Xa Lus ua thawj lub Rooj Ncauj Lus nyob Yes Lus Xas Les, lawv txiav hais tias cov pej kum neeg xav ua Yes Xus kev cai mas lawv tsis coj Mais Xes kev cai xws li cov Yus Das kuj tau. 

Xauv thaum nws mus qhia kev cai nyob pej kum teb, nws yuav ib lub npe tshiab hu ua ‘Paj Lug’; nws mus tshaj lub Moo Zoo peb zaug rau cov pej kug teb. Cov Yus Das ntau leej ntxub Paj Lug vim nws qhia cov pej kum neeg, ces lawv muab Paj Lug ntes, lawv xav muab nws tua. Paj Lug thov cov nom tswv kom xa nws mus txiav txim nyob Los Mas. Paj Lug thiaj nyob ob peb xyoos hauv tsev loj faj nyob Los Mas.

Phau ntawv Cov Hauv Paus Xa Lus Cov Hauj Lwm hais zoo li ntawd. Tus sau phau ntawv no yog Lus Kas, nws paub Paj Lug zoo dua, ces nws piav txog Paj Lug tej hauj lwm ntau dua cov; tab sis cov Hauv Paus Xa Lus sawv daws puav leej tau tshaj lub Moo Zoo nyob ntau lub teb chaws.