-5-
1 Yes Xus pom neeg coob coob tuaj, nws nce mus saum lub roob. Nws zaum. Cov thwj tim txav los ze Yes Xus. 2 Ces Yes Xus tsa ncauj qhia lawv hais tias : 3 “Cov tau txoj hmoov zoo,(1) yog cov pluag hauv nruab siab,(2) vim Ntuj lub Ceeb Tsheej yog lawv li. 4 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug. 5 Cov tau txoj hmoov zoo, yog cov quaj ntsuag, vim Ntuj yuav nplij lawv. 6 Cov tau txoj hmoov zoo, yog cov tshaib thiab nqhis txoj kev ncaj,(3) vim Ntuj yuav daws lawv qhov nqhis. 7 Cov tau txoj hmoov zoo, yog cov hlub luag tej, vim Ntuj yuav hlub lawv. 8 Cov tau txoj hmoov zoo,(4) yog cov siab huv, vim lawv yuav pom Tswv Ntuj. 9 Cov tau txoj hmoov zoo, yog cov tsim kev thaj yeeb,(5) vim Ntuj yuav hu lawv ua Tswv Ntuj cov tub ki. 10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug. 11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo. 12 Nej zoo siab thiab nej hom khaj mog, vim nej yuav tau txais koob haum loj nyob saum ntuj. Cov yaj saub ua nej ntej, kuj raug luag hiam zoo li ntawd thiab.
13 Nej yog cov ntsev las lub ntiaj teb. Tab sis yog ntsev tsuag lawm, yuav muab dab tsi ua kom ntsev rov qab daw tuaj ? Ntsev tsuag tsis zoo ua dab tsi, tsuas kawg muab pov tseg nraum zoov rau neeg tsuj xwb.
14 Nej yog lub teeb ci rau lub ntiaj teb. Ib lub nroog txhim rau saum ib lub ncov roob, yuav muab zais tsis tau. 15 Hos, luag kuj tsis taws teeb coj mus zais rau hauv qab txee, luag muab txawb saum tus ncej teeb, lub teeb ci rau tas cov neeg nyob hauv tsev pom kev. 16 Li ntawd, nej lub teeb yuav tsum ci nyob ntawm zeej tsoom xub ntiag, kom lawv pom nej cov dej num zoo,(6) ces lawv yuav cav txog nej Txiv nyob saum ntuj.
17 Nej txhob xav tias kuv tuaj rhuav Txoj Cai(7) thiab cov Yaj Saub : kuv tsis tuaj rhuav, kuv tuaj qhia ntxiv kom thoob. 18 Vim tias qhov kuv hais rau nej muaj tseeb(8) : lub ntuj lub teb yuav dua, tab sis tsis muaj ib tug txwm ntawv, los ib lub cim ntawv me me hauv Txoj Cai yuav ploj. Tas ib puas tsav yam nyob hauv Txoj Cai yuav tsum tshwm sim tuaj tso. 19 Tus twg hla ib txog cai me, thiab nws qhia kom luag ua xws li nws, mas Ntuj yuav saib tus ntawd qis tshaj cov nyob hauv Ntuj lub Ceeb Tsheej. Hos tus ua raws Txoj Cai tas huv si, thiab nws qhia kom luag ua xws li nws, Ntuj yuav saib nws yog tus loj nyob hauv Ntuj lub Ceeb Tsheej.(9)
20 Kuv hais rau nej : yog nej tsis ua siab ncaj dua cov thoob xwm ntawv thiab cov Fas Lis Xais, mas nej yuav mus tsis tau hauv Ntuj lub Ceeb Tsheej.
21 Nej hnov cov lus qhia rau tej laus thaud tias : “Koj tsis txhob tua neeg. Tus twg tua neeg, nws yuav raug luag txiav txim rau nws. 22 Hos kuv, mas kuv hais rau nej : Leej twg npau taws(10) rau nws tus kwv, nws yuav raug txim ntawm tsev hais plaub. Yog nws hais rau nws tus kwv tias “Niag ruam !” mas nws yuav raug txim ntawm lub rooj txwj laus Xas Nes Nrees. Yog nws hais rau nws tus kwv tias : “Niag vwm”, mas nws yuav raug txim nyob hauv dab phem cov hluav taws.(11)
23 Thaum koj cev ib co txim rau saum lub thaj txi Ntuj, yog koj nco dheev tias koj tus kwv tau muaj lus rau koj lawm. 24 Mas koj cia li tso koj cov txim rau ntawm lub thaj txi Ntuj, koj mus nrog koj tus kwv hais kom haum tso, koj mam rov los cev koj cov txim.
25 Thaum koj nrog tus neeg ntxub koj tseem ua ke mus kev, koj kav tsij nrog nws hais kom haum, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj. 26 Kuv hais tseeb rau koj, koj yuav tawm tsis tau hauv tsev loj faj, mus txog thaum koj rho nyiaj qab nas txog npib kawg nkaus los them.
27 Nej hnov tej lus qhia tias : Koj yuav tsis txhob deev luag txij luag nkawm. 28 Hos kuv, mas kuv hais rau nej : Leej twg ntsia ib tug poj niam vim ntshaw zes nws, tus ntawd twb deev tus poj niam ntawd hauv nruab siab lawm.
29 Yog koj sab qhov muag xis coj koj mus ua txhaum, mas kav tsij muab sab qhov muag ntawd kaus pov tseg deb koj : txhiaj khoov cia ib sab qhov muag puas zoo dua tas koj lub cev poob hauv dab phem teb. 30 Yog koj sab tes xis coj koj mus ua txhaum, kav tsij muab txiav pov tseg deb koj : txhiaj khoov cia tu ib sab tes zoo dua tas koj lub cev poob hauv dab phem teb.
31 Tseem muaj tej lus qhia tias : Leej twg nrauj nws poj niam, yuav tsum muab ib daim ntawv nrauj rau tus poj niam. 32 Tab sis, kuv hais rau nej : Tus txiv neej twg nrauj nws poj niam, tus ntawd tso nws poj niam rau luag deev. Qhov no tsis yog hais txog tus poj niam uas mus ‘nrog lwm tus txiv neej ua dev ua npua.’
Hos leej twg yuav ib tug poj nrauj, mas tus ntawd yog ib tug deev luag txij luag nkawm.
33 Nej tseem hnov cov lus qhia rau tej laus thaud tias : Koj tsis txhob twv ntuj, koj yuav ua raws li cov lus koj tau cog rau Huab Tais. 34 Tab sis kuv hais rau nej, nej tsis txhob twv ntuj ib zaug li. Txhob muab lub ntuj los ua tim khawv, vim ntuj yog Tswv Ntuj lub theej kiab ; 35 txhob muab lub ntiaj teb los ua tim khawv, vim lub ntiaj teb yog Tswv Ntuj lub rooj tiag taw ; txhob muab Yes Lus Xas Les los ua tim khawv, vim yog tus Tuam Vaj lub Nroog. 36 Txhob muab koj lub taub hau los ua tim khawv, vim koj ua tsis tau kom ib txog plaub hau dawb tuaj los dub tuaj. 37 Nej yuav hais li no : Muaj, ces hais tias muaj ; tsis muaj, ces hais tias tsis muaj. Cov lus hais tshaj, yog tuaj ntawm tus Phem tuaj.
38 Nej hnov tej lus qhia tias : Qhov muag pauj qhov muag, kaus hniav pauj kaus hniav. 39 Hos kuv hais rau nej : nej tsis txhob nrog tus neeg phem sib cav. Yuav ua li no : leej twg ib ncuav pias rau koj sab plhu xis, tig sab plhu laug rau nws thiab. 40 Leej twg xav ua plaub rau koj kom tau koj lub tsho, mas koj muab koj lub tsho tshaj sab ntxiv rau nws thiab. 41 Leej twg thov koj xa nws mus ib ncuas kev, mas koj nrog nws mus ob ncuas. 42 Leej twg thov koj, mas koj pub rau nws. Leej twg xav txais nyiaj ntawm koj, mas koj txhob tig nraub qaum rau nws.
43 “Nej hnov tej lus qhia tias : Koj yuav nyiam tus nyob ze koj, koj yuav ntxub koj tus yeeb ncuab. 44 Tab sis, kuv hais rau nej tias : nej yuav nyiam nej cov yeeb ncuab, nej yuav thov Ntuj rau cov tsim txom nej ; 45 nej thiaj yog nej Txiv nyob saum ntuj cov tub ; vim nej Txiv ua kom lub hnub tuaj ziab cov neeg phem thiab cov neeg zoo, nws ua kom nag los rau cov siab ncaj thiab cov siab nkhaus.
46 Yog nej nyiam cov neeg nyiam nej, mas nej yuav tau koob haum dab tsi ? Tab yog cov sau se, lawv kuj txawj nyiam li ntawd. 47 Yog nej tshwj zias nej cov lus foom zoo rau nej cov kwv tij xwb, mas nej tau ua dab tsi zoo tshaj luag ? Tab yog cov neeg teev pej kum dab, los lawv kuj txawj ua li ntawd. 48 Hos nej, mas nej yuav ua neeg zoo tshaj, vim nej Txiv nyob saum ntuj yog tus zoo tshaj.
(1) ‘Txoj hmoov zoo’ (Blessed) yog ntxeev los ntawm lo lus Hes Las tias ‘Makrios’ txhais tias ‘kev zoo siab kawg nkaus’. Yog li nyob hauv zaj ‘cov tau txoj hmoov zoo’ thiaj hais tau tias yog Huab Tais Yes Xus qhia tias neeg yuav ua zoo li cas thiaj yuav muaj kev zoo siab kawg nkaus. Cov tau txoj hmoov zoo los yog cov muaj kev zoo siab kawg nkaus, tsis yog cov muaj nyiaj muaj txiaj ntau; tsis yog cov noj tsau haus qaug, tsis yog cov yuav nyob kaj siab luag ntxhi, kuj tsis yog cov muaj suab npe rau tas sawv daws tuaj hwm. Tab sis cov tau txoj hmoov zoo yog cov luag saib tias lawv ntxim hlub heev.
(2) Mas Tais siv lo lus tias ‘pluag yam tsis muaj peev xwm yuav rov pab yus tau, yuav vam txog lwm tus pab xwb’ (Ptochos) tsis yog ‘pluag li muaj tsis txaus’ (Penes). ‘Cov pluag hauv nruab siab’ yog cov neeg vam txog Tswv Ntuj ces nws ‘tso siab’ (hope) rau Tswv Ntuj, nws ‘nyiam ua tus neeg me’ tsis muab hlob; nws ‘tsis khav’ tias nws paub tas puas tsav yam, nws tsis khav tias nws zoo dua sawv daws, nws tsis khav tias nws muaj peev xwm ua txhia yam ywj nws siab, tsis quav ntsej rau luag, nws ‘tsis nrhiav’ lub koob meej, Ntuj pub dab tsi rau nws mas nws zoo siab yuav dab tsi.
(3) ‘Txoj kev ncaj’ (Rightousness) yog ua xis Tswv Ntuj siab, ua qhov yog.
(4) Cov neeg siab huv (The pure in heart) yog cov neeg xav ‘qhov ncaj’ (justic) hauv lawv nruab siab.
(5) ‘Tsim kev thaj yeeb (Peacmaker) yog ua kom sawv daws rov sib haum xeeb.
(6) Lo lus ‘zoo’ (Good) uas Mas Tais piav txog yog ntxeev los ntawm lo lus Hes Las tias ‘Kalos’ txhais tias ‘zoo thiab ntxim sawv daws siab’. Li ntawd, cov neeg ntseeg cov dej num thiaj yuav yog cov hauj lwm zoo thiab ntxim sawv daws siab ces cov hauj lwm ntawd yuav ‘rub’ tau cov neeg nyob ib ncig kom los cav txog Tswv Ntuj lub koob meej. Cov hauj lwm zoo tab sis tsis ua rau luag tej cav txog Tswv Ntuj mas cov hauj lwm ntawd tsis yog cov dej num zoo.
(7) ‘Txoj Cai’ (The Law) Huab Tais Yes Xus hais txog mas yog Mais Xes txoj cai thiab cov Yaj Saub lus qhia. Cov kws ntawv thiab cov Fas Lis Xais muab Huab Tais Ntuj 10 Lo Lus los twm ces lawv ntxiv ntau yam rau mas thiaj ua ib lub nras rau tsoom pej xeem. Piv li lo lus tias ‘koj yuav caiv Tswv Ntuj hnub’, mas lawv hais tias Tswv Ntuj hnub mas cov Yus Das yuav tsis txhob ua hauj lwm, yog li hauj lwm yog dab tsi; ces lawv tias hauj lwm yog txhua yam neeg ua. Yog li yam hauj lwm twg ua tau thiab yam twg ua tsis tau. Lawv ntxiv tej yam me me li no rau hauv lo lus. Cov kws ntawv thiab cov Fas Lis Xais ua li ntawd vim lawv xav nrhiav ua xis Tswv Ntuj siab, tab sis lawv tsis nco pom tias lub ntsiab hauv Huab Tais Ntuj 10 Lo Lus yog kom sawv daws ‘saib taus’ (Feverence) thiab paub ‘hwm’ (Respect). Koj yuav hwm Tswv Ntuj, hwm Tswv Ntuj lub npe, hwm Tswv Ntuj hnub, hwm koj niam koj txiv, hwm luag lwm tus, thiab koj yuav rov hwm koj.
(8) Huab Tais Yes Xus hais tias ‘Kuv hais rau nej muaj tseeb’ mas Mas Tais sau tias ‘As Mees, kuv hais tias’ (Amen, I tell you). Lo lus ‘Amen’ muaj 2 lub ntsiab yog; pom zoo thiab muaj li ntawd tiag, ces peb muab ntxeev ua lus Hmoob tias ‘Ua li’.
(9) Huab Tais Yes Xus hais tias tus twg xav ua tus loj nyob hauv Ntuj lub Ceeb Tsheej mas nws yuav ua 2 yam no; ua raws txoj cai thiab qhia txoj cai rau luag tej paub. Yog peb ua raws txoj cai tab sis tsis qhia lwm tus kom ua raws, mas kuj tsis txaus. Yog peb qhia luag tej paub txoj cai tab sis peb tsis ua raws txoj cai, mas peb yog tus neeg zoo sab nraud xws li cov Fas Lis Xais.
(10) Muaj 2 yam npau taws; yam li ‘npau taws luv’ (Thumos) thiab ‘npau taws ntev’ (Orge). Tus neeg npau taws luv mas nws siab npau tam sid tab sis nws lub siab nqig sai; tus npau taws ntev mas nws lub siab zoo li lub hluav ncaig maj mam kub tab sis kug qeeb. Tus npau taws Huab Tais Yes Xus hais txog hauv nqe no yog tus muaj lub siab npau taws thee.
(11) Tus cem luag tej tias ‘niag vwm’ thiab ‘niag ruam’ mas nws yuav raug txim hnyav dua tus npau taws rau luag vim tias thaum nws cem lawv mas yog nws tab tom saib tsis taus lawv thiab yog nws tab tom hais lus dag lus liam.