Paj Lug yug los ze ntawm xyoo tim 10 nyob Tas Xis. Tas Xis yog ib lub nroog loj nyob Tws Kis qab teb.
Thaum Paj Lug yav hluas nws hu ua Xauv. Nws niam thiab txiv kub siab coj Mais Xes Txoj Cai. Xauv tsev neeg nplua nuj hauj sim. Lawv xa tub Xauv mus kawm txuj nyob hauv cov tsev qhia cov txuj txheej siab nyob Tas Xis. Xauv thiaj paub lus Hes Las zoo, thiab paub cov txuj Hes Las zoo.
Thaum Xauv tseem hluas, nws txiv xa nws mus kawm Mais Xes Txoj Cai nyob Yes Lus Xas Les. Xauv thawj tug Xib Hwb yog Nkas Mas Lias. Xyoo 30 Xauv tuaj kawm nyob Yes Lus Xas Les. Yog thaum Yes Xus nyuam qhuav tuag tas, ces Xauv tuaj txog Yes Lus Xas Les. Xauv tsis tau pom Yes Xus.
Xauv ntseeg Mais Xes Txoj Cai ti txha. Thaum Xauv hnov hais tias ib cov neeg nyob Yes Lus Xas Les pib teev Yes Xus thiab saib Yes Xus yog Tswv Ntuj Leej Tub, mas Xauv xav tias cov neeg teev Yes Xus ua txhaum thuam Mais Xes txoj cai. Lawv thuam haiv His Xas Lais txoj kev ntseeg. Xauv pab cov nom Yus Das uas lawv muab cov neeg teev Yes Xus tua. Hnub uas cov nom Yus Das muab Tes Fas Nos tua, Xauv nrog lawv nyob ntawd.
Xauv hnov hais tias muaj ib cov neeg teev Yes Xus tsiv mus nyob hauv lub nroog Das Mas, nyob Xis Lias teb, mas Xauv thov kom cov nom Yus Das xa nws mus ntes cov neeg teev Yes Xus nyob Das Mas.
Thaum Xauv caij nees yuav luag txog Das Mas, ces ib sij huam, muaj ib qho pom kev ci dawb vog tuaj saum nntuj tuaj ncig nws. Xauv ntog rau pem teb. Xauv hnov ib lub suab hais rau nws tias “Xauv, vim li cas koj hiam kuv?” Xauv teb tias “Huab Tais, koj yog leej twg?” Lub suab ntawd hais tias “Kuv yog Yes Xus, tus uas koj hiam. Koj sawv, koj mus hauv lub nroog. Yuav muaj neeg qhia koj tias koj yuav ua dab tsi” (HL 22: 6-8).
Xauv mus hauv lub nroog. Nws txais lub Cim Ntxuav ntawm As Nas Nias. Xauv pib tshaj tias Yes Xus yog tus Huab Tais cawm ntiaj teb neeg. Txij thaum ntawd los Xauv thiaj hloov npe tshia hu tias Paj Lug.
Paj Lug hloov siab tshiab los ntseeg txog Yes Xus yog ib yam xwm tseem ceeb hauv lub Koom Txoos, vim Paj Lug yog tus ‘Hauv Paus Xa Lus rau cov pej kum neeg’, nws mob siab tshaj lub Moo Zoo rau cov Yus Das thiab pej kum neeg nyob ib ncig lub hiav txwv Mes Dis Tes Las Nes.
Nyob hauv tiam 8 cov ntseeg nyob Nkas Lias teb pib ua hmoov txog Paj Lug hloov siab tshiab, ces ob puas xyoo tom qab lub Koom Txoos nyob Los Mas mam li tso lus rau cov ntseeg ua hmoov, kom sawv daws ras tau tias tab txawm yav tas los yus ua neeg phem npaum cas, los qhov ntawd tsis yog chaw txiav tias yus yog neeg tsis muaj qab hau. Qhov tseem ceeb, mas saib yus puas hloov siab tshiab los ua dua tus neeg tshiab. Ntawm cov ntseeg txog Yes Xus, mas lawv tsum hloov siab tshiab tas mus li, lawv tsum yoog raws Huab Tais Yes Xus tus piv txwv xws li Leej Ntshiab Paj Lug.
