Hnub hwm Yes Xus tus Ntoo Cuam 2025 Vaj Qhia Les Os 14 hais tias Tswv Ntuj kev nyiam loj tshaj tau hloov kev tuag rab twj (instrument of death) los ua txoj kev pub txoj sia.
Hnub Chiv tas los ncaj rau hnub tim 14 lub 9 hli uas yog hnub lub Koom Txoos tshwj cia hwm Yes Xus tus Ntoo Cuam, yog li mas hnub no Vaj Qhia Les Os 14 tawm tuaj coj sawv daws hais zaj tus Tshiab xa xov, nws thiaj li nthuav tias hnub hwm Yes Xus tus Ntoo Cuam yog ib hnub tseem ceeb li cas rau peb tsoom ntseeg.
Ntawv Moo Zoo hauv hnub no hais txog thaum Nis Kos Des Mos tuaj nrhiav Huab Tais Yes Xus, ces Huab Tais Yes Xus qhia rau Nis Kos Des Mos txog Neeg Leej Tub yuav raug tsa siab xws li Mais Xes tsa tus nab tooj nyob teb chaws suab puam (Z 3: 13-17). Vaj Qhia hais tias tos Nis Kos Des Mos tuaj nrhiav Huab Tais Yes Xus, vim nws xav tau qhov pom kev los taw kev rau nws; Nis Kos Des Mos nrhiav Tswv Ntuj, nws thiaj li vam txog tus Xib Hwb Yes Xus nyob Nas Xas Les ua tus qia kev rau nws.
Nis Kos Des Mos yog ib tus Fas Lis Xais tab sis Huab Tais Yes Xus txais nws, Huab Tais Yes Xus mloog Nis Kos Des Mos, thiab txog qhov kawg Huab Tais Yes Xus qhia rau Nis Kos Des Mos tias Neeg Leej Tub yuav raug tsa siab, kom txhua tus neeg ntseeg txog Neeg Leej Tub tau txais txoj sia nyob mus li. Tab txawm tias Nis Kos Des Most sis to taub tam sid, tab sis ntev mus mas nws yuav to taub; yog thaum Nis Kos Des Mos pom Huab Tais Yes Xus raug ntsia nyob saum tus Ntoo Cuam, mas nws thiaj to taub tias Tswv Ntuj yeem yug los ua neeg thiab tuag saum Ntoo Cuam kom tau cawm ntiaj teb neeg.
Nyob hauv cov lus Huab Tais Yes Xus nrog Nis Kos Des Mos tham, nws hais txog ‘tus nab tooj’ (bronze serpent) uas Mais Xes puab thiab muab khuam cia rau saum tus ncej raws li Tswv Ntuj qhia, kom tau pab cawm cov His Xas Lais raug nab muaj taug tom. Vaj Qhia muab xav thiab nthuav zoo li no tias Tswv Ntuj tawm tuaj rau peb pom kom tau cawm peb, Tswv Ntuj muab Tswv Ntuj tus kheej los cev rau peb kom tau ua peb tus kwv luag (companion), ua peb tus kws kho mob (physician), thiab ua peb tus phooj ywg (friend). Tsis tas li ntawd xwb, Tswv Ntuj tseem muab nws lub cev los ua lub ncuav mov raug ntais pub rau peb noj nyob hauv lub Cim Yug thiab. Tseev kom muaj tuaj raws li tau hais los no, Tswv Ntuj muab rab tw tua neeg yam txaus ntshai thiab phem tshaj plaws los hloov ua lub cim qhia txog Tswv Ntuj kev nyiam peb. Rab twj ntawd yog tus ‘Ntoo Cuam’ (the Cross).
Txhua yam li hais los no, yog laj thawj hais tias ua cas hnub no peb thiaj li ‘hwm’ (exaltation) Yes Xus tus Ntoo Cuam. Vim Tswv Ntuj nyiam peb, nws thiaj li puag tus Ntoo Cuam kom tau cawm peb, nws muab kev tuag rab twj hloov ua txoj kev pub txoj sia, nws qhia peb tias tsis muaj dab tsi yuav cais peb tau ntawm Tswv Ntuj, thiab qhia peb kom paub tias Tswv Ntuj kev nyiam loj dua peb cov txhaum.
Vaj Qhia coj sawv daws koom suab thov niam Mab Liab pab thov Ntuj rau sawv daws, kom Tswv Ntuj kev nyiam cawm neeg no nrhau ncag ruaj thiab huam vam nyob hauv sawv daws, thiab kom sawv daws paub muab tus kheej cev rau luag lwm tus zoo li hnub no Tswv Ntuj muab nws cev pub rau peb nyob saum Ntoo Cuam.