Vaj Qhia Les Os 14 hais tias Huab Tais Yes Xus sawv rov los tsis yog kom tau tshaj txog nws lub koob meej, tsis yog kom tau pauj cov tau ua phem rau nws, tab sis Huab Tais Yes Xus sawv rov los kom sawv daws pom tias nws yog tus muaj lub siab hlub mos nyoos thiab zam rau sawv daws. Tsis tas li ntawd, Huab Tais Yes Xus xav qhia lawv tias kev nyiam thiab kev zam txim muaj zog loj dua neeg kev tsis ncaj, mas nws thiaj li muab nws cov qhov ntsia hlau ntawm tes thiab qhov hmuv ntawm phab tav rau cov thwj tim saib.
Hnub tim 1 lub 10 hli 2025 Vaj Qhia Les Os 14 rov tawm tuaj qhia Ntuj kev cai rau tsoom sid mloo nyob ntawm Leej Ntshiab Pob Zeb lub tshav puam. Hnub no Vaj Qhia nthuav txog cov txuj tob zais ntshis hais txog Huab Tais Yes Xus sawv rov los (the Resurrection of Christ), thiab lo lus Huab Tais Yes Xus hais rau cov thwj tim tias “Nej nyob kaj lug” (Peace be with you).
Vaj Qhia hais tias Huab Tais Yes Xus sawv rov los tsis yog nws xav sawv los piav yeev tias nws yog tus yeej txoj kev tuag, thiab tsis yog nws sawv los muab txim los yog pauj cov tau muab nws tua. Huab Tais Yes Xus sawv rov los, nws tseem ua tus neeg muaj lub siab hlub mos nyoos xws li qhov qub, ces Huab Tais Yes Xus thiaj li tawm tuaj rau cov thwj tim pom thiab muab cov qhov ntsia hlau rau lawv saib thiab hais rau lawv tias “Nej nyob kaj lug.”
Ua cas Huab Tais Yes Xus thiaj li muab nws cov qhov txhab rau cov thwj tim uas tso nws pov tseg saib? Ua cas Huab Tais Yes Xus tsis npog nws cov qhov txhab kom cov thwj tim tsis txhob pom?
Vim tias Huab Tais Yes Xus cov qhov txhab tsis yog cov cim cia tsawm peb, tab sis Huab Tais Yes Xus cov qhov txhab ua pov thawj tias Huab Tais Yes Xus kev nyiam muaj zog thiab loj dua peb kev ua tsis ncaj. Huab Tais Yes Xus cov qhov txhab zeem tseeb tias tab txawm nyob hauv lub caij nyoog peb ntog, los Tswv Ntuj tsis tso peb pov tseg.
Peb leej tib neeg, thaum peb lub cev raug mob los yog muaj qhov txhab, mas peb npog cia kom luag tej tsis txhob pom, tab sis Huab Tais Yes Xus tsis npog nws cov qhov txhab cia. Huab Tais Yes Xus thws nws cov qhov txhab rau cov thwj tim ntsia vim nws xav muab nws cov qhov txhab ntawd los qhia tias nws tuaj yeem (guarantee) zam rau lawv thiab tseem qhia tias kev sawv rov los tsis yuav so tau tej yam lawv tau ua dhau los tau, tab sis kev sawv rov los hloov tej yam dhau los ntawd kom ras ua kev tso siab rau kev khuv leej neeg (hope of mercy).
Cov thwj tim ntog rau hauv kev txhaum, lawv tsis tsim nyog yuav txais kev zam txim ntawm Huab Tais Yes Xus, tsis kav Huab Tais Yes Xus nyiam lawv, mas nws zam rau lawv. Thaum cov thwj tim tau txais kev zam txim lawm, lawv zoo siab hlo, lawv kuj yuav coj lawv kev zoo siab no mus pub rau cov neeg tau ua txhaum xws li lawv thiab. Yog vim qhov no, cov Hauv Paus Xa Lus thiab lub Koom Txoos lub luag hauj lwm thiaj pib hlav.
Li ntawd, lub Koom Txoos lub luag hauj lwm tshaj lub Moo Zoo thiaj tsis yog tswj sawv daws, tab sis yog coj kev zoo siab mus txog cov tau ua txhaum yuam kev thiab nws tu siab rau nws cov txhaum, nws pom tias nws tsis tsim nyog Tswv Ntuj yuav zam rau nws.
Vaj Qhia hais lo lus txhib sawv daws tias “Tus twg thiaj li yuav tshaj txog Leej Txiv Tswv Ntuj lub ntsej muag khuv leej neeg tau, kawg yog nej cov tau muaj swm txheej txog thiab tau txais kev zam txim xwb.”